Adieyi Disinga Vangama Muna Lumbu kia Yave

‘Lumbu kia Yave, nga mwivi i kikwizila, . . . e nza mpe, ye vangwa yawonso ina mo, ibomoka.’​—⁠2 PET. 3:⁠10.

1, 2. (a) E nza yayi yambi aweyi isinga sukila? (b) Nkia yuvu tubadika?

E NZA yayi yambi ifilwanga kwa nyindu aluvunu wa sia vo muntu olenda toma yala e nza lembi landa luludiku lwa Yave. (Nku. 2:​2, 3) Nga e lekwa kiatuka muna luvunu kilenda zingila yakwele mvu? Ve kikilu. I kuma vo, katufwete vingila ko vo e nza ya Satana ya kifwasa yau kibeni. Kansi, ifwaswa kwa Nzambi muna ntangwa ye mpila ina kakubika. Ekani dia Nzambi dia fwasa e nza yayi disonganga o unsongi yo zola kwandi.​—⁠Nku. 92:7; Nga. 2:​21, 22.

² Petelo wa ntumwa wasoneka vo: ‘E lumbu kia Yave, nga mwivi i kikwizila; kina kina vo, ezulu divempokela kuna mazu mayingi, o mazuku mezelokela kuna mbangazi, e nza mpe, ye vangwa yawonso ina mo, ibomoka.’ (2 Pet. 3:​10) “Ezulu” ye “nza” iyikwanga mu sono kiaki nki isonganga? Nki i “mazuku” mana mezeloka? O Petelo adieyi kazola vova vava kayika vo e “nza mpe, ye vangwa yawonso ina mo, ibomoka”? O zaya e mvutu za yuvu yayi dikutusadisa mu kala wakubama mu kuma kia mambu mansisi mevangama kuna sentu.

Ezulu ye Nza ina Ivempoka

3. Nkia “zulu” diyikwanga muna 2 Petelo 3:10? Aweyi divempokela?

³ Vava Nkand’a Nzambi usadilanga o mvovo “ezulu” nkumbu miayingi ayadi uyikanga, ana bekuyitundidikanga vana vena o nkangu una beyalanga. (Yes. 14:​13, 14; Lus. 21:​1, 2) “Ezulu [dina] divempoka” i tuyalu tuyalanga nza yayi yambi. O vempoka kuna “mazu mayingi,” dilenda songa vo lufwasu lw’ezulu diadi lwa nzaki lukala.

4. Nki i “nza”? Aweyi ifwasilwa?

⁴ E “nza” i kintwadi kia wantu bavambuka yo Nzambi. E nza yayi yakala muna lumbu ya Noa, eyi yafwaswa muna kizalu mun’owu wa nkanikinu a Nzambi. “Vo i’zulu dina wau, yo ntoto, muna diambu diau adimosi, dialundilw’o tiya, dialundilw’e lumbu kia mfundiswa ye mbukumunw’a akwa luvezo.” (2 Pet. 3:⁠7) Ekolo kizalu kiafwasa wantu awonso ambi muna nkumbu mosi, o lufwasu olu lukwiza malembe-malembe luvangama muna “mpasi zayingi.” (Lus. 7:​14) Kuna lubantiku lwa mpasi zayingi, Nzambi ofila ayadi a nza yayi mu fwasa “Babele Anene.” Muna mpila yayi, osonga makasi mandi kwa nkembi ndioyo. (Lus. 17:​5, 16; 18:⁠8) I bosi, muna vita Armangedo, kuna mfoko a mpasi zayingi, Yave yandi kibeni ofwasa nza ya Satana.​—⁠Lus. 16:​14, 16; 19:​19-21.

“O Mazuku Mezelokela”

5. Nki i mazuku?

⁵ Nki i “mazuku” mana “mezelokela”? E “mazuku” kayika o Petelo i mawonso meyivisanga e nza yayi nze fu, ngindu ye  makani. Dimosi muna “mazuku” mama i “Mwand’a nza” una “usalanga wau muna wan’a nganzi.” (1 Kor. 2:12; tanga Efeso 2:​1-3.) Mwanda wau wasayana mu nza ya Satana. Ufilanga wantu mu yindula yo vova yo vanga mana mesonganga nyindu a Satana wa “nkuluntu a ungwizi wa mwela” wa nkwa lulendo.

