Tanginina Kwikizi kia Itai

‘O MAVANGU maku manene y’esivi, e Yave wa Nzambi ampungu; e fu yaku yansongi ye ludi, e Ntinu a mvu ya mvu. E Yave, nani olembi vumina yo kembel’e nkumbu aku; kadi ngeye kaka nkwa kwikizi.’ Nkunga wau wayimbilwa kwa ‘awana basunda e bulu, ye teke kiandi’ usonganga vo Nzambi nkwa kwikizi. (Lus. 15:​2-4) Yave ozolele vo asambidi andi bantanginina muna songanga e fu kiaki kiambote.​—⁠Ef. 4:⁠24.

Kuna diak’e sambu, Nkadi Ampemba wa Satana ovanganga wawonso kalenda, mu vambula selo ya Nzambi muna zola kwa Nzambi ona besambilanga. Kansi, ayingi besimbininanga kwikizi kiau muna Nzambi, kana nkutu mu ntangw’ampasi. Tufwete kalanga ye kiese wau vo Yave oyangalelanga kwikizi kieto. Tuvewanga o nsilu vo: “Yave ozolele ndungidi, keyambula minkwikizi miandi ko.” (Nku. 37:​28) Muna kutusadisa twasikila ye kwikizi, Nzambi muna  Diambu diandi wasonekesa tusansu twa wantu ayingi akwa kwikizi. Lumosi muna tusansu twatu lwa Itai wa mwisi Ngati.

‘Nzenza ye Nyaluki’

Itai nanga mwisi Ngati, mbanza yatoma zayakana kuna Felesetia, kuna kwawutukila mpe Ngoleyate ye atantu akaka a Isaele. Nkumbu antete tutanganga mu kuma kia Itai muna Nkand’a Nzambi, i vava Abesalome katelamena Davidi wa Ntinu. Itai ye makesa 600 ma Felesetia ana banlandanga batinina ku vata diakala lukufi ye Yerusaleme.

Dina diabwila Itai ye alandi andi nanga diasungamesa Davidi e lumbu ina kakala muntayila, vava yandi ye makesa 600 ma Aneyisaele batinina kuna Felesetia, e zunga kiayalwanga kwa Akisi wa ntinu a Ngati. (1 Sam. 27:​2, 3) Itai ye makesa mandi adieyi bafwana vanga vava Davidi katelamenwa kwa Abesalome wa mwan’andi? Nga beyikama Abesalome? Nga ke bekuyisia ku sambu dia muntu ko? Nga beyikama Davidi ye makesa mandi?

Yindula ekolo kina Davidi katina muna Yerusaleme yo lwaka vana fulu kiayikilwanga vo ‘Bete-Meleyaki,’ nkumbu ina ye nsasa vo ‘Nzo ya Vala.’ Nanga i nzo yansuka muna Yerusaleme kwa ndiona okwendanga kuna Mongo a Olive, una kasaukidi ko Ndimb’a Kiderone. (2 Sam. 15:​17) Va fulu kiaki, Davidi watanga makesa mandi ekolo maviokanga vana ndose andi. Kansi, Davidi wamona vo ke makesa ma Aneyisaele kaka ko makala yandi, kansi ye Akerete ye Apelete mpe. Vana ntandu, vakala mpe ye Agati awonso, i sia vo, Itai ye makesa mandi 600.​—⁠2 Sam. 15:18.

Davidi wavovesa Itai ye mvovo miangemba vo: “Ongeye, mu nkia kum’okwizila yeto? Vutuka wakala yo ntinu: kadi u nzenza, u nyaluki muna nsi aku. Wau vo ezono kaka wayizidi, nga unu yavumvulwisa mu nzil’eto, wau vo se nkwenda konso kuna ndenda? Vutuka, wanat’akw’aku; o walakazi ye ziku wakala yaku.”​—⁠2 Sam. 15:​19, 20.

