Nga Wakumama yo Simam’e Mianzi Vana Nkubilwa?

NGA wamona kala nti anene unikunwanga kwa tembwa kiangolo, kansi wau ke ubwe? Ekuma? E kuma kadi e mianzi miandi miatoma simama muna ntoto. Tulenda kala nze nti wau. Vava tuwanananga ye mpasi muna zingu kieto, tulenda zo zizidila kele vo ‘twakumama yo simam’e mianzi vana nkubilwa.’ (Ef. 3:​14-​18) Nki i nkubilwa wau?

Nkand’a Nzambi uvovanga vo “Kristu Yesu yandi kibeni i mbut’etadi dia konko” yovo nkubilwa wa nkutakani y’Akristu. (Ef. 2:20; 1 Kor. 3:​11) Wau vo tu Akristu, tukasakeswanga mu ‘kangadila muna yandi, twasimama yo vangamena muna yandi, yo sikidiswa muna lukwikilu.’ Avo tuvanga wo, tulenda zizidila konso mpasi zilenda tonta lukwikilu lweto kumosi ye zina zikwizilanga mu ‘mvovo mianlebo’ mitukanga muna “luvuki luamfwanti” lwa wantu.​—⁠Kol. 2:​4-8.

“Ntau, yo Lambuka, yo La, yo Sina”

Aweyi tulenda ‘simamena’ yo ‘sikila muna lukwikilu’? Imosi muna mpila tulenda toma simikina e mianzi muna ntoto i longokanga Diambu diavumunwinwa dia Nzambi. Yave ozolele vo ‘twakala kikilu ye ngolo za zaya, y’aveledi awonso, owu win’o ntau, yo lambuka, yo la, yo sina’ kwa ludi. (Ef. 3:​18) Muna kuma kiaki, ke vena Nkristu ko ofwete yangalela umbakuzi wakete, wa zayanga kaka “mambu ma lubantiku” mena muna Diambu dia Nzambi. (Ayib. 5:12; 6:⁠1) Kansi, yeto awonso tufwete si’e ngolo za wokesa umbakuzi weto wa Nkand’a Nzambi.​—⁠Nga. 2:​1-5.

Ediadi ke disongele ko vo, o kala yo zayi wayingi diau kaka divavwanga mu ‘simama yo sikila’ muna ludi. Kadi, Satana mpe ozeye mana masonama muna Nkand’a Nzambi. Vena ye diambu diakaka divavwanga. Tufwete ‘zay’o zola kwa Kristu, kuna kuviokele o zayi.’ (Ef. 3:​19) Vava tulongokanga mu kuma kia zola kweto muna Yave ye muna ludi, umbakuzi weto muna  Diambu dia Nzambi ukumika lukwikilu lweto.​—⁠Kol. 2:⁠2.

Teza Umbakuzi Waku

Ekuma olembi tezela umbakuzi waku muna maka malongi mena muna Nkand’a Nzambi? O vanga wo dilenda kukasakesa mu longoka Nkand’a Nzambi ye sungididi kiawonso. Kasikil’owu, tanga e tini yantete ya nkanda kasoneka Paulu wa ntumwa kwa esi Efeso. (Tala babu, “Kuna kwa Esi Efeso.”) Vava ofokola tanga e tini yayi, ukiyuvula: ‘Nga nzeye nsas’a mvovo mia Nkand’a Nzambi mina mitekameso muna babu?’ Yambula twafimpa e mvovo miami.

Basolwa ‘Una ke Kiasemeno nza Ko’

Paulu wasonekena akw’andi vo: “[Nzambi] katekelel’o kutukanin’o uwana muna Yesu Kristu oku kwa yandi kibeni.” Elo, Yave wakana o sola wantu akaka mu kala se wan’andi kun’ezulu. Wana awaya a Nzambi bekituka se atinu ye anganga kumosi yo Kristu. (Roma 8:​19-23; Lus. 5:​9, 10) Muna mpaka kafidisa o Satana mu kuma kia kimfumu kia Yave, wasonga vo wantu ke besikila ye kwikizi ko kwa Nzambi. Kansi, Yave wasola wantu awaya mu katula e mbi yawonso omu nza, kumosi ye Nkadi Ampemba wa Satana w’etuku dia mbi. Yave kateka kana ko konso muntu mun’awana bekituka se wan’andi kun’ezulu. Kansi, Nzambi wateka wo zaya vo vekala ye buka kia wantu ana beyala kumosi ye Kristu kun’ezulu.​—⁠Lus. 14:​3, 4.

Nkia “nza” kayika Paulu vava kasonekena Akristu akw’andi, bena se buka kina  kiasolwa “ova ke kiasemeno nza ko”? Ekolo kayika o Paulu, ke vitila Nzambi kasema o ntoto yovo wantu ko. Kadi, ediadi ke diansongi ko. Ekuma Adami yo Eva bavaninwa tumbu kele vo Nzambi wakizayila wo vo sumuka besumuka una kabasemene ko? Ozevo, nkia ntangwa o Nzambi kavava singika mpasi zatwasa Adami yo Eva vava bayikama Satana muna kolamena kimfumu kia Nzambi? Yave wavanga wo vava kaka mase meto mantete bakolama, kansi vitila kiayantika e nza ya wantu asumuka ana bafwana vuluzwa.

