Nga Obadikilanga Yave nze se Diaku?

“E MFUMU, utulong’o samba.” Vava mosi mun’alongoki andi kalomba diambu diadi, Yesu wavutula vo: “Ovo se nusamba nuvova vo, e Tata yambula nkumbu aku yazitiswa.” (Luka 11:​1, 2) Yesu wafwana yikila Yave mu mazina nze “Mpungu-ngolo,” ‘Nlongi Anene,’ “Nsemi,” “Munkulu-nkulu a Lumbu” yovo “Ntinu a mvu ya mvu.” (Etu. 49:25; Yes. 30:20; 40:28; Dan. 7:9; 1 Tim. 1:​17) Kansi, Yesu wasadila o mvovo “Tata.” Ekuma? E kuma kadi wazola vo twayikila ndion’osundidi o nene muna nsema wawonso nze una mwana keyikilanga ese diandi dianzodi.

Kana una vo i wau, diampasi dikalanga kwa wantu ayingi dia badikila Nzambi nze Ese diau. Atsuko, * una vo Nkristu, wavova vo: “Muna mvu mialandila luvubu lwame, diampasi diakala kwa mono mu finama Yave nze Ese yo samba kwa yandi.” Muna songa e kuma kia lukatikisu lwandi, wavova vo: “Kisungamenanga ko e lumbu kina o se diame kansonga o zola.”

Mu lumbu yayi yambaninu, e ‘nzolani a ungudi’ ke imonekanga diaka ko kwa mase. (2 Tim. 3:​1, 3) Muna kuma kiaki, ke diampasi ko dia kala ye ngindu nze za Atsuko. Kansi, diakiese dia zaya vo tuvwidi kuma yayingi mu badikila Yave nze Ese dieto dianzodi.

Yave​—⁠Mvani Anzodi

Muna badikila Yave nze Ese dieto, tufwete toma kunzaya. Yesu wavova vo: “Ke ven’on’ozeye o Mwana ko, Ese kaka, ngatu muntu ozeye Ese, Mwana kaka, konso ona mpe o Mwana kakanini kunsengomwena.” (Mat. 11:​27) E mpila yambote tulenda zayila una Yave kenena nze Ese, i bakula dina kavova Yesu mu kuma kia Nzambi aludi. Kansi, nkia diambu kavova Yesu mu kuma kia Se?

Wau kazaya vo Yave i Nto a moyo andi, Yesu wavova vo: “Omono muna Se i nkadilang’o moyo.” (Yoa. 6:​57) Yeto mpe muna Se i twinin’o moyo. (Nku. 36:9; Mav. 17:​28) Adieyi diafila Yave mu vana moyo kw’akaka? Nga ke zola kwandi ko? Kieleka, yeto mpe tufwete zola S’eto ezulu wau katuvana o moyo.

E mpila isundidi in’o Nzambi kasongela zola kwandi muna wantu, i vana Yesu se kimenga kia lukulu. E kimenga kiaki kiaziula e nzila kwa wantu alembi lunga mu kala ye ngwizani ambote yo Yave muna Mwan’andi anzolwa. (Roma 5:12; 1 Yoa. 4:​9, 10) Wau vo S’eto ezulu olungisanga e nsilu miandi, tulenda kala ye ziku vo, awonso bekunzolanga yo kunlemvokela besinga vwa ‘luvevoko lwa nkembo a wan’a Nzambi.’​—⁠Roma 8:⁠21.

Vana ntandu, o S’eto ezulu “odungumunanga ntangw’andi” kwa yeto e lumbu yawonso. (Mat. 5:​45) Ke divavanga ko vo twasamba kimana e ntangwa yavaika. Kansi, e mbangazi a ntangwa mfunu ina kwa yeto ye tutoma yo yangalelanga. O S’eto una vo Mvani olembi tezakana, ozeye mpe nsatu zeto za nitu una nkutu ke twanlombele ko. Muna kuma kiaki, tufwete vaulanga ntangwa mu badika una S’eto ezulu ke lunga-lunganga e vangwa yandi.​—⁠Mat. 6:​8, 26.

O S’eto​—⁠‘Ntanini Ambote’

Muna kuma kia nkangu a Nzambi kuna nz’ankulu, ungunza wa Yesaya uvovanga vo:  “E miongo mikatuka, e kundubulu inikuka; kansi o walakazi wame ke ukukatuka ko, ngatu ekangu diame dia luvuvamu dianikuka, i kavovele o Yave ndiona ufwidi e nkenda (yovo ndiona okutanina).” (Yes. 54:​10) Muna siamisa e diambu diadi, e sambu kia Yesu muna fuku wansuka wa zingu kiandi ova ntoto kisonganga vo Yave ‘ntanini ambote’ kikilu. Mu kuma ki’alongoki andi, Yesu wasamba vo: “Awaya ben’omu nza, omono kwa ngeye nkwiza. E Tat’avelela, ubalundila muna nkumbu aku.” (Yoa. 17:​11, 14) Yave olunga-lunganga yo tanina alandi a Yesu.

