Ubasadisa Bavutuka mu Nzaki!
Ubasadisa Bavutuka mu Nzaki!
“Kwa nani tukwenda? O mambu ma moyo a mvu ya mvu, nge una mau.” —YOA. 6:68.
1. Adieyi kavova Petelo vava alongoki akaka bayambula landa Yesu?
LUMBU kimosi, alongoki ayingi a Yesu Kristu ana babembola elongi diandi, bayambula kunlanda. Wayuvula ntumwa zandi vo: “Oyeno mpe nuzolele katuk’e?” Petelo wavutula vo: “E Mfumu, kwa nani tukwenda? o mambu ma moyo a mvu ya mvu, nge una mau.” (Yoa. 6:51-69) Ke vakala fulu kiakaka ko balenda kwenda. E nsambila Kiyuda ke yakala ye “mambu ma moyo a mvu ya mvu” ko. O unu mpe mambu mama ke malendi wanuka mu Babele Anene ko, ina vo i kintwadi kia nsambila zawonso za luvunu ova nza. Kuna kw’awana bavengomoka mun’ekambi dia Nzambi, kansi bazolele yangidika Yave, ‘e ntangwa ifwene ya sikama’ yo vutuka mun’ekambi.—Roma 13:11.
2. Adieyi tufwete vanga mu kuma kia diambu difwete kaka fimpwa kw’akuluntu?
2 Yave wasonga e nzol’andi muna mameme mavila ma nzo a Isaele. (Tanga Yezekele 34:15, 16.) Diau adimosi mpe, akuluntu Akristu bena ye luzolo ye mbebe ya sadisa mameme mana mavengomoka mun’ekambi. Kele vo akuluntu basolele nteleki mu longoka yo muntu wayoya muna mwanda ovavanga lusadisu, adieyi kafwete vanga kele vo obakwidi vo muntu ndioyo sumu diampwena kasumuka? Vana fulu kia kumvana longi mu kuma kia sumu diandi, o nteleki kafwete kumvovesa vo kazayisa dio kw’akuluntu. Kele vo kavangidi wo ko, o nteleki yandi kibeni kafwete zayisa akuluntu.—Fuka 5:1; Ngal. 6:1.
3. Adieyi kavang’o muntu wakala ye 100 mameme vava kasolola dina diavila?
3 Elongi diviokele, diavovele kingana kia Yesu mu kuma kia muntu ona wakala ye 100 mameme. Vava dimosi diavila mun’ekambi, wasisa e 99 yo kwenda vava dina diavila. Ekwe kiese kamona vava kasolola dio! (Luka 15:4-7) Diau adimosi, tuyangalalanga kele vo ndiona wavengomoka ovutukidi mun’ekambi. Akuluntu ye akaka muna nkutakani besonganga zola muna kingula muntu ndioyo wayoya. Yau mpe bezolanga mona muntu ovutukidi mun’ekambi yo tambula lusadisu, lutaninu ye nsambu za Nzambi. (Nsi. 33:27; Nku. 91:14; Nga. 10:22) Adieyi balenda vanga mu sadisa muntu kavutuka muna nkutakani?
4. Adieyi tulenda bakula muna sono kia Ngalatia 6:2, 5?
4 Nanga balenda kasakesa o muntu mu vutuka muna nkutakani muna kunsonga vo Yave ozolanga mameme mandi, ovavanga vo twavanga dina tulenda. Ovavanga vo twalongokanga Nkand’a Nzambi, twendanga muna tukutakanu tw’Akristu yo samunang’e nsangu zambote za Kintinu. Diamfunu mu tanga Ngalatia 6:2, 5 yo songa vo Akristu balenda nataziana mazitu. Kansi, e ngwizani a muntu yo Yave, ‘zitu dia konso muntu’ yandi kibeni. Ke vena muntu ko olenda songa kwikizi kwa Nzambi vana fulu kieto.
Nga ‘Mambu ma Zingu’ Mabayoyesa?
5, 6. (a) Ekuma dinina diamfunu mu toma tamb’o matu vava mpangi ana bayoya muna mwanda bevovanga? (b) Aweyi lenda vanga muna sadisa awana bayoya mu zay’e mfwilu mia lembi kalanga ye nkangu a Nzambi?
5 Muna zaya una balenda sadisila mpangi ana bayoya muna mwanda, akuluntu ye ateleki azikuka bafwete toma tambang’o matu vava bevovanga dina dikubatokanesanga. Yindula vo u nkuluntu, wele kingula yakala yo nkento ana bayambula kwiza mu nkutakani mu kuma kia ‘mambu ma zingu’ yo yoya muna mwanda. (Luka 21:34) Nanga kondwa kwa nzimbu yovo mbebe ya esi nzo yabayoyesa muna mwanda. Dilenda kala vo luvevoko bevavanga, kansi olenda kubasonga vo, o kuyivaula ye nkutakani ke dilendi kubasadisa ko. (Tanga Ngana 18:1.) Kuna ndekwa, lenda kubayuvula: “Nga e kiese kieno kiawokela tuka nwayambulwila kwiza mu lukutakanu? E zingu kia nzo eno, nga kitomene? Nga nwakinu vwa e kiese kitukanga muna bundang’e vuvu kwa Yave?”—Nek. 8:10.
