Kukendeleka Mwand’avelel’a Yave ko
Kukendeleka Mwand’avelel’a Yave ko
‘Ke nukendelek’o mwand’avelel’a Nzambi ko, una nwasilwa dimbu.’—EF. 4:30.
1. O Yave nki’elau kevananga kwa mazunda ye mazunda ma wantu? Nkia mbebe bena yau?
YAVE diambu diamfunu kevanganga kuna kwa mazunda ye mazunda ma wantu bezinganga mu nza yayi yampasi. Okubavananga elau dia kala ye ngwizani ambote yo yandi muna Yesu Kristu wa Mwan’andi amosi. (Yoa. 6:44) Olenda kala mosi muna wantu awaya kele vo wakiyekola kala kwa Nzambi yo zingila ngwizani ye kiyekola kwaku. Wau vo mu nkumbu a mwand’avelela wavubilwa, mbebe una yau ya zingila mun’owu wa mwanda wau.—Mat. 28:19.
2. Nkia yuvu tubadika?
2 Oyeto ‘tukuninanga muna mwanda,’ uwuntu wampa twavwatanga. (Ngal. 6:8; Ef. 4:17-24) Kansi, Paulu wa ntumwa okutuvananga elongi yo kutulukisa twalembi kendeleka mwand’avelel’a Nzambi. (Tanga Efeso 4:25-32.) Yambula twatoma badika elongi dia Paulu. Adieyi kazola vova Paulu mu kuma kia kendeleka mwand’a Nzambi? Ndiona wayiyekola kwa Yave aweyi kalenda kendelekela mwand’andi? Aweyi tulenda vengela kendeleka mwand’a Yave?
Adieyi Paulu Kazola Vova?
3. Yika e nsas’a mvovo miasonama muna Efeso 4:30.
3 Entete, badika mvovo mia Paulu mina muna Efeso 4:30. Wasoneka vo: ‘Ke nukendelek’o mwand’avelel’a Nzambi ko, una nwasilwa dimbu yamuna lumbu kia kûka.’ Paulu kazola ko vo mpangi zandi basia kimwanda kiau mu vonza. Mu mwand’a Yave ‘basilwa dimbu yamuna lumbu kia kûka.’ Yamu wau, mwand’avelel’a Nzambi wakinu se dimbu yovo ‘ngyelek’a lekwa kikwiza’ kuna kw’Akristu akuswa ana besikilanga ye kwikizi. (2 Kor. 1:22) O siwa dimbu disongele vo bakitukidi s’evwa dia Nzambi yo vewa elau dia vwila moyo kun’ezulu. Lutangu lw’awana besiwa dimbu lwa 144.000.—Lus. 7:2-4.
4. Ekuma tufwete vengela kendeleka mwand’a Nzambi?
4 O kendeleka o mwanda i diambu diantete dilenda fila Nkristu mu lembi filwa diaka kwa ngolo za Nzambi muna zingu kiandi. Dina kavova Davidi vava kasumuka yo Bate-seba, disonganga vo ediadi dilenda vangama. Davidi wawondelela Yave vo: “Kunkudi oko wina ko; kunkatula mwand’aku avelela ko.” (Nku. 51:11) Akuswa ana ‘bezizidila yamu lufwa,’ yau kaka betambul’e “kolowa” ya moyo ulembi fwa kun’ezulu. (Lus. 2:10; 1 Kor. 15:53) Akristu ana bena ye vuvu kia zingila ova ntoto, mwand’avelela mpe bevwanga o mfunu muna sikila ye kwikizi muna Nzambi yo tambula lukau lwa moyo mu kuma kia lukwikilu lwau muna kimenga kia Kristu. (Yoa. 3:36; Roma 5:8; 6:23) Muna kuma kiaki, yeto awonso tufwete kuyikeba mu lembi kendeleka mwand’avelel’a Yave.
O Nkristu Aweyi Kalenda Kendelekela Mwanda?
5, 6. O Nkristu aweyi kalenda kendelekela mwand’a Yave?
5 Wau vo tu Akristu twayiyekola kwa Nzambi, tulenda venga kendeleka mwanda. Tulenda wo vanga kele vo ‘tukwamanana kangalela muna mwanda,’ kadi muna mpila yayi ke tusundwa kwa zolela yambi ya nitu ko ngatu songa fu yambi. (Ngal. 5:16, 25, 26) Kansi, e mambu malenda soba. Lembi wo zaya, tulenda yantika kendeleka mwand’avelela muna kuyivana muna mavangu mesimwanga muna Diambu dia Nzambi diavumininwa.
