Toma Sadila “Nsosolo a Mwanda”

“Nutambula . . . nsosolo a mwanda, una vo i diambu dia Nzambi.”​—⁠EF. 6:⁠17.

1, 2. Adieyi tufwete vanga wau vo ateleki ayingi a Kintinu bavwilu mfunu?

VAVA kamona ndonga yavavanga lusadisu lwa mwanda, Yesu wavovesa alongoki andi vo: “O nsâlu wayingi, kansi nsadi mike. Dianu vo, nudodokela mfumu a nsâlu, katuma nsadi muna nsâlu andi.” Yesu kavova kaka ko, wavanga mpe diambu. Una kavova mvovo miami, “obokele alongoki andi au ekumi ye zole” yo kubatuma muna salu kia umbangi, i sia vo, muna “nsâlu.” (Mat. 9:​35-38; 10:​1, 5) Kuna kwalanda, Yesu “watumba lusambwadi lu’akaka, ubatumini nwole-nwole” muna salu kiau kimosi.​—⁠Luka 10:​1, 2.

² O unu, ateleki ayingi a Kintinu bavwilu o mfunu. Muna nkinzi a Luyindulu lwa lufwa lwa Mfumu wavangama mu nza yawonso muna mvu a 2009, wantu 18.168.323 bakutakana. Lutangu lwalu luviokele olu lwa Mbangi za Yave mu mazunda 10 ma mazunda. Kieleka, e yana yabwaka kikilu. (Yoa. 4:​34, 35) Muna kuma kiaki, tufwete sambanga mu lomba asadi ayingi. Kansi, adieyi tufwete vanga ekolo tusambanga? Tufwete siang’e ngolo twakala ateleki azikuka yo kuyivana muna salu kia samuna nsangu za Kintinu yo kitula wantu s’alongoki.​—⁠Mat. 28:​19, 20; Maku 13:⁠10.

3. Mwand’a Nzambi aweyi ulenda kutusadisila mu kala ateleki azikuka?

³ Elongi twalongokele, diasongele una o mwand’a Nzambi ulenda kutusadisila mu ‘vova e diambu dia Nzambi kuna unkabu.’ (Mav. 4:​31) O mwanda wau ulenda mpe kutusadisa mu kala ateleki azikuka. Imosi muna mpila tulenda sadila salu kia umbangi una ufwene i toma sadila sadilwa kiamfunu katuvana o Yave wa Nzambi, i sia vo, Nkand’a Nzambi una vo i Diambu diandi diasonama. Mwand’avelela wasadisa mu soneka Nkand’a Nzambi. (2 Tim. 3:​16) Nzambi wavumunwina e nsangu zina mo. Muna kuma kiaki, avo tutoma sadila Nkand’a Nzambi muna salu kia umbangi, tusonga vo mwand’avelela ukutufilanga. Muna zaya una tulenda wo vangila, yambula twateka fimpa e nkuma una muna Diambu dia Nzambi.

‘Diambu dia Nzambi Divwidi Nkuma’

4. Aweyi Diambu dia Nzambi dilenda sobela e zingu kia muntu?

⁴ Kieleka, diambu dia Nzambi divwidi nkuma wayingi. (Ayib. 4:​12) Tulenda vova vo e nsangu zina muna Nkand’a Nzambi zilutidi o twa ke mu nsosolo wavangwa kwa muntu ko, kadi zikotanga yamuna mpambula za visi yo nluku. E ludi kia Nkand’a Nzambi kikotanga muna kati kwa ntim’eto yo lwaka muna nyindu ye makani yo senzeka owu twina muna kati. E ludi kia Nkand’a Nzambi kina yo nkuma ulenda fila muntu mu soba zingu kiandi. (Tanga Kolosai 3:10.) Elo, Diambu dia Nzambi dilenda kikilu soba zingu kia wantu.

5. Nkand’a Nzambi aweyi ulenda kutufidila? Nkia nluta dilenda kututwasila?

⁵ Vana ntandu, muna Nkand’a Nzambi tulenda mo solola ngangu zina ka tulendi solola mu fulu kiakaka ko. Uvwidi malongi mamfunu malenda sadisa wantu mu zaya una balenda sundila e mpasi bemonanga mu nza yayi. Diambu dia Nzambi ke diminikanga kaka tambi yeto ko, kansi diminikanga mpe  mayendelo meto. (Nku. 119:105) Dilenda kutusadisa mu sunda mpasi za zingu yovo baka nzengo zambote vava tusolanga akundi, nsaka, salu ye mvwatu ye mu mambu makaka. (Nku. 37:25; Nga. 13:20; Yoa. 15:14; 1 Tim. 2:⁠9) O sadila nkanikinu mina muna Diambu dia Nzambi dilenda kutusadisa mu kala nkal’ambote y’akaka. (Mat. 7:12; Fili. 2:​3, 4) Avo tuyambwidi vo Diambu dia Nzambi diaminika mayendelo meto, tulenda zaya e nluta yovo mfwilu milenda twasa e nzengo tubaka. (1 Tim. 6:⁠9) Nkand’a Nzambi uyikanga mpe dina kevanga o Nzambi kuna sentu. Ediadi dilenda kutusadisa mu zingil’e ngwizani y’ekani diadi. (Mat. 6:33; 1 Yoa. 2:​17, 18) Ekwe zingu kiambote kalenda kala kiau o muntu kele vo yambwidi vo nkanikinu mia Nkand’a Nzambi miafila zingu kiandi!

