Kuvunginikwa ko kwa Satana

‘KE nuvunginikwa ko. O Nzambi eno ke kunusadisa ko. Nuyivana, avo ke wau ko, mpasi numona.’ Ezazi i nsangu zazayiswa nkangu a Yerusaleme kwa Rabesake, nkunzi a Sankerebe wa ntinu a Asuri. Makesa ma ntinu makota muna nsi a Yuda. Ekani dia mvovo mia nkunzi ndioyo, i tokanesa ngindu za nkangu a Yerusaleme yo kubavumisa kimana bayivana kwa ntinu.​—⁠2 Nti. 18:​28-35.

Esi Asuri batoma zayakana vo akwa nsoki. Bavumisanga atantu au muna kubavovesa e mpasi bamwesanga abakami au. Philip Taylor, wa nsoneki a lusansu wavova vo esi Asuri “luvunu basadilanga yo mwesa wantu o wonga, kimana basakalelwa kwa abakami au yo vumisa atantu au ye nsangu zaluvunu.” Elo, luvunu nwaninwa kiangolo kikilu. Taylor wavova vo luvunu “ngindu za wantu lutokanesanga.”

E ndwana benwananga Akristu akieleka “ke ya nitu yo menga ko, kansi . . . ye vu ya umwanda ya bi,” i sia vo, ye vangwa ya mwanda ina yakolamena Nzambi. (Ef. 6:​12) O ntantu eto antete, i Satana wa Nkadi Ampemba. Yandi mpe ovavanga mwesa wantu o wonga yo kubavunginika.

Satana wavova vo lenda fwasa kwikizi kia konso muntu mu yeto. Muna lumbu ya Yobi, wavovesa Yave wa Nzambi vo: “Yawonso kena yau o muntu i kevanina muna moyo andi.” Muna mvovo miami, edi kazola vova vo, kele vo wantu bamweseso mpasi zayingi, balenda yambula kwikizi kiau muna Nzambi. (Yobi 2:⁠4) Nga mvovo mia Satana mialudi? Nga konso muntu mu yeto una ye diambu kalendi zizidila ko yo simbinina kwikizi kiandi? Satana zolele vo twakala ye nyindu wau. Muna kuma kiaki, osadilanga luvunu mu kotesa ngindu zazi muna ntima mieto. Yambula twafimpa e ndekwa kesadilanga yo zaya una tulenda kunsila kitantu.

O ‘Nkubilw’au mu Ntoto Wina’

Satana wasadila Elefaze, mosi mun’akundi atatu a Yobi ana bayenda kunkingula, mu songa vo wantu ke balendi sikila ye kwikizi ko muna Nzambi. Muna yikila wantu vo “ana bekalanga muna nzo za tuma,” wavovesa Yobi vo: “O nkubilw’au wina muna ntoto, bakosomweno nga kinsekwa! Vana kati kwa menemene yo masika bawosomokene: Bevila yakwele mvu, on’oyindula dio nkatu.”​—⁠Yobi 4:​19, 20.

Muna sono yakaka, yeto wantu tutezaneswanga ye “yinzu yatuma,” i sia vo, yinzu yavangilwa mu nteke. (2 Kor. 4:⁠7) Twatovoka mu kuma ki’esumu twasambukila. (Roma 5:​12) Ka tulendi zizidila ntambu mia Satana ko muna ngolo za yeto kibeni. Kansi, wau vo tu Akristu, tusadiswanga kwa Yave. Kana una vo twatovoka, mfunu twina vana meso ma Nzambi. (Yes. 43:⁠4) Vana ntandu, Yave ovananga mwand’avelela kw’awana bekunlombanga wo. (Luka 11:​13) Mwand’andi ulenda kutuvana “ulolo wa nkuma,” mu zizidila konso mpasi tulenda mweswa kwa Satana. (2 Kor. 4:7; Fili. 4:​13) Avo tusia Nkadi Ampemba kitantu yo ‘sikila muna lukwikilu,’ Nzambi okutusikidisa yo kutukumika. (1 Pet. 5:​8-​10) Muna kuma kiaki, ka tufwete mwena Satana wa Nkadi Ampemba wonga ko.