6 Avo tukwamanana vanga mana ke mena ngwizani ko ye mwand’avelela, tukendeleka mwanda kumosi mpe yo Yave una vo i Nto a mwanda wau. Lufimpu lwa sono kia Efeso 4:25-32 lukutusonga dina tufwete vanga. Dikutusadisanga mpe mu lembi kendeleka mwand’a Nzambi.
Aweyi Tulenda Vengela Kendeleka Mwanda?
7, 8. Yik’e kuma tufwete vovelang’e ludi.
7 Tufwete vovanga e ludi. Muna Efeso 4:25, Paulu wasoneka vo: “Nutengola luvunu, nuvova ludi, muntu yo muntu yandi: kadi tu yîkwa ya yîkwa.” Wau vo tu “yîkwa ya yîkwa,” ke tufwete kala ampuki ko yovo vunginika asambidi akw’eto. Kadi ediadi disonga vo vuna tukubavunanga. Konso ndiona okuyivana mun’evangu diadi, olenda vidisa e ngwizani andi yo Nzambi.—Tanga Ngana 3:32.
8 E mvovo ye mavangu ma umpuki malenda fwasa kintwadi kia nkutakani. Muna kuma kiaki, tufwete kala nze Daniele wa ngunza wa nkwa ziku, ona walembi solokwa ye mpilakanu. (Dan. 6:4) Tufwete mpe sungamena luludiku lwa Paulu kw’Akristu ana bakala ye vuvu kia vwila moyo kun’ezulu, lusonganga vo konso yîkwa kia “to kia Kristu” kivwilu kwa yîkwa yakaka ye kifwete kalanga entwadi y’alandi akusw’a Yesu. (Ef. 4:11, 12) Avo vuvu kia zingila muna Paradiso ova ntoto tuna kiau, oyeto mpe tufwete vovanga e ludi. Muna mpila yayi, tusiamisa kintwadi kia wan’angudi omu nza yawonso.
9. Ekuma dinin’o mfunu dia lemvokela luludiku luna muna Efeso 4:26, 27?
9 Tufwete sianga Nkadi Ampemba kitantu, ke tuyambula ko vo kafwasa kimwanda kieto. (Yak. 4:7) O mwand’avelela ukutusadisanga mu sia Satana kitantu. Kasikil’owu, tulenda wo vanga muna venga makasi masaka. Paulu wasoneka vo: “Numona makasi, kansi ke nusumuka ko: ke nuyambul’o ntangwa kanudimukina y’ekudi dieno ko: musungula sila Nkadi ampemb’e nzila.” (Ef. 4:26, 27) Avo vena ye kuma kiasikila kilenda kutufila mu funga makasi, e sambu kia nsi a ntima kilenda kutusadisa mu kala yo “ntim’anzizi” ye volo vana fulu kia vanga diambu dilenda kendeleka mwand’a Nzambi. (Nga. 17:27) Muna kuma kiaki, ke tufwete lundanga makasi ko yo sisila Satana e nzila mu kutufila mu vanga edi diambi. (Nku. 37:8, 9) Imosi muna mpila tulenda sila Satana kitantu i landa elongi dia Yesu dia singikang’e ntantani mu nzaki.—Mat. 5:23, 24; 18:15-17.
10, 11. Ekuma tufwete vengela e fu kia yiya?
10 Tufwete venga e fu kia yiya yovo kia vuna. Muna kuma kia yiya, Paulu wasoneka vo: ‘Ndion’oyiyidi, kayiyi diaka ko: deke kasala, kavanga muna moko mandi owu wambote, kakala ye ma kia kayila nkondami.’ (Ef. 4:28) Avo Nkristu oyiyidi, ‘okindula nkumbu a Nzambi’ yo vezesa yo. (Nga. 30:7-9) O kala nsukami ke kuma ko kifwete fila muntu mu yiya. Awana bezolanga Nzambi ye mfinangani zau bazeye wo vo ke vena kuma ko kifwete kubafila mu yiya.—Maku 12:28-31.
