Aweyi Tulenda Siamisina Kikundi mu nza Yakondwa Zola

“Owu inukanikini, nwazolaziana.”​—⁠YOA. 15:⁠17.

1. Ekuma diavavila vo Akristu a tandu kiantete basiamisa kikundi kiau?

MUNA fuku wansuka kakala ova ntoto, Yesu wakasakesa alongoki andi akwikizi mu siamisa kikundi kwa muntu yo nkw’andi. Muna fuku wauna, Yesu wabavovesa vo o zola besonga kwa muntu yo nkw’andi i kusonga vo alandi andi. (Yoa. 13:​35) Muna zizidila mpasi zabavingilanga yo lungisa e salu kina kekubasisila o Yesu, diavavanga vo antumwa basiamisa kikundi kiau. Elo, Akristu a tandu kiantete bazayakana mu kuma kia kwikizi kiau muna Nzambi ye kwa muntu yo nkw’andi.

2. (a) Nki’ekani tuna diau? Ekuma? (b) Nkia yuvu tubadika?

² O unu, tuna ye kiese kia kala muna nkutakani ya nz’amvimba, ya wantu belandanga e mbandu y’Akristu a tandu kiantete. Tuna y’ekani dia kwamanana lemvokela nkanikinu  a Yesu wa zolaziana. Kansi, mu lumbu yayi yambaninu, wantu ayingi bakondelo e kwikizi ye ungudi. (2 Tim. 3:​1-3) Nkumbu miayingi, kikundi bevanganga kia disu kunsi a lukaya yo vava wete dia yau kibeni. Muna songa vo tu Akristu akieleka, tufwete venga e fu kiaki kia wantu a nza. Yambula twabadika yuvu ilende: Ayeyi i nsabi mu kala ye kikundi kiambote? Adieyi tufwete vanga mu kala y’akundi ambote? Nkia ntangwa tulenda vonda kikundi? Aweyi tulenda siamisina kikundi?

Ayeyi i Nsabi mu Kala ye Kikundi Kiambote?

3, 4. Ayeyi i nsabi mu kala ye kikundi kiasikila? Ekuma?

³ Zola muna Yave i nsabi mu kala ye kikundi kiasikila. Solomo wa Ntinu wasoneka vo: ‘O muntu vo sunda nkw’andi ansona, nwole bantelamena: nsinga wa nzinga tatu ke uvika danukanga ko.’ (Kim. 4:​12) E kikundi kisikilanga vava Yave kekalanga nsinga wetatu muna kikundi kiaki.

⁴ Dialudi vo awana ke bezolanga Yave ko balenda mpe vanga kikundi kiambote. Kansi, vava wantu awole besikidisanga kikundi kiau muna zola kwau muna Nzambi, e kikundi kiau kiangolo kikala. Kele vo ntantani zikotele, akundi ambote bebadikila muntu yo nkw’andi mu mpila ina iyangidika Yave. Vava atantu a Nzambi bevavanga vambula kikundi kiaki, bemonanga vo kikundi ki’Akristu akieleka kiasikila kikilu. Muna lusansu lwawonso, selo ya Yave betambulwilanga o fwa ke mu yekola mpangi zau ko.​—⁠Tanga 1 Yoane 3:⁠16.

5. Ekuma kikundi kia Rutu yo Naomi kiakadila kiasikila?

⁵ Ka lukatikisu ko vo, e kikundi kiambote tulenda kala kiau i ki’awana bezolanga Yave. Badika kikundi kia Rutu yo Naomi. Kimosi muna yikundi iyikwanga muna Nkand’a Nzambi kitoma kutusivikisanga, i kikundi ki’akento awaya. Ekuma kikundi kiau kiakadila kiasikila? Rutu wayik’e kuma vava kavova kwa Naomi vo: “O nkangu aku i nkangu ame; o Nzambi aku i Nzambi ame. . . . O Yave umpangila wo yo lutakesa wo, tuvambaniswa yo ngeye yo mono kwa lufwa kaka.” (Rutu 1:​16, 17) Kieleka, Rutu yo Naomi zola kwasikila bakala kwau muna Nzambi, bayambula vo zola kwaku kwabafila muna mpila bakadilanga muntu yo nkw’andi. Muna kuma kiaki, yau ewole basambulwa kwa Yave.

Adieyi Tufwete Vanga mu Kala Y’akundi Ambote?

6-8. (a) Adieyi divavwanga mu kala ye kikundi kiasikila? (b) Nkia mambu olenda vanga muna yantika kikundi?