6. O mwand’a nza aweyi umonekenanga?

⁶ Muna kuma kiaki, zaya yovo lembi wo zaya, awana besambukilanga mwand’a nza beyambulanga vo e ngindu ye ntima miau miafilwa kwa Satana, kimana basonga e ngindu ye fu yandi. Mu kuma kiaki, bevanganga dina bazolele lembi badika luzolo lwa Nzambi. Bevangilanga mambu kuna lulendo y’eloko, besonganga e fu kia kolamena ayadi yo kuyivana muna “eketo dia nitu, y’eketo dia meso.”​—⁠Tanga 1 Yoane 2:​15-17. *

7. Ekuma tufwete ‘lunga-lunga e ntima mieto’?

⁷ Diamfunu ‘twalunga-lunganga e ntima mieto’ muna sadilanga ngangu za Nzambi vava tusolanga akundi, mana tutanga, nsaka ye mana tutala muna Internete. (Nga. 4:​23) Paulu wa ntumwa wasoneka vo: “Nutoma tala, kinkwa kal’on’okunukitula s’esanzu muna ndongot’andi, yo luvuki luamfwanti, mun’owu wa lusansu lua wantu, mun’owu wa mazuku ma nza, ke mu wau wa Kristu ko.” (Kol. 2:⁠8) Tufwete lemvokela nkanikinu wau ekolo e lumbu kia Yave kifinamanga, kadi “mazuku” mawonso ma nza ya Satana mebomonwa kwa “mbangazi” a makasi ma Yave. Ediadi dikutusungamesanga e mvovo mina muna Malaki 4:1 vo: “E lumbu kikwiza, kikweme nz’esoka: akwa lulendo awonso y’ayimpumbulu awonso bekala se minga: e lumbu kikwiza kikubabomona.”

‘E Nza ye Vangwa Yawonso ina mo Ibomoka’

8. E nza ye vangwa yawonso ina mo aweyi ‘ibomokena’?

⁸ Adieyi kazola vova Petelo vava kasoneka vo ‘e nza ye vangwa yawonso ina mo ibomoka’? Petelo edi kazola vova vo muna mpasi zayingi, Yave osenzeka e nza ya Satana, yo songa vo Yandi ye Kintinu kiandi itelamenanga. Muna kuma kiaki, yafwana fwaswa. Ungunza wa Yesaya 26:21 uyikanga vo: “O Yave ovaikidi vana fulu kiandi katumba wantu a nza muna bi wau: o ntoto ufukula menga mandi, ke ufuka diak’awana bavondwa ko.”

9. (a) Nkia mambu tufwete venga? Ekuma? (b) Nkia fu tufwete yima? Ekuma?

⁹ Muna lumbu kia Yave, kiwuntu ki’awana befilwanga kwa nza yo mwand’andi ambi kisenzama yamu tezo kia vondaziana. Kieleka, dilenda kala vo ulolo wa nsaka zansoki zivangamanga o unu zifila e ngindu za wantu ayingi vava o koko kwa konso muntu “kutelamen’o koko kwa nkw’andi.” (Zak. 14:​13) Muna kuma kiaki, diambote twavenganga filmes, nkanda, vídeo games ye makaka mana malenda kutufila mu yima fu ina kemenganga Nzambi nze lulendo yo zola umpumbulu. (2 Sam. 22:28; Nku. 11:⁠5) Yambula twayima e fu ya mbongo a mwand’avelel’a Nzambi, kadi e fu yayi ikutusadisa mu venga makasi ma lumbu kia Yave.​—⁠Ngal. 5:​22, 23.

“Ezulu Diampa ye Nz’ampa”

10, 11. “Ezulu diampa” ye “nz’ampa” nki isonganga?

