Yuvu Y’atangi

E sono kia Yezekele 18:​20, kivovanga vo “mwana kenata bi w’es’andi ko,” kina kia Luvaiku 20:5 kivovanga vo Yave ‘okingulwisa bi wa mase muna wana.’ Nga nswaswani ina vo?

Ke vena nswaswani ko. E sono kiantete kisonganga e mbebe ya konso muntu, eki kiazole kisonganga vo, evangu diambi dia muntu dilenda twasa mfwilu kwa mbongo andi.

E tini yakaka ya kapu kia 18 kia Yezekele yisonganga vo, konso muntu osendwa mun’owu w’evangu diandi. E tini kia 4 kivovanga vo “o moyo una usumuka, fwa ufwa.” Adieyi tuvova mu kuma kia muntu una vo ‘nsongi kwandi ovangang’oma ma ndungidi yo unsongi’? “Okala una” yovo ozing’aka. (Yez. 18:​5, 9) Vava kelwakanga muna ntela ya kibakila e nzengo, konso muntu ofundiswanga “mun’owu wa ngyenda zandi.”​—⁠Yez. 18:⁠30.

E diambu diadi diabwa muna Kora wa Nlevi. Vava Aneyisaele bakala muna makanga, Kora wayantika veza e salu kavewa kwa Yave. Muna vava vo e kiyekwa kia kinganga kia kala mpe kiandi, Kora ye akaka batelamena Mose yo Arone ana basunzulanga Yave. Muna kuma kia lulendo, basala e salu kina ke bavaninwa nswa ko, Yave wavonda Kora y’awana banyikama. (Nta. 16:​8-11,  31- 33) Kansi, o wan’a Kora ke bayisia mu ukolami wau ko. Nzambi kabatumba ko mu kuma ki’esumu dia se diau. E kwikizi kiau muna Yave kiabavuluza.​—⁠Nta. 26:​10, 11.

Kansi, adieyi tuvova mu kuma kia mvovo mina muna Luvaiku 20:​5, mina muna Nkanikinu Kumi? Fimpa e tini yakaka ya kapu kiaki. Yave wakanga ekangu dia Nsiku ye zula kia Isaele. Vava bawá e mvovo mi’ekangu, Aneyisaele bavutula kumosi, oku vo: “Mawonso mana kavovele o Yave i tuvanga.” (Luv. 19:​5-8) E zula kiawonso kiakala ye ngwizani ambote yo Yave. Muna kuma kiaki, e mvovo mina muna Luvaiku 20:5 kwa zula kiawonso miazayiswa.

Vava Aneyisaele basonganga e kwikizi muna Yave, e zula kiakala ye kiese yo vwa nsambu zayingi. (Fuka 26:​3-8) Kansi, vava e zula kia Isaele kiayambulanga Yave yo landa nzambi zaluvunu, wayambulanga kubasambula yo kubatanina. E zula kiamonanga e mpasi. (Afu. 2:​11-​18) Dialudi vo vakala y’awana basikila ye kwikizi yo lemvokela nkanikinu mia Nzambi, kana una vo e zula kiau kialanda nzambi zaluvunu. (1 Nti. 19:​14, 18) Akwa kwikizi awaya bamona mpe e mpasi mu kuma ki’esumu dia nkangu, kansi Yave wabasonga walakazi.

Vava Isaele basakisa kulula nkanikinu mia Yave yo vezesa nkumbu andi kwa zula yakaka, Yave watumba nkangu andi muna kubayambula banatwa mu kinkole kuna Babele. E tumbu kiaki kiavewa kwa konso muntu ye kwa nkangu awonso. (Yer. 52:​3-11, 27) Kansi, Nkand’a Nzambi usonganga vo esumu dia zula kia Isaele diampwena kikilu diakala, kadi e mbandu ina yetatu ye ina yeyá, nanga ye zina zalanda zamona e mpasi mu kuma kia bi wa mase mau, nze una wasonama muna Luvaiku 20:⁠5.

Nkand’a Nzambi uyikanga mpe tusansu twa esi nzo bamona e mpasi mu kuma ki’evangu diambi dia mase mau. Ele wa ngang’ambuta wakendeleka Yave mu yambula “yimpumbulu” ya wan’andi bakwamanana sala se anganga. (1 Sam. 2:​12-16, 22-​25) Wau vo Ele wazitisa wan’andi ke mu Yave ko, Nzambi wavova vo esi nzo a Ele bekatulwa muna kinganga. Ediadi diayantika vangama muna Abiata wa ntekelo a ntekelo andi. (1 Sam. 2:​29-36; 1 Nti. 2:​27) E nona kia Ngekazi kitoma songanga e nkanikinu una muna Luvaiku 20:⁠5. Wasadila kiyekwa kiandi nze selo kia Elesa mu tambula nsendo kwa Namani wa Mfumu a makesa ma Suria ona wawukwa. Muna Elesa, Yave wayika e tumbu kevewa. Wavova vo: “O wazi wa Namani ulamina ngeye ye mbongo aku yakwele mvu.” (2 Nti. 5:​20-​27) Muna kuma kiaki, e mbongo a Ngekazi yamona e mpasi mu kuma ki’evangu diandi.

Nze Nsemi ye Mvani a Moyo, Yave una yo nswa wa sikidisa e tumbu kafwanukinu o muntu. E nona iyikilu va ntandu isonganga vo o mwana yovo e mbongo ilenda mona e mpasi z’esumu di’akulu au. Kansi, Yave ‘owanga kazu kia mimbona-mpasi.’ Awana bevilukanga e ntima balenda vw’edienga diandi yo kubavevola muna mpasi.​—⁠Yobi 34:28.

[Foto ina muna lukaya lwa 29]

Kora y’awana banyikama muna ukolami batumbwa mu kuma ki’evangu diau