Nsambila ya esi nzo Mfunu ina Muna Vuluka

YINDULA mpasi zikala muna “vit’a lumbu kianene kia Nzambi wa Mpungu-ngolo.” (Lus. 16:​14) Mika wa ngunza wasoneka vo: “E miongo mikunzelokela, e ndimba mibulwa nze dimbu vana tiya, nze maza mapongoka vana mbeka.” (Mika 1:⁠4) Adieyi dibwila awana ke besadilanga Yave ko? Muna Nkand’a Nzambi tutanganga vo: “E lumbu kina ana bavondwa kwa Yave bekala tuka nsuka mosi a nza yakun’eyaka nsuk’a nza: ke bedidilwa ko, ovo kutikwa, ngatu zikwa; bekala se mbole vana ntoto.”​—⁠Yer. 25:⁠33.

Muna kuma kia lulukisu lwalu, amase, ayingi muna yau besansanga wana yau amosi, diamfunu bakiyuvula mu kuma kia wan’au bena vo bafwana kuyibakil’e nzengo: ‘Nga bevuluka muna vita ya Armangedo?’ O Nkand’a Nzambi ukutuvanang’e vuvu vo balenda vuluka kele vo bekala ye ngwizani ambote yo Yave mun’owu wa kimbuta kiau.​—⁠Mat. 24:⁠21.

Mfunu wa Vaula Ntangwa ya Nsambila ya Esi Nzo

Mase bafwete vanganga mawonso balenda mu sansila wan’au ‘muna ndonga yo lusansu lwa Yave.’ (Ef. 6:⁠4) O longoka Nkand’a Nzambi yo wan’aku diambu diamfunu kikilu. Tuzolele vo aleke eto bakala nze Akristu kuna Filipi, ana kasanisina o Paulu mu kuma kia luzolo lwau lwa lemvokela Yave. Wasoneka vo: “Azolw’ame, wauna nulemvokelang’aka, ke vana ngina kaka ko, kansi wau ngina kw’akaka, nusakisanga wo, owu wa fûl’olueno luvuluku, yo wonga y’ezakamu.”​—⁠Fili. 2:⁠12.

Nga wan’aku belemvokelanga nsiku mia Yave vava kukalanga yau vamosi ko? Adieyi tuvova vava bekalanga kuna sikola? Aweyi olenda sadisila wan’aku mu bakula e ngangu zina muna lemvokela nsiku mia Yave, kimana e nsiku miami miabafila vava bekalanga va yau kaka?

E nsambila ya esi nzo mfunu ina muna sadisa wan’aku bakala yo lukwikilu lukubafila mu lemvokela Yave. Muna kuma kiaki, yambula twabadika mambu matatu mamfunu malenda kunusadisa mu sikidisa elongi dia esi nzo.

Nusikidisa Lumbu

O Nkand’a Nzambi usonganga vo mbasi za Nzambi babokelwa vana ndose andi muna lumbu kiasikidiswa. (Yobi 1:⁠6) Vanga diau adimosi yo wan’aku. Nusikidisa lumbu ye ola nufwete kalanga ye nsambila ya esi nzo yo tatidila lumbu kiaki. Vana ntandu, nusola lumbu kiakaka kina nulenda vang’elongi kele vo diambu dia kinsalukisa dibwidi.

Ekolo lumbu iviokanga, venga e fu kia vanganga elongi dia esi nzo kele vo nubakidi e ntangwa. Sungamena vo wan’aku i alongoki aku a Nkand’a Nzambi ofwete sia va fulu kiantete. Kansi, o Satana ozolele kubavempola. (1 Pet. 5:⁠8) Avo nuyambwidi elongi dia esi nzo mu kuma kia tala televizau yovo mambu makaka makondwa mfunu, o Satana sunda kesunda.​—⁠Ef. 5:​15, 16; 6:12; Fili. 1:⁠10.

