‘Nkia Mpil’a Wantu Nufwete Kala!’
‘Nkia Mpil’a Wantu Nufwete Kala!’
“Wau vo e lekwa yayi yawonso izelok’e nzeloka yayi, nkia mpil’a wantu ozevo nukal’oyeno muna nkal’avauka yo vumina Nzambi.”—2 PET. 3:11.
1. Ekuma nkand’ezole a Petelo wakadila wamfunu kw’Akristu a lumbu yandi?
VAVA Petelo wa ntumwa kasoneka nkand’andi wezole, e nkutakani y’Akristu mu lubangamu yakala. Kansi, ediadi ke diakulula vema kwau ko. Muna kuma kiaki, o Nkadi Ampemba wasadila ndekwa zakaka, zina kateka sadila mu tandu yavioka. Nze una Petelo kavova, Satana wavava yivisa nkangu a Nzambi muna sadila alongi aluvunu ana bakala ye ‘meso mazala ye zumba,’ ye “ntima miasinswa mun’eloko.” (2 Pet. 2:1-3, 14; Yuda 4) O nkand’ezole a Petelo wabavana luludiku lwamfunu lwabasadisa mu sikila ye kwikizi muna Nzambi.
2. Nkia diambu diamfunu dina muna 2 Petelo kapu kia 3? Nkia yuvu tufwete kiyuvula?
2 Petelo wasoneka vo: “Edi ngina diau, ovo diansongi edi, kiau kolo eki ngin’omu saba kiaki, edi dia kunuyangumwina muna yindula; wau nzeye wo vo e nkatulw’a saba kiame se in’o lukufi . . . Nsia mpe e sungididi, kinumana, ovo ngyele kwame, e ntangwa zawonso nwakal’owu nubakulwila mama.” (2 Pet. 1:13-15) Elo, Petelo wazaya wo vo lufwa lwandi lufinamene, kansi wazola vo Akristu basungamena luludiku lwamfunu kabavana. E mvovo miandi miasonekwa muna Nkand’a Nzambi kimana yeto mpe twatanganga mio o unu. E kapu kia 3 kia nkand’ezole a Petelo kiamfunu kikilu kwa yeto, kadi kiyikanga oma ma “lumbu yambaninu” ya nza yayi yo lufwasu lw’ezulu, i sia vo, ayadi kumosi ye nza, i sia vo, wantu ambi. (2 Pet. 3:3, 7, 10) Nkia luludiku katuvana o Petelo? O lemvokela luludiku lwandi aweyi dilenda kutusadisila mu vwa edienga dia Yave?
3, 4. (a) Petelo aweyi kayika bafwete kala Akristu? Nkia lulukisu kavana? (b) Nkia mambu matatu tubadika?
3 Una kayika lufwasu lwa nza ya Satana, Petelo wavova vo: “Nkia mpil’a wantu ozevo nukal’oyeno muna nkal’avauka yo vumina Nzambi.” (2 Pet. 3:11, 12) Petelo kayuvula kiuvu ko, kansi mpila ina Akristu bafwete kala kayika. Wazaya wo vo awana kaka bevanganga luzolo lwa Yave yo songa fu yambote besala yo moyo muna “lumbu kia nlandu a kunda.” (Yes. 61:2) I bosi, Petelo wa ntumwa wakudikila vo: “Dianu vo, oyeno azolwa, wau nuteka zaya mambu mama, nwiyilunga-lunga, nunkwa filakeswa kwa ntungianu a yimpumbulu [alongi aluvunu], yo kunkuka muna kweno sikila.”—2 Pet. 3:17.
