Dibundu Isambilanga nga Mono Yasola dio ovo Mase Mame?

KUNA Polônia wantu ayingi bevovesanga a Mbangi za Yave vo: “Muna dibundu yawutukila, i muna mfwila.” Ediadi disongele vo, kuna kwa yau, wantu bafwete landa dibundu dia mase mau. Nga i wau mpe beyindulanga wantu muna zunga kieno? Adieyi difilanga wantu mu kala yo nyindu wau? O unu, wantu mpasi sambila kaka besambilanga yo kitula dibundu se diambu dia kinkulu. Nga diadi dilenda vangama kwa Mbangi za Yave, ana balongwa e ludi kwa mase yovo kwa nkaka zau?

Ke diau ko diavangama kwa Timoteo, ona walongwa kwa ngudi ye nkak’andi ankento mu kwikila yo zola Nzambi aludi. Timoteo wazaya e sono yavelela “tuka muna kisedia” kiandi. Kuna kwalanda, muna lusadisu lwa ngudi ye nkak’andi ankento, Timoteo wakwikila vo e nsambil’a Kikristu yaludi. ‘Wakwikidiswa’ mana kalongoka muna Nkand’a Nzambi mu kuma kia Yesu Kristu. (2 Tim. 1:5; 3:​14, 15) Kana una vo mase bevanganga wawonso mu sadisa wan’au bakituka selo ya Yave, o wana yau kibeni bafwete vang’e ngolo mu kituka selo ya Yave.​—⁠Maku 8:34.

Muna sadila Yave kuna zola yo sikila ye kwikizi, kana nkutu nkia diambu dilenda kumbwila, konso muntu kafwete kala ye ziku vo mana kekwikilanga maludi. Muna mpila yayi, o lukwikilu lwandi lukumama yo sikila.​—⁠Ef. 3:17; Kol. 2:​6, 7.

Dina Divavwanga kwa Wana

Albert, * ona wasanswa kwa mase mena vo Mbangi za Yave wavova vo: “Yazaya wo vo Mbangi za Yave mu nsambil’a ludi bena, kansi diampasi diakala mu lemvokela dina bavovanga mu kuma kia mpila mfwete zingila.” Kele vo u nleke, nanga ngindu zazi una zau. Avo i wau, si’e ngolo za zaya dina divavwanga mu landa e nzila ina Nzambi kazolele vo twalanda yo yangalela vanga luzolo lwandi. (Nku. 40:⁠8) Albert wavova vo: “Yayantika samba. Kuna lubantiku diampasi diakala. Kansi yakwamanana samba. Kuna kwalanda, yabakula vo Nzambi olenda kumvwa o mfunu kele vo nsidi e ngolo za vanga oma mansongi. Ediadi diampana o nkuma wa soba e mpil’a zingu kiame.” Avo tukedi ye ngwizani ambote yo Yave, tukala y’etima dia vanga edi kevavanga oku kwa yeto.​—⁠Nku. 25:14; Yak. 4:⁠8.

 Badika e nona kia nsaka nze za tá esomba. Avo kutomene zaya nsiku mia nsaka zazi ko, kutoma zo sakana ko. Kansi, avo olongokele e nsiku yo zaya toma tá esomba, oyangalela e nsaka zazi yo vava malau ma tá esomba. Diau adimosi mpe ye salu ya Kikristu. Ofwete vaulanga e ntangwa ya kubika tukutakanu tw’Akristu. Sia e sungididi mu mana olongokanga. Kana una vo u nleke, e mbandu aku ilenda kasakesa akaka.​—⁠Ayib. 10:​24, 25.

Diau mpe olenda vanga vava ozayisanga oma ma lukwikilu lwaku kw’akaka. Ediadi difwete vangilwa kuna zola, kansi ke mu komekenwa ko. Olenda kiyuvula: ‘Ekuma nzolele zayisila oma ma Yave kw’akaka? Ekuma ikunzolelanga?’ Ofwete zaya Yave nze Se dianzodi. Muna Yeremiya wa ngunza, Yave wavova vo: “Nukumpava, nwansolola, ovo nukuntomba muna nsi eno a tima.” (Yer. 29:​13, 14) Aweyi olenda lungisila mvovo miami? Jakub wavova vo: “Yasoba e ngindu zame. Yayendanga muna tukutakanu ye muna salu kia umbangi tuka kileke kiame, kansi e salu yayi kiavangilanga yo mu nsi a ntima ko. Vava kaka yatoma zaya Yave yo siamisa e ngwizani ame yo yandi, i yayantika kuyivana emvimba muna salu ya mwanda.”

