Olenda Zizidila Kele vo Nkaz’aku Ubembwele

MARGARITA yo Raúl wa nkaz’andi, mvu miayingi basadila Yave kumosi muna salu kia ntangwa ke ntangwa. * Kansi, ke kolo ko vava kiawutuka mwan’au antete, Raúl wayantika kuyivambula yo Yave. Raúl wayantika mpe kuyisia mu mavangu ma zumba. Muna kuma kiaki, wavaikiswa muna nkutakani y’Akristu. Margarita wavova vo: “Vava ediadi diabwa, yamona vo e zingu kiame kisukidi. Yakendalala kikilu, kiazaya diaka ko dina ndenda vanga.”

Ke vavioka kolo kiayingi ko vava Jane basompana, o nkaz’andi wankendeleka mu mpila zayingi. Wayantika kunwanda. Jane wavova vo: “E nkumbu antete kangwanda, diansivikisa kikilu yo kumfusulwisa nsoni. Kiakituka se fu kiandi kia kungwanda, i bosi walombanga ndoloki. Yabanzanga vo wau vo i Nkristu, mfwete kunloloka yo vilakana. Yabanzanga mpe vo ke diambote ko mu zayisa mambu ma nzo eto kwa muntu akaka, kana nkutu kw’akuluntu a nkutakani eto. E diambu diadi dia sia vo oyandi kambangikanga, omono yanlolokanga, diakwamanana mu mvu miayingi. Muna kolo kiaki kiawonso, yabanzanga vo vena ye diambu ndenda vanga kimana nkaz’ame kanzola. Kansi, vava kambembola kumosi yo mwan’eto, yayindula vo vena ye diambu kialungisa ko, mambu mayingi  yafwana vanga yovo vova muna tanina longo lweto.”

Nze Margarita yo Jane, ngeye mpe nanga wakendalala wina, nanga se diampasi mu vwa nzimbu, dilenda kala mpe vo lukwikilu lwaku mu vonza lwina wau vo yakala diaku wabembola. Nanga u yakala una vo wakendalala kikilu wau vo nkento aku kena diaka ye kwikizi ko muna ngeye. Nze una uvovanga Nkand’a Nzambi, mu ‘ntangwa zampasi’ tuzingilanga. Ungunza wau usonganga vo muna “lumbu yambaninu,” zingu kia esi nzo mu vonza kikala, e nzolani a ungudi ikuluka. Akaka besadila Nzambi kuna disu kunsi a lukaya. (2 Tim. 3:​1-5) Akristu akieleka mpe balenda bwila mambu mama. Muna kuma kiaki, adieyi dilenda kusadisa mu zizidila kele vo nkaz’aku ubembwele?

Uyibadikila nze Una Yave Kekubadikilanga

Entete, dilenda kala diampasi mu kwikila vo muntu ona ozolanga uvangidi edi diambi yo kukendeleka. Olenda nkutu yantika kuyitumba mu kuma kia mavangu mambi ma nkaz’aku.

Kansi sungamena vo, kana nkutu Yesu wakala vo muntu alunga, wayekolwa kwa muntu ona kazolanga yo bund’e vuvu. Vitila kasola ntumwa zandi, Yesu wateka fimpa diambu diadi yo samba. O wantu 12 kasola, selo yakwikizi ya Yave bakala. Ka lukatikisu ko vo Yesu wakendalala kikilu vava Yuda ‘kakituka se nyekodi.’ (Luka 6:​12-​16) Kansi, Yave katumba Yesu ko mu kuma ki’evangu dia Yuda.

Dialudi vo, ke vena akazi alunga ko. Yakala yo nkento balenda vanga mpilakanu. Ntozi a nkunga wasoneka vo: “E Yave, kala vo otona bi, e Mfumu, nga nani otelama?” (Nku. 130:⁠3) Yakala yo nkento bafwete tangininanga Yave muna yambulwilanga e mpilakanu za muntu yo nkw’andi.​—⁠1 Pet. 4:⁠8.

Kansi, “konso muntu vava twina, ofuta muna mpanga za yandi kibeni oku kwa Nzambi.” (Roma 14:​12) Kele vo mosi mun’akazi oyantikidi sadila mvovo mia malevo yovo kuyivana mu mavangu mambi, yandi kibeni i nkwa kuma vana meso ma Yave. Yave ke yangalelanga umpumbulu ko ngatu mvovo mia malevo. Muna kuma kiaki, ke vena ye kuma kiasikila ko kilenda fila yakala yovo nkento mu lembi zola ngatu zitisa nkaz’andi. (Nku. 11:5; Ef. 5:33; Kol. 3:​6-8) Kele vo Nkristu, nkumbu miayingi makasi kesakisanga yo lembi viluk’o ntima, kafwete vaikiswa muna nkutakani y’Akristu. (Ngal. 5:​19-21; 2 Yoa. 9, 10) O yakala yovo nkento kafwete yindula ko vo diambi mu zayisa kw’akuluntu evangu diambi dia nkaz’andi. Yave nkwa walakazi kuna kw’awana bemweswanga mpasi.

