Nga u ‘Selo kia Nsambu za Nzambi’?

“Mun’owu wa nzolani a ungudi, nukalaziana yo walakazi; mun’owu wa zitu, nuyinduziana.”​—ROMA 12:10.

1. Nkia ziku tuvoveswanga muna Nkand’a Nzambi?

NKAND’A NZAMBI nkumbu miayingi ukutusungamesanga vo Yave okutusadisa, avo tutovokele yovo kala ye ntima miabudika. Kasikil’owu, tala e mvovo emi mia lufiaulwisu: “O Yave osikin’awonso bebwa. Yo vumbul’ana bavetekelo.” “Osasul’abudikw’a ntima, yo kanga ndwadi zau.” (Nku. 145:14; 147:⁠3) Vana ntandu, o S’eto ezulu ovovanga yandi kibeni vo: “Mono Yave wa Nzambi aku nsimba koko kwaku kwalunene, yo kuvovesa vo, kumoni wonga ko; ikusadisa.”​—Yes. 41:13.

2. O Yave aweyi kesadisilanga nkangu andi?

² O Yave, on’ozingilanga kun’ezulu aweyi ‘kesimbilanga koko kweto’? Aweyi kekutuvumbulwilanga vava tukalanga mu mpasi? Yave wa Nzambi mu mpila zayingi kesadisilanga. Kasikil’owu, o Nzambi ovananga o nkangu andi “ulolo wa nkuma” muna mwand’andi avelela. (2 Kor. 4:7; Yoa. 14:16, 17) Selo ya Nzambi bebakanga mpe nkuma muna Nkand’a Nzambi una vo i Diambu diavumunwinwa dia Nzambi. (Ayib. 4:12) Nga vena ye mpila yakaka ina Yave kekutukumikinanga? Tulenda solola mvutu muna nkand’antete wa Petelo.

“Nsambu za Nzambi za Mpila mu Mpila”

3. (a) Adieyi kavova Petelo wa ntumwa mu kuma kia mpasi? (b) Nkia diambu diyikwanga muna nkand’antete wasoneka Petelo?

³ Vava kasonekena mpangi zandi akuswa, Petelo wa ntumwa wabavovesa vo vena ye kuma yayingi bafwete mwena kiese, kadi vena ye nsendo ukubavingilanga. I bosi, wakudikila vo: “Owau muna kolo kiandwelo, ovo wau, numwesesenwa mpasi muna mpukumunwa za mpila mu mpila.” (1 Pet. 1:1-6) Tala mvovo “mpila mu mpila.” E mvovo wau usonganga vo e mpasi zayingi zina. Kansi, Petelo ke diau kaka ko kavova, mu lembi fila mpangi zandi mu yindula vo ke belenda zizidila ntota zazi ko. Petelo wasonga vo Akristu balenda kala ye vuvu vo Yave okubasadisa mu zizidila konso mpasi zilenda kubabwila. E vuvu kiaki kina muna nkand’antete kasoneka Petelo, muna kasongela vo e “nsukilu a lekwa yawonso ifinamene.”​—1 Pet. 4:7.

4. E mvovo mina muna 1 Petelo 4:10 aweyi minina mia lufiaulwisu kwa yeto?

⁴ Petelo wavova vo: “Konso muntu, muna una katambula lukau, nusadilanga lo vovo nwina, nze selo yambote ya nsambu za Nzambi za mpila mu mpila.” (1 Pet. 4:10) Petelo wavutukila diaka e mvovo “mpila mu mpila.” Petelo edi kazola vova vo ‘e mpasi mu mpila zayingi zikwizilanga, kansi e nsambu za Nzambi mpe mu mpila zayingi zikwizilanga.’ Ekuma e mvovo miami minina mia lufiaulwisu? E mvovo miami misonganga vo kana nkutu kia mpila mpasi zitubwididi, e nsambu za Nzambi zilenda kutusadisa mu zizidila zo. Ng’omwene muna mvovo mia Petelo e mpila ina e nsambu za Yave zilwakilanga kwa yeto? Muna mpangi zeto Akristu.

 ‘Nusadila Muntu yo Nkw’andi’

5. (a) Adieyi difwete vanga konso Nkristu? (b) Nkia yuvu iyuvulwanga?

