Yuvu Y’atangi

Nkia diambu dilenda fila muntu mu vubwa diaka?

Vena ye mambu malenda fila muntu ona wavubwa mu kuyifimpa kana vo luvubu lwandi lwakinu ye nsasa yo vava vo kavubwa diaka. Kasikil’owu, vava muntu kevubwanga, nanga evangu diambi kevanganga kuna sweki, edi dilenda kumfila mu vaikiswa muna nkutakani kele vo wavubwa kala. Nga muntu ndioyo olenda kukiyekola kwa Nzambi? Muntu ndioyo wafwana kaka kiyekola kwa Yave kele vo wayambula emvimba evangu diandi diambi. Muna kuma kiaki, muntu wavubwa ekolo kayivananga mun’evangu diambi, olenda lomba vo kavubwa diaka.

Adieyi tuvova mu kuma kia muntu una vo kayivananga diaka mu vangu diambi ko vava kavubwa, kansi kuna kulanda ovangidi diambu divava vo kafundiswa kw’akuluntu? Yindula vo katoma bakula ko dina kavanga vava kavubwa yo vova vo o luvubu lwandi ke lwakaka kikilu ye nsasa ko. Vava akuluntu befundisa muntu ndioyo, ke bafwete katikisa luvubu lwandi ko ngatu vava zaya kana vo wafwana kakala mu kiyekola kwa Yave yo vubwa. Kadi muntu ndioyo kawá elongi dia Nkand’a Nzambi diasonga nsas’a luvubu. Kavana mpe e mvutu za yuvu mu kuma kia kiyekola yo luvubu. I bosi, wasoba e mvwatu miandi yo dimunwa muna maza. Muna kuma kiaki, tulenda vova vo katoma bakula dina kavanga. Akuluntu bafwete kumbadikila nze muntu wavubwa.

Avo muntu okatikisi luvubu lwandi, akuluntu balenda fimpa yandi Eyingidilu dia 1 dia ngonde Yanuali, 1961, lukaya lwa 31-32, y’edi dia 1 dia ngonde Agositu, 1964, lukaya lwa 474-477 mu Kimputu, disasilanga mu mpila yakiá e diambu dilenda fila muntu mu vubwa diaka. Avo muntu omwene vo kafwete vubwa diaka mu kuma kia diambu (nze lembi toma bakula Nkand’a Nzambi vava kavubwa), ezazi nzengo za muntu yandi kibeni.

Akristu nkia mambu bafwete badika mu kuma kia zingila nzo mosi yo wantu ayingi?

Konso muntu fulu kia zingila kavwidi o mfunu. Kansi, o unu wantu ayingi bakondelo e nzo za yau kibeni. E mpasi za zingu, mayela yovo mambu makaka malenda fila wantu mu zingila vamosi ye yitu yau. Muna fulu yayingi ova nza, wantu ayingi balenda zingila mu suku dimosi ye yitu yau.

Ke diambu dia nkubik’a Yave ko dia sikidisa kana azeyi i nzo zambote bafwete zingila a mpangi mu nza yawonso. Akristu bakasakeso mu badika e nkanikinu mia Nkand’a Nzambi mu zaya kana vo e mpila bezingilanga muna nzo Yave iyangidikanga yovo ve. Nkia nkanikinu miami?

E diambu diantete tufwete fimpa i dia zaya vo, o zingila nzo mosi yo wantu ayingi dilenda kutwasila mfwilu yo fwasa  ngwizani eto yo Yave. Nkia mpila wantu tuzinganga yau? Nga Yave besambilanga? Nga nkanikinu mia Nkand’a Nzambi belemvokelanga? Paulu wa ntumwa wasoneka vo: “Ke nuvukikwa ko: E yikundi yambi ifwasa fu yambote.”​—⁠1 Kor. 15:33.

Nkand’a Nzambi uvovanga vo Yave otumbanga mavangu ma zumba. (Ayib. 13:⁠4) Muna kuma kiaki, e fu kia yambula vo akala y’akento baleka vamosi nze vika sia vo nkento yo yakala, ka kilendi yangidika Nzambi ko. Nkristu kalendi zingila mu nzo iyambulwilanga mavangu ma zumba ko.

Vana ntandu, Nkand’a Nzambi uvovanga vo awonso bazolele vwa edienga dia Nzambi ‘batin’e zumba.’ (1 Kor. 6:​18) Muna kuma kiaki, diangangu kw’Akristu mu venga zingila muna nzo ilenda kumfila mun’evangu dia zumba. Kasikil’owu, badik’e nona ki’Akristu ayingi belekanga nzo mosi. Nga e fulu kiaki ke kikubasia mu vonza ko? Adieyi tuvova kele vo wantu wole bena vo ke nkento yo yakala ko basidi yau kaka muna nzo, wau vo ana bekalanga yau bavaikidi mu fikolo? Diau adimosi mpe, dilenda kala dia vonza kwa mwan’eyakala yo mwan’ankento bebandananga kimakangu mu zingila nzo mosi. Diangangu dia lembi zingila mu nzo za mpila yayi.

Ke diangangu ko kw’awana bavonda o longo mu kwamanana zingila mu nzo mosi. E nzola ina bateka kala yau ilenda kubafila mun’evangu dia zumba.​—⁠Nga. 22:⁠3.

E diambu diakaka tufwete badika i una esi belo bebadikilanga e diambu diadi. Kele vo Nkristu oyangalele zingila mu nzo ina yo wantu ayingi, kansi ifilanga esi belo mu tá esakuba, kafwete fimpa e diambu diadi. Ka tuzolele ko vo e kadilu kieto kiatwasa luvezo muna nkumbu a Yave. Paulu wavova vo: “Nukondwa nkankalakani, kana vana vena Ayuda, kana Mingerekia, kana dibundu dia Nzambi: waun’omono mpe nyangidika wantu awonso muna mambu mawonso, kivavang’owame wete ko, owu w’ebidi kaka, bavuluzwa.”​—⁠1 Kor. 10:​32, 33.

O solola e fulu kiambote kia zingila dilenda kala diampasi kw’awana bazolele lemvokela nkanikinu mia Yave. Kansi, Akristu bafwete ‘fimpanga bazay’owu utondakananga, kwa Mfumu.’ Bafwete kala ye ziku vo muna nzo zau ke muvangamanga diambu diasafu ko. (Ef. 5:​5, 10) Ediadi divavanga vo Akristu balombanga luludiku kwa Nzambi yo vanga wawonso balenda mu tanina akaka muna nitu, muna mwanda yo zitisa e nkumbu ambote a Yave.