Vava mosi mun’akazi ketang’e zumba, kesumukinanga kaka nkaz’andi ko, kansi yo Yave mpe. (Mat. 19:​4-9; Ayib. 13:⁠4) Kele vo yakala yovo nkento una vo mukondwa kuma, osianga ngolo za zingila ngwizani ye nsiku mia Nkand’a Nzambi, kafwete kuyitumba ko mu kuma ki’evangu dia zumba dia nkaz’andi.

Sungamena vo Yave ozeye mpasi omonanga muna ntima. Wakala nze yakala kwa zula kia Isaele. Muna Diambu diandi, muna mpe ye sono yayingi isonganga ntantu kamona vava zula kiaki kiatang’e zumba kia mwanda. (Yes. 54:​5, 6; Yer. 3:​1, 6-​10) Kala ye ziku vo Yave omonanga mansanga ovaikisanga wau vo nkaz’aku wabembola. (Mal. 2:​13, 14) Ozeye wo vo lufiaulwisu ye lukasakeso ovwidi o mfunu.

Una Yave Kevaninanga Lufiaulwisu

Imosi muna mpila ina Yave kevaninanga lufiaulwisu i muna nkutakani y’Akristu. Jane watambula lufiaulwisu lwalu. Jane osungamenanga vo: “O nkengi a zunga wankingula muna kolo kina yakala kikilu yakendalala. Wazaya wo vo ntantu zayingi yakala zau mu kuma kia nkaz’ame wazola vonda longo. Wakala yo luzindalalu lwa kunsasila e sono ya  Nkand’a Nzambi nze 1 Korinto 7:15. E sono yayi ye mvovo miandi miangemba miansadisa mu katula ngindu za sia vo kuma yakala kiau yo kuntwasila luvuvamu lwa ntima.” *

Margarita ona tuyikidi kala, walongoka mpe vo Yave osadilanga nkutakani y’Akristu mu vana lusadisu. Margarita wavova vo: “Una yamona vo yakala diame kazolele viluka ntima ko, yanata wan’ame yo kwenda zingila ku mbanza yakaka. Vava twalwaka, yayantika futila nzo ya masuku mole. Muna lumbu kialanda, ekolo yaziulanga e nkutu twanatina lekwa, yawá muntu wadodelanga kielo. Yabanza vo mfumu a nzo, ona wazingilanga mu nzo yakala va ndambu. Yasivika vava yamona vo ona wadodela kielo i mpangi ankento ona watusadisa mu zay’e ludi. Kayindula dio ko vo mono yakala muna nzo, kadi mfumu a nzo kayiza kingula ona kalongokanga yandi Nkand’a Nzambi. Ntim’ame wavuvama, kansi kialenda kakidila mansanga ko. Vava yanzayisa dina diambwila, yandi yo mono twadila. Vana vau wavanga nkubika kimana twenda kuna lukutakanu muna lumbu kiakina. Ampangi muna nkutakani batoma kututambula, akuluntu bavanga wawonso kimana mono yo wan’ame twatambula lusadisu muna mwanda.”

Aweyi Akaka Balenda Sadisila?

Kieleka, ampangi muna nkutakani balenda sadisa mu mpila zayingi. Kasikil’owu, Margarita wayantika sala. Esi nzo mosi muna nkutakani bayivana mu lunga-lunga wan’andi vava batukanga kuna sikola.

Margarita wavova vo: “Edi itoma yangalelanga i vava ampangi z’akala ye z’akento bekuyivananga mu vaika yame muna salu kia umbangi, akaka bevaikanga yo wan’ame.” Vava ampangi muna nkutakani bevananga lusadisu lwa mpila yayi, ‘benatazianang’o mazitu’ yo lungisa “nsiku a Kristu.”​—⁠Ngal. 6:⁠2.

Awana bemonanga mpasi mu kuma kia masumu ma wantu akaka, betoma yangalelanga lusadisu bevewanga. Monique, ona wabembolwa kwa nkaz’andi yo kunsisa muna mfuka ya 15.000 ma dolare yo wana yá wavova vo: “Mpangi zame z’Akristu batoma kunsonganga zola. Kele vo ke yau ko, kizeye ko kana vo yadi lenda zizidila. Yamona una Yave kafidila mpangi zanzolwa, ana bayivana mu sadisa wan’ame. Ngina ye kiese kia mona vo wan’ame mu nungunuka bena muna mwanda mu kuma kia lusadisu  lw’ampangi. Vava yavavanga luludiku, akuluntu bansadisanga. Vava yavavanga muntu mu kunzayisa konso diambu, bantambanga matu.”​—⁠Maku 10:​29, 30.

