Nga Osungamenanga?

Nga wayangalele tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:

• Adieyi dilenda kusadisa mu sansa wana angangu?

E mpila yambote olenda sadisila wan’aku i ‘kubasongang’e mbandu.’ (Yoa. 13:15) Kalanga ye tezo muna dina olenda vingila kwa mwan’aku, ekolo kenungunukang’e ntela. Mokenanga yandi mu kuma kia luveleleso, zitisa ola yo vanga malongi ma sikola. Vana malongi masikididi malenda sadisa mwan’aku mu kala ye ngangu.—1/5, lukaya lwa 19-20, mu Kimputu.

• Ekuma Nzambi katumbila Arone ko vava kavang’e teke kia mwan’a ngombe?

Arone nsiku a Nzambi kakulula wasimanga e sambu ya teke. (Luv. 20:3-5) Kansi, Mose wasamba kwa Nzambi mu kuma kia Arone. E sambu kiandi ‘kiasala kikilu.’ (Yak. 5:16) Arone wasonga kwikizi mu mvu miayingi. Kana una vo nkangu wakomekena Arone mu vanga teke kia mwan’a ngombe, kuna kwalanda wasonga vo o ntim’andi ke wakala muna yau ko. Kadi wayikama wan’a Levi yo kuyisia kun’esambu dia Yave. (Luv. 32:25-29)—15/5, lukaya lwa 21.

• Ofere iyikwanga muna Nkand’a Nzambi vo fulu kiatukanga wolo akweyi yakalanga?

Muna nata wolo watukanga kuna Ofere, Solomo watungisa zinzaza kuna Esiongebe. (1 Nti. 9:26-28) Elwakilu diadi dia nzaza kuna Golfo de Acaba diakala, lukufi ye mbanza ziyikilwanga o unu vo Elate ye Acaba, kun’ekumu dia Mbu Ambwaki. Muna kuma kiaki, mbanza Ofere kuna Arábia yakala, lukufi ye Mbu Ambwaki yovo kun’esimu dia África yovo Índia.—1/6, lukaya lwa 15, mu Kimputu.

• Nki i bâmi kia Ngiladi? (Yer. 8:22)

Bâmi, mafuta mansunga mabakilwanga mu nti miayingi miakala kuna Ngiladi, kuna este ya Nkoko a Yodani ye mu fulu yakaka. Mafuta mama masadilwanga mpe se nlongo mia mputa. Diavavanga vo e zula kia Isaele kiavava mawuku mu kuma kia mpasi bakala zau. Kansi, o nkangu ke wazola vava mawuku ko. (Yer. 8:9)—1/6, lukaya lwa 21-22, mu Kimputu.

• Adieyi dilenda sadisa Nkristu mu zizila kele vo nkaz’andi umbembwele?

Kele vo nkento yovo yakala ona wabembolwa kwa nkaz’andi, osidi e ngolo za lemvokela nkanikinu mia Nkand’a Nzambi, ke dikala mfunu ko dia banza vo yandi i nkwa kuma wau nkaz’andi otele zumba. Nzambi ozeye wo vo lufiaulwisu ye lukasakeso ovwanga o mfunu. Olenda sadila mpangi zaku Akristu mu kufiaulwisa.—15/6, lukaya lwa 30-31.

• Adieyi olenda vanga mu sadisa muntu oyelanga?

Toma winikinanga. (Kim. 3:1, 7) Songanga ngemba yo vwa ngindu zandi o mfunu. (Roma 12:15) Unkasakesanga yo kumvana lusadisu kavwidi o mfunu. (Kol. 4:6; 1 Yoa. 3:18) Mokenanga yo nkundi aku. (Nga. 17:17)—1/7, lukaya lwa 10-13, mu Kimputu.

• Aweyi tuzayidi wo vo Nzambi kena yo lubantiku ko?

Mose wasonga e ziku kia diambu diadi muna sambu kasamba. (Nku. 90:2) Muna kuma kiaki, Yave kaka oyikilwanga muna zina dia “Ntinu a mvu ya mvu.” (1 Tim. 1:17)—1/7, lukaya lwa 28, mu Kimputu.

• Aweyi olenda sadisila wan’aku bazolanga o tanga?

O zola ye mbandu a mase isadisanga wana mu yima fu kia tanga. Ofwete mpe kalanga ye nkanda. Tanganga mu ndinga yangolo. Kasakesanga wana bavova yo mokenanga mana nutangidi. Lombanga wana batangila yo kubakasakesa mu yuvulanga yuvu.—15/7, lukaya lwa 26.

• Ekuma Yesu kayendela nzaki ko kuna kwa nkundi andi Lazaro wayelanga yo kunwuka?

Vava Yesu kalwaka, Lazaro wayifwila se vioka lumbu yá. Muna viokesa e lumbu, Yesu wavana umbangi wasikila mu kuma kia S’andi. Mu mpila yayi, ayingi bakwikila. (Yoa. 11:45)—1/8, lukaya lwa 14-15, mu Kimputu.

• Nki i “mabata”?

Nkumbu miayingi, mabata mama fulu yazanguka yovo fulu yakaka yasadilwanga muna nsambil’aluvunu. Maziku, teke ye lekwa yakaka yasadilwanga muna nsambila yasiwanga mu fulu yayi mu vanga mana Nzambi katumbanga. (Nta. 33:52)—1/8, lukaya lwa 23, mu Kimputu.