11 Paulu kayika kaka ko dina tufwete venga; wayika mpe dina tufwete vanga. Avo tuzingilanga yo kangalela muna mwand’avelela, tusia ngolo za sala kimana twalunga-lunga esi nzo zeto yo kala ye ‘má kia kayila nkondami.’ (1 Tim. 5:8) Yesu ye ntumwa zandi balundanga nzimbu mu sadisa asukami, kansi o Yuda mwisi Kereote wayiyanga nzimbu zazi. (Yoa. 12:4-6) Dialudi vo kafilwanga kwa mwand’avelela ko. Oyeto tufilwanga kwa mwand’a Nzambi tukalanga “nkal’ambote muna mambu mawonso,” nze una Paulu kavanga. (Ayib. 13:18) Muna mpila yayi, tuvenganga kendeleka mwand’avelel’a Yave.
Mpila Zakaka Tulenda Vengela Kendeleka Mwanda
12, 13. (a) Mun’owu wa sono kia Efeso 4:29, nkia mpila mvovo tufwete venga? (b) Aweyi ufwete kala e mvovo mieto?
12 Tufwete kebanga lubini lweto. Paulu wavova vo: “E diambu diansafu ke divaika mu nua mieno ko, dina diambote kaka muna vangamesa wantu akaka, diavan’awana bew’e nsambu.” (Ef. 4:29) Omu sono kiaki mpe, Paulu wa ntumwa kayika kaka ko dina tufwete venga; wayika mpe dina tufwete vanga. Muna lusadisu lwa mwand’a Nzambi, tulenda vova ‘dina diambote muna vangamesa wantu akaka, diavan’awana bew’e nsambu.’ Vana ntandu, ke tufwete yambula ko vo “diambu diansafu” diavaika muna nua mieto. E mvovo wa Kingerekia wasekolwa vo ‘safu,’ usadilwanga mpe mu yika bundu yovo mbizi yawola. Nze una tutininanga madia mawola, tufwete venganga sadila mvovo mina kebadikilanga o Yave vo miambi.
13 E mvovo mieto mifwete kalanga miambote, ‘miasiwa mungwa.’ (Kol. 3:8-10; 4:6) Vava bewanga mana tuvovanga, wantu bafwete mona vo twaswaswana twina. Muna kuma kiaki, yambula twasadisa akaka muna vovanga ‘dina diambote muna vangamesa.’ Yambula twavova nze ntozi a nkunga ona wayimbila vo: “E mvovo mia nu’ame, ye mbalu za ntima, mbula zatambukakana oko wina, e Yave w’etadi diame yo nkûdi.”—Nku. 19:14.
14. Mun’owu wa Efeso 4:30, 31, nkia fu tufwete venga?
14 Tufwete venga ndudi, makasi, mvovo mia malevo ye mbi yawonso. Vava kalukisa mu kuma kia kendeleka mwand’a Nzambi, Paulu wasoneka vo: “E ndudi yawonso, yo makasi, y’ekudi, ye miangu, yo kumbaziana, mbula makatulw’omu yeno, y’efwenka diawonso.” (Ef. 4:30, 31) Wau vo tu wantu alembi lunga, yeto awonso tufwete sianga ngolo za lunga-lunga e ngindu ye mavangu meto. Tulenda kendeleka mwand’a Nzambi avo tuyambwidi vo ‘e ndudi yo makasi y’ekudi’ diatuyala. Diau adimosi mpe dilenda vangama kele vo tukwamanene yindula e diambu diambi batuvangidi, lunda makasi yo lembi vutulwisa e ngwizani yo muntu utuvangidi e mbi. Kele vo tuyantikidi veza elongi dia Nkand’a Nzambi, tulenda yima e fu kilenda kutufila mu sumukina mwand’avelela yo kututwasila mfwilu miayingi.
15. Avo muntu utuvangidi e mbi, adieyi tufwete vanga?
15 Tufwete kala yo walakazi, nkenda yo lolokanga akaka. Paulu wasoneka vo: “Nulembamiana, nukala yo walakazi, nuyambuziana, una kanuyambulwil’o Nzambi muna Kristu.” (Ef. 4:32) Kana nkutu vo muntu utukendelekele ntima mu kuma kia mbi katuvangidi, tufwete kunloloka nze una Nzambi kevanganga. (Luka 11:4) Yindula vo mpangi ovovele diambu diambi mu kuma kieto. Muna vava singika e diambu, twele kwa yandi. Okendalele yo kutulomba ndoloki. Kana una vo tunlolokele, diambu diakaka diaka tufwete vanga. Muna Fuka 19:18 tutanganga vo: “Kulandi kunda ko, ngatu lundil’ekasi muna wan’a nkangu aku, kansi ozola nkw’aku konso una okuzolela: i Yave kwame.”
