Kalasi kia 125 kia Sikola ya Ngiladi Misionario Bakasakeswa mu Kala nze Yeremiya

“KALASI kiaki kia Ngiladi nsasa yamfunu kikilu kina.” Mpangi Geoffrey Jackson wa mwisi Buka kia Selo Yambuta, wavova mvovo miami kwa 6.156 ma wantu bakutakana muna lumbu kiafokoka kalasi kia 125 kia Sikola ya Ngiladi, kina kia 13 kia Setemba, 2008. Kumosi ye alongoki 56 bakala mu kalasi kiaki, e Sikola ya Ngiladi tezo kia 8.000 ma misionario yifididi kala ‘yakuna nsuk’a nza.’​—⁠Mav. 1:⁠8.

Mpangi Jackson, wa mfidi a lukutakanu lwalu, wayuvula vo: “Nki kilenda fila wantu mu kwikila muna nsangu zeno?” I bosi, wayika mambu mayá malenda kwikidisa wantu: Kala yo nyindu asikila, songa mbandu ambote, bongela malongi muna Nkand’a Nzambi yo sia sungididi kia zayisa nkumbu a Yave kw’akaka.

David Schafer, wa mwisi Buka kia Malongi, wavova elongi diakala yo ntu a diambu vo: “Nga Ozaya mawonso?” Wavovesa alongoki a Sikola ya Ngiladi vo balenda “zaya mawonso” mavwilu mfunu muna salu kia misionario kele vo bakwamanene vava luludiku lwa Yave yo sakalela “ntaudi akwikizi yo lulungalalu.”​—⁠Nga. 28:5; Mat. 24:⁠45.

I bosi, mpangi John E. Barr, wa mwisi Buka kia Selo Yambuta wavova elongi diakala yo ntu a diambu vo: “Kuyambudi Konso Lekwa ko Kiavambula Muna Zola kwa Nzambi.” Elongi dia mpangi Barr diasadisa alongoki ye yitu yau mu lembi tokana kwayingi mu kuma kia mambu mana misionario zampa bewanana mau muna nsi befilwa. Mpangi Barr wavova vo: “Kala muna zola kwa Nzambi i fulu kisundidi o wete, kia luvuvamu tulenda kala muna zingu kieto.” Ka vena lekwa ko kilenda vambula misionario muna zola kwa Nzambi, nanga vo yau kibeni bayivambula yo Nzambi.

Mpangi Sam Roberson, osalanga mu Departamento ya Sikola za Kimfumu, wakasakesa nkangu mu vwata “mvwatu usundidi o wete.” Muna longoka dina kavanga o Yesu yo tanginina dio, alongoki balenda ‘vwata Mfumu Yesu Kristu.’ (Roma 13:​14) I bosi, mpangi William Samuelson, wa mfidi a Departamento ya Sikola za Kimfumu, wavova dina divananga zitu kwa muntu. Ke una umonwanga ko kwa wantu i uvananga zitu kwa muntu, kansi una umonwanga kwa Nzambi.

Mpangi Michael Burnett, mosi muna alongi, wayuvula alongoki bavova dina bawanana diau muna salu kia umbangi. Kana una vo alongoki bafilwa mu kwenda sila umbangi mu zunga itoma sadilwanga, ekolo bakala kuna Sikola ya Ngiladi kuna Patterson, Nova York, basolola wantu akwa luzolo lwambote. Gerald Grizzle, otalanga mambu ma tukutakanu twampwena, wamokena ye mpangi tatu bakota Sikola ya Afidi a Mavula. Mvovo miau miakubika alongoki mu mana mekubabwila muna nsi zina befilwa.

 Mpangi David Splane wa mwisi Buka kia Selo Yambuta, wakota sikola ya 42 ya Sikola ya Ngiladi, wafila elongi diakala yo ntu a diambu vo: “Kala nze Yeremiya.” Kana una vo Yeremiya wonga kakala wau mu kuma kia salu kavewa, Yave wankumika. (Yer. 1:​7, 8) Nzambi diau adimosi kevanga kwa misionario zampa. Mpangi Splane wavova vo: “Kele vo diambu una diau yo muntu, vwanda yo soneka fu kumi yambote omonanga muna muntu ndioyo. Avo kulendele soneka fu kumi ko, ediadi disongele vo kutomene kunzaya ko.”

Yeremiya wayivana kuna mvevo. Vava kayoyanga, wasambanga, Yave mpe wansadisa. (Yer. 20:​11) Mpangi Splane wavova vo: “Avo mwene vo yoyele, samba kwa Yave. Osivika e mpila kekusadisila o Yave.”

Kuna mfoko a lukutakanu, o mfidi wasungamesa nkangu vo alongoki mpila zayingi balongokele balenda tomesena e salu kiau kia umbangi. Ekolo misionario besila umbangi kuna nsi zina befilwa, o wantu bekwikila muna nsangu zau, kele vo basongele vo bafwana bundw’e vuvu.​—⁠Yes. 43:​8-12.

[Mvovo mia Fwaniswa mina muna lukaya lwa 22]

OMA M’ALONGOKI

[Babu kina muna lukaya lwa 22]

Lutangu lwa nsi zina batuka: 6

Lutangu lwa nsi zina bafilwa: 21

Lutangu lwa alongoki: 56

Tezo kia mvu: 32,9

Tezo kia mvu bena mu ludi: 17,4

Tezo kia mvu bena mu salu kia ntangwa ke ntangwa: 13

[Foto ina muna lukaya lwa 23]

Kalasi kia 125 kia Sikola ya Ngiladi

Nlonga bakiatamene miyantikidi ku ntwala yakuna nima, e nkumbu zau zasonama tuka kuna koko kwalumonso yaku koko kwalunene muna konso nlonga.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.