Nga Osungamenanga?

Nga wayangalele tanga malongi mavaika mun’Eyingidilu? Teza van’e mvutu za yuvu eyi yilende:

• Tatidila ziku kieto kia Kikristu, ekuma dinina o mfunu?

O tatidila ziku kieto dilenda kutusadisa mu yikama kimfumu kia Yave ye zola kwawonso yo songa vo Satana nkwa luvunu. Nzambi okutufundisila mun’owu wa ziku kieto. E ziku mfunu mpe kina muna kala ye vuvu kia kusentu.​—⁠15/12, lukaya lwa 4-6.

• Ameyi i maka mazina mesonganga e fulu kia Yesu mun’ekani dia Nzambi?

Mwan’amosi. Diambu. Amen. Nkambami ekangu diampa. Ngang’ambuta. Mbongo yasilwa nsilu.​—⁠15/12, lukaya lwa 15.

• Ekuma Eleya kalombela kwa ntaudi andi vo katala kuna kalunga ekolo kasambanga mu kuma kia mvula? (1 Nti. 18:43-45)

Eleya wasonga vo wazaya kuna kutukanga e maza ma mvula. Wazaya vo matuti va ntandu a kalunga mevangamenanga, yo tomboka kun’ezulu yo noka se mvula.​—⁠Abidi-Yuni, lukaya lwa 23-24.

• Aweyi tulenda kadila ye kiese muna salu kia umbangi?

Muna kubikanga ntima mieto yo sia sungididi mu dina tulenda vanga muna sadisa akaka. Tufwete kalanga y’ekani dia yantika longoka Nkand’a Nzambi yo muntu vava tusamunanga nsangu zambote. Avo tuwananene yo wantu ke bezolanga wá nsangu zambote ko, tulenda sadila mpila zakaka za yantikila moko zilenda yangidika wantu a zunga kieto.​—⁠15/1, lukaya lwa 8-​10.

• Nga kimbevo kia wazi kiyikwanga muna Nkand’a Nzambi kiau kimosi y’eki kizayakene o unu?

Kimbevo kiyikilwanga vo wazi kiakala kuna nz’ankulu. (Fuka 13:​4, 5) O Nkand’a Nzambi usonganga vo vakala ye wazi wavaikanga mu mvwatu yovo mu nzo. O “wazi” wau nanga wakala nze mbumbu. (Fuka 13:​47-52)​—⁠1/2, lukaya lwa 19 mu Kimputu.

• Malongi ma Nkand’a Nzambi aweyi malenda vanga muna mpila in’o Nkristu kebadikilanga fu ya luziku?

Kana una vo Nkristu olenda kendalala vava kifwanga azolw’andi, ozeye wo vo amafwa ke bazeye diambu ko. Kana nkutu vo mindembi-kwikila ke bayangalele ko, o Nkristu ovenga kuyisia muna fu isonganga vo amafwa balenda vanga diambu kw’awana bena moyo. Muna venga fu yayi, Akristu akaka besonekanga luzolo lwau muna nkanda mu mpila ifwete vangamena luziku lwandi.​—⁠15/2, lukaya lwa 29-​31.

• Muna Nkunga 1:1, nkia fu tatu ina mo, tufwete venga avo tuzolele kala ye kiese?

E sono kiaki kiyikanga e fu kia kangalela muna “ndongesel’a yimpumbulu,” telama muna “nzil’asumuki” yo fonga vana “fongo ki’avezi.” Elo, muna kala ye kiese, tufwete yangalelanga nsiku mia Yave, yo venga kala vamosi y’awana bevezanga nsiku mia Nzambi.​—⁠1/3, lukaya lwa 17 mu Kimputu.

• E “nkand’a Yasa” yo “nkand’a vita Yave” nga vila miavila yo lembi siwa mu Nkand’a Nzambi? (Yos. 10:13; Nta. 21:14)

Ve. Nanga e nkanda miami miakala kuna nz’ankulu kansi ke nkanda miavumunwinwa ko. Asoneki a Nkand’a Nzambi bayika e nkanda miami.​—⁠15/3, lukaya lwa 32.

• Nkia diambu diamfunu diasoba muna nsekola yampa ya Nkand’a Nzambi mu ndinga Latim?

Muna mvu wa 1979, Papa João Paulo II wavana nswa wa nsekola yampa mu ndinga Latim yayikilwa vo Nova Vulgata. Muna nsekola yantete, e nkumbu a Nzambi yakala muna yaka fulu. (Luv. 3:15; 6:⁠3) Kansi, vava kiavaikiswa e nsekola ina yezole muna mvu wa 1986, vana fulu kiasonama Iahveh [Yave], vavingiswa Dominus [Mfumu].​—⁠1/4, lukaya lwa 22 mu Kimputu.