4 Wau vo Petelo mosi mun’awana ‘bateka zaya mambu,’ wazaya wo vo muna lumbu yambaninu, Akristu bafwete kala balungalala muna sikila ye kwikizi muna Nzambi. Kuna kwalanda, Yoane wa ntumwa wayika e kuma. Wamona muna mona-meso Satana wayingwa kun’ezulu, yo funga “makasi mayingi” mu kuma ki’awana ‘belundang’e nkanikinu mia Nzambi yo kala yo umbangi wa Yesu.’ (Lus. 12:9, 12, 17) E selo yakwikizi ya Nzambi bena vo akuswa ye mpangi zau “mameme makaka” sunda besunda. (Yoa. 10:16) Kansi, adieyi tuvova mu kuma kia konso muntu mu yeto? Nga tusikila ye kwikizi? Tulenda wo vanga kele vo (1) tuyima fu yambote, (2) tukondw’ekeya yo lusembo muna mwanda ye muna nkal’eto yo (3) kala ye ngindu zasikila mu kuma kia mpasi. Yambula twabadika mambu mama.
Tuyima Fu Yambote
5, 6. Nkia fu tufwete yima? Ekuma tufwete sil’e ngolo muna yima fu yayi?
5 Kuna lubantiku lwa nkand’andi wezole, Petelo wasoneka vo: “Nwiyikùdikidìl’e sungididi, muna lukwikilu lueno nuvambula unsongi; yo muna unsogi weno, zayi; yo muna zayi, volo, yo muna volo, luzindalalu; yo muna luzindalalu, vumi wa Nzambi; yo muna vumi wa Nzambi, nzolani a ungudi; yo muna nzolani a ungudi, zola. Okala vo kadi, omama, ovo meno yo wokela, mekunukondesa wolo, yo unlomba yamuna luzayilu lua Mfumu eto Yesu Kristu.”—2 Pet. 1:5-8.
6 Elo, “sungididi” yovo ngolo divavanga mu kuyivana muna salu ilenda kutusadisa mu yima fu yambote. Kasikil’owu, ngolo divavanga mu kwenda muna tukutakanu twawonso tw’Akristu, tanga Nkand’a Nzambi lumbu yawonso yo kala ye nkubika yambote y’elongi dia yeto kibeni. Vana ntandu, ngolo divavanga mu kalanga y’elongi diakiese dia esi nzo. Kansi, avo tukedi ye nkubika zambote, ke dikala diampasi ko mu tatidila fu yayi yambote, musungula vava tumonanga e nluta ditwasanga.
7, 8. (a) Mpangi zakaka adieyi bavova mu kuma kia Fuku wa Nsambila ya Esi Nzo? (b) Nkia nluta nubakanga mun’elongi dia esi nzo?
7 Muna kuma kia nkubika ya nsambila ya esi nzo, mpangi mosi ankento wasoneka vo: “E nkubika yayi ikutusadisanga mu longoka mambu mayingi.” Mpangi akaka wankento wavova vo: “Muna vov’e ludi, kiayangalala ko vava lukutakanu lw’elongi dia nkanda lwasobwa. I lukutakanu yatoma zolanga. Kansi owau, vava tukalanga yo Fuku wa Nsambila ya Esi Nzo, ibakulanga vo Yave ozeye dina tuvwidi o mfunu ye ntangwa tuvwa dio mfunu.” Se dimosi wavova vo: “E nsambila ya Esi zo itoma kutusadisanga kikilu. O kala ye nkubika ina tulenda vovela nsatu zeto nze akazi, dia lusadisu kikilu. Yeto awole tumonanga vo mu nungunuka twina muna songa fu ya mbongo a mwand’avelela. E kiese kieto mpe muna salu kia umbangi mu wokela se kina.” Se diakaka wavova vo: “O wana bevavululanga yau kibeni yo longoka mambu mayingi. Ediadi kiese dikubatwasilanga. E nkubika yayi isiamisanga vuvu kieto vo Yave ozeye nsatu zeto, owanga mpe sambu yeto.” Nga ongeye mpe i wau obadikilanga e nkubika yayi kavanga o Nzambi?