Nukudikilanga Mambu Makaka Mamfunu

Fuku wa Nsambila ya Esi Nzo ke ntangwa ya longoka kaka ko. Nuvavanga kotesa mambu makaka mamfunu. Mu nkia mpila? Ezak’e ntangwa, nulenda sola mambu malenda bwila wan’eno mu lumbu ikwiza. Kasikil’owu, nulenda vovela oma ma salu kia umbangi. Aleke beyangalelanga vanga mana bazeye toma vanga. O vanga nsongesela yo yindula dina nulenda vova vava wantu bekutuzengang’e mvovo, dilenda sadisa wana mu yangalela kuyivana mu mpila zayingi za sila umbangi.​—⁠2 Tim. 2:⁠15.

 Nulenda mpe vovela mambu malenda sadisa wan’eno mu zizidila ntonta z’akundi a sikola. E kapu kia 15 kia nkanda Os Jovens Perguntam​—⁠Respostas Práticas, Volume 2, kilenda sadilwa mun’elongi dia esi nzo. Muna lukaya lwa 132 ye 133, muna y’elongi dina yo ntu a diambu vo “Plano para enfrentar a pressão de colegas,” disonganga una nulenda wo vangila. Divananga mpe wan’aku elau dia soneka mvutu zina bamwene vo zambote. Mvovo mina vana yand’a lukaya lwa 133 mikasakesanga aleke vo: “Zayisa e mvutu osonekene kwa mase maku yovo kwa nkundi azikuka” (Treine suas respostas com seus pais ou com um amigo maduro). Ezak’e ntangwa, nulenda vanga nsongesela za mambu mama muna Fuku wa Nsambila ya Esi Nzo.

Nsambila ya esi nzo ivananga mase elau dia sadisa wan’au bakala y’etima dia sala salu ya mwanda ilenda kubasadisa mu kala ye ngwizani ambote yo Yave. Muna diambu diadi, o nkanda Os Jovens Perguntam, Volume 2, muna kapu kia 38, muna y’elongi diamfunu dina yo ntu a diambu vo, “O que fazer da minha vida?” Vava nufimpanga elongi diadi, sadisa wan’aku bazaya vo o kuyivana muna salu kia Yave i diambu disundidi o mfunu muna zingu. Sadisa wan’aku basia etima muna salu kia kimviti a nzila, sadila kuna Betele, kota Sikola ya Nkubama ya Uselo yovo salu yakaka ya ntangwa ke ntangwa.

Lulukisu: Sungamena vo mase makaka ana betokanenanga wete dia wan’au bevanganga vilwa wa sia kaka sungididi kiau mu dina bazolele mu kuma kia wan’au yo lembi kubasanisina mu mana mambote bevanganga. Dialudi vo, diambote mu kasakesa wan’eno mu kuyisila ekani dia kwenda sadila kuna Betele ye salu kia kimisionario. Kansi, vava ukubakasakesanga, keba walembi kendeleka wan’aku muna kubakomekenanga balungisa kaka mana ozolele. (Kol. 3:​21) Sungamena vo mwan’aku yandi kibeni ofwete yima zola muna Yave, ke mu kuma kia sia ko vo ngeye ozelele wo. (Mat. 22:​37) Muna kuma kiaki, kalanga ye fu kia sanisina wan’aku vava bevanganga edi diambote, vana fulu kia siang’e sungididi mu dina ke belungisanga ko. Sadisa wan’aku bayangalela mawonso kevavanga o Yave yo yambula vo yau kibeni bayivana kwa Yave mu kuma kia wete wandi.

Kitula Elongi dia Esi Nzo Diakiese

E diambu dietatu dilenda sadisa mu sikidisa fuku wa Nsambila ya Esi Nzo i mu kitula yo se ntangwa yakiese. Aweyi nulenda wo vangila? Ezak’e ntangwa nulenda winikinanga fukwa (drama) yovo tala vídeo zivaikiswanga kwa Mbangi za Yave. Nulenda mpe tanga kapu ya Nkand’a Nzambi yo sola e tini kafwete tanga konso muntu.

