Nga Osungamenanga?

Nga wayangalele tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:

• O Masia nkia kuma kafwila?

O lufwa lwa Yesu lwasonga vo muntu alunga olenda kwandi sikila ye vumi wa Nzambi kana nkutu nkia mpila ntota zinlwakidi. Lufwa lwalu i mfutu a tumbu ki’esumu diasambukila mbongo a Adami yo ziula nzil’a moyo a mvu ya mvu.​—⁠15/12, lukaya lwa 22-23.

• Nki kilenda sadisa muntu mu kala ye nyindu asikila mu kuma kia malavu ma nkolwa?

Sambu y’elongi dia Nkand’a Nzambi dilenda sadisa. Kala ye volo, tatidila nzengo zaku, sola yikundi yambote. Ndiona zolele nua malavu kafwete sikidisa e tezo yo kala yo unkabu wavova vo kinua malavu ko.​—⁠1/1, lukaya lwa 7-9, mu Kimputu.

• Adieyi divavwanga mu kala ye mbokena zambote yo wana?

Mayingi mevavwanga, ke mpasi vovana kaka ko ye wana. Divavanga vo wayuvulanga yuvu yo kala ye luzindalalu lwa wunikina e mvutu zau. Ndonga bemonanga vo, ola ya dia i ntangw’ambote ya kala ye mbokena zambote.​—⁠15/1, lukaya lwa 18-​19.

• Wau vo Yave walunga, aweyi kalenda mwena e ntantu?

Ezak’e ntangwa Nzambi osobanga e ngindu mu kuma kia wantu. Kasikil’owu, nkumbu miayingi Aneyisaele babembolanga Yave yo landa nzambi zakaka. Yave wayambulanga kubatanina. Kansi, vava nkangu wavilukanga o ntima muna vilwa wau yo lomba lusadisu lwa Nzambi, wasobanga e ngindu mu kuma kiau yovo ‘wamonanga e ntantu.’ (Afu. 2:18)​—⁠1/2, lukaya lwa 21, mu Kimputu.

• Nkia diambu dilenda fila muntu mu vubwa diaka?

Ediadi dilenda vangama kele vo, o muntu vava kavubwa, nanga evangu diambi kavangidinge kuna sweki, edi dilenda kumvaikisa mu nkutakani kele vo wavubwa kala.​—⁠15/2, lukaya lwa 22.

• Nkia vakuba tatu besianga o wantu mu lembi kala akwa ziku?

Ndonga beyindulanga vo balenda kwau yiya wau vo asukami. Akaka bevovanga vo, “Awonso i diau bevanganga.” Akaka vava benonanga e lekwa kiangani bevovanga vo “nona ke yiya ko.” Nkand’a Nzambi ke utondanga diambu diadi ko.​—⁠1/3, lukaya lwa 12-​14, mu Kimputu.

• Muna kingana kia Yesu kia masa ye mbongo ambi, e mvovo wa kuna mbongo ambote adieyi misonganga?

Yesu wa Mwan’a muntu, wakubika e mpatu ekolo kasala salu kiandi ova ntoto. Tuka kina kia Pentikosti ya mvu a 33 wa Tandu Kieto, e mbongo ambote yayantika kunwa vava Akristu bakuswa nze wan’a Nzambi, i sia vo, wan’a Kintinu.​—⁠15/3, lukaya lwa 20.

• Muna kingana kia Yesu, awana bafwananene ye mbongo ambote, aweyi bekutikilwanga mun’elundilu dia Yave? (Mat. 13:⁠30)

E kingana kiaki mu lungana kina mu lumbu yayi yambaninu. O wan’a Kintinu, ana bafwananene ye mbongo ambote, bekutikwanga mun’elundilu dia Yave vava bekotanga mu nkutakani y’Akristu yovo vava bebakanga nsendo au kun’ezulu.​—⁠15/3, lukaya lwa 22.

• Nani wasikidisa vo e Sono ya Kingerekia ya Kikristu yakala muna buka kia nkanda miavumunwinwa?

Ka mfumu za mabundu ko. Kansi, Akristu akieleka, ana bafilwa kwa mwand’avelel’a Nzambi mu zaya e nkanda mina miavumunwinwa. Ediadi ngwizani dina y’edi dia sia vo, muna tukau twa mwanda twavewa muna nkutakani y’Akristu a tandu kiantete vakala ye akwa ‘ntona za sono yavumunwinwa.’ (1 Kor. 12:​4, 10)​—⁠1/4, lukaya lwa 28, mu Kimputu.