Yuvu Y’atangi

Nki’elongi divewanga muna sono kia Ngana 24:⁠27?

Muna lukisa etoko, nsoneki a Ngana wavova vo: “Sikidisa salu kiaku kuna mbazi, wiyikubikila kio muna kiana; i bosi otunga nzo aku.” Nkia diambu diamfunu diyikwanga mu ngana yayi yavumunwinwa? Etoko kafwete teka kubama una kasompele ko yo wuta wana, yo zaya e mbebe itwasanga o nsilu wau.

Muna mvu miavioka, e nsasa yavanwanga mu kuma kia sono kiaki yasonganga vo o yakala kafwete kaka sia sungididi mu salu kiandi ko, kansi kafwete mpe siang’e ngolo za tunga yovo kasakesa esi nzo andi muna kubalonganga oma ma mwanda. Kanele vo e nsasa yayi yaludi ye ngwizani ina yo Nkand’a Nzambi, kansi ke diau ko i diambu diasina diyikwanga mu sono kiaki. Ekuma? Tubadika kuma yole.

Kiantete, o tunga kuyikwanga muna sono kiaki ke kwa kasakesa ko yovo kumika esi nzo ana bena kala. Kansi, e sono kiaki tunga nzo kikilu kiyikanga. O mvovo wasekolwa vo ‘tunga’ ulenda kala mpe ye nsasa yakaka, ya sikidisa e nzo, i sia vo, sompa yo wuta wana.

Kiezole, e sono kiaki mfunu wa vangila mambu una ufwene kisonganga, nze muntu ovovele vo: “Teka vanga edi, i bosi ovanga diakaka.” Nga ngana yayi isonganga vo tufwete teka sala e salu yeto ya kinsuni i bosi tusala eyi ya mwanda? Ve kikilu!

Kuna nz’ankulu, avo etoko ozolele ‘tunga nzo [andi],’ yovo sompa, kafwete teka kiyuvula: ‘Nga yakubama ngina mu lunga-lunga nkaz’ame yo wana ana tuwuta?’ Vitila kasompa yo wuta wana, kafwete sala kwayingi muna lunga-lunga e mpatu yovo twelezi. Muna kuma kiaki, e nsekola ya Today’s English Version isekolanga sono kiaki vo: “Kuteki tunga nzo ko yovo sompa kele vo e mpatu aku ke yayantikidi yima mbongo ko, mu kala ye ziku vo una yo madia ovana kwa esi nzo aku.” Nga nkanikinu wau ulenda sadilwa mpe o unu?

Elo. Etoko dizolele sompa kafwete kala wakubama mu lungisa e mbebe yayi una ufwene. Kele vo una ye vimpi wambote, kafwete sala. Kansi, o yakala kena kaka ye mbebe ya lungisa nsatu za nitu za esi nzo andi ko. Kadi, o Nkand’a Nzambi usonganga vo o yakala ndiona ke lungisanga e nsatu za esi nzo andi ko muna nitu, muna mwanda yo kubazola, oviokele mundembi-kwikil’o bi. (1 Tim. 5:⁠8) Muna kuma kiaki, vava etoko kekubamanga mu sompa yo wuta wana, kafwete kiyuvula e yuvu nze yayi: ‘Nga yakubama mu lungisa e nsatu za nitu za esi nzo ame? Nga yakubama mu lungisa nsatu za mwanda za esi nzo ame? Nga isinga lungisa e mbebe ya fila elongi dia Nkand’a Nzambi yo nkaz’ame yo wana?’ Nkand’a Nzambi utoma kiesesanga e mbebe yayi yamfunu.​—⁠Nsi. 6:​6-8; Ef. 6:⁠4.

Muna kuma kiaki, etoko dizolele sompa kafwete toma badika elongi dina muna Ngana 24:27. Diau adimosi, diamfunu mpe kwa ndumba mu kiyuvula kele vo wakubama kena mu lungisa dina divavwanga kwa nkento yovo ngudi. Ana bazolele sompa yovo ana basompa kala bazolele wuta wana, balenda kiyuvula e yuvu yayi kana vo bakubama bena mu sansa o wana. (Luka 14:​28) O lemvokela luludiku nze lwalu lulenda sadisa nkangu a Nzambi mu venga e mpasi yo kala ye zingu kia nzo kiakiese.

[Foto ina muna lukaya lwa 12]

Etoko dizolele sompa nkia yuvu kafwete kiyuvula?