Vena ye malongi mayingi mun’Eyingidilu ye Despertai!, mana nulenda mokena mun’elongi dia esi nzo. Kasikil’owu, nulenda sadila oma mena muna lukaya lwa 31 lwa Despertai!, mun’elongi dina yo ntu a diambu “Qual é a sua resposta?” (“Nkia mvutu ovana?”). Ezak’e ntangwa, mun’Eyingidilu dia nkangu mu vaikiswanga elongi dina yo ntu a diambu “Para os Jovens” (Kuna Kw’aleke Eto) yovo elongi diakaka mu kuma ki’aleke dina yo ntu a diambu vo, “Ensine Seus Filhos” (“Longa Wan’aku”).

 Elongi dina yo ntu a diambu vo, “Os Jovens Perguntam” divaikiswanga muna Despertai! kumosi yo nkanda Os Jovens Perguntam, Volume 2, ulenda sadisa mase bena yo wana bena vo se matoko yovo ndumba. Vava nusadilanga nkanda wau, ke nuvilakananga ko e babu kina yo ntu a diambu “Como responderia?” kuna nsuk’a konso kapu. E babu kiaki ke kia lufimpu kaka ko. E yuvu ina muna babu kiaki ilenda sadilwa mun’elongi dia esi nzo.

Kansi, keba kimana elongi dia esi nzo dialembi kala ye yuvu yayingi nze vika sia vo wantu befundiswanga. Kasikil’owu, ke diambote ko mu lomba kwa mwana katanga mu nding’angolo mana kasoneka vana lukaya luna yo ntu a diambu “Minhas anotações” yovo va fulu yakaka ivavanga vo mwana kasoneka mana keyindulanga. Mun’elongi dina yo ntu a diambu vo, “Uma nota para os pais,” lukaya lwa 3 lwa nkanda wau disonganga vo: “Muna kasakesa wan’aku amatoko yovo andumba, basoneka muna nkanda mana beyindulanga ye ziku kiawonso, ku vavi zaya mawonso ko basonekene wau vo ma mbumba. Kuna kukwiziwa, balenda ziula ntima yo kuvovesa mana basoneka.”

Avo nusikidisa e lumbu kia nsambila ya esi nzo, yo kudikila mambu mena vo mamfunu yo kitula elongi se diakiese, o Yave osambula ngolo nuvanganga. E ntangwa yayi ina vo yamfunu kwa esi nzo, ikunusadisa mu tanina wan’eno kimana bakala ye ngwizani ambote yo Yave.

[Foto ina muna lukaya lwa 31]

Kala ye Ndekwa

“Vava twalongokanga yo wan’eto andumba, mono yo nkaz’ame twafimpanga mana tulongoka kuna nkutakani. I bosi, twalombanga kwa wan’eto bayika mu mvovo miankufi dina balongokele. Ezak’e ntangwa, twavanganga nsongesela za tusansu twa Nkand’a Nzambi yovo za nkotelo za moko muna salu kia umbangi. Twalongokanga oma mena betela ye ntel’a wana, vova oma ma lukasakeso yo kitula elongi se diakiese.”​—⁠J.M., Estados Unidos.

“Muna sadisa mwan’a nlongoki ame a Nkand’a Nzambi mu bakula una wakalanga e nkanda miasadilwanga kuna nz’ankulu, twabandula o nkand’a Yesaya yo katula ntalu zisonganga e kapu ye tini. Twayikakesa makaya mawonso yo sia nti miavindumuka kuna nsuka zau ezole. O mwana wavava tanginina dina kavanga o Yesu mun’esambilu kuna Nazarete. Muna Luka 4:​16-21 tutanganga vo Yesu ‘oyalumwini nkanda [Yesaya], osolwele’ sono kina kavavanga. (Yes. 61:​1, 2) Kansi, vava o mwana kazola vanga diau adimosi, kalenda solola ko e kapu kia 61 kia Yesaya muna nkanda wauna wakondwa e ntalu zisonganga kapu ye tini. Wasivika e ngangu kakala zau o Yesu za sadila e nkanda miami yo vova vo: ‘Kieleka, Yesu nkwa ngangu kakala!’”​—⁠Y.T., Japão.

[Foto ina muna lukaya lwa 30]

O vanga nsongesela dilenda sadisa wan’eno mu zizidila ntonta z’akundi a sikola

[Foto ina muna lukaya lwa 31]

Sia ngolo mu kitula fuku wa Nsambila ya Esi Nzo se ntangw’a kiese