Tusadila Nzambi mu “Ntima Mosi yo Moyo Mosi”

AYUDA ye minkwikila mia kiyuda balungalakene kumosi y’alongoki a Yesu Kristu. Muna lumbu kia Nkinzi a Pentikosti, e nzenza ana bayiza muna Yerusaleme, batuka mu zunga ya nsi a Roma kuna weste ye ku Pártia kuna este. Ndinga zaswaswana bavovanga. Kansi, ayingi mun’alongoki a Yesu ana babalonga esi Ngalili. Akaka mun’anzenza zazi bayuvula: “Nkia ngwa tuwa, konso muntu muna yandi ndinga ina kawutukila?”​—⁠Mav. 2:⁠8.

Petelo wa ntumwa watelama yo kubasonga ekuma ki’esivi dina bamona. Vana vau, ndonga yatambulwila e nsangu zambote.  Mazunda muna alongoki ampa bavubwa. (Mav. 2:​41) Kana una vo e nkutakani yawokela mu nzaki, yau awonso bakala ye ungudi. Luka wa nsoneki a Nkand’a Nzambi wavova vo: “Ebidi di’awana bakwikidi bakedi yo ntima mosi yo moyo mosi.”​—⁠Mav. 4:⁠32.

Mazunda mun’awana bavubwa muna lumbu kia Pentikosti ya mvu wa 33 Tandu Kieto engi bazola kala muna Yerusaleme mu kolo kiandá kimana balongoka diaka mayingi ma lukwikilu lwau lwampa. Kansi, ke bayiza y’ekani dia nanga ko. Muna kuma kiaki, vakala ye mfunu wakuba e nzimbu muna sadisa e mpangi zazi. Akwikidi akaka kuna mvevo a ntima bateka mavwa mau yo van’e nzimbu kw’antumwa kimana basadisa awana bakondelo. (Mav. 2:​42-​47) Ekwe mbandu ambote basonga ya zola yo vanina kuna mvevo!

Akristu akieleka besonganga zola ye fu kia vanina kuna mvevo. O unu, nkutakani y’Akristu isadilanga Yave ye “ntima mosi yo moyo mosi.” Akristu awonso besadilanga ntangw’au, ye ngolo zau ye mavwa mau mu samun’e nsangu zambote yo sia e Kintinu kia Nzambi va fulu kiantete.​—⁠Tala kunku kina ye ntu a diambu, “Vava Ntim’eto Ukutufilanga mu Vana Kina Tulenda.”

[Babu kina muna lukaya lwa 6 7]

VAVA NTIM’ETO UKUTUFILANGA MU VANA KINA TULENDA

Akete kaka muna Mbangi za Yave bena ye mavwa mayingi, kansi ulolo bemonanga e mpasi za kondwa e nzimbu. Kansi avo se vana lukau lwamvevo mu nungununa salu kia Kintinu, kana nkutu lwafioti, kufwete banza ko vo kaluna mfunu ko. Vava Yesu kamona nkento anson’ansukami watuba mbiya zole muna lundilwa kia nzimbu muna tempelo, kamveza ko. Kansi wavova vo: “Kieleka inusamunwini vo, o nkento ndioyu anson’ansukami otubidi ntuba iviokele awonso; kadi awowo muna nsavu au i batubìdi muna mwina tukau: vo i yandi, muna usukami wandi i katubìdi vumu kiandi kiawonso.” (Luka 21:​1-4) Kanele vo lukau lwandi lwakete lwakala, wavana kina kalenda.

Muna lenda vana lukau, konso muntu, konso nzo yovo konso nkutakani, divavanga vo twateka kubama. Vava Akristu a esi Korinto bazola sadisa ampangi zau bakala mu mpasi kuna Yuda, Paulu wa ntumwa wabavana luludiku lwamfunu luna bafwete landa. Wasoneka vo: ‘Vo i diambu dia ngonzekel’aveledi, wauna yakanikina mabundu ma Ngalatia, oyeno mpe i nuvanga una. Muna lumbu kiantete kia lumingu, konso muntu muna nzo andi, kafwete kilundila, muna mbaku andi, ke vakala ngonzekela vava ikwiza.’​—⁠1 Kor. 16:​1, 2.

Nze una muntu kelundilanga nzimbu mu kuma kia diambu dilenda bwa ku kinsalukisa, i una mpe konso Mbangi a Yave yovo konso nzo yovo nkutakani balenda lundanga konso kina balenda mu vana lukau mu nungununa nsambil’aludi. Muna kuma kiaki, e nkutakani zawonso konso ntangwa zivananga tukau mu nungununa salu kia Kintinu. Bevanganga wo muna teka kubama yo wizana una bafwete wo vangila. Akwa ntima miamvevo ana beyangalelanga nsangu zambote, bevananga mpe tukau twau mu yikama e salu kiaki kisalwanga mu nza yawonso. Tukau twatu twamvevo tuwokesanga luyangalalu ye kiese kiau mu zaya vo bevananga kina balenda.

Evula difilanga e nkand’a matondo mu zayisa vo lukau lwau lutambukidi.

Tukau twawonso tufilwanga kuna Vula, tuyangalelwanga yo sadilwa mu salu kia samun’e nsangu zambote za Kintinu kia Nzambi. Kasikil’owu, tukau twatu tusadilwanga mu kubika e nzo ye salu kia misionario muna nsi zayingi. Tusadilwanga mpe mu lunga-lunga yovo sumba sadilwa inietekanga e nkanda ye má yakaka. Tukau twatu tusadisanga mpe akengi a zunga ye a mvivu mu kingula nkutakani z’Akristu mu nza yawonso yo kubakasakesa muna mwanda. (Roma 1:​11, 12) Akaka mpe bena mu salu kia ntangwa ke ntangwa bebakanga filusadisu mu tukau twatu.

Akristu antete ana bayikama nsambil’aludi batambula nsambu, kadi bakembelela Yave muna mavwa mau. Ekwe nsambu bakala zau! Yeto mpe nsambu zayingi tuvwa avo tuyikama e salu kia Kintinu mu mpila yayi. Muna kuma kiaki, yambula twakala yo nyindu ambote vava ntim’eto ukutufilanga mu vana konso kina tulenda.

Konso muntu, konso nzo yovo konso nkutakani izolele vana lukau, lenda lo fila kun’evula dia Mbangi za Yave, Rua Talatona n.^o1​—⁠Luanda Sul, Caixa Postal 6877 Luanda-Angola