Vanina Kuna Kiese yo Ntim’amvevo

MU KUMA kia vana tukau, Paulu wa ntumwa wasoneka vo: “Yambula konso muntu kavanga una kakanini muna ntim’andi.” I bosi wakudikila vo: “Ke ku ntantu ko, ngatu ku nkomena: kadi Nzambi ozolele mvani amvevo.” (2 Kor. 9:⁠7) Yave ke komekenanga muntu ko kavana tukau mu yikama nsambila yavelela. Oyambulanga vo selo yandi basonga o zola kwau muna vanina kuna kiese ye mvevo. O lusansu lusonganga vo o nkangu andi i wau bevanganga ye kiese kiawonso. Yambula twabadika nona tatu.

Vava Yave kavaikisa Aneyisaele kuna Engipito, wabakanikina vo batunga e saba. O nkangu a Isaele walombwa vo bavana e lekwa yavuwang’o mfunu mu tunga e saba. Muna lemvokela nkanikinu wau, “konso muntu wayangumunw’o ntima” watwasa wolo, palata, matadi mantalu ye lekwa yakaka. O nkangu wakwamanana twasa tukau yavana kiabokwa o nkoki vo ke bavani diaka ko.​—⁠Luv. 35:​5, 21; 36:​6, 7.

 Kuna kwalanda, vava kiavavwa tungwa e tempelo, o nkangu a Nzambi wakala diaka y’elau dia songa luzolo lwau lwa yikama nsambila yavelela. Davidi wa Ntinu wavana tukau twayingi muna nkubika yayi yo lomba akaka mu vana tukau. Bavanga wo vana vau. Tukau twa wolo ye palata bavana twavioka 100 za malundu (bilhões) za nzimbu za dólar mu ntalu ya unu. O nkangu wayangalala kwayingi mu vana tukau twa mvevo kwa Yave.​—⁠1 Tus. 29:​3-9; 2 Tus. 5:⁠1.

Alandi antete a Yesu Kristu basonga mpe fu kia vanina kuna mvevo. Kina kia Pentikosti ya mvu wa 33 wa Tandu Kieto, vava kia vubwa tezo kia 3.000 ma wantu, ndonga muna yau ke bazingilanga mu Yerusaleme ko. Muna sadisa awana ke bakala ye madia mafwana ko muna kwamanana muna mbanza mu longoka mambu mayingi mu kuma kia lukwikilu lwau, diavavanga vo Akristu bakuba e nzimbu. Ampangi batek’o mavwa mau yo twasa e nzimbu kw’antumwa mu sadisa awana bavavanga lusadisu. Yave wayangalala mu mona una ampangi basongela lukwikilu yo zola.​—⁠Mav. 2:​41-47.

O unu, Akristu bakinu yikama e nsambila yavelela muna sadila e ntangwa, ngolo ye mavwa mau kuna kiese kiawonso.​—⁠Tala kunku kina yo ntu a diambu, “Vava Ntim’eto Ukutufilanga mu Vana Kina Tulenda.”

Vava Ntim’eto Ukutufilanga Mu Vana Kina Tulenda

Akete kaka muna Mbangi za Yave bena ye mavwa mayingi, kansi ulolo bemonanga e mpasi za kondwa e nzimbu. Kansi, avo se vana lukau lwamvevo mu nungununa salu kia Kintinu, kana nkutu lwakete, kufwete banza ko vo kaluna mfunu ko. Vava Yesu kamona nkento anson’ansukami watuba mbiya zole muna lundilwa kia nzimbu muna tempelo, kamveza ko. Kansi wavova vo: “Kieleka inusamunwini vo, o nkento ndioyu anson’ansukami otubidi ntuba iviokele awonso; kadi awowo muna nsavu au i batubìdi muna mwina tukau: vo i yandi, muna usukami wandi i katubìdi vumu kiandi kiawonso.” (Luka 21:​1-4) Kanele vo lukau lwandi lwakete lwakala, wavana kina kalenda.

Muna lenda vana lukau, konso muntu, konso nzo yovo konso nkutakani, divavanga vo bateka kubama. Vava Akristu a esi Korinto bazola sadisa mpangi zau bakala mu mpasi kuna Yuda, Paulu wa ntumwa wabavana luludiku lwamfunu luna bafwete landa. Wasoneka vo: ‘Vo i diambu dia ngonzekel’aveledi, wauna yakanikina mabundu ma Ngalatia, oyeno mpe i nuvanga una. Muna lumbu kiantete kia lumingu, konso muntu muna nzo andi, kafwete kilundila, muna mbaku andi, ke vakala ngonzekela vava ikwiza.’​—⁠1 Kor. 16:​1, 2.

Nze una muntu kelundilanga nzimbu mu kuma kia diambu dilenda bwa ku kinsalukisa, i una mpe konso Mbangi a Yave yovo konso nzo yovo nkutakani balenda lundanga konso kina balenda mu vana lukau mu nungununa nsambil’aludi. Muna kuma kiaki, e nkutakani zawonso konso ntangwa zivananga tukau mu nungununa salu kia Kintinu. Bevanganga wo muna teka kubama yo wizana una bafwete wo vangila. Akwa ntima miamvevo ana beyangalelanga nsangu zambote, bevananga mpe tukau twau mu yikama e salu kiaki kisalwanga mu nza yawonso. Tukau twatu twamvevo tuwokesanga luyangalalu ye kiese kiau mu zaya vo bevananga kina balenda.

Evula difilanga e nkand’a matondo mu zayisa vo lukau lwau lutambukidi.

Tukau twawonso tufilwanga kuna Vula, tuyangalelwanga yo sadilwa mu salu kia samun’e nsangu zambote za Kintinu kia Nzambi. Kasikil’owu, tukau twatu tusadilwanga mu kubika e nzo ye salu kia misionario muna nsi zayingi. Tusadilwanga mpe mu lunga-lunga yovo sumba sadilwa inietekanga e nkanda ye má yakaka. Tukau twatu tusadisanga mpe akengi a zunga ye a mvivu mu kingula nkutakani z’Akristu mu nza yawonso yo kubakasakesa muna mwanda. (Roma 1:​11, 12) Akaka mpe bena mu salu kia ntangwa ke ntangwa bebakanga filusadisu mu tukau twatu.

Akristu antete ana bayikama nsambil’aludi batambula nsambu, kadi bakembelela Yave muna mavwa mau. Ekwe nsambu bakala zau! Yeto mpe nsambu zayingi tuvwa avo tuyikama e salu kia Kintinu mu mpila yayi. Muna kuma kiaki, yambula twakala yo nyindu ambote vava ntim’eto ukutufilanga mu vana konso kina tulenda.

Konso muntu, konso nzo yovo konso nkutakani izolele vana lukau, lenda lo fila kun’evula dia Mbangi za Yave, Rua Talatona n.o1​—⁠Luanda Sul, Caixa Postal 6877 Luanda-Angola