¹⁰ Tanga 2 Petelo 3:13. “Ezulu diampa”  i Kintinu ki’ezulu kia Nzambi, eki kiasikidiswa muna mvu wa 1914, vava “tandu ya zula” yafokoka. (Luka 21:​24) Kintinu kiaki kifilwanga kwa Kristu Yesu ye 144.000 m’awana beyala yandi entwadi, ayingi muna yau batambula kala o nsendo au kun’ezulu. Muna nkand’a Lusengomono, o wantu awaya basolwa beyikilwanga vo “mbanz’avauka, Yerusaleme ampa, ikulumukini kun’ezulu tuka kwa Nzambi, yakubama nga ndumba yaviengela mu nkaz’andi.” (Lus. 21:​1, 2, 22-​24) Nze una Yerusaleme yankulu yakadila se kunda kia luyalu lwa Isaele yankulu, Yerusaleme ampa ye Toko diansompi befila luyalu lwa nz’ampa. E mbanza yayi ‘ikulumuka kun’ezulu,’ i sia vo, iyala e nza.

¹¹ E “nz’ampa” i kintwadi kia wantu ana besonganga luzolo lwa sakalela Kintinu kia Nzambi. E “nza ikwiza” isunda e paradiso a kimwanda ina bena nkangu a Nzambi owau. (Ayib. 2:⁠5) Adieyi tulenda vanga mu kala muna nz’ampa?

Kala Wakubama mu Kuma kia Lumbu Kianene kia Yave

12. Ekuma e lumbu kia Yave kikadila kia ntantu kwa wantu a nza?

¹² Paulu yo Petelo bavova vo e lumbu kia Yave kikwiza “nze mwivi,” i sia vo, kuna kinsalukisa. (Tanga 1 Tesalonika 5:​1, 2.) Kana nkutu Akristu akieleka, ana bevingilanga e lumbu kiaki, besivika vava kilwaka. (Mat. 24:​44) Kansi, o wantu a nza yau besunda sivika. Paulu wasoneka vo: “Una [awana bavambuka yo Yave] se bevovanga vo, Ngemba yo luvuvamu, o lubukumuku luakinsunzumukina lubaluàkidi, nze nsongo mia nkento owuta; yau ke batini.”​—⁠1 Tes. 5:⁠3.

13. Aweyi tulenda vengela vunginikwa vava wantu bevova “Ngemba yo luvuvamu”?

¹³ E mvovo “Ngemba yo luvuvamu” i mvovo miakaka mialuvunu miavumunwinwa kwa nkwiya. E mvovo miami ke mivukumuna selo ya Yave ko. Paulu wasoneka vo: “Ke nuna ku tombe ko, ovo nuluakilwa kwa lumbu kina nze mwivi: yeno awonso nu wan’a ntemo, nu wan’a ntangw’a mwini.” (1 Tes. 5:​4, 5) Yambula twasikila muna ntemo, yo vambuka ye tombe kia nza ya Satana. Petelo wasoneka vo: “Oyeno azolwa, wau nuteka zaya mambu mama, nwiyilunga-lunga, nunkwa filakeswa kwa ntungianu a yimpumbulu [alongi aluvunu muna nkutakani y’Akristu], yo kunkuka muna kweno sikila.”​—⁠2 Pet. 3:⁠17.

14, 15. (a) O Yave aweyi kekutuvwilanga o mfunu? (b) Nkia mvovo miavumunwinwa tufwete sia e sungididi?

¹⁴ Yave ke kutuvovesanga kaka ko vo ‘twayilunga-lunga’ yo lembi vanga diambu. Kansi, okutuvwanga o mfunu muna teka kutuzayisa mana mebwa kuna sentu.

 ¹⁵ Diankenda kikilu vo, akaka bevezanga lulukisu lwa kwamanana yingila. Bevovanga vo: ‘Se tuka kolo tuwanga lulukisu lwalu.’ Kansi, wantu awaya bafwete sungamena vo vava bevovanga mambu mama, Yave yo Mwan’andi befidisanga e mpaka, ke buka kia ntaudi akwikizi kaka ko. Yave wavova vo: “Vingila kio.” (Kab. 2:⁠3) Yesu mpe wavova vo: “Nuyingila: kadi ke nuzeye kio ko, e lumbu kikwiz’o Mfumu eno.” (Mat. 24:​42) Vana ntandu, Petelo wasoneka vo: ‘Nkia mpil’a wantu ozevo nukal’oyeno muna nkal’avauka yo vumina Nzambi, nusiang’e vuvu yo sutilang’e ngiz’a lumbu kia Yave.’ (2 Pet. 3:​11, 12) E ntaudi akwikizi ye Buka kia Selo Yambuta besianga e sungididi muna mvovo miami.

