Tusongang’o Zola kwa Mpangi Zeto Bena vo Afwa Matu

NKANGU a Nzambi o unu una se kintwadi kia mpangi z’akala ye z’akento belandanga mbandu a selo yakwikizi ya nz’ankulu nze Samuele, Davidi, Samesone, Rakabi, Mose, Abarayama, Sara, Noa ye Abele. Vana vena selo ya Yave yakwikizi o unu, ayingi bena vo afwa matu. Kasikil’owu, yakala dimosi yo nkaz’andi bena vo afwa matu yau i wantu antete bakituka Mbangi za Yave kuna nsi a Mongólia. Muna kuma kia kwikizi kia mpangi zeto afwa matu kuna Rússia, twasunda mfundu kuna buka kitalanga zitu wa wantu (Corte Européia dos Direitos Humanos).

Mu lumbu yeto, o “ntaudi akwikizi yo lulungalalu” ovaikisanga nkanda kumosi ye nkutakani ye tukutakanu twampwena muna ndinga za sinsu. (Mat. 24:​45) E nkubika zazi nluta miayingi zitwasanga kwa mpangi bena vo afwa matu. * Kansi, nga wayindula kala una afwa matu badi zayila Nzambi yo nungunuka muna mwanda kondwa kwa nkubika zazi? Nga oyindulanga dina olenda vanga mu sadisa afwa matu bena muna zunga kieno?

Una Nkubika mu Kuma kia Ndinga za Sinsu ke Zavangamene Ko

Nga olenda yuvula ampangi bena vo afwa matu una bazayila Nzambi? Balenda kuzayisa una bamona vava bazaya vo Nzambi ovwidi nkumbu. Balenda yika una ludi kiaki kiasobela zingu kiau ye una kiabakumikina vitila DVD za ndinga za sinsu zayantika vaikiswa mu kubasadisa balongoka malongi masina ma Nkand’a Nzambi. Balenda mpe kuzayisa e nkakalakani bakala zau vava tukutakanu tw’Akristu ke twavangamenanga ko mu nding’a sinsu ngatu sekolwa muna ndinga yayi. Diavavanga vo mpangi mosi kavwanda vana ndambu au yo soneka muna papela mana mavovwanga muna lukutakanu. Mpangi mosi wafwa matu i wau kalongokela e ludi mu tezo kia mvu nsambwadi yavana kiayantika sekolwa malongi ma tukutakanu muna nding’a sinsu.

Mpangi mosi wafwa matu osungamenanga una basilanga umbangi kwa wantu ana bewanga yo vova. Kuna koko kwakaka, basimbanga papela ina basonekanga e nsangu basamunanga muna nzo ke nzo. Kuna kwaka koko basimbanga Eyingidilu ye Despertai! Diampasi diakalanga mu longoka Nkand’a Nzambi yo muntu wakaka una vo fwa matu muna sadila nkanda mina ke babakulanga ko. Mpangi zakaka zafwa matu besungamenanga ntantu bamonanga muna lembi bakula mana malongwanga. Muna kuma kiaki, ke bakalanga ye mambu mayingi ko ma mwanda mana balenda vova kw’akaka. Bazayanga mpe vo kana una vo batoma zolanga Yave, ke bakalanga ye ziku ko kana vo mana bavanganga ngwizani mena ye nsiku miandi. Ekuma? E kuma kadi ke bakala ye vuvu ko kana vo umbakuzi wau muna mambu makaka waludi.

Kana una vo nkakalakani zayingi bakala zau, mpangi zeto zafwa matu basimbinina kwikizi kiau. (Yobi 2:⁠3) Muna kolo kiakina kiawonso, Yave kaka batadilanga. (Nku. 37:⁠7) Owau, Yave okubasambulanga mu mpila zayingi zina nkutu ke bayindulanga ko.

Yindula ngolo zavanganga mpangi mosi wafwa matu una yo nkento yo wana. Una vídeo za nding’a sinsu ke zavaikidi ko, wakalanga ye fululu kia fila elongi dia esi nzo. Mwan’andi  osungamenanga vo: “O fila elongi dia esi nzo diampasi diakalanga kwa s’ame, kadi mawonso katulonganga mu nkanda kabongelanga mo. Nkumbu miayingi, katoma bakulanga ko mana masonama muna nkanda miami. Yeto wana mpe ke twansadisanga ko. Kele vo katomene sasila diambu ko, vana vau twanzayisanga wo. Kana una vo i wau, kayoyanga ko fila elongi dia esi nzo. Wazayanga wo vo o longoka diambu mu kuma kia Yave disundidi o mfunu ke mu nkenda ko kamonanga muna lembi toma bakula Kingelezo.”

Tuna mpe ye mbandu a Richard, mpangi una ye kimbuta kia mvu vioka 70, una vo fwa matu ye mpofo ozingilanga kuna Brooklyn, Nova York, Estados Unidos. Richard otomene zayakana wau vo ke kondwanga ko muna tukutakanu tw’Akristu. Muna kwenda kuna lukutakanu, wakangalanga mun’ekumbi (metrô) kondwa nsadisi, yo tanga fulu ikulumukinanga wantu mu zaya e fulu kina kekulumukina. Lumbu kimosi muna nsungi a sivu, lukutakanu ke lwavangama ko mu kuma kia tembwa kiangolo. Awonso muna nkutakani bazayiswa wo, kansi Richard kazaya wo ko. Vava ampangi bawá dina diabwa, bayantika vava Richard yo kunsolola watelama vana mwelo w’Eseka dia Kintinu, wavingilanga yavana kiziulwa mielo. Vava kayuvulwa ekuma kayandela kun’Eseka dia Kintinu kuna nsi a tembwa, wavutula vo: “Yave izolanga.”

