Yangalela Fulu Kiaku Muna Nkutakani
Yangalela Fulu Kiaku Muna Nkutakani
“O Nzambi osidi e yîkwa, konso kîkwa muna ina, muna to, konso una kazolele.”—1 KOR. 12:18.
1, 2. (a) Adieyi disonganga vo konso muntu muna nkutakani una ye fulu kina kafwana yangalela? (b) Nkia yuvu tubadika mun’elongi diadi?
TUKA muna Isaele yankulu, Yave osadilanga nkutakani mu lunga-lunga nkangu andi yo kubavana luludiku. Kasikil’owu, vava Aneyisaele bafwasa mbanza Ai, Yosua ‘watanga mambu mawonso ma nsiku, ye nsambu ye sibu, mun’owu wawonso wasonama muna nkand’a nsiku . . . vana vena nkutakani awonso ya Isaele.’—Yos. 8:34, 35.
2 Muna tandu kiantete, Paulu wa ntumwa wavovesa Timoteo ona wakala nkuluntu vo, e nkutakani y’Akristu i “nzo a Nzambi” ye “elunzi, yo nkubilw’a ludi.” (1 Tim. 3:15) O unu, e “nzo a Nzambi” i kintwadi ki’Akristu akieleka omu nza yawonso. Muna kapu kia 12 kia nkand’andi antete kwa esi Korinto, Paulu watezanisa e nkutakani ye nitu a muntu. Wavova vo kana una vo e yîkwa yaswaswana, yawonso mfunu ina. Paulu wasoneka vo: “O Nzambi osidi e yîkwa, konso kîkwa muna ina, muna to, konso una kazolele.” Wakudikila vo “e yîkwa ya to, ina ibanzilwa vo yasavuka, tusakisa yo o zitu.” (1 Kor. 12:18, 23) Muna kuma kiaki, e fulu yovo kiyekwa kia konso muntu muna nzo a Nzambi ka kisundidi yovo sakalala ko vana vena Akristu akaka. Yaswaswana kaka ina. Aweyi tulenda solwela fulu kieto muna nkubik’a Nzambi yo yangalela kio? Nkia mambu meswaswanesanga fulu kieto muna nkutakani? Adieyi tulenda vanga kimana ‘lunungunuku lweto luamoneka kw’awonso’?—1 Tim. 4:15.
Aweyi Tulenda Yangalela Fulu Kieto?
3. Aweyi tulenda solwela fulu kieto muna nkutakani yo songa vo tuyangalelanga kio?
3 Imosi muna mpila tulenda solwela fulu kieto muna nkutakani yo songa vo tuyangalelanga kio, i salanga kumosi ye “ntaudi akwikizi yo lulungalalu” kumosi ye Selo Yambuta. (Tanga Matai 24:45-47.) Tufwete kifimpa mu zaya kana vo tulemvokelanga luludiku tuvewanga kwa ntaudi akwikizi. Kasikil’owu, mu mvu miviokele twatambwidi luludiku lwa mpila ya vwatila yo kuyikubika, mu kuma kia nsaka ye sadila Internete mu mpila yambi. Nga tulemvokelanga luludiku lwalu lukututaninanga muna mwanda? Adieyi tuvova mu kuma kia luludiku lwa sikidisa nsambila ya esi nzo? Nga tulemvokelanga luludiku lwalu yo vaula fuku wa nsambila ya esi nzo? Avo tu ampumpa, nga tuvaulanga e ntangwa y’elongi dia yeto kibeni dia Nkand’a Nzambi? Yave okutusambula kumosi y’esi nzo zeto kele vo tulemvokele luludiku lwa ntaudi akwikizi.
4. Adieyi tufwete badika vava tubakang’e nzengo za mambu ma yeto kibeni?
4 Akaka balenda banza vo mambu nze nsaka ye mpila ya vwatila yo kuyikubika, i mambu mana konso muntu kafwete kibakila nzengo. Kansi, o Nkristu ona yangalelanga fulu kiandi muna nkutakani, kafwete sianga zolela ya yandi kibeni va fulu kiantete ko vava kebakang’e nzengo. Osianga sungididi muna mpila ina Yave kebadikilanga diambu, nze una kasikidisa muna Diambu diandi. Mana masonama muna Nkand’a Nzambi mafwete kala se ‘mini kia tambi yeto, yo ntemo eyendelo dieto.’ (Nku. 119:105) Diangangu mpe dia badika una nzengo tubakanga muna mambu ma yeto kibeni, zilenda vanga muna salu kieto kia umbangi ye muna wantu akaka, kana mu kati yovo ku mbazi a nkutakani.—Tanga 2 Korinto 6:3, 4.