6 O fimpa e yuvu yayi, dilenda sadisa ana bayoya mu mona vo e kimwanda ye kiese kiau kiakuluka wau bayambula e nkutakani. (Mat. 5:3; Ayib. 10:24, 25) Tulenda mpe kubasadisa muna kubasonga vo e kiese kiau kiakuluka wau bayambula samun’e nsangu zambote. (Mat. 28:19, 20) Nkia diambu diangangu bafwete vanga awana bayoya mu mwanda?
7. Adieyi tufwete songa kw’awana bavengomoka mun’ekambi bafwete vanga?
7 Yesu wavova vo: ‘Nutoma kulunga-lunga kweno, e ntima mieno ke miazemboka yo mvunda yo wuyana yo lunzumbulu lua zingu . . . Nuyingila muna kolo yawonso, nwadodokelanga, nwavw’owu nukutukila muna mambu mawonso mekwiza vangama.’ (Luka 21:34-36) Awana bavengomoka mun’ekambi kansi bazolele vutukila e kiese kiau, balenda kasakeswa mu lomba mwand’avelela muna sambu ye lusadisu lwa Nzambi yo zingila ngwizani ye dina belombanga.—Luka 11:13.
Nga Vena ye Diambu Diabatesesa Esakuba?
8, 9. Nkia mambu lenda yika mu sadisa ndiona watá esakuba?
8 Wau vo tu wantu alembi lunga, valenda bwa diambu dilenda tesa akaka esakuba. Akaka betang’esakuba vava mpangi ona otoma zitiswanga mu nkutakani kekululanga e nsiku mia Nkand’a Nzambi. Kele vo i diau diayoyesa o muntu, nkuluntu okwenda kunkingula lenda kunsonga vo Yave ketesanga muntu esakuba ko. Ozevo, ekuma o muntu kafwete yambulwila vo mpangi ayakala yovo ankento kafwasa e ngwizani andi yo Nzambi ye nkangu andi? Vana fulu kia tá esakuba, kafwete zindalala sadila Nzambi yo kala ye vuvu vo “o Mfundisi a nza yawonso” omonanga mawonso mebwanga, osinga singika e diambu muna ntangw’andi. (Etu. 18:25; Kol. 3:23-25) Vava muntu ketang’esakuba yo bwa, ngolo kevanganga za telama.
9 Vava nkuluntu kesadisanga ana bayoya muna mwanda mu vutuka, lenda kubasonga vo ekolo kiviokang’e ntangwa, engi bemonanga vo dina diantesesa esakuba ke diambu diamfunu kwandi ko. Nanga e diambu diabafila mu yambula sadila Yave diavioka kwandi. Kele vo watá esakuba mu kuma kia tumbu kavewa, e sambu yo toma kuyifimpa kulenda kunsadisa mu bakula vo e tumbu kavewa kiamfwanukina kikilu, kafwete yambula ko vo elongi yovo tumbu kiantesa esakuba.—Nku. 119:165; Ayib. 12:5-13.
Nga mu Kuma kia Lembi Bakula Malongi?
10, 11. Nkia mambu lenda yika mu sadisa ona wayoya mu kuma kia lembi bakula maka malongi ma Nkand’a Nzambi?
10 Akaka nanga bavengomoka mun’ekambi dia Nzambi mu kuma kia lembi bakula maka malongi ma Nkand’a Nzambi. Aneyisaele ana bavevolwa mu ubundu kuna Engipito ‘bavilakana mavangu ma Nzambi’ muna wete diau yo ‘lembi vingila luludiku luandi.’ (Nku. 106:13) Dilenda sadisa mu sungamesa ona wayoya vo “ntaudi akwikizi yo lulungalalu” ovananga madia mambote ma mwanda. (Mat. 24:45) I mau mansadisa mu longoka yo zay’e ludi. Ozevo, ekuma kelembi vutukila yo kangalela diaka muna ludi?—2 Yoa. 4.
11 Vava nkuluntu kesiang’e ngolo za sadisa muntu wavengomoka mun’ekambi dia Nzambi, lenda yika e nona ki’alongoki ana bayambula landa Yesu mu kuma kia lembi bakula elongi dina bawa. (Yoa. 6:53, 66) Muna yambula landa Kristu ye alandi andi akwikizi, bavidisa kiese kiau muna mambu ma mwanda. Awana bayambula nkutakani y’Akristu, nga besololanga fulu kiakaka kina ye madia mambote ma mwanda? Ve kikilu!