6. Nkand’a Nzambi aweyi winina se nwaninwa kiangolo muna vit’a mwanda?

⁶ Nkand’a Nzambi una mpe se nwaninwa kiangolo muna vit’a mwanda tunwananga. Paulu wayikila Diambu dia Nzambi vo “nsosolo a mwanda.” (Tanga Efeso 6:​12, 17.) Avo ditomene sadilwa, Diambu dia Nzambi dilenda vevola wantu muna ubundu wa Satana. Vana fulu kia fwasa wantu, nsosolo wau mioyo mia wantu uvuluzanga. Muna kuma kiaki, tufwete sianga ngolo za toma sadila nsosolo wau.

Toma Sadila Nkand’a Nzambi

7. Ekuma o longoka toma sadila “nsosolo a mwanda” dinina o mfunu?

⁷ Soladi lenda zaya toma sadila nwaninwa muna vita kele vo olongokele wo sadila mu mpila yambote. Diau adimosi mpe divavwanga mu sadila “nsosolo a mwanda” muna vit’a mwanda tunwananga. Paulu wasoneka vo: “Sia ko e sungididi, o kusonga kwa Nzambi, wafwana, u nsadi wakondw’e nsoni otoma sansang’e diambu dia ludi.”​—⁠2 Tim. 2:⁠15.

8, 9. Adieyi dilenda kutusadisa mu toma bakula e sono ya Nkand’a Nzambi? Yik’e nona.

⁸ Adieyi dilenda kutusadisa mu ‘toma sasila diambu dia ludi’ muna salu kia umbangi? Muna toma sasila kw’akaka dina diasonama muna Nkand’a Nzambi, entete yeto kibeni tufwete dio bakula. Ediadi divavanga vo twasia e sungididi muna sono ivitidi ye ina ilandidi e tini tutanganga. E sono yayi ilenda kutusadisa mu toma bakula e nsasa ya dina tutangidi.

⁹ Muna toma bakula e sono kia Nkand’a Nzambi divavanga vo twafimpa e sono ina vana ndambu. Tulenda bak’e nona muna mvovo mia Paulu muna Ngalatia 5:13. Wasoneka vo: “Oyeno abunzi, muna umfumu (yovo luvevoko) i nwasuminwa; kansi ke umfumu wa sila nitu e nzila ko, muna zola nusadiziana kaka.” Nkia luvevoko kayika o Paulu mu sono kiaki? Nga luvevoko mun’esumu yo lufwa yovo muna malongi maluvunu kayika, ovo mu diambu diakaka? E sono ina vana ndambu isonganga vo luvevoko kayika o Paulu lwa “sibu kia Nsiku.” (Ngal. 3:​13, 19-24; 4:​1-5) Luvevoko lwakaka kayika i luna bavwa mu kuma kia landa Kristu. Awana  bayangalelanga luvevoko lwalu, basadisanga muntu yo nkw’andi muna zola. Awana bakondelo zola, bekuyivananga muna fu kia tantana ye kumbaziana.​—⁠Ngal. 5:⁠15.

10. Muna toma bakula e nsasa ya sono ya Nkand’a Nzambi, nkia lusansu tufwete zaya? Aweyi tulenda lo zayila?

¹⁰ Muna toma bakul’e nsasa ya sono kimosi kia Nkand’a Nzambi, tufwete vava zaya ona wasoneka nkanda wauna, nkia ntangwa kasoneka wo ye una wakala zingu kiandi muna kolo kiakina. Dia lusadisu mpe dia zaya ekani diasonekenwa nkanda wauna. Avo dilendakana, vava zaya una wakala e fu ya kisi nsi ya wantu bazinganga muna kolo kiakina, nsambil’au ye mavangu mau. *

11. Adieyi tufwete venga vava tusasilanga sono ya Nkand’a Nzambi?

¹¹ O ‘toma sasila diambu dia ludi,’ ke mpasi sasila kaka ko. Tufwete keba twalembi sadilanga Nkand’a Nzambi mu vumisa wantu. Kana una vo tulenda sadila e sono ya Nkand’a Nzambi mu tanina lukwikilu lweto, nze una Yesu kavanga vava katontwa kwa Nkadi Ampemba, o Nkand’a Nzambi ka ufwete sadilwa mu vumisa wantu ko yovo kubakwikidisa mu ngolo mana tulonganga. (Nsi. 6:16; 8:3; 10:20; Mat. 4:​4, 7, 10) Tufwete lemvokela lulukisu lwa Petelo wa ntumwa wasoneka vo: “Nutumba Kristu se Mfumu muna ntima mieno: nukubama kak’o vana mvutwilu kwa konso on’okunuyuvul’e kuma kia vuvu kin’omo yeno, kansi kuna lembama, yo vumi.”​—⁠1 Pet. 3:⁠15.

