Nga Wasadila Kala Akaka? Nga Olenda Vutukila Salu Kiaku?
Nga Wasadila Kala Akaka? Nga Olenda Vutukila Salu Kiaku?
NGA wasadila kala akaka muna nkutakani y’Akristu? Nanga selo kia salu yovo nkuluntu wakala. Dilenda kala vo mu salu kia ntangwa ke ntangwa wakala. Ka lukatikisu ko, wamona kiese mu sala e salu kiaku, kansi nanga mu kuma kia diambu diabwa wavidisa elau diaku.
Nanga wayambula salu kiaku mu lunga-lunga esi nzo. Yovo nanga kinunu yovo kimbevo kiafila mu yambula salu kiaku. Ediadi ka disongele ko vo kwafwana ko. (1 Tim. 5:8) Muna tandu kiantete, Filipo wasalanga nze ntumwa, kansi kuna kwalanda wasala kuna Kaisaria mu lunga-lunga esi nzo andi. (Mav. 21:8, 9) Muna kinunu kiandi, Davidi wa Ntinu a Isaele yankulu, wakubika mwan’andi Solomo mu vinga vana kunda kia kintinu. (1 Nti. 1:1, 32-35) Kansi, Filipo yo Davidi bakwamanana zolwa yo yangalelwa kwa Yave yo zitiswa yamu lumbu yeto.
Dilenda kala vo, akuluntu bavovesa vo walembi sadila diaka akaka. Nga mu kuma kia vangu diambi? Yovo mu kuma kia diambu diasia sungididi muna esi nzo aku? (1 Tim. 3:2, 4, 10, 12) Nanga kwayangalela nzengo zazi ko yo kala ye makasi yamu unu.
Lenda Vutukila Sadila Akaka
O vidisa elau dia sadila akaka nga disongele vo kulendi dio vutukila diaka ko? Ve. Kansi, muna vutukila elau diaku, ofwete si’e ngolo. (1 Tim. 3:1) Ekuma ofwete vavil’elau dia sadila akaka? Mu kuma kiau akimosi kia fila mu kiyekola kwa Nzambi, i sia vo, zola muna Yave ye mun’awana bekunsadilanga. Avo una ye luzolo lwa vutukila sadila akaka mu songa zola kwaku, ediadi difila Yave mu sadila mana wateka zaya ye dina olongokele tuka wavidisila elau dia sadila akaka.
Sungamena o nsilu kavana Yave kwa Isaele, vava e zula kiaki kiavidisa elau bakala diau. Wavova vo: “Mono Yave kisoboka ko; muna diadi oyeno, e wan’a Yakobo, i nulembele sukila.” (Mal. 3:6) Yave wazola Aneyisaele ye wazola diaka kubasadila. Yave una mpe ye luzolo lwa kusadila diaka kuna sentu. Adieyi lenda vanga owau? Muna vwa diaka elau dia sadila akaka ke divavanga ko vo muntu kakala ye ngangu zayingi, kansi kafwete kala ye ngwizani yambote yo Yave. Muna kuma kiaki, ekolo ke una y’elau dia sadila akaka ko muna nkutakani, vava siamisa ngwizani aku yo Yave.
Muna ‘kumama’ muna lukwikilu, ofwete ‘tomba Yave yo nkum’andi.’ (1 Kor. 16:13; Nku. 105:4) Imosi muna mpila olenda wo vangila i sambanga ye nsi a ntima yawonso. Vava osambanga kwa Yave, zayisa e ngindu zaku kwa yandi yo lomba mwand’andi. Avo vangidi wo, e ngwizani aku yo Yave iwokela, ediadi dikukumika. (Nku. 62:8; Fili. 4:6, 13) E mpila yakaka olenda kumikina kimwanda kiaku, i longokanga e Diambu dia Nzambi. Wau vo kuna ye salu yayingi ko owau, dilenda kusadisa mu kala y’elongi dia ngeye kibeni ye dia esi nzo. Lenda vutukila vanga maka mambu mana kwalendelenge diaka vanga ko.