Nga Esumu Diampwena Basumuka?
12, 13. Avo muntu wavengomoka mun’ekambi otambulwidi vo esumu diampwena kasumuka, aweyi kalenda sadisilwa?
12 Akaka beyambulanga samun’e nsangu zambote yo lembi kwenda mu tukutakanu mu kuma ki’esumu diampwena basumuka. Nanga bebanzanga vo balenda vaikiswa mu nkutakani, kele vo bazayisi esumu diau kw’akuluntu. Kansi, kele vo bayambwidi emvimba evangu diambi yo viluka kieleka o ntima, ke bevaikiswa ko muna nkutakani. (2 Kor. 7:10, 11) Betondwa diaka muna nkutakani, akuluntu bekubavana lusadisu lwa mwanda luna bavwidi o mfunu.
13 Avo u nteleki azikuka osolelo mu sadisa muntu wayoya muna mwanda, adieyi ofwete vanga kele vo uzayisi vo esumu diampwena kasumuka? Nze una uyikilu kala, vana fulu kia kuyikotesa mu diambu diadi, unkasakesa kenda dio zayisa kw’akuluntu. Avo kazolele wo vanga ko, songa vo nkumbu a Yave otokanenanga yo velela kwa nkutakani muna sadila edi diyikwanga muna Nkand’a Nzambi mu kuma kia diambu diadi. (Tanga Fuka 5:1.) Akuluntu bazeye una balenda sadisila muntu ozolele vutuka muna nkutakani yo vanga luzolo lwa Nzambi. Dilenda vava vo o muntu kavewa elongi kuna zola. (Ayib. 12:7-11) Avo muntu otambulwidi vo Nzambi kasumukina, yo yambula evangu diandi diambi yo viluka kieleka o ntima, akuluntu bekunsadisa, olenda mpe lolokwa kwa Yave.—Yes. 1:18; 55:7; Yak. 5:13-16.
Mvutuk’a Mwana Yatwas’e Kiese
14. Muna mvovo mia ngeye kibeni, yika kingana kia Yesu mu kuma kia mwan’a nkolami.
14 Vava osadisanga ememe diavengomoka, lenda sadila kingana kia Yesu kiasonama muna Luka 15:11-24. Muna kingana kiaki, o nleke wamanisa evwa diandi muna zingu kia umpumbulu. Kuna kwalanda, wayantika okendalala mu kuma kia mpila zingu kakala kiau. E nzala y’etima dia yitu, diamfila mu vutuka kuna nzo. Ekolo kakala kuna vala, o s’andi wamona, walundumuka, wambimbakana muna nsingu, yo kumfibulula yo mona kiese. O fimpa kingana kiaki dilenda sadisa ona wavengomoka mu vutuka mun’ekambi. Wau vo lufwasu lwa nza yayi lufinamene, kafwete vutuka mu nzaki muna nkutakani.
15. Adieyi difilanga akaka mu vengomoka e nkutakani?
15 Ayingi mun’awana bavengomoka mu nkutakani ka bena nze mwan’a nkolami ko. Kuna kw’akaka, malembe-malembe bevengomokanga, nze una e nzaza ivengomokenanga van’ekumu dia mbu. Akaka beyoyanga mu kuma kia mambu ma zingu yo bembola ngwizani au yo Yave. Akaka, esakuba betanga mu kuma kia mpangi muna nkutakani yovo mu kuma kia lembi bakula maka malongi ma Nkand’a Nzambi. Vena mpe y’awana bevengomokanga mu kuma kia kuyisia mun’evangu di’esumu. Kansi, oma mayikilu mun’elongi diadi, malenda kusadisa mu kasakesa awana bavengomoka mun’ekambi mu vutuka mu nzaki mu nkutakani.
“Ngiz’ambote, e Mwana!”
16-18. (a) Aweyi nkuluntu mosi kasadisila mpangi ona wayoya mu mvu miayingi? (b) Ekuma mpangi ndioyo kayoyela, aweyi kasadisilwa? Aweyi katambulwilwa kwa nkutakani?
16 Nkuluntu mosi wa Nkristu wavova vo: “Akuluntu a nkutakani eto ngolo besianga za kingula awana beyoyanga muna mwanda. Ngina ye nona kia mpangi mosi yalongoka yandi Nkand’a Nzambi yo kunsadisa mu zay’e ludi. Wayambula samun’e nsangu zambote mu mvu 25 yo kuyisia mu mpasi. Kansi, yansonga e nluta kalenda baka kele vo olemvokele nkanikinu mia Nkand’a Nzambi. I bosi, wayantika kwiza kun’Eseka dia Kintinu yo tambulwila longoka Nkand’a Nzambi, ediadi diansadisa mu vutuka mun’ekambi.”