⁵ Vava kasonekena Akristu awonso muna nkutakani, Petelo wavova vo: “Vana ntandu a mambu mawonso nusiamanen’o zolana.” I bosi, wakudikila vo: “Konso muntu, muna una katambula lukau, nusadilanga lo vovo nwina.” (1 Pet. 4:8, 10) Muna kuma kiaki, konso muntu muna nkutakani una ye mbebe ya kasakesa Akristu akw’andi. Yave lekwa kiantalu katuvana, tuna ye mbebe ya kayana kio y’akaka. Nkia lekwa kiaki? Petelo wayikila kio vo “lukau.” Nkia lukau lwalu? Aweyi ‘tusadilanga lo muna sadisa muntu yo nkw’andi’?

6. Nkia lukau bevewanga Akristu?

⁶ Muna Nkand’a Nzambi tutanganga vo: “Konso lukau luambote, yo konso lukau luaziku, kuna ntandu luatuka.” (Yak. 1:17) Elo, tukau twawonso kevananga o Yave kwa nkangu andi i sinsu kia nsambu zandi. Lumosi muna tukau kekutuvananga o Yave i mwand’avelela. Lukau lwalu lulenda kutusadisa mu yima fu yambote nze zola, walakazi yo lulembamu. E fu yayi ilenda kutufila mu zola mpangi zeto Akristu yo kubasadisa. E ngangu yo zayi wakieleka i lukau lwakaka tubakanga muna lusadisu lwa mwand’avelela. (1 Kor. 2:10-16; Ngal. 5:22, 23) Tufwete badikilanga ngolo zeto, ngangu ye umbangu tuna wau nze lukau luna tufwete sadila mu kembelela S’eto ezulu. Nzambi watuvana elau dia sadila ngangu ye fu yeto mu van’e nsambu zandi kwa mpangi zeto.

“Nusadilanga lo”​—⁠Mu Nkia Mpila?

7. (a) “Muna una,” e mvovo wau adieyi usonganga? (b) Nkia yuvu tufwete kiyuvula? Ekuma?

⁷ Mu kuma kia tukau tutambulanga, Petelo wavova diaka vo: ‘Konso muntu, muna una katambula lukau, nusadilanga lo.’ E mvovo “muna una” usonganga vo e tezo kia fu ye ngangu zeto kilenda swaswana y’akaka. Muna kuma kiaki, konso muntu okasakeswanga mu ‘sadila lo [i sia vo, konso lukau katambula] mu sadisa muntu yo nkw’andi.’ Vana ntandu, e mvovo ‘nusadilanga lo . . . nze selo yambote’ una se nkanikinu. Muna kuma kiaki, tufwete kiyuvula: ‘Nga isadilanga konso lukau yavewa mu kasakesa mpangi zame Akristu?’ (Tezanesa ye 1 Timoteo 5:9, 10.) ‘Nga isadilanga ngangu yavewa kwa Yave mu wete dia mono  kibeni, mu kala ye mavwa yovo etunda?’ (1 Kor. 4:7) Avo tusadila tukau twavewa muna ‘sadisa muntu yo nkw’andi,’ tulenda yangidika Yave.​—Nga. 19:17; tanga Ayibere 13:16.

8, 9. (a) Nkia mpila zakaka zina Akristu mu nza yawonso besadisilanga mpangi zau? (b) Ampangi z’akala ye z’akento muna nkutakani eno aweyi besadisilanga muntu yo nkw’andi?

⁸ Nkand’a Nzambi usonganga mpila zayingi zina Akristu a tandu kiantete basadisilanga muntu yo nkw’andi. (Tanga Roma 15:25, 26; 2 Timoteo 1:16-18.) Diau adimosi o unu, Akristu awonso akieleka belemvokelanga o nkanikinu wa sadila lukau bavewa muna wete dia mpangi zau. Badika ezaka mpila bevangilanga wo.

⁹ Mpangi zayingi bevaulanga ntangwa yayingi konso ngonde mu kubika malongi bevova muna nkutakani. Vava bevovanga mambu mamfunu basolwele mun’elongi dia yau kibeni dia Nkand’a Nzambi, awonso muna nkutakani bekasakeswanga mu zindalala. (1 Tim. 5:17) Mpangi zayingi zamakala ye zamakento batomene zayakana mu kuma kia kiese yo walakazi besonganga kwa mpangi zau Akristu. (Roma 12:15) Akaka bekingulanga awana bakendalala yo samba yau entwadi. (1 Tes. 5:14) Akaka besonekanga mvovo mia lukasakeso kw’awana bena mu mpasi. Vena mpe y’awana besadisanga mpangi bena ye mayela mu kwiza mu tukutakanu. Mbangi zayingi za Yave bekivananga mu sadisa mpangi zau mu tungulula nzo zibangulwanga kwa sumbula. O zola ye lusadisu lwa mpangi zazi z’akala ye z’akento i sinsu kia “nsambu za Nzambi za mpila mu mpila.”​—Tanga 1 Petelo 4:11.