12, 13. Nkia “tumbu twangolo” tulenda bangulwa kwa ludi kia Diambu dia Nzambi? Yik’e nona.

¹² Avo Diambu dia Nzambi ditomene sasilwa, adieyi dilenda vanga? (Tanga 2 Korinto 10:​4, 5.) E ludi kia Nkand’a Nzambi kilenda bangula “tumbu twangolo,” i sia vo, senzeka malongi maluvunu, mavangu mayiva ye ndongota zitukanga muna ngangu za wantu alembi lunga. Tulenda sadila Nkand’a Nzambi muna vunisa konso malongi ‘metelamenang’o zayi wa Nzambi.’ Malongi ma Nkand’a Nzambi malenda sadilwa mu sadisa akaka mu singika ngindu zau yo wizanisa zo ye ludi.

¹³ Tubong’e nona kia nkento mosi una ye kimbuta kia mvu 93, kuna Índia. Tuka kileke kiandi, elongi dia wutuluka kakwikilanga. Vava kayantika longoka Nkand’a Nzambi mu nkanda ye mu telefone yo mwan’andi wakala ku nsi ya kinzenza, vana vau wakwikila dina kalongokanga mu kuma kia Yave ye nsilu miandi. Kansi, wau vo elongi dia wutuluka diatoma kota muna ntim’andi, wafidisa mpaka vava mwan’andi kansonekena mu kuma kia nkal’a mafwa. Wavova vo: “Kilendi kwikila mu sono oyikidi ko. Mabundu mawonso melonganga vo vena ye lekwa kilembi fwanga muna nitu a muntu. Tuka kolo, ikwikilanga  vo nitu fwa ifwanga, kansi vena ye lekwa kilembi monekanga kikwenda wutulukanga mu nitu zakaka. Kilenda wutuluka vioka nkumbu 8.400.000. Nga diadi dialuvunu? Nga mabundu mawonso luvunu belonganga?” Nga “nsosolo a mwanda” ulenda bangula elongi diadi? Una bafimpa e sono yayingi ya Nkand’a Nzambi mu kuma ki’elongi diadi, wasoneka vo: “Owau, ngyantikidi bakula e ludi mu kuma kia nkal’a mafwa. Ntomene yangalala mu zaya vo vava kikala lufuluku, tumonana diaka ye azolw’eto ana bafwa. Ngina ye vuvu vo ke kolo ko, e Kintinu kia Nzambi kikwiza.”

Wondelelanga

14. Wondelela wantu aweyi disongele?

¹⁴ O toma sadila Nkand’a Nzambi muna salu kia umbangi ka diambu dia tanga kaka sono ko. Paulu wantu ‘kawondelelanga’ vava kalonganga. I diau mpe tufwete vanga oyeto. (Tanga Mavangu 19:​8, 9; 28:23.) O “wondelela” disongele vo “kwikidisa.” Ndiona okwikidisu, otambulwilanga dina kazayisu. Vava tuwondelelanga muntu katambulwila malongi ma Nkand’a Nzambi, tukumfilanga mu kwikila dina tumvovese. Muna vanga wo, tufwete songanga kwa wantu e ziku kia dina tuvovanga. Tulenda wo vangila mu mpila zilende.

15. Aweyi lenda fidila ngindu za muntu muna Nkand’a Nzambi yo kumfila kazitisa wo?

¹⁵ Fila e ngindu za muntu muna Nkand’a Nzambi yo kumfila kazitisa wo. Vava oyikanga e sono kia Nkand’a Nzambi, sadisa muntu mu sia sungididi muna mfunu wa zaya e ngindu za Nzambi muna diambu numokenanga. Avo umvene e kiuvu yo wá mvutu zandi, lenda kumvovesa vo ‘yambula twafimpa una tulenda zayila una Nzambi kebadikilanga diambu diadi.’ Lenda mpe kunyuvula, ‘Adieyi kevovanga o Nzambi mu kuma kia diambu diadi?’ Vava tusadilanga e ndekwa zazi mu tanga e sono, tusonganga vo Nkand’a Nzambi kwa Nzambi wavumunwinwa. Tusadisanga mpe wantu mu kala ye vumi wa Nkand’a Nzambi. Diamfunu dia vanga wo, musungula vava tusianga umbangi kwa muntu okwikilanga mu Nkand’a Nzambi, kansi kazeye dina ulonganga ko.​—⁠Nku. 19:​7-10.