8 Ke nufwete yambula ko vo mambu makete mavunzanesa e nsambila ya esi nzo. Mpangi mosi yo nkaz’andi bavova vo: “Konso kiayá muna fuku, mu tumingu yá tuviokele, vabwanga diambu muna nzo eto diadi vunzanesa elongi dia esi nzo. Kansi, ke twayambulanga ko vo diadi diavangama.” Ezak’e ntangwa, dilenda vava vo nwasoba e lumbu. Kana una vo i wau, nufwete sianga ngolo za kalanga yo Fuku wa Nsambila ya Esi Nzo, lembi viokesa kana nkutu lumingu lumosi.
9. O Yave aweyi kasadisila Yeremiya? Adieyi tulenda longoka muna mbandu andi?
9 Yeremiya wa ngunza mbandu ambote katusisila. Watoma yangalelanga madia ma mwanda kavewanga kwa Yave. Madia mama mansadisanga mu zindalala sila umbangi kwa wantu bakala vo akwa ntima miambadi. Wavova vo: “E diambu dia Yave dikitukidi . . . nze tiya twanyuyi twazikama muna visi yame.” (Yer. 20:8, 9) E diambu diadi diansadisa mpe mu zizidila e kolo kiampasi kiafokokela muna lufwasu lwa Yerusaleme. O unu, tuvwidi Nkand’a Nzambi wamvimba. Vava tulongokanga wo ye sungididi kiawonso, yo badikila mambu nze una Nzambi kebadikilanga mo, tuzindalala ye kiese kiawonso muna salu kia umbangi nze Yeremiya, tuzizidila mpe e mpasi yo kala wavelela muna fu ye muna mwanda.—Yak. 5:10.
‘Nukondw’ekeya yo Lusembo’
10, 11. Ekuma tufwete sil’e ngolo za ‘kondw’ekeya yo lusembo’? Adieyi divavanga kwa yeto?
10 Wau vo tu Akristu, tuzeye wo vo mu lumbu yambaninu tuzingilanga. Muna kuma kiaki, ke tusivikanga ko vava tumonanga wantu a nza bekuyivananga muna mambu kemenganga o Yave, nze eloko, zumba ye umpumbulu. E ndekwa kesadilanga o Satana tulenda zo vovela mu mpila eyi: ‘Wau vo selo ya Nzambi ke balendi vumiswa ko, balenda yiviswa muna ngindu ye muna fu.’ (Lus. 2:13, 14) Muna kuma kiaki, diamfunu twalemvokela luludiku lwa Petelo: “Nusia sungididi nwawanuka kuna luvuvamu, nwakondw’ekeya yo lusembo vana ndose [a Nzambi].”—2 Pet. 3:14.
11 Mu sono kiaki, Petelo wavutukila mvovo una kateka yika muna vova vo: “Nusia sungididi.” Elo, o Yave ona wavumunwina Petelo mu soneka mvovo miami, ozeye wo vo tufwete siang’e ngolo kimana ‘twakond’ekeya yo lusembo,’ i sia vo, lembi safulwa kwa fu yambi ya nza ya Satana. Ediadi divavanga vo twalunga-lunga ntima mieto kimana twalembi yima makani mambi. (Tanga Ngana 4:23; Yakobo 1:14, 15.) Divavanga mpe vo twayikeba mu lembi vukumunwa kw’awana bekutuvezanga yo ‘kututianguna’ wau vo tu Akristu.—1 Pet. 4:4.
12. Nkia diambu dia lukasakeso dina muna Luka 11:13?
12 Wau vo tu wantu alembi lunga, diampasi dikalanga dia vanga edi diambote. (Roma 7:21-25) Tulenda sunda kele vo tubund’e vuvu muna Yave, ona ovananga mwand’avelela kw’awana bekunlombanga wo. (Luka 11:13) O mwanda wau ukutusadisanga mu yima fu keyangalelanga o Nzambi yo zizidila e ntonta ye mpasi za zingu, ezi ziwokelanga ekolo e lumbu kia Yave kifinamanga.
