‘Oyeno nu Akundi ame’
‘Oyeno nu Akundi ame’
‘Oyeno nu akundi ame, ovo nuvang’owu inukanikini.’—YOA. 15:14.
1, 2. (a) Akundi a Yesu entete nkia salu yaswaswana basalanga? (b) Ekuma dinina o mfunu dia kala nkundi a Yesu?
O WANTU bakala mun’esuku diantandu yo Yesu, salu yaswaswana basalanga. O Petelo yo mbunzi andi Andere abaki a mbizi bakala. Matai nkwa mpaku kakala. Awana basalanga e salu kiaki ke bazolakananga ko kw’Ayuda. Akaka muna yau, nze Yakobo yo Yoane, bazayana yo Yesu tuka kileke kiau. Akaka nze Natanaele, ke bazayana kolo kiayingi ko. (Yoa. 1:43-50) Kansi, awonso bakala muna fuku wauna wa nkinzi a Nduta muna Yerusaleme, bakala ye ziku vo Yesu i Masia wasilwa o nsilu, wa Mwan’a Nzambi amoyo. (Yoa. 6:68, 69) Ka lukatikisu ko vo bayangalala kikilu vava kabavovesa vo: “Inuyikidi vo nu akundi; kadi wawonso yawa kw’Es’ame, inuzayisi wo.”—Yoa. 15:15.
2 E mvovo mia Yesu kuna kwa ntumwa zandi zakwikizi miyikwanga mpe kw’Akristu akuswa mu lumbu yeto, ye kwa mpangi zau “mameme makaka.” (Yoa. 10:16) Kana nkutu nkia fulu tuzingilanga, tulenda vwa elau dia kala akundi a Yesu. E kikundi kieto yo yandi i diambu disundidi o mfunu, kadi avo tu akundi andi, tu akundi a Yave mpe. Kieleka, ke tulendi finama Yave ko avo ke tutekele finama Kristu ko. (Tanga Yoane 14:6, 21.) Adieyi tufwete vanga mu kala akundi a Yesu? Una ke twafimpidi ko diambu diadi diamfunu, yambula twabadika e mbandu kasisa o Yesu ya kala nkundi ambote yo zaya dina tulenda longoka muna mpila ina alongoki andi babadikilanga kikundi kiandi.
Mbandu a Yesu mu Kala Nkundi Ambote
3. O Yesu aweyi kazayakena?
3 Solomo wa Ntinu wasoneka vo: “O mvwama, ana banzola, engi.” (Nga. 14:20) E mvovo miami misonganga e fu kia wantu alembi lunga, kia vanga kikundi yo muntu muna yindula kaka kina balenda tambula, ke mu kina balenda vana ko. Yesu kavanga kikundi kia mpila yayi ko. Yesu kalandanga mavwa ko ngatu etunda. Dialudi vo, Yesu kasong’o zola kw’etoko dia mvwama yo kumbokela kakala nlandi andi. Kansi, Yesu wavovesa etoko diadi vo kateka lekwa kakala yau yo kayila asukami. (Maku 10:17-22; Luka 18:18, 23) Yesu kazayakana mu kuma kia vanga kikundi ya mvwama ye akwa etunda ko, kansi muna vanga kikundi y’asukami y’awana bavezwanga.—Mat. 11:19.
4. Ekuma tulenda vovela vo akundi a Yesu bavanganga o vilwa?
4 Kieleka, akundi a Yesu bavangang’o vilwa. Vakala ye ntangwa ina Petelo kalembi badikila diambu nze una Nzambi kabadikilanga dio. (Mat. 16:21-23) Yakobo yo Yoane basonga fu kia vava etunda, vava balomba vo Yesu kabavana e fulu ki’etunda muna Kintinu. Evangu diadi diafungisa ntumwa zakaka makasi yo kubafila mu tantana. Kansi, Yesu kuna luzindalalu lwawonso wasingika e ngindu z’akundi andi yo lembi kubafungila makasi.—Mat. 20:20-28.
5, 6. (a) Ekuma Yesu kakadila nkundi a ntumwa zandi? (b) Ekuma Yesu kavondela kikundi kiandi yo Yuda?
5 Yesu wakala nkundi a wantu awaya alembi lunga, ke mu kuma kia sia ko vo kamonanga vilwa bavanganga ko. Kansi, wasianga e sungididi muna makani ye fu yambote bakala yau. Kasikil’owu, Petelo, Yakobo yo Yoane, baleka tulu twangolo vana fulu kia sadisa Yesu muna ntangw’ampasi. Yesu wakendalala mu kuma kia lutovoko lwau. Kana una vo i wau, wazaya makani mambote bakala mau yo vova vo: “O mwand’ele uzolele, kansi nitu yatovoka.”—Mat. 26:41.