“Mun’owu wa Umvwama wa Nsambu Zandi”

Ekuma Paulu kavovela vo e nkubika ziyikwanga muna tini yantete ya nkanda Efeso “mun’owu wa umvwama wa nsambu [za Nzambi]” zavangamena? Wavova wo mu songa vo Yave kakomekenwa ko mu kûla o wantu mun’esumu.

Kieleka, ke vena mosi ko muna yeto wafwanukina kûlwa. Kansi, mu kuma kia zola kwandi muna wantu, Yave wavanga e nkubika mu kutukûla. Wau vo tu asumuki, o lukulu lweto nze una Paulu kavova, mu nsambu za Nzambi kaka tulenda lo vwila.

Mbumba Y’ekani dia Nzambi

Kuna lubantiku, Nzambi kasengomona ko una kadi fokolwela e mpasi zatwasa Satana. E diambu diadi diakala se ‘mbumba.’ (Ef. 3:​4, 5) Kuna kwalanda, vava kiasikidiswa e nkutakani ya Kikristu, Yave wasengomona una kelungisila ekani diandi mu kuma kia wantu ye ntoto. Paulu wasasila vo, ‘muna ntangwa kasikidisa,’ o Nzambi wavanga ‘nkubika,’ i sia vo, wasikidisa mpila ya vangila mambu, kimana kayikakesa diaka vangwa yandi yawonso yangangu.

O yikaneswa kwaku kwayantika kina kia Pentikosti ya mvu a 33 wa Tandu Kieto, vava Yave kayantika yikanesa awana beyala entwadi yo Kristu kun’ezulu. (Mav. 1:​13-15; 2:​1-4) Kuna kwalanda, awana bezingila yakwele mvu muna paradiso ova ntoto, muna wisa kia Kintinu kia Masia kiyalwa kwa Kristu, bayantika yikaneswa. (Lus. 7:​14-17; 21:​1-5) E ‘nkubika’ yayi ke Kintinu kia Masia ko, kadi e Kintinu kiaki mu mvu wa 1914 kaka kiayantika yala. E nkubika yayi i mpila ina Nzambi kevangilanga mambu mu lungisa ekani diandi dia yikanesa vangwa yandi yawonso.

‘Zikuka Muna Zayi’

Kieleka, o kala ye nkubika yambote y’elongi dia ngeye kibeni dilenda kusadisa mu toma zaya “o ntau, yo lambuka, yo la, yo sina” kwa ludi. Kansi, dialudi mpe vo Satana osadilanga e mpasi za zingu mu vava kutuyoyesa yovo fwasa e nkubika y’elongi dia yeto kibeni. Kuyambula ko vo ediadi diabwila. Sadila o “zayi” kekuvananga o Nzambi kimana ‘wazikuka muna zayi.’ (1 Yoa. 5:20; 1 Kor. 14:​20) Ofwete kala ye ziku vo obakulanga mana okwikilanga yo kala wakubama mu song’e ‘kuma kia vuvu kin’omo ngeye.’​—⁠1 Pet. 3:⁠15.

Yindula vo wakala kuna Efeso vava nkand’a Paulu watangwa mu nkumbu yantete. Nga e mvovo miandi ke miadi kufila ko mu kala y’etima dia zikuka muna ‘zayi wa Mwan’a Nzambi’? (Ef. 4:​13, 14) Elo, nanga wadi kala y’etima diadi. Muna kuma kiaki, yambula vo e mvovo mia Paulu miafila mu vanga diau adimosi o unu. O kala yo zola muna Yave yo zayi wa Diambu diandi, dikusadisa mu ‘kumama yo simam’e mianzi vana nkubilwa’ ya Kristu. Muna mpila yayi, okala wakubama mu zizidila konso ntonta kalenda kutwasila o Satana ekolo e nza yayi yambi ke yalweke ku mfoko ko.​—⁠Nku. 1:​1-3; Yer. 17:​7, 8.

[Foto ina muna lukaya lwa 27]

“Kuna kwa Esi Efeso”

‘Okembelw’o Nzambi w’Es’andi a Mfumu eto Yesu Kristu, ona watusambwila nsambu zawonso zakimwanda, muna mwezulu muna Kristu: wauna katusolola muna yandi, ova ke kiasemeno nza ko, twavelela yo kondwa twangu vana ndose andi muna zola: wau katekelel’o kutukanin’o uwana muna Yesu Kristu oku kwa yandi kibeni, mun’owu wa kiakankamba kia luzolo luandi, muna lusanisinu lua nkembo a nsambu zandi, zina katuvevolwelela muna Ndiona wanzolwa: ona tunina ye nkûk’eto muna menga mandi, o luyambulwilu lua makuzuka meto, mun’owu wa umvwama wa nsambu zandi, zina katuwokesela muna ngangu zawonso, yo lulungalalu, wau katuzayisa e mbumba ya luzolo luandi, mun’owu wa zola kwandi mu mana kayikànina ma mpila ina kevangilanga mambu muna ntangwa kasikidisa, i sia vo, kayikanesa diaka ma yawonso muna Kristu, e ma ina kun’ezulu, y’eyi in’ova nza.’​—⁠Ef. 1:​3-10, NW.