Yambula vo Mpasi Zakumika Lukwikilu Lwaku
13. Adieyi dilenda kutusadisa mu zizidila mpasi?
13 Ekolo tuzingilanga mu nza yayi, tulenda bwilwa mpasi za mpila mu mpila. Kansi, vana fulu kia kendalala kwayingi, diambote wabadikila mpasi zazi nze elau dia songa zola kwaku muna Nzambi yo yambula vo zakumika lukwikilu lwaku muna yandi ye muna Diambu diandi. Yakobo wasoneka vo: “Nubadika dio vo dia kiese kaka, abunzi ame, ovo nubwa muna mpukumunwa (yovo mpasi) za mpila mu mpila; wau nuzeye wo vo e ntont’a lukwikilu lueno itwalanga luzindalalu.” (Yak. 1:2-4) Sungamena mpe vo “[Yave] ozeye e mpuluza kevuluz’awana bekumvumina muna umpukumuni.”—2 Pet. 2:9.
14. E mbandu a Yosefe aweyi ilenda kukasakesela?
14 Badika e mbandu a Yosefe wa mwan’a Yakobo, vava katekwa kwa mpangi zandi muna ubundu. (Etu. 37:23-28; 42:21) Nga lukwikilu lwa Yosefe lwayoya mu kuma kia mpasi kamweswa? Nga wafungila Nzambi makasi wau kayambula vo kamona mpasi? Nkand’a Nzambi usonganga vo ve. Kansi, e mpasi za Yosefe ke zasukila vava ko. Kuna kwalanda, wavuninwa mambu vo nkento angani kaleka mu ngolo yo siwa muna pelezo. Muna kolo kiaki mpe, Yosefe wasikila ye kwikizi muna Nzambi. (Etu. 39:9-21) Wayambula vo e mpasi zakumika lukwikilu lwandi. Ediadi diantwasila nsambu zayingi.
15. Adieyi tulenda longoka muna mbandu a Naomi?
15 Dialudi vo e mpasi zilenda kutukendeleka. Yosefe mpe nanga kakendalalanga ezak’e ntangwa. Vena mpe ye selo yayingi ya Nzambi bakendalala vava bakala mu mpasi. Badika mbandu a Naomi, ona wafwilwa yakala yo wana awole. Wavova vo: “Ke nungikila Naomi ko, nungikila Mara [ina ye nsasa vo ndudi]; kadi mandudi kampangidi o Mpungu-ngolo.” (Rutu 1:20, 21) E ntantu kamona o Naomi ke zambi ko, konso muntu olenda zo mona. Kansi, nze Yosefe, Naomi kavidisa ngwizani andi ko muna Nzambi ngatu kulula kwikizi kiandi. Yave wasambula nkento ndioyo akwikizi. (Rutu 4:13-17, 22) Vana ntandu, muna Paradiso ikwiza, Yave ofokola mpasi zawonso zitwasanga Satana ye nz’andi yambi. “Oma mantete ke meyindulwa ko, ngatu kota muna ntima.”—Yes. 65:17.
16. Aweyi tufwete badikilanga e sambu? Ekuma dinin’o mfunu?
16 Kana nkutu nkia mpasi zilenda kutubwila, o zaya vo Nzambi okutuzolanga dilenda kutusadisa mu zizidila. (Tanga Roma 8:35-39.) Kana una vo Satana ke lekanga ko mu vava kutuyoyesa, ke sunda ko kele vo tukala ye ‘ngangu’ yo “lungalala yamu sambu.” (1 Pet. 4:7) Yesu wavova vo: “Nuyingila muna kolo yawonso, nwadodokelanga, nwavw’owu nukutukila muna mambu mawonso mekwiza vangama, nwatelamena vana ven’o Mwan’a muntu.” (Luka 21:36) Yesu wasadila mvovo ‘ludodokelo,’ i sia vo, sambu kia kwikizi. Muna kutuvovesa vo twadodokelanga, Yesu wasonga vo eyayi i ntangwa tufwete sikila ye kwikizi muna yandi yo S’andi. Awana kaka besikilanga ye kwikizi besala yo moyo muna lumbu kia Yave.
