Basolola Lusalu Lwaswekama

NGA wasolola kala lekwa kiamfunu va fulu kina kwayindulanga ko? I diau diavangama kina kia 27 kia Malusu, 2005 kwa Ivo Laud, wa Mbangi a Yave kuna Estônia. Muna lumbu kiakina, Alma Vardja, mpangi ankento anunu kasadisanga mu bangula elundilu diankulu. Una babangula e yaka kia mbazi, bamona nkela mosi yanene. (1) Elundilu dia lekwa yamfunu. Nkia lekwa? Nani wasweka yo va fulu kiaki?

Muna nkela yayi mwakala ye mvolopi mianene. (2) Muna mvolopi miami mwakala ye nkanda mia Mbangi za Yave, musungula malongi ma longoka m’Eyingidilu. Miakaka muna nkanda miami miavaikiswa mu mvu wa 1947. (3) Mu moko  miasonekenwa mu ndinga Estoniano. Muna mvolopi miakaka, mwakala ye sinsu yasonganga ndiona wasweka nkanda miami. Mwakala ye lusansu lwa mpangi Villem Vardja, wa nkaz’a Alma. Muna mvolopi miami, mwasoloka mpe nsangu za mvu mina kakala mu pelezo. Ekuma kasilwa mu pelezo?

Mpangi Villem Vardja kiyekwa kiampwena kakala kiau muna nkutakani a Tartu ya Mbangi za Yave, i bosi muna nkutakani a Otepää kuna Estônia. Una Vit’Anzole ya Nz’Amvimba ka inweno ko, nanga i ntangwa kalongoka e ludi kia Nkand’a Nzambi. Mvu miakete kaka miavioka, kina kia 24 kia Desemba, 1948, luyalu lwa Comunista lwasia mpangi Vardja mu pelezo mu kuma kia samun’e nsangu zambote. Wafundiswa yo mweswa mpasi kwa mapolisi ekolo bavavanga vo kasongela nkumbu za mpangi zandi Akristu. Una balembi kunyambula vo kenda kuna mfundu mu kuyivovela, banzengela mvu kumi mu pelezo mu fulu ya salu yangolo kuna Rússia.

Mpangi Villem Vardja wasikila ye kwikizi muna Yave yavana kafwa kina 6 kia Malusu, 1990. Nkaz’andi kazaya wo ko vo nkanda kasweka. Nanga kanzayisa ko mu kuntanina kalembi songa fulu kiaki kele vo bamfudisi. Ekuma kaswekela e nkanda miami? Wasweka mio kadi wazaya wo vo mapolisi ma União Soviética, KGB, balenda kwiza sata nzo za Mbangi za Yave, mu vava nkanda miami. Mpangi Vardja nanga wasweka mpe nkanda kimana ampangi bakala ye madia ma mwanda kele vo mapolisi ma KGB bakutumwini lekwa yau yawonso. Mvolopi miakaka kasweka miasololwa muna mvu a 1990. Mvolopi miakaka mu mbanza Tartu miasolokela, kuna sude ya Estônia. Mvolopi miami mpe mpangi Villem Vardja wasweka mio.

Ekuma tuyikidi nkanda miami vo lusalu lwantalu? Kadi e nkanda miami miasonekenwa mu moko yo toma swekwa misonganga una ampangi bayangalelanga madia ma mwanda muna tandu kiakina. (Mat. 24:​45) Nga osonganga luyangalalu muna nkanda otambulanga muna nkutakani aku? Eyingidilu, umosi muna nkanda miami, usekolwanga mu tezo kia 170 lwa ndinga kumosi ye ndinga Estoniano.

[Foto ina muna lukaya lwa 17]

1

[Foto ina muna lukaya lwa 17]

2

[Foto ina muna lukaya lwa 17]

3