Kasakesanga Akaka Muna Nkutakani
Kasakesanga Akaka Muna Nkutakani
‘Nulongaziana, yo kasakesa muntu yo nkw’andi.’—1 TES. 5:11.
1. O kala muna nkutakani y’Akristu nkia nsambu ditwasanga? Akaka nkia mpasi benwananga zau?
DIA nsambu kikilu dia kala muna nkutakani y’Akristu. Kadi, e nkutakani ikusadisanga mu kala ye ngwizani ambote yo Yave. O filwa kwa Diambu diandi dikutaninanga muna vonza itukanga mu landa mpila zingu kisimwanga kwa Nzambi. Ovwidi akundi ayingi ana betokanenanga wete diaku. Elo, nsambu zayingi otambulanga. Kansi, Akristu ayingi benwananga ye mpasi za mpila mu mpila. Akaka muna yau lusadisu bavwidi o mfunu mu toma bakula mambu masina ma Diambu dia Nzambi. Akaka benwananga ye mayela yovo ntantu zasaka. Akaka bemonanga mpasi mu kuma kia nzengo zambi babaka. Yeto awonso mpe mu nza yambi tuzingilanga.
2. Adieyi tufwete vanga vava mpangi zeto benwananga ye mpasi? Ekuma?
2 Ke mosi ko mu yeto oyangalalanga vava mpangi zeto Akristu bemonanga e mpasi. Paulu wa ntumwa watezanesa e nkutakani ye to kia muntu yo vova vo: “Kana kîkwa kimosi kimona mpasi, e yîkwa yawonso imwena mpasi kumosi.” (1 Kor. 12:12, 26) Tufwete sianga ngolo za sadisa mpangi zeto z’akala ye z’akento vava bekalanga mu mpasi. Vena ye tusansu twayingi muna Nkand’a Nzambi tusonganga una mpangi muna nkutakani basadisila akaka mu zizidila mpasi. Ekolo tubadika tusansu twatu, yindula una ngeye mpe lenda tanginina mbandu au mu sadisa akaka. Aweyi olenda sadisila mpangi zaku z’akala ye z’akento mu zindalala sadila Yave yo vangamesa nkutakani andi?
“Bambongele”
3, 4. Akwila yo Peresekila aweyi basadisila Apolo?
3 Vava Apolo kayenda zingila kuna Efeso, nteleki avema kakala. Lusansu lwa nkand’a Mavangu lusonganga vo, “wau kena vo nkw’etima, otomene samuna yo long’oma ma Yesu, [kansi] mvub’a Yoane kaka kazeye.” Muna lembi zaya edi dia vubilwa “muna nkumbu a Se, yo Mwana, yo mwand’avelela,” disonganga vo nanga alongoki a Yoane wa Mvubi yau basila Apolo umbangi yovo alandi a Yesu vitila lumbu kia Pentikosti ya mvu a 33 wa Tandu Kieto. Kana una vo Apolo nkwa vema kakala, vena ye mambu makaka mamfunu mana kabakulanga ko. O kala vamosi ye mpangi zandi Akristu aweyi diansadisila?—Mav. 1:4, 5; 18:25; Mat. 28:19.
4 Vava Akwila yo nkaz’andi Peresekila bawa Apolo walonganga mun’esambilu, bambonga yo toma kuntendolwela mambu mana kazaya ko. (Tanga Mavangu 18:24-26.) Ediadi diambu diambote bavanga. Kansi, Akwila yo Peresekila mu ndekwa bavovesela Apolo, ke bamveza ko. Kadi, edi kaka kazaya ko i lusansu lwa nkutakani y’Akristu. Ka lukatikisu ko vo Apolo kayangalela mambu mamfunu kalongwa kwa mpangi zandi. Wau katoma bakula mambu mama, Apolo ‘wasadisa kikilu’ mpangi zandi kuna Akaya yo sila umbangi una ufwene.—Mav. 18:27, 28.
5. Nkia lusadisu bevananga ateleki ayingi a Kintinu? Nkia nluta ditwasanga?
5 O unu, ayingi muna nkutakani y’Akristu bevutulanga matondo kw’awana babasadisa mu bakula Nkand’a Nzambi. Yikundi yambote ivangamanga vana vena alongoki ye alongi au. Nkumbu miayingi, muna sadisa wantu babakula e ludi, divavanga vo balongwa mambu ma mpila mu mpila mu ngonde zayingi. Kansi, ateleki a Kintinu bekuyivananga kuna mvevo kadi bazeye wo vo diambu dia moyo yovo lufwa. (Yoa. 17:3) Diakiese kikilu dikalanga vava wantu bebakulanga e ludi, zingila ngwizani ye ludi kiaki yo sadila zingu kiau mu vanga luzolo lwa Yave.
