Ekuma Tufwete Zitisila Anunu?

KUNA mbanz’a California, Estados Unidos, kuna ye nti una vo umosi muna nti milutidi katulwa mafoto mu nza yawonso. Nti wau uyikilwanga vo Lone Cypress. Nze una amwangi a nsangu bevovanga, nti wau mvu 250 se una. Kana una vo utomene zayakana mu kuma kia mvu miayingi se una, vena ye mambu makaka metuntanga sungididi kia wantu mu kuma kia nti wau. Kasikil’owu, muna toma wo sikinina, bakanga wo e nsinga yo zunga matadi vana yanda.

O nti wau una ye nkumbu Lone Cypress ukutusungamesanga Akristu bena vo se anunu, ana besonganga luzindalalu. Imosi muna mpila besongelanga wo i samunang’e nsangu zambote. O Yoele wa ngunza wasakula vo ‘anunu’ besamuna e nsangu za Nkand’a Nzambi. (Yoe. 2:​28-32; Mav. 2:​16-​21) Yindula ntangwa beviokesanga muna sadisa wantu mu zaya oma ma ‘nsangu zambote za kintinu.’ (Mat. 24:​14) Akaka muna anunu awaya bena vo ateleki a Kintinu, bezizidilanga lubangamu yovo mpasi zakaka mu mvu miayingi. Avo nti ankatu nkutu usiwanga e sungididi mu kuma kia mvu miayingi se una yo kangwa e nsinga yo zungwa matadi muna wo sikinina, mpangi zeto anunu bafwete toma yangalelwanga yo zitiswa.

Yave wa Nzambi wakanikina nkangu andi kuna nz’ankulu vo: “Otelama vana ndose a nkwa mvu, wazitisa mpolo a nunu.” (Fuka 19:​32) Vana vena selo ya Yave o unu, vena ye mpangi zayingi zakwikizi bena vo anunu ‘bekangalanga yo Nzambi’ se mvu miayingi.  (Mika 6:⁠8) Ekolo bezindalalanga lemvokela e nsiku mia Nkand’a Nzambi, e nsuki zau zampembe zina se “kolow’ankembo.”​—⁠Nga. 16:⁠31.

Paulu wa ntumwa wavovesa Timoteo vo: ‘Kabadila mbuta ko.’ Kansi, wakasakeswa vo ‘kanludika kaka nga se’ yo badikila “ambuta zamakento nga ngudi.” (1 Tim. 5:​1, 2) Elo, Timoteo wakanikinwa vo ‘katelamanga’ vana ndose a nkwa mvu. Yave ovavanga vo twasonga o zitu wau muna mpil’eto ya vovela.

Muna Roma 12:10 tutanganga vo: “Mun’owu wa zitu, nuyinduziana (yovo nuvit’o ntu).” Dialudi vo akuluntu muna nkutakani bafwete zitisanga Akristu ana bena vo se anunu. Kansi, yeto awonso tufwete vitang’o ntu muna zitisa muntu yo nkw’andi.

O wana bena ye mbebe ya lunga-lunga mase mau ye nkaka zau. Muna kuma kia nti Lone Cypress, o wantu bevavanga e mpila balenda wo lunga-lunga yo kwamanana wo vanga. Muna kuma kiaki, tufwete vavanga e mpila tulenda songela zitu kwa mase meto m’anunu ye kwa nkaka zeto. Kasikil’owu, o sia sungididi vava bevovanga dikutusadisa mu lembi vangilanga mambu mu mpila tuzolele, lembi zitisa e ngindu zau.​—⁠Nga. 23:22; 1 Tim. 5:⁠4.

Anunu vana kati kweto mfunu bena vana meso ma Yave. Ke kubayambulanga ko. (Nku. 71:​18) O Nzambi aludi okubakumikanga kimana bazindalala kunsadila ye kwikizi kiawonso. Yambula yeto mpe twakwamanana sadisa yo zitisa anunu.

[Mafoto zina muna lukaya lwa 7]

Nze una o nti a Lone Cypress uvavilanga vo walungwa-lungwa, anunu mpe bafwete lungwa-lungwa yo zitiswa

[Avwe a Foto]

American Spirit Images/age fotostock