6 Kuna diak’esambu, Yesu wavonda kikundi yo Yuda wa mwisi Kereote. Kana una vo Yuda wayisonganga nze nkundi ambote, Yesu wabakula vo o nkundi ndioyo wayambula vo makani mambi makota muna ntim’andi. Wau vo Yuda wakituka nkundi a nza, wayikitula se ntantu a Nzambi. (Yak. 4:4) Muna kuma kiaki, vava Yesu kayikila ntumwa zandi 11 zakwikizi vo akundi, Yuda kakala vo diaka ko.—Yoa. 13:21-35.
7, 8. Aweyi Yesu kasongela o zola kwandi mun’akundi andi?
7 Yesu kasianga sungididi muna vilwa w’akundi andi ko, wavanganga mawonso muna wete diau. Kasikil’owu, walomba kw’Es’andi kabatanina muna ntangw’ampasi. (Tanga Yoane 17:11.) Yesu wazayanga lutovoko lwau lwa nitu. (Maku 6:30-32) Kazolanga kaka kubavovesa ko dina kayindulanga oyandi, kansi wazolanga mpe o wá yo bakula dina yau bayindulanga.—Mat. 16:13-16; 17:24-26.
8 Yesu wasadila zingu kiandi yo fwa muna wete dia akundi andi. Kieleka, wazaya wo vo kafwete vana o moyo andi kimana kalungisa nsiku miansongi mia S’andi. (Mat. 26:27, 28; Ayib. 9:22, 28) Yesu wavana mpe moyo andi muna songa zola kwandi. Yesu wavova vo: ‘Ke vena muntu wina ye nzola isundidi nzola yayi ko, ovo muntu oyekwele nkundi andi o moyo.’—Yoa. 15:13.
Alongoki Aweyi Babadikila Kikundi kia Yesu?
9, 10. Aweyi o wantu babadikilanga e fu kia Yesu kia kaya?
9 Yesu wakala ye fu kia kaya kuna mvevo muna sadilanga ntangwa, zola ye mavwa mandi. Muna kuma kiaki, o wantu bamfinamanga yo kala ye kiese kia kunkayila ina bakala yau. (Luka 8:1-3) Mu kuma kia mana kamona, Yesu wavova vo: “Nuvana, ozevo kivewa kwa yeno; nzongo ambote, ukomenenwa, ubandilwa, usiw’o mabetomona, i bevanina vana mfokol’eno. Kadi muna nzongo nuzongela i kikunuzongelwa.”—Luka 6:38.
10 Kuna diak’esambu, akaka bavavanga finama Yesu kimana kabasadisa. Akundi awaya ambi babembola Yesu vava ke babakula ko dina kavova. Vana fulu kia bunda Yesu e vuvu vava ke babakula ko dina kavova, bayima ngindu zabendomoka yo yambula kunlanda. Nswaswani yo wantu awaya, antumwa basikila ye kwikizi. Nkumbu miayingi, e kikundi kiau yo Kristu kiatontwanga, kansi bavanganga wawonso mu kunsadisa muna ntangw’a kiese ye muna ntangw’ampasi. (Tanga Yoane 6:26, 56, 60, 66-68.) Muna fuku wansuka kakala ova ntoto nze muntu, Yesu wasonga o zola kwandi kuna kw’akundi andi vava kavova vo: “I yeno yaya nunzizididi muna mpukumunwa zame.”—Luka 22:28.
11, 12. Aweyi Yesu kasongela alongoki andi vo wakinu nkundi au? Aweyi babadikila salu kabavana?
11 Ke vavioka kolo ko vava Yesu kasanisina alongoki andi mu kuma kia kwikizi kiau, alongoki awaya mpe bambembola. Bayambula vo wonga wa wantu wasunda zola kwau muna Kristu. Kansi, Yesu wabaloloka. Vava kafwa yo fuluka, wamoneka kwa yau yo kubasonga vo wakinu nkundi au. Vana ntandu, wabavana salu kiavauka, kia kitula “wantu a zula yawonso” s’alongoki yo kala mbangi zandi ‘yakuna nsuk’a nza.’ (Mat. 28:19; Mav. 1:8) Alongoki aweyi babadikila e salu kiaki?