17 Ekuma mpangi ndioyo kayoyela muna mwanda? Wavova vo: “Yayantik’o sia sungididi muna mambu ma nza ke mu mambu ma mwanda ko. Yayambula longoka, yo yambula salu kia sila umbangi ye kwenda muna tukutakanu. Edi yamona vo, yavauka emvimba e nkutakani y’Akristu. Kansi, o zola yasongwa kwa nkuluntu ndioyo kwansadisa mu vutuka mu nkutakani.” E mpasi za mpangi ndioyo zayantika kuluka vava katambulwila longoka Nkand’a Nzambi. Wavova vo: “Yabakula vo edi diakondwanga muna zingu kiame i zola ye luludiku lwa Yave ye nkubik’andi.”
18 Mpangi ndioyo, aweyi katambulwilwa kwa nkutakani? Wavova vo: “Yayimwena nze mwan’a nkolami a kingana kia Yesu Kristu. Mpangi mosi wankento una vo se nunu, ona yakala yandi muna nkutakani se vioka 30 ma mvu, wakinu sadila Yave ye kwikizi kiawonso, wampovesa vo, ‘Ngiz’ambote, e Mwana!’ Ediadi diayangidika kikilu o ntim’ame. Yayimwena vo i mwisi nkutakani. Nzolele vutula matondo mu kuma kia zola, kiese ye luzindalalu yasongwa kwa nkuluntu ye kwa nkutakani yawonso. Kieleka, zola kwau muna Yave ye mun’ampangi kwansadisa mu vutuka mun’ekambi.”
Tubakasakesa Babak’e Nzengo Owau!
19, 20. Aweyi lenda kasakesela ana bayoya mu vutuka mun’ekambi owau? Aweyi lenda kubasongela vo Nzambi kevavanga ko vo twavanga dina ke tulendi vanga ko?
19 Mu lumbu yambaninu tuzingilanga, ke kolo ko e nza yayi ifwaswa. Ikuma vo, tukasakesa ana bayoya bavutuka kwiza mu tukutakanu tw’Akristu. Ubawondelela bayantika wo vanga owau. Ubasungamesa vo Satana ozolele fwasa e ngwizani au yo Nzambi yo kubafila mu yindula vo, avo babembwele nsambil’aludi, e mpasi zau za zingu zilenda fokoka. Lenda kubasonga vo muna kala alandi akwikizi a Yesu kaka i balenda vwila luvuvamu lwakieleka.—Tanga Matai 11:28-30.
20 Sungamesa ana bayoya vo Nzambi ke vavanga ko twavanga dina ka tulendi vanga ko. Vava Maria wa nsang’a Lazaro katumbwa wau kakusa Yesu mazi mantalu vitila lufwa lwandi, Yesu wavova vo: “Nunyambula. . . . Ovangidi una kalenda.” (Maku 14:6-8) Yesu wasanisina nkento anson’ansukami ona wavana lukau lwakete muna tempelo. Yandi mpe wavanga dina kalenda. (Luka 21:1-4) Ayingi muna yeto tulenda kwenda mu tukutakanu tw’Akristu yo samun’e nsangu zambote za Kintinu. Muna lusadisu lwa Yave, ayingi muna awana bayoya muna mwanda balenda vanga diau adimosi.
21, 22. Nkia ziku lenda songa kw’awana bevutukanga kwa Yave?
21 Avo ona wavengomoka mun’ekambi nsoni kemonanga za monana diaka ye mpangi zandi, lenda kunsungamesa e kiese kiatwasa mwan’a nkolami vava kavutuka kuna nzo. Awana bevutukanga muna nkutakani kiese mpe betwasanga. Ubakasakesa babak’e nzengo owau za sia Nkadi Ampemba e kitantu yo finama Nzambi.—Yak. 4:7, 8.
22 Awana bevutuka kwa Yave, betoma tambulwa. (Man. 3:40) Ka lukatikisu ko vo mana bateka vanga muna salu kia Nzambi kiese kiayingi mabatwasila. Nsambu zayingi zivingilanga awana bevutuka mun’ekambi mu nzaki.
Nkia Mvutu Ovana?
• Aweyi lenda sadisila Nkristu ona watá esakuba yo yoya muna mwanda?
• Adieyi dilenda sadisa ona wavengomoka mun’ekambi dia Nzambi mu kuma kia lembi bakula maka malongi?
• Aweyi tulenda sadisila muntu una ye nsoni za vutuka muna nkutakani?
[Yuvu ya Longoka]
[Foto ina muna lukaya lwa 13]
Toma tambang’o matu vava mpangi wayoya kevovanga mana mekuntokanesanga
[Foto ina muna lukaya lwa 15]
O badika e kingana kia Yesu kia mwan’a nkolami dilenda fila muntu mu vutuka mun’ekambi