⁶ E mbandu a Rutu yo Naomi isonganga vo kikundi kiambote ke kivangamenanga ku kinsalukisa ko. O zola muna Yave i nsabi mu kala ye kikundi kiasikila. Kansi, ngolo ye kuyivana kuna mvevo divavanga mu kala ye kikundi kiambote. Kana nkutu yitu ana besambilanga Yave, bafwete sia ngolo mu kala akundi ambote. Adieyi tufwete vanga mu kala y’akundi ambote?

 ⁷ Yantika kikundi. Paulu wa ntumwa wakasakesa akundi andi muna nkutakani a Roma mu ‘tatidil’o zola nzenza.’ (Roma 12:​13) Muna tatidila yovo yima konso fu, muntu malembe-malembe keyantikilanga. Diau adimosi, e fu kia zola nzenza mu mambu makete kiyantikilanga. Ka vena muntu ko lenda tatidila e fu kia zola nzenza vana fulu kiaku. (Tanga Ngana 3:27.) Imosi muna mpila olenda tatidila zola nzenza i bokelanga ampangi muna nkutakani mu dila vamosi kana nkutu madia makete. Nga lenda kio kitula se fu kiaku kia kayilanga mpangi za nkutakani eno?

⁸ Mpila yakaka olenda yantikila kikundi i vaikanga ye mpangi zaswaswana muna salu kia umbangi. Vava owanga mpangi kesianga umbangi kwa muntu ye ziku kiawonso mu kuma kia zola kwandi muna Yave, ka lukatikisu ko vo kikundi yo mpangi ndioyo kiwokela.

9, 10. O Paulu nkia mbandu kasisa? Aweyi tulenda kuntanginina?

⁹ Nusâdila muna zola. (Tanga 2 Korinto 6:​12, 13.) Nga omonanga vo muna nkutakani eno ke muna yo muntu ko olenda vanga yandi kikundi? Nga dilenda kala vo wantu akete kaka oyindulanga ana balenda kala akundi aku? Paulu wa ntumwa mbandu ambote kasisa ya sâdila muna zola. Entete, Paulu kayindulanga ko vo lenda kala nkundi kw’awana bakala vo ke Ayuda ko. Kansi, kuna kwalanda wakituka se “ntumw’azula.”​—⁠Roma 11:⁠13.

¹⁰ Vana ntandu, Paulu kavanganga kaka kikundi yo wantu a ntel’andi ko. Kasikil’owu, kikundi kiambote kakala kiau yo Timoteo kana una vo baswaswana muna mvu ye nsansuka. O unu, aleke ayingi bebakanga nluta muna kikundi bevanganga muna nkutakani y’awana bena vo ambuta. Vanessa una ye tezo kia 20 ma mvu, wavova vo: “Mvwidi nkundi ambote, wa mpangi ankento una ye tezo kia 50 ma mvu. Ikumvovesanga konso diambu dina ndenda vova kwa nkundi a ntel’ame. Mpangi ndioyo zola ketoma kunzolanga.” Aweyi bavangila kikundi kiaki? Vanessa wavova vo: “Kiavingila ko vo kayantika. Mono yasia ngolo za yantika kikundi kiaki.” Nga osianga ngolo za vanga kikundi y’awana balutidi kimbuta? Elo, Yave osambula ngolo zaku.

11. Adieyi tulenda longoka muna mbandu a Yonatane yo Davidi?

¹¹ Kala nkwa kwikizi. Solomo wasoneka vo: “O nkundi ozolanga ntangwa zawonso, o mpangi muna mpasi kawutukila.” (Nga. 17:​17) Vava kasoneka mvovo miami, Solomo nanga kikundi kia Davidi wa s’andi yo Yonatane kayindula. (1 Sam. 18:⁠1) Saulu wa Ntinu wazola vo Yonatane kavinga vana kunda kia kintinu kia Isaele. Kansi, Yonatane watambulwila vo Davidi, ona wasolwa kwa Yave,  kakala se ntinu. Nswaswani yo Saulu, Yonatane kamwena Davidi kimpala ko. Kafunga makasi ko vava Davidi kasanisinwanga, ngatu kwikila muna mvovo mia Saulu vava kakumbanga Davidi. (1 Sam. 20:​24-​34) Nga tulandanga mbandu a Yonatane? Nga tuyangalalanga vava akundi eto bevewanga kiyekwa muna nkutakani? Vava bekalanga mu mpasi, nga tukubafiaulwisanga yo kubasadisa? Kele vo muntu okumbanga nkundi eto, nga tukwikilanga muna mvovo miandi vana vau? Nga tutaninanga nkundi eto nze una Yonatane kavanga?

Nkia Ntangwa Tulenda Vonda Kikundi?