Sungamena vo wakinu Mbangi a Yave. (Yes. 43:10-12) Elau disundidi tulenda vwa i kala ‘asadi kumosi yo Nzambi.’ (1 Kor. 3:9) Kuyivana muna salu kia umbangi, i mpila yambote lenda siamisina ngwizani aku yo Yave ye akw’aku muna salu kia umbangi.
Sunda Ngindu Zalembi Songa
O vidisa elau dia salu dilenda fila muntu mu mona nsoni yovo kendalala. Olenda vava kilungisa mu dina wavanga. Adieyi tuvova kele vo ampangi bevitanga o ntu bawidi e ngindu zaku, kansi bamwene vo kwafwana ko mu sadila akaka? Ediadi dilenda kufila mu yima ngindu zambi mu kuma ki’ampangi. E ngindu zazi zilenda kusimba mu vwa elau ozolele yo kitula dio se diampasi mu longoka diambu mu dina diabwila. Yambula twafimpa una e mbandu a Yobi, Manase, ye Yosefe ilenda kutusadisila mu sunda ngindu zambi.
Yobi wasunzulanga akaka kwa Yave yo solwa nze nkuluntu ye mfundisi. (Yobi 1:5; 29:7-17, 21-25) Kansi, vava kabakama e mpasi, Yobi wavidisa mavwa mandi, wafwilwa wan’andi yo bakama kimbevo. Muna kuma kiaki, wavidisa nkumbu ambote kakala yau vana meso m’akaka. Yobi wavova vo: “Ansakila zame banyembele o tusevo.”—Yobi 30:1.
Yobi wayibadikila vo munkondwa kuma yo vava kuyilungisa vana ndose a Nzambi. (Yobi 13:15) Kansi, Yobi watadila Yave, mu kuma kiaki wasambulwa. Walongoka vo singikwa kavavanga, musungula e mpila kabadikilang’e mpasi zambwila. (Yobi 40:6-8; 42:3, 6) Mu kuma kia lulembamu lwandi, Yobi wasambulwa kwa Nzambi.—Yobi 42:10-13.
Avo mu kuma ki’evangu diambi i bakatulwila elau dia sadila akaka, olenda yindula vo Yave ye mpangi zaku Akristu ke bekuloloka diaka ko ngatu vilakana dina wavanga. Yindul’e mbandu a Manase wa Ntinu a Yuda. ‘Bi wingi kavanga muna meso ma Yave, wantutis’ekudi.’ (2 Nti. 21:6) Kana una vo i wau, Manase wayala diaka nze ntinu yo fwa ye kwikizi. Aweyi diavangamena?
Manase watambulwila elongi kavewa. Vava kaveza luludiku kavewa, Yave wayambula vo kanwaniswa kwa Asuri, ana bankanga muna ngonzi yo kunata e kinkole kuna Babele. Ekolo kakala muna kinkole, Manase “ododokele Yave wa Nzambi andi, osakalele kikilu vana ndose a Nzambi a mase mandi. Osambidi kwa yandi.” Manase waviluka o ntima yo vanga oma mambote, yo lolokwa.—2 Tus. 33:12, 13.
Kele vo ovidisi elau dia salu, muna vutukila dio, ke vana vau ko ovewa o nswa wasal’e salu yawonso wasadidinge, kansi ekolo ntangwa yivioka, ye lunungunuku lwaku, lenda yantika vewa maka malau. Otambulwila elau muna tezo kiaki yo vanga wawonso olenda, dilenda kufila mu vewa elau diakaka. Olenda mona vo e diambu diaku ke disingikilu nzaki ko nze una ozolele. Ediadi dilenda twasa lukendalalu. Kansi zaya dio vo, o luzolo lwambote ye luzindalalu nluta miambote lutwasanga.