Imosi muna mpila Nzambi kekututaninanga muna ntambu mia Satana o unu, i kutuvana madia ma mwanda muna “ntaudi akwikizi yo lulungalalu.” (Mat. 24:​45) Avo tuzolele “vwata nwaninwa yawonso ya Nzambi,” tufwete dianga madia mama malenda kutukumika. Kasikil’owu, yindula “e ngubu a lukwikilu,” ina ilenda kutusadisa mu ‘zima maswanga mawonso matiya ma mbi.’ (Ef. 6:​11, 16) Lukwikilu tusonganga lukututaninanga muna vonza ya mwanda. Ekiaki i kimbangi kia nkum’a S’eto wa kututanina.

Tulenda longoka mayingi mu kuma kia walakazi wa S’eto ezulu, muna toma badika una Mwan’a Nzambi kakadila ova ntoto. Tala dina diasonama muna Maku 10:​13-16. Muna sono kiaki, Yesu wavovesa alongoki andi vo: “Nuyambula yingyana-ngyana iza kwa mono.” Vava yingyana-ngyana yayi banzunga, Yesu wababimbakana yo kubasambula. Ekwe kiese bamona! Muna kuma kia dina kavova Yesu vo: “Ona wambona, wamona Se,” tuzeye wo vo Nzambi akieleka ozolanga vo twamfinama.​—⁠Yoa. 14:⁠9.

Yave wa Nzambi i Nto a zola kulembi suka. Mvani ye Ntanini olembi tezakana, on’ozolanga vo twamfinama. (Yak. 4:⁠8) Ka lukatikisu ko vo, Yave i Se disundidi o wete tulenda vwa.

Nluta Miayingi Tubakanga

Tulenda baka nluta miayingi muna bundang’e vuvu muna Yave nze S’eto ezulu, una vo Se dianzodi yo walakazi. (Nga. 3:​5, 6) Yesu wabaka nluta miayingi wau kasi’e vuvu kiandi kiawonso muna S’andi. Kristu wavovesa alongoki andi vo: “Kina mono amosi ko, mono yo Se kaka, ona wantuma.” (Yoa. 8:​16) Yesu wakala ye ziku vo Yave okunsadisa. Kasikil’owu, vava kavubwa wakasakeswa kwa S’andi, vava kavova vo: “Ndioyu i Mwan’ame anzolwa, ona nyangalelanga.” (Mat. 3:​15-​17) Muna ola lufwa lwandi, Yesu waboka vo: “E Tata, muna moko maku i ngyekwele moyo ame.” (Luka 23:​46) E vuvu kia Yesu muna S’andi ke kiakuluka ko.

Ediadi dilenda vangama mpe kwa yeto. Avo Yave wina yeto, nki kilenda kutumwesa wonga? (Nku. 118:⁠6) Atsuko, ona tutekele yika, wakala ye fu kia bund’e vuvu muna ngolo za yandi kibeni vava kakalanga mu mpasi. Kansi, walongoka oma ma zingu ye salu kia Yesu, yo yantika sia e sungididi muna ngwizani andi ambote yo S’andi ezulu. Nkia nluta diatwasa? Atsuko wavova vo: “Yazaya e nsasa ya kala ye Se yo kumbunda e vuvu.” Wakudika vo: “Owau ngina ye luvuvamu ye kiese. Kieleka, ke vena diambu ko difwete kututokanesa.”

Nkia nluta miakaka tulenda baka muna badikila Yave nze Se dieto? O wana bezolanga mase mau yo vava kubayangidika. Muna kuma kia zola, o Mwan’a Nzambi ‘wavangang’oma mayangidikanga o S’andi e lumbu yawonso.’ (Yoa. 8:​29) Diau adimosi, o zola muna S’eto ezulu kufwete kutufila mu vanga oma mambote yo kumvan’o ‘nkembo.’​—⁠Mat. 11:25; Yoa. 5:⁠19.

O S’eto ‘Osimbanga Koko Kweto Kwalunene’

O S’eto ezulu okutuvananga mpe “nsadisi,” i sia vo, mwand’andi avelela.  Yesu wavova vo mwanda wau ‘ukunufila muna ludi kiawonso.’ (Yoa. 14:​15-17; 16:​12, 13) O mwand’avelela a Nzambi ulenda kutusadisa mu kala yo umbakuzi wafwana mu kuma kia S’eto. Ulenda kutusadisa mu bangula “tumbu twangolo,” i sia vo, malongi maluvunu ye ngindu zabendomoka yo “bunduna konso’kani muna tumama kwa Kristu.” (2 Kor. 10:​4, 5) Muna kuma kiaki, yambula twasambanga kwa Yave kimana katuvana o “nsadisi” katusil’o nsilu ye vuvu vo ‘o Tata kun’ezulu, o van’o mwand’avelela kw’awana bekunlomba.’ (Luka 11:​13) Diamfunu mpe twasambanga kimana mwand’avelela watusadisa mu finama Yave.

O mwana wavuvama kekalanga yo lembi mona wonga vava kekangalanga yo s’andi yo kunsimba o koko. Avo badikidi Yave nze S’aku, olenda kala ye vuvu muna mvovo emi: “Mono Yave wa Nzambi aku nsimba koko kwaku kwalunene, yo kuvovesa vo, kumoni wonga ko; ikusadisa.” (Yes. 41:​13) Lenda kala y’elau diampwena dia “kangala” yo Nzambi yakwele mvu. (Mika 6:⁠8) Avo ozindalala vanga luzolo lwandi, omona zola, kiese ye luvuvamu lutukanga muna badikila Yave nze S’aku.

[Mvovo Vana Yand’a lukaya]