E yikundi yambote ilenda kusadisa mu yangalela e salu kia umbangi. E ngana yavumunwinwa ivovanga vo: “On’okangala y’akwa ngangu, okal’e ngangu.” (Nga. 13:​20) Muna kuma kiaki, vanga kikundi ye awana bena y’etima dia mambu ma mwanda ye bena ye kiese muna salu kia Yave. Jola wavova vo: “O vanga kikundi ye aleke ana bekuyivananga muna salu kia Yave dikunkasakesanga. Yayantika kuyivana muna salu kia umbangi ye kiese kiawonso.”

Dina Divavwanga kwa Mase

Jola wavova vo: “Ivutulanga matondo kwa mase mame wau bandonga e ludi mu kuma kia Yave.” Kieleka, mase balenda sadisa wan’au mu sola nsola yambote. Paulu wa ntumwa wasoneka vo: ‘Amase, . . . nubatongonona [wan’eno] muna ndonga yo lusansu lua Yave.’ (Ef. 6:⁠4) Luludiku lwalu lwavumunwinwa lutoma songanga vo mase bena ye mbebe ya longa wan’au e nzila za Yave, ke ngindu za yau kibeni ko. Vana fulu kia kubalonga mana ozolele vo balungisa, diambote wabasadisa bakala y’etima dia zingila ngwizani ye luzolo lwa Yave.

Olenda longa wan’aku e mambu ma Yave yo ‘mokena mo vav’ofongele muna nzo, yovo se kiya yovo leka yovo sikama.’ (Nsi. 6:​6, 7) Eva yo Ryszard bena yo wana tatu, besungamenanga vo: “Nkumbu miayingi twamokenanga mu kuma kia salu kia ntangwa ke ntangwa.” Nkia nluta diatwasa? “Wan’eto bakota muna Sikola ya Salu kia Kimfumu ekolo bakala aleke, bakituka ateleki, yo baka e nzengo za vubwa. I bosi, yau awonso bayivana muna salu kia ntangwa ke ntangwa.”

 E mbandu ambote ya mase mfunu ina. Ryszard wavova vo: “Twabaka e nzengo za lembi nata e zingu kia vilu-vilu, i sia vo, kuna nzo tu wantu akaka, kuna nkutakani tu wantu akaka.” Muna kuma kiaki, ukiyuvula: ‘Nkia mbandu isonganga kwa wan’ame? Nga bemonanga vo Yave kikilu izolanga? Nga bemonanga zola kwaku muna sambu yame ye muna nkubika z’elongi dia mono kibeni? Nga bemonanga ko muna mpila isadilanga salu kia umbangi, nsaka, muna mpila ibadikilanga mavwa ye mu mana ivovanga mu kuma kia mpangi muna nkutakani?’ (Luka 6:​40) O wana bebakula muna zingu kiaku kia lumbu ke lumbu, kana vo mana ovovanga ngwizani mena ye mana ovanganga.

Elongi mfunu dina muna sansa wana. Muna kuma kiaki, Nkand’a Nzambi ukutuvovesanga vo: “Tongonwena mwana muna nzila kekwenda.” (Nga. 22:⁠6) Eva yo Ryszard bavova vo: “Twavaulanga e ntangwa ya longoka Nkand’a Nzambi ye konso mwana.” Mase yau bafwete zaya kana vo diamfunu dia longokanga ye konso mwana ye ntangw’andi. Konso nzengo zina bebaka, mase bafwete sansa konso mwana muna mpil’andi. Ediadi divavanga vo bakala ye tezo yo unleka. Kasikil’owu, vana fulu kia vovesanga wan’eno vo e miziki miami miambi, ekuma olembi kubasongela una balenda sadila nkanikinu mia Nkand’a Nzambi mu baka e nzengo zambote?