5. Ekuma tufwete vengela fu kia kitumina?
5 O “mwanda una usalanga wau muna wan’a nganzi” watoma sayana nze tembwa kina tufulumunanga. (Ef. 2:2) Mwanda wau ulenda kutufila mu yindula vo katuvwidi mfunu wa luludiku lwa nkubik’a Yave ko. Kieleka, ka tuzolele kala nze Dioterefe ko, ona walembi songa luzitu muna luludiku lwa Yoane wa ntumwa. (3 Yoa. 9, 10) Tufwete kebanga twalembi yima fu kia kitumina. Kana mu mvovo yovo mu mavangu, ka tufwete kolamenanga ko e nkubika kesadilanga Yave o unu mu kutuludika. (Nta. 16:1-3) Kansi, tufwete yangalelanga elau tuna diau dia sala kumosi ye ntaudi akwikizi yo kunlemvokela. Tufwete mpe sianga ngolo za lemvokela yo sakalela awana bevitang’o ntu muna nkutakani eto.—Tanga Ayibere 13:7, 17.
6. Ekuma tufwete zayilanga una wina zingu kieto?
6 Mpila yakaka tulenda songela vo tuyangalelanga fulu kieto muna nkutakani, i zayanga una wina zingu kieto yo vanga wawonso tulenda mu ‘kembesa salu kieto’ yo twasa nkembo kwa Yave. (Roma 11:13) Akaka besalanga se aviti a nzila a ngonde ke ngonde. Vo i akaka, besalanga nze misionario, akengi a zunga ye asadi a Betele omu nza yawonso. Mpangi zayingi z’akala ye z’akento bekivananga mu salu kia tunga Maseka ma Kintinu. Ayingi muna nkangu a Yave besianga ngolo za lungisa nsatu za mwanda za esi nzo au yo kuyivana muna salu kia umbangi konso lumingu. (Tanga Kolosai 3:23, 24.) Tulenda kala ye vuvu vo vava tukivananga muna salu kia Nzambi yo kunsadila ye nsi a ntima wawonso, tukala ye fulu muna nkubik’andi.
Mambu Meswaswanesanga Fulu Kieto Muna Nkutakani
7. Yika una mpil’a zingu kieto ilenda swaswanesa e fulu kieto muna nkutakani.
7 Diamfunu twafimpanga una wina zingu kieto, kadi dilenda vanga diambu muna salu tulenda sala muna nkutakani. Kasikil’owu, e kiyekwa kia mpangi eyakala muna nkutakani kilenda swaswana ye kina kia mpangi ankento. Kimbuta, mavimpi ye mambu makaka malenda mpe swaswanesa dina tulenda vanga muna salu kia Yave. Muna Ngana 20:29 tutanganga vo: “O nkembo a matoko i nkum’au: O wete w’anunu, mvu.” Aleke muna nkutakani balenda sala salu yangolo mu kuma kia nkum’au, ambuta mpe mfunu bena muna nkutakani mu kuma kia ngangu zau ye mana bazeye kala. Tufwete mpe sungamenanga vo konso salu tulenda sala muna nkubik’a Yave, i mu kuma kia nsambu za Nzambi.—Mav. 14:26; Roma 12:6-8.
8. Luzolo lweto adieyi lulenda vanga mu dina tulenda sala muna nkutakani?
8 E nona kia mpangi zole z’akento bena mpangi yo mbunzi kisonganga diambu diakaka dilenda swaswanesa fulu kieto muna nkutakani. Yau ewole kalasi yampwena batanga. Mana mabwa muna zingu kiau mafwanana. Mase mau bavanga wawonso mu kubakasakesa mu kota mu salu kia kimviti a nzila vava befokola tanga sikola. Kansi, vava bafokola sikola, mosi kaka wakota mu salu kia kimviti a nzila, wakaka wayivana mu salu kiakaka. Ekuma babakila nzengo zaswaswana? Luzolo lwa muntu. Konso muntu wavanga dina kazola. Nga ke diau ko mpe divangamanga kw’ayingi mu yeto? Tufwete kuyifimpanga mu zaya dina tulenda vanga muna salu kia Nzambi. Nga tulenda kuyivana mu salu kiaki, kana nkutu divava vo twasoba zingu kieto?—2 Kor. 9:7.