Kansi, o nkundi ambote obakulanga nkia ntangwa ke dikalanga diambote ko mu yantika moko kia diambu diabwila nkw’andi. (Kim. 3:⁠7) Margarita wavova vo: “Nkumbu miayingi, yazolanga mokena ye mpangi z’akento za nkutakani yampa mu kuma kia salu kia umbangi, alongoki eto a Nkand’a Nzambi, wan’eto ye mambu makaka, kansi kiazolanga ko vo twamokena mu kuma kia mana mambwila. Yatoma yangalala wau vo bansadisa mu vilakana mana mambwila yo yantika zingu kiampa.”

Venga Fu kia Vutula Mbi Muna Mbi

Ezak’e ntangwa, vana fulu kia kuyimwena vo u nkwa kuma mun’esumu diavanga nkaz’aku, olenda funga makasi wau vo e mpasi omonanga i mu kuma kia vilwa wandi. Avo makasi mama makwamanene, dilenda kulula etima diaku dia sikila ye kwikizi muna Yave. Kasikil’owu, olenda tontwa mu vava mpila ya vutula mbi muna mbi kwa nkaz’aku ona wabembola.

Avo mwene vo ngindu zazi ziyantikidi kulwakila, yindula mbandu a Yosua yo Kalebe. Wantu awaya akwa kwikizi basia zingu kiau mu vonza mu kwenda langa e Nsi a Nsilu. Alangi akaka ke bakala ye lukwikilu ko, bafila nkangu mu kolamena Yave. Aneyisaele akaka bazola nkutu tubila Yosua yo Kalebe matadi vava bazola kasakesa nkangu mu sikila ye kwikizi muna Nzambi. (Nta. 13:25–14:​10) Muna kuma kia vilwa wa Isaele, Yosua yo Kalebe bayungana mvu 40 muna makanga, ke mu kuma kia mbi bavanga ko, kansi mu kuma kia mbi ya wantu akaka.

Kana una vo Yosua yo Kalebe bakendalala, ke balunda makasi ko mu kuma kia masumu ma mpangi zau. Edi basia vana fulu kiantete i sadila Yave. Kuna mfoko a mvu 40 bakala muna makanga, yau ewole kumosi ye Anelevi, bakala y’elau dia sala yo moyo muna mbandu yayina yo yambulwa vo bakota muna Nsi a Nsilu.​—⁠Nta. 14:​28-30; Yos. 14:​6-12.

Mavangu mambi ma nkaz’aku malenda kutwasila mpasi mu kolo kiandá. O longo lulenda fwa, kansi e ntantu ye mpasi mu kuma kia kondwa nzimbu zilenda kwamanana. Kansi, vana fulu kia yambula vo e ntantu zakwamanana, sungamena vo Yave otomene zaya mpila kalenda kadila y’awana bekululanga nsiku miandi, nze una usonganga dina diabwila Aneyisaele muna makanga.​—⁠Ayib. 10:​30, 31; 13:⁠4.

Olenda Zizidila

Vana fulu kia yambula vo ngindu zambi zayala, zadisa ntim’aku ye ngindu za Yave. Jane wavova vo: “Edi diansadisa mu zizidila i wanga malongi m’Eyingidilu ye Despertai! muna CD. O tukutakanu mpe tutoma kunkumikanga. O vanang’e mvutu muna tukutakanu diansadisa mu lembi yindulanga mpasi zame. E salu kia umbangi kiansadisa mpe. Muna sadisanga akaka basiamisa lukwikilu lwau muna Yave, lukwikilu lwame mpe lwasikila. O longoka yo wantu Nkand’a Nzambi diansadisa mu sia sungididi muna mambu masundidi o mfunu.”

Monique ona tuyikidi kala wavova vo: “O kala muna tukutakanu ntangwa zawonso yo kuyivana muna salu kia umbangi, dikunsadisanga mu zizidila. Ediadi dikutusadisanga mpe mu kala ye ngwizani ambote muna nzo ye mpangi za nkutakani. Dina diambwila dikunsadisanga mu zaya lutovoko lwame. Ntonta zayingi inwananga zau, kansi Yave okunsadisanga mu zizidila zo.”

Ongeye mpe olenda zizidila ntonta zazi. Kiakala nkutu nkia ntantu omonanga wau vo nkaz’aku wabembola, sia ngolo za landa luludiku lwa Paulu, oku vo: ‘Ke tuyambudi vanga wete ko: kadi muna yandi nsungi tusâla, ovo tulembi yoya.’​—⁠Ngal. 6:⁠9.

[Mvovo Vana Yand’a lukaya]

Awana babembolwa kw’akazi au beyangalelanga ampangi bevaikanga yau muna salu kia umbangi