Adieyi Olenda Vanga?

Nga vena ye afwa matu muna zunga kieno? Nga olenda longoka nding’a sinsu kimana wamokenanga yau? Ditomene zayakana vo afwa matu luzindalalu ye ngemba bekalanga zau vava belonganga akaka e nding’au. Olenda solola muntu una vo fwa matu muna nzila yovo muna salu kia umbangi. Adieyi olenda vanga? Vang’e ngolo za mokena yandi muna sadilanga sinsu, nkanda yovo fwaniswa. Kana nkutu vo muntu kazolele zaya ludi ko, zayisa kwa mpangi una vo fwa matu yovo ozeye nding’a sinsu kimana kenda kunkingula. O fwa matu olenda yangalela nsangu zambote vava zizayisilwanga muna nding’a sinsu.

Dilenda kala vo nding’a sinsu olongokanga yovo mu nkutakani ya nding’a sinsu wina. Aweyi olenda toma zayila yo bakula ndinga yayi? Kana una vo muna nkutakani eno muna y’ateleki akaka bewanga, olenda mokenanga yau muna nding’a sinsu. Ediadi dikusadisa mu yindula muna nding’a sinsu. Ezak’e ntangwa, olenda vilakana vovela muna nua vana fulu kia sadila sinsu. Nze una ulongokelwanga konso ndinga, ofwete zindalala yavana otoma yo zaya.

Vava tusiang’e ngolo za sadila nding’a sinsu, tusonganga vo tuzolanga yo zitisa mpangi zeto zafwa matu. Yindula e nkenda bemonanga afwa matu kuna salu yovo kuna sikola wau balembi bakulanga mana akaka bevovanga. Mpangi mosi wafwa matu wavova vo: “E lumbu yawonso, o wantu ikalanga yau vamosi vova bevovanga. Nkumbu miayingi, ediadi  makasi dikumpananga yo kuyimwena nze nsona. Diampasi mu songa una imonanga ezak’e ntangwa.” Muna kuma kiaki, tukutakanu tweto tufwete kalanga fulu kina mpangi zeto zafwa matu betambulwilanga madia ma mwanda, kala ye mbokena zakiese ye kikundi kiambote.​—⁠Yoa. 13:​34, 35.

Vena mpe ye buka yayingi ya mpangi zafwa matu ikutakananga kumosi ye nkutakani za mpangi bewanga. Muna nkutakani zazi, malongi mesekolwanga muna nding’a sinsu mu kuma kiau. Muna toma bakula mana mevovwanga, ampangi bena vo afwa matu bevwandanga vana kunda yantete mun’Eseka dia Kintinu. Ediadi dikubasadisanga mu mona mpangi osekolanga yo mpovi lembi kakidilwa. Ampangi za nkutakani zazi ana bewanga, bekulukilwanga diambu diadi, ke dikubavunzanesanga ngindu ko. I diau mpe divangamanga muna tukutakanu twampwena vava kisekolwanga malongi muna nding’a sinsu. Ampangi muna nkutakani bafwana sanisinwa muna ngolo bevanganga za sekola malongi muna nding’a sinsu nze una afwa matu besongelanga ngindu zau mu mpila yakiá.

Nanga mu nkutakani isadisanga buka kia nding’a sinsu wina yovo mu nkutakani ina ye mpangi zina vo afwa matu, bevavanga vo malongi masekolwa muna nding’a sinsu. Adieyi olenda vanga mu songa vo ozolanga mpangi zazi zafwa matu? Olenda kubalomba vo beza kuna nzo aku. Avo dilendakana, longoka eyaka sinsu. Kutokani ko mu kuma kia una lenda mokenena yau. Osolola e mpila ina omokenena yau. O zola okubasonga, kiese kiayingi kukutwasila. (1 Yoa. 4:⁠8) Mayingi tulenda longoka kwa mpangi zeto zafwa matu. Mokena bezolanga, bavwidi umbakuzi wayingi yo zola seva. Mpangi mosi una vo mase mandi afwa matu, wavova vo: “Muna zingu kiame kiawonso, vamosi ikalanga yo wantu afwa matu. Mayingi bevanganga mana kisinga lenda kubavutulwila ko. Kieleka, mayingi tulenda longoka kwa mpangi zeto zafwa matu.”

Yave otoma zolanga selo yandi yakwikizi, kumosi y’awana bafwa matu. E mbandu ya lukwikilu ye luzindalalu lwau iwokesanga o wete wa nkubik’a Yave. Yambula twasonganga zola kwa mpangi zeto z’akala ye z’akento bena vo afwa matu.

[Mvovo Vana Yand’a lukaya]

[Foto ina muna lukaya lwa 31]

O fwa matu olenda yangalela nsangu zambote za Kintinu vava zizayisilwanga muna nding’a sinsu

[Foto ina muna lukaya lwa 32]

Tukutakanu tweto tufwete kalanga fulu kina mpangi zafwa matu betambulwilanga lukasakeso muna mwanda