“O Wana Bena yo Nswa wa Longwa oma ma Mwanda”

KINA kia 9 kia ngonde Desemba, 2008, e buka kitalanga oma ma zitu wa wana (Academia Sueca dos Direitos da Criança), kiakala ye lukutakanu lwakala ye ntu a diambu vo: “O Wana Bena yo Nswa wa Longwa Oma ma Mwanda.” Ngindu zayingi zasongwa kwa mpovi zasunzula Dibundu dia Suécia ye mabundu makaka ma Kikristu kia Kimpangila, esi Islame ye buka kitalanga nkal’a wantu.

Mosi muna mpovi, una vo mfumu a dibundu, wavova vo: “Diampasi mu vova ye ziku kiawonso una lusansu lwa Nkand’a Nzambi lulenda sadisila wana mu lungisa nsatu zau za mwanda.” Nkand’a Nzambi aweyi ulungisilanga nsatu za mwanda za wana?

Mfumu a dibundu wavova vo: “E sono ye tusansu twa Nkand’a Nzambi tuvananga wana mambu balenda tanga yo badika yau kibeni.” Wayika “lusansu lwa Adami yo Eva, lwa Kaini ye Abele, lwa Davidi ye Ngoleyate, lwa luwutuku lwa Yesu, lusansu lwa Zakai wa nkwa mpaku, kingana kia mwan’a nkolami, kia Nsamaria oyu wasong’e nkenda.” Wavova vo “tusansu twatu tulenda sadisa wana mu kala ye ngindu zasikila muna mambu mayingi mamfunu muna zingu kia wantu nze i fu kia vuna, kia loloka, kia meng’akaka, singika mambu ye nzolani ya ungudi.” Wakudikila vo: “Tusansu twatu tusonganga e mbandu ambote balenda tanginina o wantu muna zingu kiau.”

Kieleka, diambote mu kasakesa wana batanganga Nkand’a Nzambi. Kansi, nga wana balenda bakula yau kibeni dina betanga muna Nkand’a Nzambi?

Kana nkutu ambuta, divavanga vo muntu akaka kabasasila e sono ya Nkand’a Nzambi batangidi. Kasikil’owu, Nkand’a Nzambi uyikanga muntu ona kalenda bakula ko yandi kibeni mana katanganga. Muntu ndioyo i mbanda-banda wa mwisi Etiopia. Ungunza wa Yesaya katanganga, kansi kabakula ko mana katanganga. Wau vo wazola bakula e mvovo mia ngunza, watambulwila lusadisu kavewa kwa Filipo. (Mav. 8:​26-​40) Mwisi Etiopia ndioyo ke yandi kaka ko wavava lusadisu mu bakula Nkand’a Nzambi. Yeto awonso, musungula wana, lusadisu tuvavanga mu bakula Nkand’a Nzambi.

Nkand’a Nzambi uvovanga vo: “Uzowa ukangamene muna ntim’a mwana.” (Nga. 22:​15) O wana luludiku bavwidi o mfunu. Mase bena ye mbebe ya longa wana e fu yambote kumosi ye mambu ma mwanda mena mu Nkand’a Nzambi ye mana melongwanga muna nkutakani y’Akristu. O wana bena ye nswa wa longwa. Tuka muna kinsedia, bafwete sadiswa mu kala yo zayi wasikila wa Nkand’a Nzambi, kimana bakituka ‘wantu azikuka, awana bena vo, muna diambu dia kulukila, i benena ye ngangu zau zasinswa bazaya mpambula za wete yo bi.’​—⁠Ayib. 5:14.