9, 10. Adieyi tufwete vanga kele vo ke tuna y’etima ko dia kuyivana kwayingi muna salu kia Yave?
9 Adieyi tuvova kele vo ke tuna y’etima ko dia kuyivana kwayingi mu salu kia Yave yo vanga kaka dina dilombwanga muna nkutakani? Muna nkanda kasoneka kw’esi Filipi, Paulu wavova vo: “I Nzambi yun’osalang’omo yeno, o zola yo sala, muna luzolo luandi.” Elo, Yave lenda sala muna yeto yo siamisa luzolo yovo etima dieto.—Fili. 2:13; 4:13.
10 Nga tulenda lomba kwa Yave katusadisa mu kala y’etima dia vanga luzolo lwandi? I wau kavanga o Davidi wa Ntinu a Isaele yankulu. Wasamba vo: “E Yave, unzayisa nzila zaku; undonga ngyendelo zaku. Undiatisila muna ludi kiaku, wandonga; kadi nge u Nzambi a luvuluku luame; nge ntadila lumbu ke lumbu.” (Nku. 25:4, 5) Yeto mpe tulenda vanga diau adimosi muna sambanga vo Yave katusadisa twakala y’etima dia vanga dina dilenda kunyangidika. Vava tuyindulanga una Yave wa Nzambi yo Mwan’andi bebadikilanga e salu tusalanga, e ntima mieto mizalanga ye kiese muna yau. (Mat. 26:6-10; Luka 21:1-4) Luyangalalu lwalu lulenda kutufila mu samba kwa Yave katusadisa twakala y’etima dia kuyivana muna salu kiandi. Yesaya wa ngunza wasonga fu tufwete kala kiau. Vava kawá nding’a Yave ona wayuvulanga vo: “Nga nani ntuma, ovo nani okutuyendela? Wavutula vo: “Mono oyu; untuma.”—Yes. 6:8.
Aweyi Tulenda Nungunukina Muna Mwanda?
11. (a) Ekuma venena yo mfunu wa mpangi bafwete vit’o ntu muna nkutakani? (b) Adieyi kalenda vanga o mpangi eyakala mu kifwanisa mu tambula kiyekwa?
11 Wau vo 289.678 za wantu bavubwa muna mvu wa salu 2008, vena ye mfunu wa mpangi z’akala zifwete vit’o ntu. Adieyi kafwete vanga mpangi eyakala mu kuma kia nsatu zazi? Kafwete sia ngolo za lungisa mana masonama mu Nkand’a Nzambi mu kuma kia selo ya salu ye akuluntu. (1 Tim. 3:1-10, 12, 13; Tito 1:5-9) Aweyi mpangi eyakala kalenda lungisila mana masikidiswa muna Nkand’a Nzambi? Olenda wo vanga muna kuyivananga muna salu kia umbangi, lungisa kiyekwa kiandi muna nkutakani, vana nkomena zambote yo sadisa ampangi muna nkutakani. Muna mpila yayi osonganga vo oyangalelanga fulu kiandi muna nkutakani.
12. Aleke aweyi balenda songela etima diau muna ludi?
12 Aleke, musungula ana bena vo matoko, adieyi balenda vanga kimana banungunuka muna nkutakani? Balenda sia ngolo za nungunuka muna “ngangu yo zayi wawonso wakimwanda” una muna Nkand’a Nzambi. (Kol. 1:9) Longokanga Nkand’a Nzambi yo kuyivana muna nkubika za nkutakani dilenda kubasadisa mu nungunuka muna mwanda. Aleke bena vo matoko balenda mpe kifwanisa mu kota muna “mwelo ampwena” wa salu ya ntangwa ke ntangwa. (1 Kor. 16:9) Kuyivana muna salu kia Yave i mpila yambote tulenda sadila zingu kieto yo kututwasila nsambu zayingi.—Tanga Kimpovi 12:1.
13, 14. Mpangi z’akento aweyi balenda songela vo beyangalelanga fulu kiau muna nkutakani?
13 Mpangi z’akento mpe balenda songa vo beyangalelanga elau diau dia lungisa dina diasonama muna Nkunga 68:11. Muna sono kiaki tutanganga vo: ‘O Yave ovene e diambu, akento betelekanga nsangu zambote, vu kiayingi.’ Imosi muna mpila mpangi z’akento balenda songela vo beyangalelanga fulu kiau muna nkutakani, i kuyivananga muna salu kia kitula wantu s’alongoki. (Mat. 28:19, 20) Muna kuma kiaki, vava mpangi z’akento besalanga kwayingi muna salu kia umbangi yo kuyivana kuna mvevo mu nungununa salu kiaki, besonganga vo beyangalelanga fulu kiau muna nkutakani.
