Obokelo Wiza!

WINIKINA MU

Obokelo Wiza!

Obokelo Wiza!

AKWEYI? Mu kwiza kingula dimosi muna mavula ma Mbangi za Yave, meyikilwanga vo Betele. Vena ye 118 dia mavula mu nsi zayingi ova nza. Awana bekwenda kingulanga Betele, besonganga luyangalalu lwau muna salu kisalwanga ko.

Vava kamona wantu basalanga ye kiese kiawonso kuna vula dia Mbangi za Yave kuna México, etoko dimosi una vo nlongoki a Nkand’a Nzambi, wasivika kikilu yo yuvula vo: “Adieyi mfwete vanga mu kwiza zingila yo sadila kwaku?” Bamvovesa vo: “Entete ofwete vubwa. I bosi, diambote wayantika sala nze mviti a nzila, i sia vo, nteleki a ntangwa ke ntangwa.” Etoko diadi wavanga dina kavoveswa. Una vavioka mvu miole, wabokelwa mu kwenda sadila kuna Betele ya México, kuna kesadilanga se vioka mvu 20.

Nki i Betele?

Muna nding’a Kiyibere, e mvovo “Betele” una ye nsasa vo “Nzo a Nzambi.” (Etu. 28:19) Mavula mama mena muna nsi zayingi mesadilwanga mu nieteka yo kayanesa Nkand’a Nzambi ye nkanda misasilanga wo yo vana luludiku lwa mwanda kwa vioka 100.000 ma nkutakani za Mbangi za Yave mu nza yawonso. Tezo kia 20.000 ma mpangi besadilanga kuna Betele, akala ye akento batuka mu fulu ya mpila mu mpila, besadilanga Yave ye mpangi zau muna nsi a ntima wawonso mu salu kia ntangwa ke ntangwa. Awana bena se mvu miayingi mu salu kiaki kia Kikristu besalanga kumosi y’aleke ana bena ye nkuma. Muna masika ye muna nsuk’a lumingu, asadi a Betele bekwendanga muna tukutakanu muna nkutakani za Mbangi za Yave zina lukufi yovo muna salu kia umbangi. Besadilanga mpe ntangw’au ya vunda mu longoka Nkand’a Nzambi, mu nsaka ye mu mambu makaka.

Konso ngonde, asadi a Betele bevewanga finzimbu mu lungisa nsatu zau za nitu. Beyangalelanga madia mambote ye masuku metoma veleleswanga. E nzo za Betele ke zantalu ko. Kansi, e nzo zazi zatoma tungwa. Awana bekwenda zo kingulanga, betoma sivikanga ke mu mona kaka ko e mpila zitoma lungwa-lungwanga ye nkubika zambote, kansi mpe ye kintwadi yo zola vana vena asadi a Betele. Awonso besalanga ye fululu kiawonso. Kana una vo yau awonso besalanga kwayingi, bekalanga mpe ye ntangwa ya songa kiese kw’akaka. Kuna Betele ke kusiwanga mpambula ko ngatu kala yo muntu okuyimwenanga vo osundidi akaka mu kuma kia salu kesalanga. E salu yawonso yamfunu, kiakala salu kia velelesa, kia lunga-lunga e yanzala (jardim), lamba madia, salu kia nieteka nkanda yovo sadila muna masonekeno. Esi Betele besalanga kumosi mu yikama salu kia umbangi kisalanga Mbangi za Yave.—Kol. 3:23.

Zaya Akaka Besadilanga Kuna Betele

Yambula twazaya akaka besadilanga kuna Betele. Nki kiabafila mu kwenda sadila kuna Betele? Badika e nona kia Mario. Vava kakituka se Mbangi a Yave, Mario salu kiafutanga nzimbu zayingi kasalanga mu kompani kia makalu kuna Alemanha. Wakala y’elau dia kituka se mvwama. Ke kolo ko vava kavubwa, wayivana mu kwenda sadila kuna Betele ya nsi andi mu lumingu lumosi. Wayantika sadila kuna kunietekenwanga e nkanda. Mario wamona e nswaswani vana vena awana kasalanga yau kuna Betele ye akundi andi a salu. Muna kuma kiaki, wavanga ndomba ya kwenda sadila emvimba kuna Betele. Kana una vo ayingi muna yitu yandi ye akundi a salu babadikila nzengo zandi vo za uzowa, Mario kiese kiayingi kena kiau muna salu kesalanga kuna Betele ya Alemanha.