12 Alongoki bavanga wawonso balenda muna sayanesa nsangu za Kintinu. Muna lusadisu lwa mwand’avelela a Yave, bazadisa Yerusaleme ye malongi mau. (Mav. 5:27-29) Ke bayambula lungisa nkanikinu wa Yesu ko wa kitula wantu s’alongoki kana nkutu vava bavumiswanga vo vondwa bevondwa. Ke vavioka mvu miayingi ko tuka bavaninwa nkanikinu wau kwa Yesu, Paulu wa ntumwa wasoneka vo nsangu zambote zatelekwa “muna nsema wawonso, wina kunansi ezulu.” (Kol. 1:23) Kieleka, alongoki awaya basonga vo bayangalelanga kikundi bakala kiau yo Yesu.
13. Alongoki a Yesu aweyi bayambulwila vo malongi mandi masoba e zingu kiau?
13 Awana bakituka alongoki, bayambula mpe vo malongi ma Yesu masoba e zingu kiau. Kuna kw’akaka diavavanga vo bavanga nsobani zampwena muna fu ye kiwuntu kiau. Alongoki akaka ampa, entete bakalanga ye fu kia lekana akala ye akala, tá zumba, kolwa malavu yo wivi. (1 Kor. 6:9-11) Akaka basoba e mpila babadikilanga wantu a se kia nitu kiaswaswana. (Mav. 10:25-28) Kana una vo i wau, balemvokela Yesu. Batengola uwuntu wau wankulu yo vwat’owu wampa. (Ef. 4:20-24) Vava bazaya o “nyindu a Kristu,” bayantika tanginina mavangu mandi ye mpila kabadikilang’e mambu.—1 Kor. 2:16.
Kikundi yo Kristu o Unu
14. Adieyi kayika Yesu kevanga kuna “mbaninu a tandu?”
14 Ndonga muna Akristu a tandu kiantete bakala vamosi yo Yesu yo kumona vava kafuluka. Oyeto ke tuna y’elau diadi ko. Kansi, aweyi tulenda kadila akundi a Kristu? Imosi muna mpila tulenda kadila akundi andi, i lemvokelanga luludiku lwa ntaudi akwikizi yo lulungalalu, i sia vo, mpangi zakuswa za Yesu ana bakinu ova ntoto. Yesu wasia nsilu vo kuna “mbaninu a tandu,” osia ntaudi yayi “kiyekwa kia salanganu yandi yawonso.” (Mat. 24:3, 45-47) O unu, ndonga mun’awana bevavanga kala akundi a Kristu ke bena mu buka kia ntaudi akwikizi ko. E mpila bebadikilanga luludiku bevewanga kwa buka kia ntaudi akwikizi, nkia diambu ilenda vanga muna kikundi kiau yo Kristu?
15. Aweyi o muntu kalenda songela vo una nze ememe yovo nkombo?
15 Tanga Matai 25:31-40. Yesu wayikila ana bena muna buka kia ntaudi akwikizi vo mpangi zandi. Muna kingana kia vambula mameme ye nkombo, Yesu watoma dio kiesesa vo konso dina tuvangidi kwa mpangi zandi dina nze kwa yandi tuvangidi wo. Wasonga vo diambu diswaswanesa ndiona una nze ememe yo ndiona una nze nkombo, i dina kavanga kana nkutu kwa ‘ndiona wanke vana vena mpangi [zandi].’ Muna kuma kiaki, o yikama buka kia ntaudi akwikizi, i mpila yambote ina awana bena ye vuvu kia zingila ova ntoto balenda songel’etima diau dia kala akundi a Kristu.
16, 17. Aweyi tulenda songela vo tu akundi a mpangi za Kristu?
16 Kele vo vuvu kia zingila ova ntoto una kiau, muna Kintinu kia Nzambi, aweyi olenda songela vo u nkundi a mpangi za Kristu? Yambula twabadika mpila tatu tulenda wo songela. E mpila yantete, i kuyivana muna salu kia samun’e nsangu zambote. Kristu wakanikina mpangi zandi vo basamuna nsangu zambote mu nza yawonso. (Mat. 24:14) Kansi, diampasi diadi kala kwa nsâdisw’a mpangi za Kristu mu lungisa kiyekwa kiau kondwa lusadisu lwa mpangi zau mameme makaka. Elo, konso ntangwa mameme makaka bekuyivananga muna salu kia umbangi, mpangi za Kristu besadisanga mu lungisa salu kiavauka bavewa. Nze Kristu, esi buka kia ntaudi akwikizi yo lulungalalu betoma yangalelanga lusadisu bevewanga kw’akundi au.