“Wakala ye Nkumbu Ambote”
6, 7. (a) Ekuma Paulu kasolela Timoteo se nkundi andi a salu? (b) Nkia lunungunuku kavanga Timoteo?
6 Vava Paulu wa ntumwa yo Sila bakingula mbanza Luseta muna nkangalu wezole wa salu kia kimisionario, bawana mo toko dimosi nkumbu andi Timoteo, ona wakala ye tezo kia mvu 20. “Wakala ye nkumbu ambote vana vena wana-ngudi akwa Luseta ye Ikonio.” Yunike wa ngudi a Timoteo yo nkak’andi ankento Loi, Akristu bakala, kansi o s’andi mundembi-kwikila. (2 Tim. 1:5) Paulu nanga wazayana yau vava kayenda kuna zunga kiaki muna nkangalu andi antete vioka mvu miole. Kansi owau, Paulu wayangalela Timoteo wau vo etoko diambote kakala. Muna kuma kiaki, una kasiwa moko kw’akuluntu, Timoteo wakituka se nsadisi a Paulu muna salu kia kimisionario.—Tanga Mavangu 16:1-3.
7 Timoteo mayingi kafwana longoka kwa nkundi andi a salu. Kansi wau vo katoma longoka, kuna kwalanda Paulu watuma Timoteo muna salu kia kingula e nkutakani yo kala se nkunzi andi. Muna mvu 15 yovo vioka mina Timoteo kasala entwadi yo Paulu, etoko edi ke diakala yo zayi wayingi ko ye nkwa nsoni, wanungunuka yamu tezo kia kituka se nkengi ambote.—Fili. 2:19-22; 1 Tim. 1:3.
8, 9. Ampangi muna nkutakani adieyi balenda vanga mu kasakesa aleke? Yik’e nona.
8 O unu matoko mayingi ye ndumba muna nkutakani y’Akristu balenda vanga mayingi muna mvu milanda. Avo bakasakeso yo sadiswa kw’awana besonganga mbandu ambote muna salu kia Yave, aleke awaya balenda vanga mayingi yo tambula mbebe vana vena nkangu a Yave. Tala omu nkutakani eno. Nga muna y’aleke bekuyifwanisanga nze Timoteo? Avo ubasadisi yo kubakasakesa balenda sala se aviti a nzila, sadila kuna Betele, misionario yovo akengi a zunga. Adieyi olenda vanga muna kubasadisa mu lungisa ekani diadi?
9 Martin, ona osadilanga kuna Betele se mvu 20, osungamenanga ye kiese kiawonso lusadisu kavewa kwa nkengi a zunga se vioka mvu 30, vava bakala muna salu kia umbangi. O nkengi a zunga wavovanga ye kiese kiawonso mu kuma kia salu kiandi kuna Betele vava kakala etoko. Wakasakesa Martin mu badika dina kalenda vanga kimana kasadilwa kwa nkubik’a Yave nze una kavanga oyandi. Martin omonanga vo e mbokena zazi zau zansadisa muna nsola kavanga. Edi diambote olenda vanga mu kuma ki’aleke, i mokenanga yau yo kubasadisa bakala y’etima muna mambu ma mwanda.
‘Nufiaulwisa Akwa Ntima Miakendalala’
10. Ekuma Epaferodito kakendalela?
10 Epaferodito wavanga nkangalu wandá ye wampasi tuka kuna Filipi yakuna Roma mu kwenda kingula Paulu wa ntumwa, ona wasiwa mu pelezo mu kuma kia lukwikilu lwandi. Esi Filipi bantuma. Kayenda kaka ko mu natina Paulu tukau, kansi mpe wazola kala yandi vamosi yo vanga dina kalenda mu kunsadisa muna ntangwa yayina yampasi. Kansi, ekolo kakala muna Roma, Epaferodito wabakama kimbevo, ‘fioti kaka fiasala nga wafwa.’ Wau kamona vo kelenda diaka lungisa ko dina kayendela, Epaferodito wakendalala kikilu.—Fili. 2:25-27.
11. (a) Ekuma ke tufwete sivikila ko vava akaka muna nkutakani bekalanga ye ntantu zasaka? (b) Paulu adieyi kakanikina mu kuma kia Epaferodito?