Yindula e mbandu a Yosefe wa mwan’a Yakobo. Vava kakala ye kimbuta kia mvu 17, Yosefe watekwa kwa mpangi zandi nze mbundu, kondwa kuma. (Etu. 37:2, 26-28) Kayindula dio ko vo mpangi zandi balenda kumvanga e diambu diadi. Kana una vo i wau, wakala se nsadi ambote, yo sambulwa kwa Yave yo ‘tundidikwa muna nzo a mfumu andi.’ (Etu. 39:2) Kuna kwalanda Yosefe wasiwa mu pelezo. Kansi, wasonga vo nkwa kwikizi, Yave wakala yandi, muna kuma kiaki, wayekekwa kinkengi muna pelezo.—Etu. 39:21-23.
Yosefe kazaya wo ko vo mana mambwila nluta metwasa. Wazindalala vanga dina kalenda. Kansi, Yave wansadila mu vuluza luvila luwutukila Mbongo yasilwa o nsilu. (Etu. 3:15; 45:5-8) Kana una vo ke vena mosi ko mu yeto lenda sadilwa nze una Yosefe kasadilwa, Nkand’a Nzambi usonganga vo Yave osambulanga e salu kisalanga selo yandi. Kwamanana tanginina Yosefe yo vingila elau dia sadilwa.
Baka Elongi Muna Dina Diabwila
Yobi, Manase yo Yosefe babwilwa mambu mampasi. Yau atatu batambulwila dina Yave kayambula vo diababwila ye konso muntu walongoka diambu diamfunu. Adieyi olenda longoka?
Vava zaya dina kazolele kulonga o Yave. Vava kamonanga e mpasi, Yobi wadimbula e vuvu yo yantika vava kilungisa yandi kibeni yo vilakana mbuta diambu. Kansi, wasingika ngindu zandi vava Yave kanlonga muna zola kwawonso. Muna kuma kiaki wavova vo: “Mpovele oma ndembele bakula.” (Yobi 42:3) Kele vo lukendalalu okalanga lwau wau wavidisa elau dia salu, ‘kuyiyindwila ngindula iviokele ina ofwete yindula ko; yindul’aka ngindul’ansongi.’ (Roma 12:3) Nanga Yave diambu kazolele kulonga mu mpila ina kulendi bakula ko.
Tambulwila elongi. Kuna lubantiku nanga Manase wayindula vo kafwana vewa tumbu kiakina ko. Kansi, watambulwila kio, waviluka o ntima, yo yambula mavangu mandi mambi. Kana nkutu nkia ngindu okalanga zau mu kuma ki’elongi wavewa, ‘uyisakidika vana ndose a Yave, kakundidika.’—1 Pet. 5:6; Yak. 4:10.
Kala ye luzindalalu ye luzolo lwambote. Dina diabwila Yosefe diafwana kumfila mu funga makasi yo landa kunda. Kansi wawokesa e ngangu ye nkenda. (Etu. 50:15-21) Kele vo lukendalalu okalanga lwau, kala yo luzindalalu. Songa luzolo lwambote mu longwa kwa Yave.
Nga wavwa kala elau dia salu muna nkutakani y’Akristu? Yambula Yave kavana diaka elau diadi kuna sentu. Kumika kimwanda kiaku. Vuvika e ngindu zaku, kala yo luzindalalu yo lulembamu. Kuna zola kwawonso, tambulwila konso salu bekuvana. Kala ye vuvu vo Yave “kekadila’ewete ko kw’awana bekangadila kuna ziku.”—Nku. 84:11.
Kumama muna lukwikilu muna sambanga ye nsi a ntima wawonso
[Foto ina muna lukaya lwa 31]
Kuyivana muna salu kia umbangi, i mpila yambote lenda siamisina ngwizani aku yo Yave
[Foto ina muna lukaya lwa 32]
Yambula vo Yave kavana diaka elau dia salu kuna sentu