17 E mpila yazole, mameme makaka balenda sadisila mpangi za Kristu, i vananga tukau muna nungununa salu kia umbangi. Yesu wakasakesa alandi andi bayivangila yikundi muna “umvwama wa vilwa.” (Luka 16:9) Diadi ke disongele ko vo tulenda sumba kikundi kia Yesu yo Yave. Kansi, vava tusadilanga mavwa meto muna yikama oma ma Kintinu, tusonganga kikundi yo zola kweto ke mu mvovo kaka ko, kansi ye muna ‘mavangu ye ludi.’ (1 Yoa. 3:16-18) Tuvananga tukau twatu vava tukuyivananga muna salu kia umbangi, vava tuvananga nzimbu muna yikama salu kia tunga yo lunga-lunga fulu yeto ya nsambila, ye nungununa salu kia umbangi mu nz’amvimba. Yave yo Yesu betoma yangalelanga tukau twa mvevo tuvananga, twakala twakete yovo twayingi.—2 Kor. 9:7.
18. Ekuma tufwete lemvokelanga luludiku bekutuvananga akuluntu muna nkutakani?
18 E mpila yatatu ina yeto awonso tulenda songela vo tu akundi a Kristu, i landanga luludiku bevananga akuluntu muna nkutakani. Wantu awaya besolwanga muna mwand’avelela muna mfil’a Kristu. (Ef. 5:23) Paulu wa ntumwa wasoneka vo: “Nulemvokel’awana ben’e wisa vovo nwina, yo kubasakalela.” (Ayib. 13:17) Ezak’e ntangwa, dilenda kala diampasi mu lemvokela luludiku lwa Nkand’a Nzambi tuvewanga kw’akuluntu muna nkutakani. Wau vo tumonanga vilwa bevanganga, dilenda kutufila mu lembi lemvokela luludiku lwau. Kana una vo i wau, Kristu wa Ntu a nkutakani, oyangalelanga sadila wantu awaya alembi lunga. Muna kuma kiaki, e mpila tubadikilanga e wisa kiau dilenda vanga diambu muna kikundi kieto yo Kristu. Tusonganga o zola kweto muna Kristu vava tuyambulwilanga vilwa bevanganga akuluntu yo landa luludiku lwau ye kiese kiawonso.
Akweyi Tulenda Sololwela Akundi Ambote
19, 20. Akinani tulenda solola muna nkutakani? Adieyi tubadika mun’elongi dilanda?
19 Yesu okwamanananga kutulunga-lunga ke mu sadila kaka akuluntu ko, kansi mu kutuvana mpe ngudi, mpangi z’akala ye z’akento muna mwanda. (Tanga Maku 10:29, 30.) Vava wayantika lungana ye Mbangi za Yave, e yitu yaku adieyi bavanga? Nanga bakusadisa mu finama Nzambi yo Kristu. Kansi, Yesu walukisa vo ezak’e ntangwa “atantu a muntu i esi nzo a yandi kibeni.” (Mat. 10:36) Dialukasakeso dia zaya vo muna nkutakani tulenda mo solola ana betoma kutuzola lutila nkutu yitu yeto.—Nga. 18:24.
20 Nze una usonganga mavimpi katwika kwa mpangi kuna nkutakani a Roma, Paulu akundi ayingi kakala yau. (Roma 16:8-16) Yoane wa ntumwa wafokola nkand’andi wetatu muna mvovo emi: “Zingwil’akundi o mavimpi muna nkumbu nkumbu.” (3 Yoa. 14) Kieleka, yandi mpe akundi ayingi ambote kakala yau. Aweyi tulenda tanginina mbandu a Yesu ye y’alongoki a tandu kiantete muna kalanga ye kikundi kiambote ye ampangi zeto z’akala ye z’akento muna nkutakani? Elongi dilanda divana e mvutu za kiuvu kiaki.
Nkia Mvutu Ovana?
• Nkia mbandu kasisa o Yesu ya kala nkundi ambote?
• Alongoki aweyi babadikilanga kikundi kiau yo Yesu?
• Aweyi tulenda songela vo tu akundi a Kristu?
[Yuvu ya Longoka]
[Foto ina muna lukaya lwa 14]
Yesu wasiang’e sungididi muna ngindu z’akundi andi
[Foto ina muna lukaya lwa 16]
Aweyi tulenda songel’etima dieto dia kala akundi a Kristu?