Yuvu Y’atangi

Nga diamfunu kwa mpangi ankento dia fuka ntu vava kesekolanga elongi dia Nkand’a Nzambi muna nding’a sinsu muna nkutakani yovo muna tukutakanu twampwena?

Mpangi ankento una vo Nkristu kafwete fuka ntu vava kesalanga e salu kifwete salwa kwa nkaz’andi yovo kwa mpangi z’akala muna nkutakani. Ediadi ngwizani dina ye nkanikinu kavana Paulu wa ntumwa uyikanga vo “konso nkento osamba, ovo sakula, yo ntu walembi fukama, osavul’o ntu” kadi “o ntu a nkento, i’yakala.” (1 Kor. 11:​3-​10) Vava mpangi ankento kefukanga ntu una ufwene ekolo kesalanga e salu yayi, osonganga lusakalalu muna nkubika kasikidisa o Nzambi muna nkutakani y’Akristu.​—⁠1 Tim. 2:​11, 12. *

Adieyi tuvova kele vo mpangi ankento osekolanga muna nding’a sinsu elongi difilwanga kwa mpangi eyakala? Kieleka, mpangi ankento mvovo mia mpovi kesekolanga kwa nkangu. Ke yandi ko olonganga kansi mpangi ona ofilanga elongi dina kesekolanga. Kansi, osekola muna nding’a sinsu kwaswaswana kikilu yo sekola mu ndinga ina vo ke ya sinsu ko. Muna ndinga zivovwanga, o nkangu ulenda sia sungididi kwa mpovi ekolo bewanga ona osekolanga. Mpangi z’akento besekolanga mu kolo kiaki, ke bekalanga ku ntwala ko yo mpovi. Ezak’e ntangwa, balenda fonga vana kunda ekolo besekolanga yovo batelama yo tala mpovi vana fulu kia tala nkangu. Muna kuma kiaki, ke dina mfunu ko kwa mpangi ankento osekolanga ndinga ivovwanga mu fuka ntu.

Vana ntandu, mu kuma kia lunungunuku lwa ngangu za nza besadilanga vava elongi  disekolwanga muna nding’a sinsu, nkumbu miayingi o nsekodi yandi otoma monekanga kwa nkangu. O nsekodi yandi osongwanga muna tela ekolo mpovi ke monekanga ko kwa nkangu. Muna kolo kiaki, diamfunu kwa mpangi ankento ona osekolanga elongi muna nding’a sinsu kafuka ntu.

Aweyi luludiku lwalu lwampa lulenda sadilwa kwa mpangi ankento ona osekolanga malongi ma Sikola ya Salu kia Kimfumu mu nding’a sinsu, yovo nsongesela, yovo nkomena za mpangi mun’Elongi dia Nkand’a Nzambi dia Nkutakani, muna Lukutakanu lwa Salu ye mun’Elongi di’Eyingidilu? Nga mpangi ankento ona osekolanga muna nding’a sinsu kafwete mpe fuka ntu muna kolo kiaki? Ezak’e ntangwa ke dikalanga mfunu ko kwa mpangi ankento mu fuka o ntu mu kolo kiaki, wau vo o nkangu bazeye wo vo ke yandi ko ofilanga lukutakanu. Kasikil’owu, vava kesekolanga e nkomena za mpangi, elongi difilwanga kwa mpangi z’akento yovo nsongesela. Kansi, kafwete fuka ntu vava kesekolanga elongi difilwanga kwa mpangi eyakala muna lukutakanu, vava kesekolanga mvovo mia mpangi ofilanga elongi di’Eyingidilu yovo Elongi dia Nkand’a Nzambi dia Nkutakani, yovo vava kevitang’o ntu mu vanga sinsu ekolo kiyimbilwanga nkunga. Muna lukutakanu, mpangi ankento olenda sekola mvovo mia mpangi z’akala, z’akento, wana ye mi’akuluntu a nkutakani. Muna kuma kiaki, diamfunu kafuka ntu tuka kuna lubantiku yaku mfoko a lukutakanu.

[Mvovo Vana Yand’a lukaya]