O Yingila Mfunu Kwina
16. Yik’e nona kisonganga vo ezak’e ntangwa divavanga vo twabak’e nzengo za lembi kendeleka mwand’a Yave.
16 Kana nkutu vava tukalanga va yeto kaka, tulenda tontwa mu vanga diambu dilenda kendeleka Nzambi. Kasikil’owu, o mpangi lenda yantika wá miziki mina vo ke miambote ko kw’Akristu. E ntona zandi nanga zilenda tokana wau vo kalemvokele luludiku ko luna muna nkanda mivaikisanga “ntaudi akwikizi yo lulungalalu.” (Mat. 24:45) Olenda samba mu kuma kia diambu diadi yo sungamena mvovo mia Paulu muna Efeso 4:30. I bosi, obakidi nzengo za lembi vanga diambu dilenda kendeleka mwand’a Nzambi yo lembi wá diaka miziki miasafu. O Yave osambula e ngolo za mpangi ndioyo. Muna kuma kiaki, yambula twakwamanana yingila kimana twalembi kendeleka mwand’a Nzambi.
17. Adieyi dilenda bwa avo ke tuyingidi ko yo samba?
17 Avo ka tuyingidi ko yo samba, tulenda bwa mun’evangu diambi yovo diasafu dilenda kutufila mu kendeleka mwanda. Wau vo Yave osadilanga mwand’andi avelela muna songa kiwuntu kiandi yo lungisa luzolo lwandi, tulenda wo kendeleka yovo mwesa wo ntantu. Oyeto ke tuzolele kendeleka mwanda wau ko. (Ef. 4:30) Asoneki Ayuda a tandu kiantete, bavova vo Yesu mu nkum’a Satana kavangilanga masivi. (Tanga Maku 3:22-30.) Atantu awaya a Kristu ‘mwand’avelela batianguna’ yo bwa mun’esumu dilembi lolokwa. Tufwete kuyikeba twalembi bwa mun’esumu diadi!
18. Aweyi tulenda zayila vo ke twabwa mun’esumu dilembi lolokwa ko?
18 Wau vo ka tuzolele bwa mun’esumu dilembi lolokwa ko, tufwete sungamenanga dina kavova Paulu dia lembi kendeleka mwanda. Kansi, adieyi tuvova kele vo esumu diampwena twavanga? Avo twaviluka o ntima, yo sadiswa kw’akuluntu, tulenda kala ye ziku vo twalolokwa kwa Nzambi. Ediadi disonga vo ke twasumukina mwand’avelela ko. Muna lusadisu lwa Nzambi, tulenda mpe venga kendeleka mwanda mu mpila zawonso.
19, 20. (a) Nkia mambu tufwete venga? (b) Adieyi tufwete kwamanana vanga?
19 O Nzambi osadilanga mwand’andi avelela mu siamisa zola, kiese ye kintwadi vana vena nkangu andi. (Nku. 133:1-3) Muna kuma kiaki, ka tufwete kendeleka mwand’avelela ko muna kumbanga akaka ngatu vova diambu dilenda kulula zitu w’awana betumbikwanga muna lusadisu lwa mwand’avelela mu kal’avungidi. (Mav. 20:28; Yuda 8) Tufwete siamisanga kintwadi muna nkutakani yo zitisa muntu yo nkw’andi. Elo, tufwete venganga e fu kia vanga buka vana vena nkangu a Nzambi. Paulu wasoneka vo: “Inuwondelele abunzi, muna nkumbu a Mfumu eto Yesu Kristu, yeno awonso nuvova dimosi, ke vakadi mpambula ko vovo nwina; nwakunkukila kumosi muna ntima mosi yo lukanu lumosi.”—1 Kor. 1:10.
20 Yave una ye luzolo ye ngolo za kutusadisa twalembi kendeleka mwand’andi. Muna kuma kiaki, tufwete kwamanana lomba mwand’avelela muna sambu yo kala y’ekani dia lembi wo kendeleka. Yambula twazindalala ‘kunina muna mwanda’ yo yambula vo watufila tuka wau, yakwele mvu.
Nkia Mvutu Ovana?
• O kendeleka mwand’a Nzambi aweyi disongele?
• O muntu wakiyekola kwa Yave aweyi kalenda kendelekela mwand’andi?
• Aweyi tulenda vengela kendeleka mwand’avelela?
[Yuvu ya Longoka]
[Foto ina muna lukaya lwa 30]
Singika e ntatani mu nzaki zawonso
[Foto ina muna lukaya lwa 31]
E mvovo miaku milenda tezaneswa ye nkia bundu?