Yuvu Y’atangi

O Satana nkia ntangwa kayingwa kun’ezulu?​—Lus. 12:1-9.

Kana una vo nkand’a Lusengomono ke uyikanga ntangwa yasikididi ko ina yayingwa Satana kun’ezulu, uyikanga mambu mabwa oma malenda kutusadisa mu zaya e ntangwa yayingwa Satana. Dimosi muna mambu mama i ngyal’a Kintinu kia Masia. I bosi, “kukedi vita kun’ezulu,” o Satana wasundwa yo yingwa kun’ezulu.

Nkand’a Nzambi usonganga vo 1914 i mvu wafokoka e “tandu ya zula” yo yadikwa e Kintinu. * (Luka 21:​24) Kolo kwa yavioka, tuka kianwanin’e vita kun’ezulu ye ntubw’a Satana ova ntoto?

Muna Lusengomono 12:4 tutanganga vo: “E ngobodi [Satana] itelamene vana ndose a nkento on’owuta, kimana, ovo owutidi, kavempola mwan’andi.” Ediadi disonganga vo Satana wakala y’ekani dia fwasa e Kintinu vava kiyadikwa, kele vo dilendakana. Kana una vo Yave wavunzanesa makani mandi mambi, Satana wakinu sia e ngolo mu fwasa Kintinu kiampa kiayadikwa. Ekiaki i kuma, “Mikaele ye mbasi zandi” ke baviokesela ntangwa ko mu yinga ‘ngobodi ye mbasi zandi’ kun’ezulu mu lembi vanga Kintinu e mbi. Ediadi disonganga vo, vava Kintinu kiayadikwa muna mvu wa 1914, vana vau Satana wayingwa kun’ezulu.

E diambu diakaka tufwete fimpa, i lufuluku lwa Akristu akuswa. Nze una usonganga Nkand’a Nzambi, vava Kintinu kiayadikwa, ke vavioka kolo kiayingi ko lufuluku lwau mpe lwayantika. * (Lus. 20:⁠6) Wau vo mpangi zakuswa za Kristu ke beyikwanga ko vo kumosi bakala yo Yesu vava kanwana e vita ye ngobodi ye mbasi zandi, nanga lufuluku lwau lwayantika vava kiavioka e vita yanwana kun’ezulu ye ntubw’andi ova ntoto.

Ozevo, Nkand’a Nzambi ke uvovanga ntangwa yasikididi ko ina yayingwa Satana ye nkwiya miandi kun’ezulu. Kansi, e ziku kisonganga vo diambu diadi diavangama vava Yesu Kristu kayadikwa kun’ezulu muna mvu wa 1914.

[Mvovo Vana Yand’a lukaya]