Yuvu Y’atangi

Wau vo Yave osimanga e nsambila ya teke, ekuma kalembi tumbila Arone vava kavanga e teke kia mwan’a ngombe?

Vava Arone kavanga mwan’a ngombe, nze una usonganga lusansu lwasonama muna Luvaiku kapu kia 32, nsiku a Nzambi kakulula. (Luv. 20:​3-5) Muna kuma kiaki, ‘o Yave ofungìdi Arone o makasi muna kumfwasakesa: kansi [Mose] osambìdi mpe mu kuma kia Arone e ntangwa ina.’ (Nsi. 9:​19, 20) Nga e sambu kia Mose wa muntu ansongi ‘kiasala kikilu’ muna kuma kia Arone? (Yak. 5:​16) Elo. Muna kuma kia sambu kiaki ye kuma yole yakaka, Yave kawá e sambu kia Mose, katumba mpe Arone ko.

Kimosi muna kuma nanga i kia sia vo Arone nkwa kwikizi kakala. Vava Mose katumwa kenda vovana yo Faro yo vaikisa Aneyisaele muna Engipito, Yave wasola Arone kenda kumosi yo Mose yo kala se kimpovela kiandi. (Luv. 4:​10-​16) Mose yo Arone balemvoka yo kwenda vana ndose a Ntinu a Engipito nkumbu miayingi, kana una vo Faro nkwa ntim’ambadi kakala. Muna kuma kiaki, ekolo kakala kuna Engipito, Arone wasonga vo nkwa kwikizi, wayivananga muna salu kia Yave.​—⁠Luv. 4:⁠21.

Badika mpe dina diafila Arone mu vanga teke kia mwan’a ngombe a wolo. Mose ku Mongo a Sinai kakala mu lumbu 40. Vava ‘nkangu wamona vo Mose ozingidi kwayingi muna kulumuka mongo,’ bawondelela Arone vo kabavangila e teke. Arone wawila nkangu yo vanga teke kia mwan’a ngombe a wolo. (Luv. 32:​1-6) Kansi kuna kwalanda, e nkal’a Arone yasonga vo kayikama nsambila ya teke ko. Nanga lubangamu lwa nkangu katina. Kasikil’owu, vava Mose kabaka e nzengo mu kuma kia asambidi a teke, o wan’awonso a Levi, kumosi yo Arone, bayisia kun’esambu dia Yave. Mazunda matatu m’awana bakala ye kuma mun’evangu diadi dia sambila teke bavondwa.​—⁠Luv. 32:​25-29.

I bosi Mose wavovesa nkangu vo: “Nusumukini esumu dingi.” (Luv. 32:​30) Muna kuma kiaki, ke Arone kaka ko wasumuka. Arone ye nkangu balolokwa kwa Yave.

Vava evangu dia vanga teke kia mwan’a ngombe diavioka, Yave wavova vo Arone oyadikwa se ngang’a mbuta. Nzambi wavovesa Mose vo: “Ovwika Arone e mvwatu miavauka; okunkusa yo kumvaula, kansadila muna kinganga.” (Luv. 40:​12, 13) Kieleka, Yave waloloka Arone muna mbi kavanga. Muna ntima, Arone kakala nkolami ko ona wasambilang’e teke, kansi nkwa kwikizi kakala muna nsambil’aludi.