Uyivana Muna Salu kia Yave
17. Avo diampasi dikalanga dia sila umbangi muna zunga kieno, e mbandu yasonga angunza kuna nz’ankulu aweyi ilenda kusadisila?
17 O kuyivana muna salu kia Yave kasakesa dikutukasakesanga. Ediadi dikusungamesanga e mvovo mia Petelo vo: “Nkia mpil’a wantu ozevo nukal’oyeno muna nkal’avauka yo vumina Nzambi.” (2 Pet. 3:11) Dimosi muna mavangu ma nkal’avauka, i salu kia samun’e nsangu zambote. (Mat. 24:14) Dialudi vo muna zunga yakaka dilenda kala diampasi mu sia umbangi, nanga wau vo wantu ke beyangalelanga nsangu zambote ko, yovo mu kuma kia kitantu yovo mu kuma kia sia vo wantu bekuyivananga muna mambu ma zingu kia lumbu ke lumbu. Selo ya Yave kuna nz’ankulu bawanana mpe ye mambu ma mpila yayi. Kana una vo i wau, ke bayoya ko, bakwamanana samun’e nsangu bavewa kwa Nzambi. (Tanga 2 Tusansu 36:15, 16; Yer. 7:24-26) Nki kiabasadisa mu zizidila? Babadikilanga e salu kiau nze una Yave kabadikilanga kio, ke nze una kiabadikilwanga ko kwa wantu a nza. Vana ntandu, babadikilanga dio s’elau diampwena dia nat’e nkumbu a Nzambi.—Yer. 15:16.
18. E salu kia samun’e nsangu za Kintinu aweyi kisinga tundidikila nkumbu a Nzambi?
18 Yeto mpe tuna y’elau dia zayisa nkumbu a Yave ye makani mandi. Badika diambu edi: Muna kuma kia salu kieto kia umbangi, atantu a Nzambi ke besinga vova ko vo ke bazeye diambu ko mu kuma kia Nzambi vava kilwaka e lumbu kiandi kianene. Elo, nze Faro kuna nz’ankulu, bezaya wo vo Nzambi onwananga yau. (Luv. 8:1, 20; 14:25) Muna kolo kiakina, Yave otundidika selo yandi yakwikizi muna toma dio kiesesa vo yandi wabatuma.—Tanga Yezekele 2:5; 33:33.
19. Aweyi tulenda songela vo tuzolele bak’e nluta muna luzindalalu lwa Yave?
19 Kuna mfoko a nkand’andi wezole, Petelo wasonekena mpangi zandi Akristu vo: “Nubadika mpe vo o nlandu a mambu a Mfumu eto i luvuluku.” (2 Pet. 3:15) Elo, yambula twakwamanana bak’e nluta muna luzindalalu lwa Yave. Mu nkia mpila? Muna yimanga fu ikunyangidikanga, muna ‘kondw’ekeya yo lusembo,’ muna kalanga yo nyindu asikila mu kuma kia mpasi yo kuyivana muna salu kia Kintinu. Avo tuvanga wo, twavwa nsambu zitwasa “ezulu diampa ye nz’ampa.”—2 Pet. 3:13.
Nga Osungamene?
• Aweyi tulenda yimina fu yambote?
• Adieyi tulenda vanga muna ‘kondw’ekeya yo lusembo’?
• Adieyi tulenda longoka muna mbandu a Yosefe yo Naomi?
• O samun’e nsangu zambote ekuma dinina s’elau diampwena?
[Yuvu ya Longoka]
[Foto ina muna lukaya lwa 9]
Adieyi dilenda kunusadisa yeno mase kumosi y’esi nzo zeno mu yima fu yambote?
[Foto ina muna lukaya lwa 10]
Adieyi tulenda longoka muna mpila ina Yosefe kazizidila e mpasi?