Nga Olenda Kwenda ku Makedonia?

PAULU wa ntumwa wasongwa mona-meso vava kakala vana fulu kiningamenanga nzaza kuna mbanza Troa, kuna Ásia Menor. Mwisi Makedonia wandodokela vo: “Sauk’oku Makedonia, watusadisa.” Vava kamona e mona-meso kiaki, vana vau Paulu y’akw’andi a salu ‘babakula vo Nzambi wababokela benda samun’e nsangu zambote’ kuna Makedonia. Nkia nluta diatwasa? Ludia y’esi nzo andi bazingilanga kuna Filipi, evata diantete dia mvivu a Makedonia, bakituka se minkwikizi. Vena mpe yakaka, mun’evata diadi dia Makedonia, zunga kia Roma, bakituka minkwikizi.​—⁠Mav. 16:​9-15.

O unu, Mbangi za Yave besonganga mpe etima dia mpila yayi. Kuna zola kwawonso, ndonga besadilanga nzimbu zau mu yaluka yo kwenda sadila mu zunga ina ye mfunu ateleki ayingi a Kintinu. Kasikil’owu, Lisa wazola sia e salu kia umbangi va fulu kiantete muna zingu kiandi. Wayaluka kuna Canadá yo kwenda kuna Quênia. Trevor yo Emily, esi Canadá, bayenda kuna Malaui y’ekani dia wokesa e salu kiau kia umbangi. Paul yo Maggie, esi Inglaterra, vava bayambula sala mu kuma kia kimbuta, basadila elau diadi mu kwenda ku África Oriental mu kivana mu salu kia Yave. Nga una y’etima dia kuyivana kuna mvevo? Nga olenda yaluka yo kwenda ku fulu kiakaka? Avo i wau, nkia nkanikinu mia Nkand’a Nzambi milenda kusadisa mu lungisa ekani diaku?

Toma Kifimpa

E diambu diantete fwete fimpa, i makani maku. O nkanikinu usundidi kavova o Yesu i  wau: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso.” Ekuma ifwete fila muntu mu kwenda sadila ku zunga kiakaka, i zola muna Yave kumosi y’etima dia lungisa nkanikinu wa kitula wantu s’alongoki. Yesu wakudikila vo: “Una wezole ufwananini, i wau wuwu, zola nkw’aku, konso un’okuzolela.” Tusadisanga akw’eto mu songa vo tukubazolanga. (Mat. 22:​36-39; 28:​19, 20) Muna sadila ku nsi a kinzenza divavanga vo muntu kayivana kuna mvevo yo sala kwayingi. Ke diambu diakete ko. Muna kuma kiaki, ofwete kala ye zola. Remco yo Suzanne, esi Holanda, owau besadilanga kuna Namíbia bavova vo: “O zola kukutusadisanga mu kwamanana sadila mu nsi yayi.”

Willie, nkengi a zunga kuna Namíbia, wavova vo: “Awana bekwizanga sadila mu nsi za kinzenza, ke beyindulanga ko vo ampangi muna nkutakani bekubasadisa. Kansi, bekwizanga y’ekani dia sala kumosi y’ampangi muna nkutakani, kubasadisa muna salu kia umbangi.”

Vava ofimpa ekani diaku, ukiyuvula: ‘Nkia mambu nzeye malenda kunsadisa kuna nsi a kinzenza? Nga isalanga kwayingi muna salu kia umbangi? Nkia ndinga nzeye toma vova? Nga ndenda longoka ndinga yakaka?’ Mokena dio y’esi nzo aku. Zayisa dio kw’akuluntu muna nkutakani. Lomba lusadisu lwa Yave muna sambu. Okuyifimpa ye ziku kiawonso, dilenda kusadisa mu zaya kana wafwana kikilu mu sadila ku nsi a kinzenza.​ —⁠Tala e kunku kina yo ntu a diambu “Toma Kizaya.”