16. Nkia ngindu tufwete venga? Ekuma?

¹⁶ Kieleka, e “ntaudi ina yambi” yandi ovovanga vo Mfumu una zingila. (Mat. 24:​48) E ntaudi yayi yambi ina muna buka ki’awana beyikwanga muna 2 Petelo 3:​3, 4. Petelo wasoneka vo: “Muna lumbu yambaninu mukwiz’akwa nsokela” ana “belandang’omau maketo” yo veza awana besiang’e sungididi muna lumbu kia Yave yo lemvo wawonso. Vana fulu kia kuyivana muna salu kia Nzambi ye Kintinu kiandi, akwa nsokela awaya besiang’e sungididi muna mambu ye zolela ya yau kibeni. Tufwete vanga e ngolo mu lembi yima e ngindu zazi za vonza ye za ukolami. Kansi, tufwete ‘badikila o luzindalalu lwa Mfumu eto vo luvuluku’ muna kuyivananga muna salu kia samun’e nsangu zambote za Kintinu yo kitula wantu se alongoki yo lembi tokana kwayingi mu kuma kia ntangwa ina vo Yave wa Nzambi kaka ozeye yo.​—⁠2 Pet. 3:15; tanga Mavangu 1:​6, 7.

Sia e Vuvu Muna Nzambi a Luvuluzu

17. Akristu aweyi babadikila luludiku lwa Yesu lwa tina muna Yerusaleme? Ekuma?

¹⁷ Vava makesa ma Roma makota muna Yuda muna mvu wa 66 wa Tandu Kieto, Akristu akwikizi balemvokela luludiku lwa Yesu lwa tina muna Yerusaleme muna nzaki. (Luka 21:​20-​23) Ekuma balemvokela luludiku lwalu vana vau? Ka lukatikisu ko vo, basiang’e sungididi muna luludiku lwa Yesu. Bazaya wo vo e nzengo zau mpasi zikubatwasila, nze una Kristu kavova. Kansi, bazaya wo mpe vo Yave kalendi vilakana selo yandi yakwikizi ko.​—⁠Nku. 55:⁠22.

18. E mvovo mia Yesu muna Luka 21:​25-28, aweyi milenda kusadisila mu kala yo nyindu asikila mu kuma kia mpasi zayingi?

 ¹⁸ Yeto mpe tufwete siang’e vuvu muna Yave, kadi yandi kaka olenda kutuvuluza vava e nza yayi ikota muna mpasi zayingi zina ke zakedi ko muna lusansu lwa wantu. Muna kolo kia mpasi zayingi, vitila Yave kafwasa emvimba e nza, o wantu ‘bemona wonga, ye swengenia kia mana mekwiz’ova nza.’ Ekolo atantu a Nzambi bemona wonga, e selo yakwikizi ya Yave ke bemona wonga ko. Kansi, beyangalala ekuma kadi bazeye wo vo luvuluzu lwau lufinamene.​—⁠Tanga Luka 21:​25-28.

19. Adieyi tubadika mun’elongi dilanda?

¹⁹ Elo, awana bekuyivambulanga ye nza ye “mazuku” mandi, bevwa zingu kia kiese kuna sentu. Nze una usonga elongi dilanda, avo tuzolele vwa o moyo, mayingi tufwete vanga ke venga kaka oma mambi ko. Tufwete yima fu iyangidikanga Yave yo vanga mana ketondanga.​—⁠2 Pet. 3:⁠11.

[Mvovo Vana Yand’a lukaya]

Nga Olenda Sasila?

• Nki i ‘zulu ye nza’ ya tandu kiaki?

• Nki i “mazuku”?

• Nki i ‘zulu diampa ye nz’ampa’?

• Ekuma tufwete sil’e vuvu muna Nzambi?

[Yuvu ya Longoka]

[Foto ina muna lukaya lwa 5]

Aweyi olenda “lunga-lunga o ntim’aku” yo kuyivambula ye nza

[Foto ina muna lukaya lwa 6]

Aweyi tulenda songela vo ‘tubadikilanga o luzindalalu lwa Mfumu vo luvuluzu’?