Adieyi Disundidi o Mfunu?

10. (a) Paulu nkia mambu mole ma salu kia Nzambi kasianga sungididi? (b) Aweyi tulenda tanginina Paulu o unu?

¹⁰ Selo ya Nzambi ke bavewa kaka lukau ko luna bafwete sadila muna wete dia mpangi zau Akristu, kansi bavewa mpe nsangu zina bafwete zayisa kwa mfinangani zau. Paulu wa ntumwa wasianga sungididi muna mambu mole mama kafwete lungisa muna salu kia Yave. Wasonekena nkutakani muna Efeso mu kuma ‘ki’esansu dia nsambu za Nzambi’ dina kavewa muna wete diau. (Ef. 3:2) Wavova mpe vo: “Wauna twatondwa kwa Nzambi twasiwa kiyekwa kia nsangu zambote.” (1 Tes. 2:4) Nze Paulu, yeto mpe tusianga sungididi muna salu twavewa kia teleka Kintinu kia Nzambi. Vava tukuyivananga mu salu kia umbangi, tutangininanga mbandu a Paulu ona wakala nteleki avema a nsangu zambote. (Mav. 20:20, 21; 1 Kor. 11:1) Tuzeye wo vo, o samuna nsangu za Kintinu dilenda vuluza mioyo mia wantu. Kansi, tutangininanga mpe Paulu muna vavanga mpila tulenda ‘kawulwila lukau lwa mwanda’ kwa mpangi zeto Akristu.​—Tanga Roma 1:11, 12; 10:13-15.

11. Aweyi tufwete badikila e salu kia samuna nsangu zambote y’eki kia kasakesa mpangi zeto?

¹¹ Nkia salu kisundidi o mfunu muna salu yole yayi ya Kikristu? O yuvula kiuvu kiaki dina nze muntu oyuvwidi kiuvu mu kuma kia nuni: Muna mave mole kena mau, nki’eve disundidi mfunu? E mvutu zasazu. Muna toma timuka, kafwete sadila mave mau mole. Diau adimosi, muna lungisa mawonso mevavwanga kwa yeto Akristu, tufwete kuyivana muna salu yau yole ya Kikristu. Muna kuma kiaki, vana fulu kia badikila salu kieto kia samuna nsangu zambote za Kintinu ye kasakesa mpangi zeto nze salu yaswaswana, tubadikilanga yo nze una Petelo ye Paulu wa ntumwa babadikilanga yo, i sia vo salu ifwete salwa kumosi. Mu nkia mpila?

12. Aweyi twinina se sadilwa vana moko ma Yave?

¹² Nze ateleki, tusadilanga ngangu zeto za  longa mu kotesa nsangu za Kintinu muna ntima mia mfinangani zeto. Muna mpila yayi, tukubasadisanga bakituka alongoki a Kristu. Kansi, tusadilanga mpe ngangu ye tukau twakaka twavewa mu kasakesa mpangi zeto muna mvovo ye mavangu. Tukau twatu i sinsu kia nsambu za Nzambi. (Nga. 3:27; 12:25) Muna mpila yayi, tulenda kubasadisa mu kwamanana kala alongoki a Kristu. Muna salu kia samuna nsangu zambote ye kia ‘sadisa muntu yo nkw’andi,’ tukalanga y’elau dia kala se sadilwa vana moko ma Yave.​—Ngal. 6:10.

“Nukalaziana yo Walakazi”

13. Adieyi dilenda bwa avo tuyambwidi ‘sadisa muntu yo nkw’andi’?

¹³ Paulu wavovesa mpangi zandi Akristu vo: “Mun’owu wa nzolani a ungudi, nukalaziana yo walakazi; mun’owu wa zitu, nuyinduziana.” (Roma 12:10) Elo, o kala yo walakazi muna mpangi zeto dilenda kutufila mu kala se selo ya nsambu za Nzambi. Tuzeye wo vo kele vo Satana utufididi mu yambula ‘sadisa muntu yo nkw’andi,’ ofwasa ungudi weto. (Kol. 3:14) O kondwa ungudi kulenda kulula etima dieto muna salu kia umbangi. Satana ozeye wo vo, kele vo utuyoyese muna salu kimosi, ke tulenda diaka lungisa kiyekwa kieto ko.