O wan’aku nanga balenda zaya dina ovavanga kwa yau yo vanga dina okubalombanga. Kansi, ofwete simbanga e ntima miau. Sungamena vo “o luludiku muna ntim’a muntu, nga maza mansini; o mbakuzi ovola lo.” (Nga. 20:⁠5) Kala yo umbakuzi, zayanga mana mena muna ntim’a mwana yo kunsadisa vana vau. Lembi kumfundisa, songa vo wete diandi otokanenanga ye yuvula e yuvu yasikila. Kansi, venga e fu kia yuvula ulolo wa yuvu. O zola okubasonganga kusimba ntima miau ye kufila mu kubasadisa.

Dina Divavwanga kwa Mpangi Muna Nkutakani

Wau vo u selo kia Nzambi, nga olenda sadisa aleke muna nkutakani bayangalela evwa  dia mwanda batambula? Kana una vo mase yau bena ye mbebe ya longa wan’au, akaka muna nkutakani, musungula akuluntu, balenda kubavana e moko. Diamfunu dia sadisa aleke bena vo mosi muna mase mau ke Mbangi a Yave ko.

Akuluntu adieyi balenda vanga mu sadisa aleke mu zola Yave yo mona vo mfunu bena ye beyangalelwanga? Mariusz, ona una vo nkuluntu muna nkutakani kuna Polônia, wavova vo: “Akuluntu bafwete kalanga ye fu kia mokena y’aleke. Ke bafwete wo vanga kaka ko kele vo diambu bavangidi, kansi ye mu ola zakaka nze vava bekalanga muna salu kia umbangi, kuna mfoko a lukutakanu yovo muna ola dia.” Ekuma olembi yuvulwila aleke bayika dina beyindulanga mu kuma kia nkutakani? E moko ya mpila yayi ifilanga aleke mu finama e nkutakani ye kubasadisa bazaya vo yau mpe mfunu bena muna nkutakani.

Kele vo u nkuluntu, nga ovavanga zaya aleke a nkutakani aku? Kanele vo se nkuluntu, Albert ona tutekele yika, mpasi zayingi kawanana zau muna kileke kiandi. Wavova vo: “Vava yakala toko, yavavanga vo yakingulwa kw’akuluntu.” Akuluntu balenda mpe songa kw’aleke vo mfunu bekubavwanga muna sambanga mu kuma kiau, kimana bakala ye ngwizani ambote yo Nzambi yo sikila muna mwanda.​—⁠2 Tim. 1:⁠3.

Diambote kw’aleke bayivananga muna salu ya nkutakani. Ovo ke wau ko, balenda sia e sungididi muna mambu ma nza yayi. Yeno ambuta, nga nulenda sala yau entwadi muna salu kia umbangi yo vanga yau kikundi? O kala vamosi y’aleke muna ntangw’a nsaka dilenda kumika kikundi kieno. Jola wasungamena vo: “Mpangi ankento una vo mviti a nzila watoma kunzolanga. Yandi yatoma vaikanga yandi muna salu kia umbangi, wau vo kiakalanga y’etima dia salu kiaki ko.”

Nsola ya Konso Muntu

Aleke nulenda kiyuvula: ‘Nkia makani ngina mau? Kele vo kiavubilu ko, nga ngina y’ekani diadi?’ Zola kwa nsi a ntima muna Yave i kufwete fila muntu mu vubwa, kansi ke mu kuma kia mase ko.

Yambula o Yave kakala Nkundi aku akieleka, e ludi kiakala s’evwa diaku. Muna Yesaya wa ngunza Yave wavova vo: “Kuvengozioka ko, kadi omono i Nzambi aku.” Yave okala yaku ekolo okwamanana kala nkundi andi. Okukumika yo “kusikidisa muna koko [kwandi] kwalunene kwa unsongi.”​—⁠Yes. 41:⁠10.

[Mvovo Vana Yand’a lukaya]

[Foto ina muna lukaya lwa 4]

Vav’o zaya mana mena muna ntim’a mwan’aku

[Foto ina muna lukaya lwa 6]

Zola kwa nsi a ntima muna Yave i kufwete fila muntu mu vubwa