Nga Osungamenanga?

Nga wayangalele tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:

• O Nzambi aweyi kalenda kukitulwila mvwama?

Kuna nz’ankulu, Yave wasambula wantu nze Abarayama ye Solomo mu kala ye mavwa mayingi. Kansi, o lukwikilu, luvuvamu ye kiese i mavwa malutidi o mfunu kw’Akristu, mana Nzambi kalenda kubasadisa mu solola.​—⁠Oktoba-Desemba, lukaya lwa 12-15.

• Adieyi tulenda longoka mu mpila Yesu kasadisila Petelo vava kayantika dimuka muna kalunga? (Mat. 14:​28-31)

Avo tumwene lukwikilu lwa mpangi mu kuluka luna, tulenda kunsadisa mu kumika diaka lukwikilu lwandi.​—⁠15/9, lukaya lwa 8.

• Luvuluzu lweto nkia mpasi lwatwasa kwa Yave?

Yave wamona ntantu vava Mwan’andi kabangikwanga yo vezwa. Nze una usonganga nona kia Abarayama ona watonda tambika mwan’andi se kimenga, Yave watonda vo Mwan’andi kavondwa nze kimpumbulu kana una vo ntantu diantwasila.​—⁠15/9, lukaya lwa 28-29.

• Ekuma e Códice Vaticano inina se lusalu lwantalu?

O nkanda wau i sono ya Kingerekia yasonekenwa mu moko, mvu 300 una Nkand’a Nzambi ke wafokwelo sonekwa ko. Muna nkanda wau, muna ye nkanda miayingi mia Sono ya Kiyibere ye Kingerekia ya Kikristu. Akwa ngangu besadilanga nkanda wau mu zaya mana masonama muna sono yankulu ya Nkand’a Nzambi.​—⁠1/10, lukaya lwa 18-​19, mu Kimputu.

• Adieyi tulenda longoka muna Ngana 24:27 mu kuma kia ‘tung’e nzo’?

Etoko dizolele sompa kafwete kala wakubama mu lungisa mbebe ikumvingilanga, nze ya lungisa nsatu za nitu za esi nzo andi yo kala se ntu mu lungisa nsatu za mwanda za esi nzo.​—⁠15/10, lukaya lwa 12.

• Ekuma ke dinina diambote ko mu yikila Mbangi za Yave vo dibundu dia Protestante?

E dibundu dia Protestante diavaika muna tandu kia 16 kuna Europa mu vava vangulula dibundu dia Katolika Romana. E mvovo “Protestantismo” usadilwanga mu yika awana bezolanga vangulula dibundu. Mbangi za Yave ke betambulwilanga wisa kia papa ko omu nza yawonso ye belandanga mana masonama muna Nkand’a Nzambi. Kana una vo i wau, ke betambulwilanga ko malongi mayingi ma dibundu dia Protestante kumosi ye fu yau ke ina ngwizani ko ye Nkand’a Nzambi.​—⁠1/11, lukaya lwa 19, mu Kimputu.

• Nga muntu kafwete longoka ndinga Kiyibere ye Kingerekia mu bakula Nkand’a Nzambi?

Ve. O zay’e ndinga zazi zankulu ke diau ko disadisanga muntu mu toma bakula Nkand’a Nzambi. Ndiona walongoka ndinga zazi wakinu vavulula muna dicionário ye nkanda miakaka mia ndinga zazi. Wau vo Yave wasadila mwand’andi kimana mvovo mia Selo kiandi miasekolwa mu ndinga yatoma vovwanga muna tandu kiakina, ediadi disonganga vo muntu olenda longoka ludi muna Nkand’a Nzambi wasekolwa mu ndinga zivovwanga o unu.​—⁠1/11, lukaya lwa 20-​23, mu Kimputu.

• Yave yo Yesu aweyi benena se mbandu ya fu yambote?

Kana una vo Yave yandi i mfumu a nsema wawonso, osonganga ngemba yo luzitu kwa wantu. Vava kamokena ye Abarayama yo Mose, wasadila mvovo wa Kiyibere ulenda sekolwa vo “dodokolo.” (Etu. 13:14; Luv. 4:​6, NW) Nzambi otambanga mpe matu vava wantu bevovanga. (Etu. 18:​23-​32) Yesu mpe i wau kavanganga. Wakalanga y’etima dia sadisa wantu, ezak’e ntangwa wabayikilanga muna nkumbu zau.​—⁠15/11, lukaya lwa 25.

• Ekuma Akristu ke bekembelelanga nkinzi a Mvu Ampa ko?

Muna manaka ma esi Ásia, o nkinzi a Mvu Ampa ubadikilwanga vo nkinzi wamfunu. Muna nkinzi wau, wantu bevavanga tambula malau mambote yo songa zitu kwa mianda. Akristu bezitisanga mase mau, kansi bevenganga nkinzi mikembelelanga akulu ana bafwa kimana bataninwa yovo lomb’e nsambu kwa nzambi za luvunu.​—⁠1/12, lukaya lwa 20-23, mu Kimputu.