Sola Fulu Okwenda Sadila

Muna mona-meso, Paulu wabokelwa kenda kuna Makedonia. O unu, Yave ke sadilanga mona-meso ko muna kutusonga kuna tufwete kwenda. Kansi, mun’Eyingidilu ye muna nkanda miakaka, nkangu a Nzambi ulenda zaya zunga yayingi ivwidi ateleki ayingi o mfunu. Soneka e fulu ivwidi ateleki ayingi o mfunu. Kele vo kulenda longoka ndinga akaka ko yovo zinga mu nsi yakaka, lenda kwenda sadila kuna nsi ivovanga e ndinga otomene zaya. I bosi, vava zaya una olenda vwila viza (visto), zaya ntalu ifwanga e tike, kana vo nsi mu luvuvamu ina, aweyi una e zingu ye nsungi. Dilenda kala dia lusadisu mu mokena y’awana bayenda kala kuna nsi yoyo. E sambu kilenda kusadisa mu baka nzengo zambote. Sungamena wo vo Paulu y’akw’andi a salu ‘basimwa kwa mwand’avelela mu vov’e diambu muna Ásia.’ Kana una vo bavava kwenda kuna Bitunia, ‘o mwand’a Yesu ke wabayambula ko’ mu kwenda ko. Diau adimosi, ntangwa yayingi divavanga mu zaya kuna lenda kwenda sadila.​—⁠Mav. 16:​6-10.

Nanga, owau ozeye maka mambu mevavwanga mu sola kuna okwenda sadila. Avo zolele kwenda sadila ku nsi yakaka, lenda soneka kuna vula dia Mbangi za Yave kuna nsi ozolele kwenda. Soneka kiyekwa wakala kiau muna nkutakani ye kina wina kiau owau, yuvula konso kiuvu ozolele, nze zaya una win’e zingu, fulu olwakila, nguka za mayela ye salu yitoma salwanga muna nsi yayina. I bosi, vana nkanda wau kwa buka kia salu kia nkutakani aku. Akuluntu mpe besoneka nkanda wakaka yo fila mio kuna vula dia nsi ozolele kwenda sadila. E mvutu bekuvana zilenda kusadisa mu zaya e fulu olenda kwenda sadila.

Willie, oyikilu kuna lubantiku wavova vo: “Ndonga bekwenda kingulanga ntete e nsi yo vava e fulu kina beyangalela sadila. Mpangi mosi yo nkaz’andi bamona vo ke belenda zingila ku fulu kiandá ko. Muna kuma kiaki, muna lenda kala ye mpila zingu bakulukiana, bayenda zingila mu mbanz’akete yakala yo mfunu w’ateleki ayingi.”

Sunda Nkakalakani Zampa

O yaluka muna mbanza wakulukiana yo kwenda zingila mu mbanza yakaka, dilenda kala diampasi. Lisa oyikilu kuna lubantiku, wavova vo: “Diampasi kikilu mu lenda zizidila kinsona.” Adieyi diansadisa? Wavanga kikundi y’ampangi muna nkutakani. Wasianga e sungididi kia zaya nkumbu za mpangi zawonso. Muna lenda wo vanga, walwakanga kun’Eseka dia Kintinu una lukutakanu ke  lwayantikidi ko mu mokena ye mpangi z’akala ye z’akento. Lisa wayantika sala kumosi y’akaka muna salu kia umbangi, wabokelanga akaka kuna nzo andi, yo vanga yikundi yampa. Wavova vo: “Kikuyibanzanga ko mu nzengo yabaka. Yave okunsambulanga kikilu.”

Vava wan’au bakola, Paul yo Maggie bayaluka muna mbanza bazingila mvu 30. Paul wavova vo: “Diampasi kikilu diakala mu sisa mavwa ye yitu yeto. Twadila vava twakota muna kumbi di’ezulu. Vana vau twayindula vo, ‘ke tulenda sala salu kiaki ko.’ Kansi, twabund’e vuvu muna Yave. Vanga yikundi yampa dikutusadisanga mu simbinina ekani dieto.”

Greg yo Crystal, wau vo Kingelezo bevovanga, bayaluka kuna Canadá yo kwenda kuna Namíbia. I bosi, babakula vo diamfunu mu longoka e ndinga ya kisi nsi. “Ezak’e ntangwa twakendalalanga. Kansi, vava twalongoka e ndinga ya kisi nsi, twatoma zay’e fu yau. Vanga kikundi ye mpangi za nkutakani diatusadisa mu kulukiana ye fu yau.”