14. Nani obakanga nluta vava ‘tusadisanga muntu yo nkw’andi’? Yika nona.

¹⁴ O ‘sadisa muntu yo nkw’andi’ ke ditwasanga kaka nluta kwa ndiona otambwidi nsambu za Nzambi ko, kansi kwa ndiona mpe kasadidi mu vana zo. (Nga. 11:25) Badika nona kia Ryan yo Roni wa nkaz’andi bekalanga kuna Illinois, Estados Unidos. Vava bawa vo e tembwa kiangolo kiayikilwa vo Katrina kiafwasa nzo zayingi za mpangi zau Akristu, e nzol’a ungudi yabafila mu yambula salu yau, bateka nzo au yo sumba ekalu dina bakitula se nzo yo vanga nkangalu wa 1.400 za kilometa yakuna Louisiana. I kuna bakala tezo kia mvu amvimba ekolo basadilanga ntangw’au, ngolo ye mavwa mau mu sadisa mpangi zau. Ryan una ye kimbuta kia mvu 29 wavova vo: “O kuyivana muna salu kia sadisa mpangi zame, diawokesa kikundi kiame yo Nzambi. Yamona una Yave kesadisilanga nkangu andi.” Ryan wakudikila vo: “O sala kumosi ye mpangi  bena vo ambuta, diandonga una ndenda sadisila ampangi. Yalongoka mpe vo vena ye mambu mayingi tulenda vanga yeto aleke muna nkubik’a Yave.” Roni una ye kimbuta kia mvu 25, wavova vo: “Kiese kiayingi ikalanga kiau muna sadisa akaka. Kisidi mona kiese kiaki ko muna zingu kiame. Nzeye wo vo muna mvu milanda, isinga tambula nluta mia salu kiaki kiamfunu.”

15. Nkia kuma tuvwidi tufwete kwamanena sala nze selo ya nsambu za Nzambi?

¹⁵ Kieleka, o lemvokela nkanikinu a Nzambi wa samuna nsangu zambote yo kasakesa mpangi zeto, nsambu ditwasanga kwa yeto awonso. Awana tusadisanga besikilanga muna salu kia Yave. Vo i yeto, tumonanga kiese kina kitukanga mu vana. (Mav. 20:35) E kiese kia mpangi muna nkutakani kiwokelanga ekolo konso muntu kesonganga zola kw’akaka. Vana ntandu, o zola yo walakazi tusonganga kwa muntu yo nkw’andi disonganga vo tu Akristu akieleka. Yesu wavova vo: “Muna wau i bezayil’o wantu awonso vo nu alongoki ame, ovo nzolani nuna yau.” (Yoa. 13:35) Yave wa S’eto anzodi okembelwanga vava luzolo lwandi lwa kasakesa awana bena mu mpasi lumonekanga muna nkangu andi ova ntoto. Muna kuma kiaki, tuvwidi kuma yayingi ya sadila lukau lweto mu ‘sadisa muntu yo nkw’andi nze selo yambote ya nsambu za Nzambi.’ Nga okwamanana wo vanga?​—Tanga Ayibere 6:10.

Nga Osungamenanga?

• O Yave aweyi kesadisilanga selo yandi?

• Nkia lukau twavewa?

• Aweyi tulenda sadisila mpangi zeto Akristu?

• Adieyi dikutufila mu kwamanana sadila lukau lweto mu ‘sadisa muntu yo nkw’andi’?

[Yuvu ya Longoka]

[Mafoto zina muna lukaya lwa 13]

Nga osadilanga “lukau” lwaku mu sadisa akaka, ovo mu kiyangidika?

[Mafoto zina muna lukaya lwa 15]

Tusamunanga nsangu zambote kw’akaka yo sadisa mpangi zeto Akristu

[Foto ina muna lukaya lwa 16]

Awana bekuyivananga kuna mvevo mu sadisa aya bebwilwanga sumbula, bafwana sanisinwa