Muna songa kwikizi kiandi, Itai wavutula vo: ‘E nkal’a Yave aka, ye nkal’a mfumu ame wa ntinu aka, kana mu fwa yovo mu moyo, o nleke aku kuna kekala.’ (2 Sam. 15:​21) E mvovo miami nanga miasungamesa Davidi dina diavova Rutu wa nkak’andi. (Rutu 1:​16, 17) E mvovo mia Itai miasimba ntim’a Davidi yo kumvovesa vo: “Nda sauka” o Ndimb’a Kiderone. Itai wa mwisi “Ngati osaukidi y’akw’andi awonso ye yingyanangyana kakala yau.”​—⁠2 Sam. 15:⁠22.

“Muna Longwa Kweto”

Muna Roma 15:4 tutanganga vo: “Konso mana mateka sonekwa, masonekenwa muna longwa kweto.” Muna kuma kiaki, diambote twakiyuvula: Adieyi tulenda longoka muna mbandu a Itai? Badika dina diamfila mu songa kwikizi kwa Davidi. Kana una vo nzenza ye muntayila a mwisi Felesetia, Itai wazaya wo vo Yave i Nzambi amoyo, Davidi i kuswa kia Yave. Itai kayambula ko vo kitantu vana vena Aneyisaele ye Afelesetia, kiansimba. Ka badikilanga kaka Davidi ko nze ndiona wavonda Ngoleyate w’ekesa diangolo dia mwisi Felesetia ye akaka esi nsi andi. (1 Sam. 18:​6, 7) Itai wabadikilanga Davidi nze muntu ona wazolanga Yave. Ka lukatikisu ko vo wayangalelanga mpe fu yambote ya Davidi. Muna kuma kiaki, Davidi watoma yangalelanga Itai. Davidi wasia nkutu ndambu etatu ya makesa mandi “muna wisa kia Itai” vava kanwaniswanga kwa makesa ma Abesalome.​—⁠2 Sam. 18:⁠2.

Yeto mpe tufwete sia ngolo za lembi sia mpambula za nsi, yovo makanda, i sia vo, venga konso ngindu zalembi songa yovo kitantu yo yangalelanga fu yambote y’akaka. Kikundi kia Davidi ye Itai kisonganga vo o  zaya yo zola Yave dilenda kutusadisa mu lembi sia mpambula.

Vava tubadikanga mbandu a Itai, diamfunu twakiyuvula: ‘Nga kwikizi kia mpila yayi mpe isonganga kwa Kristu Yesu wa Davidi Anene? Nga isonganga kwikizi muna kivana muna salu kia samun’e nsangu zambote za Kintinu yo kitula wantu s’alongoki?’ (Mat. 24:14; 28:​19, 20) ‘Yamu nkia tezo ndenda lwaka mu songa kwikizi kiame?’

Mase mpe balenda bak’e nluta muna badikanga mbandu a Itai ya songa kwikizi. E kwikizi kasonga Itai muna Davidi ye luzolo kasonga lwa landa ntinu kasola o Nzambi, kiakala se mbandu kwa makesa mandi. Diau adimosi, o luzolo lwa mase lwayikama nsambil’aludi, lulenda kala se mbandu kwa esi nzo. Lulenda mpe kubasia mu mpasi mu fikolo. Kansi, tuvewanga nsilu vo: “Kuna kwa nkwa nkwikizi [Yave] okusonga vo nkwa kwikizi.”​—⁠Nku. 18:​25, NW.

E vita ya Davidi ye Abesalome vava yamanisa, Nkand’a Nzambi ke uyikanga diaka Itai ko. Kana una vo i wau, lusansu lwandi lwankufi lwasonama muna Nkand’a Nzambi lusonganga fu kiambote kasonga muna ntangw’ampasi ya zingu kia Davidi. Wau vo Itai oyikwanga muna Nkand’a Nzambi, i ziku kisonganga vo Yave oyangalelanga yo sambula akwa kwikizi.​—⁠Ayib. 6:10.