 Muntu “Onua Vilwa”

Elefaze wayuvula vo: “O muntu nki, kakala mveledi? Ona wawutwa kwa nkento, kalunga?” I bosi, yandi kibeni wavutula vo: “[Nzambi] kebundang’avauki andi vuvu ko; ezulu ke divelele ko muna meso mandi. Nkwa ungemi yo yiva, o muntu on’onua vilwa nga maza, ozevo weyi?” (Yobi 15:​14-​16) Elefaze edi kazola vova kwa Yobi vo ke vena muntu ko una wasonga vana meso ma Yave. Nkadi Ampemba mpe osadilanga e ngindu zambi tulenda kala zau. Ozolanga vo twakendalala mu kuma kia vilwa twavanga yo kuyitumba, yo banza vo ka tulendi lolokwa ko. Ozolele vo twayindula vo Yave mayingi kevavanga kwa yeto yo katikisa luzolo lwandi lwa kutufwila nkenda, kutuloloka yo kutusadisa.

Dialudi vo yeto awonso ‘twasumuka, yo funga muna nkembo a Nzambi.’ Ka vena muntu ko walembi lunga, olenda lungisa nkanikinu miawonso miansongi mia Yave. (Roma 3:23; 7:​21-​23) Kansi, ediadi ka disongele ko vo ka tuna mfunu ko vana meso mandi. Yave ozeye wo vo “o niok’ankulu, una vo, Nkadi ampemba, wa Satana,” ozolanga sadila e nkal’eto yalembi lunga. (Lus. 12:​9, 10) Wau kazeye vo “tu ntoto,” Nzambi okutuyambulwilanga, ke ‘kwamanananga kututumba ko.’​—⁠Nku. 103:​8, 9, 14.

Avo tuyambwidi nzila zambi yo finama Yave yo viluk’o ntima, ‘owokesa kutuyambulwila.’ (Yes. 55:7; Nku. 51:​17) Nkand’a Nzambi usonganga vo, kana nkutu vo masumu meto “mabwaka, mepemba nze mvul’ampembe.” (Yes. 1:​18) Muna kuma kiaki, yambula twabak’e nzengo za lembi yoya o vanga luzolo lwa Nzambi.

Wau vo tu wantu alembi lunga, ke twafwana badikilwa asongi ko vana meso ma Nzambi. Adami yo Eva bavidisa kiwuntu kialunga ye vuvu kia moyo a mvu ya mvu. Ke yau kaka ko, kansi yo yeto awonso. (Roma 6:​23) Kansi, muna kuma kia zola kwandi muna wantu, Yave wakubika vo masumu meto malolokwa, avo tukwikidi muna kimenga kia lukulu kia Mwan’andi Yesu Kristu. (Mat. 20:28; Yoa. 3:​16) Eyayi i mpila isundidi ina Nzambi kasongela e “nsambu” yovo walakazi wandi. (Tito 2:​11) Kieleka, masumu meto malenda lolokwa. Ozevo, ekuma tufwete yambulwila Satana katufila mu yindula vo masumu meto ka malendi lolokwa ko?

‘Viakana Visi Yandi ye Nitu’

Satana wavova vo Yobi oyambula kwikizi kiandi kele vo ovidisi vimpi wandi wambote. Muna fidisa Yave e mpaka, Nkadi Ampemba wavova vo: “Lambul’ak’o koko waviakana visi yandi ye nitu, ozevo okuyambula vana ndose aku.” (Yobi 2:⁠5) O ntantu a Nzambi otoma yangalala avo lendele kutufila mu yindula vo ke tuna mfunu ko wau vo kimbevo tuna kiau.