12-14. Nkia ntonta benwananga zau alongoki a Nkand’a Nzambi? Aweyi tulenda kubasadisila?

¹² Vava nlongoki a Nkand’a Nzambi keyantikanga soba zingu kiandi, olenda wanana ye ntonta mu kuma kia yikundi. Nanga una y’akundi ana ketoma zolanga, kansi ke bezingilanga ngwizani ko ye nsiku mia Nkand’a Nzambi. Entete, nanga wazolanga kala yau vamosi. Kansi owau, oyantikidi mona vo mana bevanganga akundi andi malenda kunsia mu vonza. Omwene vo diamfunu mu lembi viokesanga ntangwa yayingi yo yau. (1 Kor. 15:​33) Kana una vo i wau, olenda banza vo ke kala diaka nkundi ambote ko, kele vo oyambwidi kala vamosi ye akundi andi.

¹³ Avo u nlongoki a Nkand’a Nzambi onwananga ye ntonta zazi, sungamena vo nkundi ambote oyangalala mu mona ngolo ovanganga za singika zingu kiaku. Nanga olenda kuyikama yo yantika mpe longoka oma ma Yave. Kuna diak’e sambu, akundi ambi beyantika ‘kutianguna’ wau oyambwidi kwenda yau muna “ulolo wa yingalu.” (1 Pet. 4:​3, 4) Kieleka, yau i akundi ambi, ke ngeye ko.

¹⁴ Vava alongoki a Nkand’a Nzambi bebembolwanga kw’akundi ana balembi zolanga Nzambi, ampangi muna nkutakani yau bafwete kituka se akundi au. (Ngal. 6:​10) Nga ozeye alongoki a Nkand’a Nzambi ana bekwizanga mu lukutakanu? Nga ovanganga yau kikundi?

15, 16. (a) Adieyi tufwete vanga kele vo nkundi eto oyambwidi sadila Yave? (b) Aweyi tulenda songela zola kweto muna Nzambi?

¹⁵ Adieyi tuvova kele vo nkundi muna nkutakani oyantikidi kolamena Yave yo vaikiswa muna nkutakani? Ediadi dilenda kikilu kutukendeleka. Muna songa una kamona vava nkundi andi kayambula sadila Yave, mpangi mosi ankento wavova vo: “Yamona nze vika sia vo yîkwa kimosi kia nitu ame kifwidi. Yabanzanga vo nkundi ame wasikila kakala muna ludi, kinga nkwa disu kunsi a lukaya. Yabakula vo ekani diamfilanga mu sadila Yave i mu yangidika mase mandi. Mono mpe yayantika fimpa dina diamfilanga. Nga isadilanga Yave mu yangidika mase mame?” Aweyi mpangi ankento ndioyo kasundila ntantu kamonanga? Wavova vo: “Yayekeka ntantu zame kwa Yave. Yabak’e nzengo za songa kwa Yave vo ikunzolanga mu kuma kia fu yandi yambote, ke mu kuma ki’akundi ko ana kampana muna nkubik’andi.”

¹⁶ Ke tulendi kala akundi a Nzambi ko kele vo tuvangidi kikundi y’awana besolanga kala akundi a nza. Yakobo wasoneka vo: “Nga ke nuzeye wo ko vo kikundi ye nza i kitantu yo Nzambi e? Dianu vo, konso on’okanini o kala nkundi a nza, wiyisidi se ntantu a Nzambi.” (Yak. 4:⁠4) Tulenda songa zola kweto muna Nzambi muna kalanga ye vuvu vo okutusadisa mu sund’e ntantu za vidisa nkundi kele vo tusikidi ye kwikizi muna yandi. (Tanga Nkunga 18:25.) Mpangi ankento ona tuyikidi kala  edi kakudikila: “Yalongoka vo ke tulendi komekena muntu ko kazola Yave yovo katuzola. Ezazi i nzengo za muntu yandi kibeni.” Kansi, adieyi tulenda vanga mu siamisa kikundi y’awana bena muna nkutakani?

Aweyi Tulenda Siamisina Kikundi?

17. Akundi ambote aweyi bemokenenanga?

¹⁷ Mbokena zambote kikundi zisiamisanga. Kele vo otangidi lusansu lwa Nkand’a Nzambi mu kuma kia Rutu yo Naomi, Davidi yo Yonatane, ye mu kuma kia Paulu yo Timoteo, omona vo akundi awaya fu kia mokena kuna ziku kiawonso bakala kiau yo zitisa muntu yo nkw’andi. Muna kuma kia mpila ina tufwete mokenenanga y’akaka, Paulu wasoneka vo: “E mpov’eno yangemb’e lumbu yawonso, yasiw’o mungwa.” Paulu mpila ina tufwete mokenenanga y’awana bena “kuna mbazi” kayika, i sia vo, awana bena vo ke mpangi zeto ko z’Akristu. (Kol. 4:​5, 6) Muna kuma kiaki, avo tuvoveswanga vo twakala ye mpova yangemba ye mindembi-kwikila, tufwete sakisa wo vanga kw’akundi eto muna nkutakani.