11 O unu, vena ye mambu mayingi metwasanga lukendalalu kwa wantu. Lufimpu lwavangwa kwa nkubika italanga vimpi wa wantu mu nz’amvimba lusonganga vo mosi vana vena wantu tanu, balenda bakama kwa ntantu zasaka mu zingu kiau. O nkangu a Yave mpe bebwilwanga diambu diadi. Mpasi za lungisa nsatu za esi nzo, mayela, lukendalalu mu kuma kia lutovoko ye mambu makaka, malenda fila muntu mu kala ye ntantu zasaka. Esi Filipi adieyi bafwana vanga mu sadisa Epaferodito? Paulu wasoneka vo: “Nuntambwila muna Mfumu kuna kiese kiawonso; numwen’ana bena wau o zitu: e kuma kadi muna diambu dia salu kia Kristu i kadi fwila, wau kakaya moyo andi kalungis’owu ukondelo muna nsadil’eno oku ngina.”—Fili. 2:29, 30.
12. Adieyi dilenda kasakesa awana bena ye ntima miakendalala?
12 Yeto mpe tufwete kasakesanga mpangi zeto bena ye ntantu zasaka. Vena ye mambu mayingi tulenda vova mu kuma kia mana belungisanga muna salu kia Yave. Dilenda kala vo nsobani zayingi bavanga muna zingu kiau mu kituka Akristu yovo mu kuyivana muna salu kia ntangwa ke ntangwa. Tuyangalelanga ngolo bevanganga ye tulenda kubavovesa vo Yave mpe okubayangalelanga. Kele vo Akristu akaka akwikizi ke belendanga diaka vanga mawonso ko bavanganga mu kuma kia kinunu yovo kimbevo, tufwete kubazitisanga mu kuma kia mvu miayingi se bena muna salu kia Yave. Kiakala nkutu nkia diambu dikendelekele muntu, o Yave edi kelombanga kwa selo yandi yawonso yakwikizi: ‘Nukasakesa akwa ntima miakendalala, nusikinin’atovoki, nulandula lutantu kwa wantu awonso.’—1 Tes. 5:14.
“Nunyambulwila yo Kumfiaulwisa”
13, 14. (a) Nkia nzengo zabaka nkutakani ya Korinto? Ekuma? (b) O vaikisa muntu muna nkutakani nkia nluta diatwasa?
13 Muna nkutakani ya Korinto, mwakala yo muntu wayivananga muna mavangu ma zumba yo lembi viluk’o ntima. Evangu diandi diasia velela kwa nkutakani mu vonza yo kendeleka ampangi kumosi ye mindembi-kwikila. Muna kuma kiaki, Paulu wakanikina vo muntu ndioyo kavaikiswa muna nkutakani.—1 Kor. 5:1, 7, 11-13.
14 E tumbu kavewa kiatwasa nluta miambote. Ediadi diatanina nkutakani yalembi yiviswa kwa fu yambi. O nsumuki mpe watambulwila e mbi kavanga yo viluk’o ntima. Wau vo muntu ndioyo wasonga mavangu ma luviluku lwa ntima, Paulu wasoneka muna nkand’andi wezole vo kavutulwiswa muna nkutakani. Kansi, ke diau kaka ko diavavwanga. Paulu wavovesa ampangi muna nkutakani vo ‘bayambulwila yo fiaulwisa [nsumuki ona waviluka ntima], unkwa votomokenwa kwa ulolo wa ntantu.’—Tanga 2 Korinto 2:5-8.
15. Aweyi tufwete badikila nsumuki ovilukidi ntima yo vutulwiswa muna nkutakani?
15 Adieyi tulenda longoka muna lusansu lwalu? Tukendalalanga vava muntu kevaikiswanga muna nkutakani. Muntu ndioyo nanga luvezo katwasa muna nkumbu a Nzambi yo fusulwisa nkutakani e nsoni. Dilenda kala vo yeto kasumukina. Kansi, vava akuluntu basolelo mu fimpa diambu diadi bebakanga nzengo mun’owu wa luludiku lwa Yave, lwa sia vo nsumuki ona ovilukidi o ntima kafwete vutulwiswa muna nkutakani, ediadi disonganga vo Yave mpe unlolokele. (Mat. 18:17-20) Nga oyeto mpe ke tufwete kuntanginina ko? Elo, o kala nkwa ntim’ambadi yo lembi loloka diau adimosi kwandi yo kolamena Yave. Muna siamisa luvuvamu ye kintwadi muna nkutakani a Nzambi yo tondakana kwa Yave, divavanga vo ‘twasikidisa zola kweto’ muna nsumuki ona ovilukidi ntima yo vutulwiswa muna nkutakani.—Mat. 6:14, 15; Luka 15:7.
