Nga Fwete Siandama Kaka Muna Zolela Yaku?
Nga Fwete Siandama Kaka Muna Zolela Yaku?
YINGYANA-NGYANA yole isakananga. Omosi okutumwini lekwa kiandi kia nsaka vana moko ma nkw’andi yo vova vo: “Lekwa kiame!” O wantu alembi lunga beyantikanga songa e fu ki’eloko tuka muna kinsedia. (Etu. 8:21; Roma 3:23) Vana ntandu, e nza itoma nungununanga e fu kiaki ki’eloko. Muna venga fu kiaki, tufwete sianga ngolo za sunda ngindu z’eloko. Avo ke wau ko, tulenda tesesa akaka esakuba yo fwasa ngwizani eto yo Yave.—Roma 7:21-23.
Muna kutusadisa mu zaya una mavangu meto malenda vanga kw’akaka, Paulu wa ntumwa wasoneka vo: “O mambu mawonso mansongi; kansi mawonso ke mavwilu mfunu ko. Mawonso mansongi; kansi mawonso ke mevangamesa ko.” Paulu wakudikila vo: “Nukondwa nkankalakani.” (1 Kor. 10:23, 32) Muna mambu mena vo konso muntu kasola dina kazolele, diangangu dia kiyuvula: ‘Nga iyambulanga vanga eyaka zolela yame kele vo mbwene vo luvuvamu lwa nkutakani disia mu vonza? Nga wakubama ikalanga mu landa nkanikinu mia Nkand’a Nzambi, kana nkutu vava dikalanga diampasi mu vanga wo?’
Muna Sola Salu
Ayingi bebadikilanga o sola salu vo diambu dia muntu yandi kibeni, ka dilendi vanga diambu ko kw’akaka. Kansi, badika e nona kia nkiti mosi kuna mbanza mosi ya América do Sul. Watoma zayakana kwa wantu vo nzodi a tá mpanza ye nduvu a malavu. Kansi, vava kayantika longoka Nkand’a Nzambi ye Mbangi 2 Kor. 7:1) Vava kasonga etima diandi dia samun’e nsangu zambote kumosi ye nkutakani, kuna ndekwa zawonso nkuluntu mosi wankasakesa kateka fimpa e salu kasalanga. Tuka kolo, muntu ndioyo yandi watoma tekelanga wantu nlongo mimosi miyikilwanga vo aguardente. E nlongo miami salu yayingi misadilwanga. Kansi, kuna zunga kiandi wantu besanganga mio ye malavu manzenzo mana benwanga y’ekani dia kolwa.
za Yave, wanungunuka muna mwanda yo soba mpil’a zingu kiandi. (O muntu ndioyo wabakula vo, avo yantikidi kwenda muna salu kia samun’e nsangu zambote, ekolo kesalanga salu kia teka nlongo miami, dilenda vezesa nkutakani yo sia ngwizani andi yo Nzambi mu vonza. Kana una vo wana ayingi kakala yau, wayambula teka nlongo miami. Owau se lekwa yakaka ketekanga mu lenda sansa esi nzo andi. Eyakala diadi yo nkaz’andi kumosi ye nzole muna wan’au atanu, bavubwa. Besamunang’e nsangu zambote kuna unkabu wawonso.
Vava Tusolanga Akundi
O vanga kikundi ye mindembi kwikila, nga diambu dia muntu yandi kibeni, ovo vena ye nkanikinu mia Nkand’a Nzambi mifwete landwa? Mpangi mosi ankento wazola kwenda ku nkinzi ye toko dimosi una vo ke Nkristu akieleka ko. Kana una vo wasongwa e vonza ki’ekani diandi, wabadikila dio se diambu dia yandi kibeni yo kwenda kuna nkinzi. Ke kolo ko vava kalwaka, bamvana malavu masangwa ye lekwa ivananga tulu. Vava kasikama kutulu twa ola zayingi, wabakula vo ndiona kabadikilanga vo nkundi, wanleka mu ngolo.—Tezanesa ye Etuku 34:2.
Kana una vo kikundi ye mindembi kwikila ke ntangwa zawonso ko kitwasanga vonza nze kiaki, o Nkand’a Nzambi ulukisanga vo: “On’okangala y’akwa ngangu, okal’e ngangu: O makangu ma mazowa, mpasi kemona.” (Nga. 13:20) Ke diambu dia fidila mpaka ko. O sola yikundi yambi vonza kutwasanga. Muna Ngana 22:3 tutanganga vo: “O nlungaladi omwene mbi, oswekamene; atunga, lutakana, badilu o nkanu.” Akundi eto balenda kututwasila nluta yovo mfwilu, tomesa yovo fwasa ngwizani eto yo Nzambi.—1 Kor. 15:33; Yak. 4:4.