18, 19. Aweyi tufwete badikila elongi tuvewanga kwa nkundi una vo Nkristu? Nkia mbandu ambote batusisila akuluntu a nkutakani ya Efeso?

¹⁸ O nkundi ambote ozitisanga ngindu za nkw’andi. Muna kuma kiaki, e mbokena zau zifwete kalanga za ngemba ye ziku. Solomo wa Ntinu angangu wasoneka vo: “Mazi mansunga ye ndumbu i mwesa ntim’e kiese, o toma kwa nkundi a muntu kwatuka mun’elongi dia ntima.” (Nga. 27:⁠9) Nga i wau obadikilanga elongi ovewanga kwa nkundi aku? (Tanga Nkunga 141:⁠5.) Vava nkundi kekuvanang’elongi mu kuma ki’evangu diambi, aweyi obadikilanga elongi diadi? Nga obadikilanga dio se sinsu kia zola ovo makasi ofunganga?

¹⁹ Paulu wa ntumwa wayangalelanga kikundi kiambote kakala kiau y’akuluntu a nkutakani ya Efeso. Nanga akaka muna yau wabazaya vava bakituka minkwikizi. Muna lumbu kiansuka kakala yau, wabavan’elongi diamfunu. Aweyi babadikila elongi diadi? Akundi a Paulu ke bafunga makasi ko. Kansi, bayangalela o zola kabasonga yo yantika dila, kadi bazaya wo vo ke bekumona diaka ko.​—⁠Mav. 20:​17, 29, 30, 36-38.

20. O nkundi ambote adieyi kevanganga?

²⁰ Nkundi ambote ke tambulwilanga kaka elongi ko, ozolanga mpe vana elongi. Kansi, tufwete zayang’e ntangwa ya “sikila muna mambu [ma yeto kibeni].” (1 Tes. 4:​11) Tufwete sungamenanga mpe vo konso muntu mu yeto “okusamwin’e nsangu kwa Nzambi.” (Roma 14:​12) Kansi, vava dikalanga diamfunu, o nkundi ambote olenda sadisa nkw’andi mu sungamena nkanikinu mia Yave. (1 Kor. 7:​39) Kasikil’owu, adieyi ovanga kele vo owilu vo nkundi aku una vo mpumpa oyantikidi banda kimakangu yo mundembi kwikila? Vana fulu kia kala yo wonga wa kendeleka nkundi aku, nga oyambula kunsonga ngindu zaku mu kuma kia diambu diadi? Adieyi ofwete vanga kele vo nkundi kazolele kuwila ko? O nkundi ambote okwenda dio zayisa kw’akuluntu kimana basadisa nkundi andi ona uyisidi mu nzila zambi. O vanga wo unkabu divavanga. Kansi, kele vo yau ewole Yave bezolanga, kikundi kiau ke kifwa ko.

21. Ezak’e ntangwa, adieyi tulenda vanga yeto awonso? Ekuma dinina o mfunu mu siamisa kikundi muna nkutakani?

²¹ Tanga Kolosai 3:​13, 14. Ezak’e ntangwa, akundi eto balenda ‘kutubak’e diambu,’ oyau mpe balenda vanga yovo vova diambu dilenda kutufungisa makasi. Yakobo wasoneka vo: “Mambu mengi tutang’esakuba yeto awonso.” (Yak. 3:⁠2) O kala nkundi ambote ke disongele ko vo ke tulendi vanga edi diambi ko kw’akundi eto, kansi i zaya yambulwila e mbi ya muntu yo nkw’andi. Muna kuma kiaki, diamfunu twasiamisa kikundi kieto muna mokenanga ye ziku kiawonso yo yambulwila muntu yo nkw’andi. Avo tusonga zola kwa mpila yayi, kukala se “kangwa kia zikuka.”

Nkia Mvutu Ovana?

• Adieyi tufwete vanga mu kala y’akundi ambote?

• Nkia ntangwa tulenda vonda kikundi?

• Aweyi tulenda siamisina kikundi?

[Yuvu ya Longoka]

[Foto ina muna lukaya lwa 18]

Kikundi kia Rutu yo Naomi mu nki kiatuka?

[Foto ina muna lukaya lwa 19]

Nga una ye fu kia zola nzenza?