E fu kiaki kia lulembamu ye kuyivana kuna mvevo kilenda kasakesa mpe ampangi muna nkutakani. Jenny osungamenanga ampangi ana bayaluka yo kwenda kuna Irlanda, kuna kasansukila. Wavova vo: “Azodi a nzenza bakala. Sala kikilu bayiza sala, ke sadilwa ko. Basalanga ye kiese yo vema kwawonso. Ediadi diamfila mpe mu kwenda sadila muna zunga kiavavanga ateleki ayingi.” Owau, Jenny yo nkaz’andi besalanga se misionario kuna nsi a Gâmbia.

E Nsambu za Yave “Zivwamisanga”

Ekwe nsambu kavwa Paulu muna salu kiandi kuna Makedonia! Vava kiavioka mvu kumi, wasonekena ampangi kuna Filipi vo: “Mfiaukilanga Nzambi ame, muna luyindulu luawonso oko nwina.”​—⁠Fili. 1:⁠3.

Trevor ye Emily, ana basadilanga kuna Malaui una ke babokelo ko mu kwenda kota Sikola ya Ngiladi, diau adimosi mpe bamona. Bavova vo: “Ezak’e ntangwa twakiyuvulanga kana vo nzengo twabaka zambote, kansi twakala ye kiese. E ngwizani eto yawokela yo vwa nsambu za Yave.” Greg ye Crystal, ana tuyikidi kala, bavova vo: “I diambu disundidi mfunu twavanga muna zingu kieto.”

Dialudi vo, ke wantu awonso ko balenda kwenda sadila mu nsi a kinzenza. Akaka balenda vanga edi diambote muna kwenda sadila ku zunga ivwidi asadi ayingi o mfunu muna nsi au. Akaka mpe balenda kala ye luzolo lwa kwenda sadila muna nkutakani zakaka zina lukufi ye nzo zau. Edi disundidi o mfunu, i vanga wawonso olenda mu sadila Yave. (Kol. 3:​23) Ozevo, e mvovo miavumunwinwa milungana kwa ngeye oku vo: “O lusambulu lua Yave luvwamisanga: Ketensekanga ko mpasi ko.”​—⁠Nga. 10:⁠22.

[Mvovo mia Fwaniswa mina muna lukaya lwa 5]

Toma Kizaya

Muna kifimpa yo zaya kana vo wafwana kwenda sadila muna nsi a kinzenza, badika e yuvu ilende yo samba ye ziku kiawonso mu zaya kana vo olenda yaluka. Mambu mena mun’Eyingidilu dia mvu miavioka malenda kusadisa mu vanga wo.

• Nga i muntu a kimwanda?​—⁠“Para ser feliz” (15 kia Oktoba 1997, lukaya lwa 6)

• Nga isalanga e salu kia umbangi una ufwene?​—⁠“Como ser bem-sucedido no ministério de pioneiro” (15 kia Mayu 1989, lukaya lwa 21)

• Nga ndenda sisa esi nzo ye akundi ame yo kwenda zingila kwakaka?​—⁠“Como enfrentar a saudade no serviço de Deus” (15 kia Mayu 1994, lukaya lwa 28)

• Nga ndenda longoka nding’a kinzenza?​—⁠“Servir numa congregação de língua estrangeira” (15 kia Malusu 2006, lukaya lwa 17)

• Nga ngina ye nzimbu zafwana mu zingila kuna nsi a kinzenza?​—⁠“Pode servir num território estrangeiro?” (15 kia Oktoba 1999, lukaya lwa 23)

[Mvovo mia Fwaniswa mina muna lukaya lwa 6]

Kala yo nyindu a sikila yo lulembamu dilenda twasa nluta miambote kwa mpangi muna nkutakani

[Mvovo mia Fwaniswa mina muna lukaya lwa 7]

Awana bekwizanga mu sadisa akaka, kiese bekalanga kiau