 Kansi, Yave ke kutubembolanga ko vava ke tulendanga diaka vanga mawonso ko twavangidinge muna salu kiandi. Adieyi tuvanga kele vo nkundi eto ovangukidi? Nga ke tukumvwa diaka mfunu ko wau kelendanga diaka kutusadisa ko? Ve. Tukwamanana kunzola yo kunlunga-lunga, musungula kele vo mu kuma kieto kavangukidi. Nga Yave kalendi wo vanga ko mu kuma kieto? Muna Nkand’a Nzambi tutanganga vo: “Nzambi kakondelo nsongi ko, ovo ovilakanwa salu kieno, yo zola nusongèle nkumbu andi.”​—⁠Ayib. 6:⁠10.

Vena ye “nkento anson’ansukami” oyikwanga muna Nkand’a Nzambi, ona wayikama nsambil’a Nzambi mu mvu miayingi. Vava Yesu kamona nkento ndiona watuba “mbiya zole” muna lundilwa kia nzimbu kiakala muna tempelo, nga wambadikila vo kena mfunu ko wau vo lukau kavana lwakete? Ve, kansi wansanisina wau kavanga dina kalenda mu yikama e nsambil’aludi.​—⁠Luka 21:​1-4.

Avo tusikila ye kwikizi, tulenda kala ye ziku vo e ngwizani eto yo Yave ke ikuluka ko, kana nkutu tununini yovo yela mu kuma kia usumuki weto. Nzambi kalendi yambula selo yandi yakwikizi ko wau ke belendanga diaka vanga mayingi ko muna salu kiandi mu kuma kia mayela yovo kinunu.​—⁠Nku. 71:​9, 17, 18.

Tambula “Mpu a Vita a Luvuluku”

Aweyi tulenda kitanina yo lembi vunwa kwa Satana? Paulu wa ntumwa wasoneka vo: “Nukumamena kaka muna Mfumu, yo muna nkum’efuka diandi. Nuvwata nwaninwa yawonso ya Nzambi, nwavw’owu nutelamena tumpeso twa Nkadi ampemba.” Kimosi muna nwaninwa yayi i “mpu a vita a luvuluku.” (Ef. 6:​10, 11, 17) Muna lembi vunwa kwa Satana, tufwete tambula mpu yayi yo vwatanga yo. E mpu yau itaninanga o ntu a soladi. E “vuvu kia luvuluku” tuna kiau, i sia vo, vuvu kia ndungan’a nsilu mia Nzambi mu kuma kia nz’ampa, kilenda tanina nyindu mieto muna luvunu lwa Satana. (1 Tes. 5:⁠8) Tufwete kalanga y’elongi dia yeto kibeni dia Nkand’a Nzambi kimana e vuvu kiaki kiakala kiasikila muna yeto.

Yobi wazizidila mpasi kamweswa kwa Satana. Wau vo lukwikilu lwandi muna lufuluku ngolo lwakala, Yobi kavutuka manima ko kana nkutu vava kamweswa mpasi za lufwa. Wavova kwa Yave vo: “Nga wadi bokela yatambulwila: Wadi si’etima mun’evangu dia moko maku.” (Yobi 14:​15) Kele vo ofwidi mu kuma kia kwikizi kiandi, Yobi wakala ye vuvu vo o zola kwa Nzambi muna selo yandi yakwikizi kwadi kumfila mu kubafula muna lufwa.

Yambula yeto mpe twakala ye vuvu kiaki muna Nzambi aludi. Yave lenda sukisa konso mpasi tulenda mweswa kwa Satana ye asadi andi. Tufwete sungamenanga dina kavova o Paulu vo: “O Nzambi i nkwa kwikizi, ona kekunuyambula nwatontwa ntontwa iviokele ina nulenda ko; kumosi ye ntontwa, oteta nzil’a nkutiswa, kimana nwalenda yo zizidila.”​—⁠1 Kor. 10:⁠13.

[Foto ina muna lukaya lwa 20]

Yave oyangalelanga salu okunsadilanga ye kwikizi kiawonso

[Foto ina muna lukaya lwa 21]

Tambula mpu a vita a luvuluku, wavwatanga yo