“Mfunu Imvwidi”
16. Ekuma Paulu kakendalela mu kuma kia Maku?
16 Lusansu lwakaka lwa Nkand’a Nzambi lusonganga vo ke tufwete lundanga makasi ko mu kuma ki’awana bekutukendelekanga. Kasikil’owu, Yoane wayikilwanga mpe vo Maku wakendeleka kikilu Paulu wa ntumwa. Adieyi kavanga? Vava Paulu yo Banaba bayenda muna nkangalu au wantete wa salu kia kimisionario, bayenda kumosi yo Maku mu kubasadisa. Kansi, ekolo bakala muna nkangalu, muna kuma tulembi zaya, Yoane una vo Maku wasisa akundi andi yo vutuka kuna kazingilanga. Paulu wakendalala kikilu mu kuma kia diambu diadi. Muna nkangalu wezole, watantana yo Banaba mu kuma kia Maku. Muna kuma kia dina diabwa muna nkangalu antete, Paulu kazola diaka ko vo Maku kakangala yau.—Tanga Mavangu 13:1-5, 13; 15:37, 38.
17, 18. Aweyi tuzayidi wo vo e ntantani vana vena Paulu yo Maku zasingikwa? Adieyi tulenda longoka muna lusansu lwalu?
17 Maku kayambula ko vo kakendalala kwayingi wau vo wabembolwa kwa Paulu. Wakwamana muna salu kiandi kia kimisionario muna zunga kiakaka kumosi yo Banaba. (Mav. 15:39) Dina kasoneka Paulu mu kuma kiandi mu mvu mialanda, disonganga vo Maku nkwa kwikizi kakala ye wafwana bundw’e vuvu. Vava kakala muna pelezo kuna Roma, Paulu watuminisa Timoteo muna nkanda kansonekena. Muna nkanda wau, Paulu wavova vo: “Vitula Maku, keza yaku: kadi mfunu imvwidi muna kunsadila.” (2 Tim. 4:11) Elo, Paulu wamona vo Maku wanungunuka kikilu muna mwanda.
18 Vena ye diambu tulenda longoka muna lusansu lwalu. Maku wayima e fu ivavwanga mu kala misionario yambote. Katá sakuba ko wau vo Paulu wateka kumbembola. Maku yo Paulu ngwizani ambote bakala yau yo Yave, ke balundaziana makasi ko. Paulu wabakula vo Maku nsadisi ambote kakala. Muna kuma kiaki, vava ampangi besundanga ntantani yo singika diambu, edi diambote bafwete vanga i kwamanana sadisa akaka kimana banungunuka muna mwanda. O vava oma mambote kuna kw’akaka nkutakani divangamesanga.
Dina Lenda Vanga Muna Nkutakani
19. Nkia lusadisu balenda vanaziana awonso muna nkutakani y’Akristu?
19 Omu ‘ntangwa zazi zampasi’ tuzingilanga, lusadisu lwa mpangi zaku z’akala ye z’akento ovwidi o mfunu. Oyau mpe lusadisu lwaku bavwidi o mfunu. (2 Tim. 3:1) Ke ntangwa zawonso ko Akristu bezayanga dina diambote bafwete vanga mu kuma kia mpasi benwananga zau. Kansi o Yave ozeye dina balenda vanga. Olenda sadila mpangi zakaka muna nkutakani, kumosi yo ngeye, mu sadisa akaka babaka nzengo zambote. (Yes. 30:20, 21; 32:1, 2) Muna kuma kiaki, yambula twavanga mawonso tulenda muna lemvokela luludiku lwa Paulu wa ntumwa. Tukwamanana ‘longaziana yo kasakesa muntu yo nkw’andi, nze una tuvanganga.’—1 Tes. 5:11.
Nkia Mvutu Ovana?
• O kasakesa akaka muna nkutakani y’Akristu ekuma dinin’o mfunu?
• Nkia mpasi benwananga zau akaka zivavanga vo wabasadisa mu sunda zo?
• Ekuma tufwete sadisilanga akaka muna nkutakani eto?
[Yuvu ya Longoka]
[Foto ina muna lukaya lwa 11]
Tulenda sadisa mpangi eto Ankristu vava kenwananga ye diambu diampasi
[Foto ina muna lukaya lwa 12]
Aleke ayingi akala ye akento muna nkutakani y’Akristu balenda vanga mayingi muna mvu milanda