14 Vava kasonekena Tito, Paulu wavova vo: “Akento anunu mpe, diau adimosi, akwa vumi muna fu yau, . . . alongi a wau wambote; balong’akento bazol’akazi au, bazola wan’au, bakal’akwa lulungalalu, avelela, minkubika-nzo, akwa fu yambote, basakalelang’akazi au, e diambu dia Nzambi ke diatiangunwa.” (Tito 2:3-5) Mpangi z’akento zazikuka muna mwanda balenda kala mbandu ambote muna nkutakani. Muna zitisanga awana bevitang’o ntu muna nkutakani yo baka nzengo zambote muna mambu ma mpila ya vwatila yo kuyikubika ye nsaka, besonganga mbandu ambote kw’akaka yo songa vo beyangalelanga e fulu kiau muna nkutakani.
15. Adieyi kafwete vanga mpangi ankento una vo mpumpa mu sunda kinsona?
15 Ezak’e ntangwa, dilenda kala diampasi kwa mpangi ankento una vo mpumpa, mu zaya fulu kiandi muna nkutakani. Mpangi ankento mosi wavova vo: “Ezak’e ntangwa e zingu kia kimpumpa zingu kia kinsona kikalanga.” Vava kayuvulwa una kesundilanga kinsona, wavutula vo: “O samba yo longoka Nkand’a Nzambi dikunsadisanga mu solola diaka fulu kiame muna nkutakani. Ilongokanga mu zaya una Yave kekumbadikilanga. I bosi, isianga ngolo za sadisa akaka muna nkutakani. Ediadi dikunsadisanga mu lembi kuyisia sungididi kiasaka.” Nze una wasonama muna Nkunga 32:8, Yave wavova kwa Davidi vo: “Ikulongesela, yo kusia meso.” Elo, Yave ovwanga selo yandi yawonso o mfunu, kumosi ye mpangi z’akento bena vo ampumpa. Osadisanga awonso mu solola fulu kiau muna nkutakani.
Lunga-lunga Fulu Kiaku
16, 17. (a) O tambulwila e mboka ya kala muna nkubik’a Yave i nzengo zambote tulenda baka. Ekuma? (b) Adieyi tufwete vanga muna lunga-lunga fulu kieto muna nkubik’a Yave?
16 Muna zola kwandi, Yave otuntanga selo yandi mu kala ye ngwizani ambote yo yandi. Yesu wavova vo: “Ke ven’on’olend’o kwiz’oku ngina ko, ovo o Se, ona wantuma, kekuntunta ko.” (Yoa. 6:44) Vana vena mazunda ye mazunda ma wantu ova nza, Yave watubokela twakala muna nkutakani andi. O tambulwila mboka yayi i nzengo zambote twabaka muna zingu kieto. Ediadi divananga e nsasa muna zingu kieto. Ekwe kiese tukalanga kiau wau tuna ye fulu kieto muna nkutakani!
17 Ntozi a nkunga wavova vo: “E Yave, nzolele ekundilu dia nzo aku.” Wavova diaka vo: “O kulu kwame kutelamene ova nlela-nlela: muna mabundu ntondela Yave.” (Nku. 26:8, 12) O Nzambi akieleka una ye fulu kina konso muntu mu yeto kalenda kala muna nkubik’andi. Avo tuzindalala landa luludiku lwa Nzambi yo kuyivana muna salu kiandi, tulenda lunga-lunga fulu kieto muna nkubik’a Yave.
Nga Osungamenanga?
• Ekuma tulenda vovela vo Akristu awonso bena ye fulu kiau muna nkutakani?
• Aweyi tulenda songela vo tuyangalelanga fulu kieto muna nkubik’a Nzambi?
• Nkia mambu malenda swaswanesa fulu kieto muna nkutakani?
• Aweyi ambuta y’aleke Akristu balenda songela vo beyangalelanga fulu kiau muna nkubik’a Nzambi?
[Yuvu ya Longoka]
[Foto ina muna lukaya lwa 16]
Mpangi z’akala adieyi balenda vanga mu tambula kiyekwa muna nkutakani?
[Foto ina muna lukaya lwa 17]
Mpangi z’akento aweyi balenda songela vo beyangalelanga fulu kiau muna nkutakani?