E Mbongo a Ludi Ilweke Muna Zunga Yandá

REPÚBLICA de Tuva ina kuna Rússia, kuna sude ya Sibéria. Kuna sude ye este yavanga mwingilu ye Mongólia. Kuna nsi ya Tuva wantu ayingi mu zunga yandá bezingilanga, diampasi dikalanga mu wá nsangu za Kintinu. Kansi, vioka fikolo, buka kia wantu bakangala tuka muna zunga yandá ya Tuva yakuna mbanza Kyzyl mu kwenda ku lukutakanu (seminário). Maria una vo mviti a nzila kuna Kyzyl wawá e nsangu za ngiz’a buka kiaki yo vava sadila elau diadi mu kubasamunwina e nsangu zambote.

Maria wavova vo: “E sikola ina isadilanga nze nlongi yakubika lukutakanu lwalu mu sadisa awana besadilanga má yankolwa. Vioka 50 ma wantu batuka muna zunga yandá ya Tuva bayiza mu lukutakanu lwalu. Muna buka kiaki mwakala ye alongi, Psicólogos ye awana betalanga mambu ma yingyana-ngyana ye akaka mpe.” Lukutakanu lwalu lwavana elau kwa Maria mu sia umbangi, kansi ke diakala diakete ko mu vanga wo. Wavova ekuma: “Wau vo i nkwa nsoni, diampasi diakala mu sila umbangi ku kinsalukisa. Kansi yalomba nkuma kwa Yave mu sund’o wonga yo sadila elau diadi mu sia umbangi.” Nga wabaka e nluta?

Maria wavova vo: “Yavava e Despertai! yayika evangu dia Fobia, i sia vo, fu kia mona wonga. Yakala ye vuvu vo e Despertai! yayi yiyangidika Psicólogo, muna kuma kiaki, yanata e finkanda fiafi kuna sikola. Muna lumbu kiakina, mosi muna alongi ana bayiza kuna lukutakanu lwalu wakota muna suku diame dia salu, yamvana finkanda fiafi. Watambula fio ye kiese kiawonso. Wavova vo yandi mpe nkwa wonga. Muna lumbu kialanda, yanatina o nkanda Os Jovens Perguntam​—⁠Respostas Práticas, Volume 1. Watambula mpe nkanda wau ye kiese kiawonso. E kiese kasonga kiamfila mu yindula vo alongi akaka mpe balenda yangalela e nkanda miami. Muna kuma kiaki, yanata nkel’amvimba ya nkanda Os Jovens Perguntam ye nkanda miakaka kuna sikola.” Ke vavioka kolo kiayingi ko, e nkela yawonso yasala e nkatu. Maria wayika dina diavangama: “Alongi ana yavana o nkanda Os Jovens Perguntam bayiza muna suku diame dia salu yo kungyuvula: ‘Akweyi mikayilwanga e nkanda miami?’” E kiaki i fulu bavavanga.

E lumbu kiansuka kia lukutakanu Kiasabala kiakala. Wau vo Maria kasala ko muna lumbu kiakina, wasisa nkanda miayingi vana meza ma suku diandi dia salu. Wasoneka vana babu kimosi vo: “Akw’ame alongi! Nulenda baka e nkanda nuzolele yo natina akundi eno. E nkanda miami milenda kunusadisa muna salu kieno yo kumika esi nzo zeno.” Adieyi diabwa? “Vava yayenda kuna suku diame dia salu muna lumbu kiakina, nkanda miakete kaka yawana. Yayenda baka diaka nkanda miakaka.” Kuna mfoko a lukutakanu, Maria 380 lwa yinkanda-nkanda kakaya, 173 lwa nkanda ye 34 ma finkanda. Awana bayiza ku lukutakanu vava bavutuka muna zunga yau bekalanga yo sadila, banata e nkanda miami. Maria wavova vo: “Ngina ye kiese wau vo e mbongo a ludi ilweke muna zunga yandá ya Tuva.”​—⁠Kim. 11:⁠6.

[Nenga kia Nsi ina muna lukaya lwa 32]

Muna zaya una mena o mambu, tala muna nkanda

RÚSSIA

REPÚBLICA DE TUVA