16. Adieyi dilenda kusadisa mu toma sasila sono ya Nkand’a Nzambi?

¹⁶ Kutanginge kaka sono ko, sasilanga kio mpe. Paulu wakala ye fu kia ‘sasila yo songa’ e ziku kia mana kalonganga. (Mav. 17:⁠3) Ezak’e ntangwa e sono kimosi kilenda yika mambu mayingi. Kansi, ofwete sola kaka mvovo miasina min’e ngwizani ye diambu numokenanga. Lenda wo vanga muna vutukilang’e mvovo miasina yovo yuvula yuvu ilenda sadisa muntu omokenanga yandi mu bakula mvovo miami. I bosi, sasila e diambu diasina dina muna sono nutangidi. Sadisa muntu kazaya una kalenda sadila sono kiaki muna zingu kiandi.

17. Aweyi lenda songela o mfunu a sono ya Nkand’a Nzambi ye ziku kiawonso?

¹⁷ Songa mfunu a sono ye ziku kiawonso. Muna sadilanga mvovo miasikididi, Paulu wasonganga kw’akaka o mfunu a sono ye ziku kiawonso. (Mav. 17:​2, 4) Nze Paulu, siang’e ngolo za kotesa diambu muna ntima mia wantu. Vavanga ‘vola,’ i sia vo, vaikisa mana mena muna ntim’a muntu muna sadilanga yuvu isonganga vo wete diandi ovwidi o  mfunu. (Nga. 20:⁠5) Kalanga ye ndekwa yo sadila mvovo miakiá, ye sikididi kiawonso. Fwete kalanga ye ziku kia dina ovovanga. E mvovo miaku mifwete tukanga muna Nkand’a Nzambi. Disundidi o wete dia sadila sono kimosi yo toma kio sasila ke mu tanga sono yole ko yovo yitatu mu nzaki-nzaki. O sadila e mvovo miasikididi milenda mpe ‘wokesa zayi muna befo yaku.’ (Nga. 16:​23) Ezak’e ntangwa, dilenda kala diamfunu dia vavulula yo kudikila mambu makaka. Kuna kwa nkento tuyikidi kala, una ye mvu 93, diavavanga vo kabakula e kuma elongi dia moyo ulembi fwa diasayanena. O zaya etuku di’elongi diadi ye una diakotela muna mabundu mayingi ma nza yayi diansadisa mu tambulwila dina kelonganga Nkand’a Nzambi mu kuma kia diambu diadi. *

Kwamanana Toma Sadila Nkand’a Nzambi

18, 19. Ekuma tufwete kwamanana toma sadila “nsosolo a mwanda”?

¹⁸ Muna Nkand’a Nzambi tutanganga vo: “E mpw’a nza yayi mu soba ina.” O wantu ambi mu wokela kaka bena o yiva. (1 Kor. 7:31; 2 Tim. 3:​13) Muna kuma kiaki, diamfunu twakwamanana bangula “tumbu twangolo” muna toma sadilanga “nsosolo a mwanda, una vo i diambu dia Nzambi.”

¹⁹ Ekwe kiese tuna kiau wau tuna ye Diambu dia Nzambi yo sadila e nsangu zankuma zina mo mu senzeka malongi maluvunu yo vava akwa ntima miansongi! Ke vena diambu ko disundidi e nsangu zina muna Nkand’a Nzambi o nkuma. Muna kuma kiaki, yambula twasia ngolo za toma sadila “nsosolo a mwanda” muna salu twavewa kwa Nzambi kia samuna nsangu zambote za Kintinu.

[Mvovo Vana Yand’a lukaya]

Adieyi Olongokele?

• E Diambu dia Nzambi nkia nkuma divwidi?

• Aweyi tulenda ‘toma sasila diambu dia ludi’?

• Malongi ma Nkand’a Nzambi aweyi malenda bangulwila “tumbu twangolo”?

• Aweyi lenda wokesela ngangu za vova ye sikididi kiawonso muna salu kia umbangi?

[Yuvu ya Longoka]

[Foto ina muna lukaya lwa 12]

Aweyi Tulenda Sadila Diambu dia Nzambi ye Ziku Kiawonso?

[Mafoto zina muna lukaya lwa 12]

▪ Sadisa wantu bazitisa Nkand’a Nzambi

▪ Sasila sono ya Nkand’a Nzambi

▪ Vova ye sikididi kiawonso kimana e ludi kiakota muna ntim’a muntu

[Foto ina muna lukaya lwa 11]

Fwete longoka toma sadila “nsosolo a mwanda”