Mpila ya Vwata ye Kikubika
E mvwatu soba misobanga. Kansi, e nkanikinu mia Nkand’a Nzambi mu kuma kia vwata ye kikubika ke misobanga ko. Paulu wavovesa akento Akristu vo “bayiviengesela muna mvwatu miatoma, yo vumi yo lulungalalu.” E nkanikinu wau ufwete mpe sadilwa kw’akala. (1 Tim. 2:9) Paulu kayika mpila mvwatu ko mina Akristu bafwete vwata. Kavova mpe ko vo Akristu awonso bafwete vwatilanga mpila mosi. Kansi adieyi tuvova mu kuma kia vumi yovo lusakalalu kayika Paulu? Disionario dimosi disasilanga vumi wau vo “kondwa umvwania . . . velela muna mvwatu, ye mu mvovo ye muna fu.”
Diamfunu twakiyuvula: ‘Nga ndenda vova vo i nkwa lusakalalu kele vo isiandamanga kaka mu mpil’ame ya vwata ina ifilanga wantu bansia sungididi kiayingi? Nga mpil’ame ya vwata ifilanga wantu mu katikisa kiwuntu kiame ye mpila zingu kiame?’ Tulenda venga ‘vana sakuba muna konso uma’ muna diambu dia vwata yo lembi ‘talanga konso muntu yo mandi mambu, kansi konso muntu oma m’akw’andi kaka.’—2 Kor. 6:3; Fili. 2:4.
Muna Mambu ma Kinkita
Vava e mfundu miakota muna nkutakani ya Korinto, Paulu wasoneka vo: “Adieyi nulembele bongela ngyelele? Adieyi nulembele tekelelw’e ngangu?” Paulu waludika Akristu mu tambulwila bak’e mfwilu vana fulu kia nata mpangi kuna mbazi a nkanu. (1 Kor. 6:1-7) Mpangi mosi kuna Estados Unidos walemvokela elongi diadi. Ntatani bakala zau yo mfumu andi a salu wa Nkristu, mu kuma kia mfutu una kafwete baka. Muna landa nkanikinu mia Nkand’a Nzambi, mpangi zole zazi bateza singika diambu diadi nkumbu miayingi, kansi ke babaka nzengo ko. I bosi, bazayisa e diambu diadi ‘kwa nkutakani’ i sia vo, basonga dio kw’akuluntu Akristu.—Mat. 18:15-17.
Diankenda vo, e diambu diadi ke diabakamena nzengo ko. Una kateka samba, e mpangi una vo i nsadi, watambulwila bak’e mfwilu muna nzimbu zina kabadikila vo i zandi. Ekuma? Wavova vo: “E ntatani zazi kiese kiame zikululanga yo fwasa ntangw’ayingi ina ndenda sala salu ya mwanda.” Vava kabak’e nzengo zazi, e kiese kia mpangi kiavutuka, Yave mpe wansambula muna salu kiandi.
Kana Nkutu mu Mambu Makete
Lembi siandama muna zolela yeto nsambu ditwasanga kana nkutu mu mambu makete. Muna lumbu kiantete kia lukutakanu lwa mvivu, mpangi mosi yo nkaz’andi bena vo aviti a nzila, muna mene-mene balwaka yo sola e fulu kiambote bevwanda. Vava kiayantika lukutakanu, esi nzo mosi ye ulolo wa wana bayantika yungana mu vava fulu. Una bamona vo esi nzo awaya ke basolola fulu kia vwanda ko, mpangi ndiona yo nkaz’andi bakatuka vana kunda yau yole. Ediadi diasadisa esi nzo yayina bavwanda vamosi. Ke vavioka lumbu yayingi ko, akazi awaya bena vo aviti a nzila batambula nkanda wa matondo wafila esi nzo ana basisila fulu. Basoneka vo nkenda kikilu bakala zau muna lembi lwaka mu ola yambote kuna lukutakanu. Kansi ke kolo ko e nkenda bamona zakituka se kiese mu kuma kia wete basongwa kwa mpangi yo nkaz’andi bena vo aviti a nzila.
Muna kuma kiaki, vava tukalanga y’elau, yambula twasianga zolela yeto va fulu kiezole muna wete dia wantu akaka. Muna songanga zola kuna ‘ke kukuvàvila wandi wete ko,’ tutatidila ungudi muna nkutakani kumosi ye mfinangani zeto. (1 Kor. 13:5) Edi disundidi o mfunu, tukala ye ngwizani ambote yo Yave.
[Foto ina muna lukaya lwa 20]
Nga oyambulanga sia zolela yaku va fulu kiantete vava osolanga e mvwatu?
[Foto ina muna lukaya lwa 21]
Nga osisilanga mpangi zaku e fulu kia vwanda?