Ayingi bekwendanga sadila kuna Betele ke bakala yo umbangu wa konso salu ko. I wau diakala kwa Abel, ona osadilanga ku Betele ya México se mvu 15. Wavova vo: “E Betele ina nze sikola kwa mono. Yalongoka sadila muna masini mampimpita ma nietekena nkanda. Nzeye wo vo, kele vo mpaikidi ku Betele, nzimbu zayingi yadi baka muna umbangu wau. Kansi, kiadi kala ye luvuvamu ko ye kiese imonanga muna salu kia Betele, nswaswani ye dina divangamanga mu fulu yayingi ya salu yazala ye ntelekw’a moyo ye ntantani. Mambu mayingi ilongwanga oma mekunsadisanga mu wokesa ngangu zame yo nungunuka muna mwanda. Kana nkutu vo yatanga sikola zandá, kiadi vwa mawete mama ma mwanda ko.”

O Kingula Betele Dilenda Kukasakesa

O kingula Betele dilenda sadisa muntu mu wokesa ngwizani andi yo Nzambi. I diau diavangama kwa Omar, kuna México. O ngudi andi wanlonga e ludi kia Nkand’a Nzambi. Kansi, muna kimbuta kia mvu 17, Omar wayambula kwenda mu tukutakanu ye muna salu kia umbangi. Wayantika kuyivana muna mavangu mambi yo vava kala ye mavwa mayingi. I bosi, vava kasadilanga muna kompani dimosi dia telefone, Omar wakala mosi mun’awana batumwa kuna Betele mu kwenda songa e salanganu batekanga. Omar wavova vo: “Vava twamanisa songa lekwa, ampangi batutambula batukiyisa mu kutusonga e vula. Mana yamona yo zola bansonga, mamfila mu yindula e mpil’a zingu yanatanga, kiavambana yo Yave. Yayantika diaka kwenda mu tukutakanu yo longoka Nkand’a Nzambi. Ngonde sambanu kaka zavioka tuka yakingulwila Betele, yavubwa. Ivutulanga matondo kwa Yave muna lukasakeso yabaka vava yakingula Betele.”

Masahiko, wa mwisi Japão, wasanswa mpe kwa mase bena vo Mbangi za Yave. Kansi, wayantika mona vo e zingu kia Kikristu kiampasi. Wayivananga kwayingi muna mambu ma sikola yo yambula kwenda mu tukutakanu ye muna salu kia umbangi. Masahiko osungamenanga vo: “Lumbu kimosi, esi nzo eto ye mpangi zakaka z’Akristu babak’e nzengo za kwenda kingula Betele. Wau vo esi nzo eto basiandama vo ngyenda, yatambulwila kwenda. E nkingula twavanga kuna Betele, yankasakesa kikilu. E kiese yamona mu kala vamosi ye mpangi z’Akristu ekolo twakangalanga, kisidi kio mona ko vava yakalanga y’akundi bena vo ke Mbangi za Yave ko. Luzolo lwa zingila ngwizani ye nkanikinu mia Kikristu lwawokela. Muna kuma kiaki, yalomba vo yayantika longoka Nkand’a Nzambi.” Owau, Masahiko se mviti a nzila a ngonde ke ngonde muna nkutakani au.

Mpangi mosi ankento wa mwisi França wayenda sadila kuna Moscou. Wayambula lungana ye nkangu a Yave yo yoya muna mwanda. Wayivana muna mavangu m’esumu yo sompana yo yakala una vo ke Mbangi a Yave ko. I bosi, mpangi andi ankento wa Mbangi a Yave watuka kuna França mu kwenda kunkingula. Yau ewole bayenda kuna mbanza St. Petersburg, Rússia, mu kingula Betele. Wasoneka vo: “Vava twalwaka kuna Betele, batoma kututambula. Ediadi diansimba kikilu o ntima. Fulu kiavuvama kiakala. Yamona vo mwand’a Yave wakala vana fulu kiokio. Ekuma yavangila uzowa wa bembola nkubik’a Yave? Vava twavutuka, yalomba lusadisu lwa Yave muna sambu yo yantika longa mwan’ame Nkand’a Nzambi ye kiese kiawonso.” Vana ntandu a lusadisu lwa mwanda kavewa, mpangi ndioyo wayoya muna mwanda wakasakeswa vava kakingula Betele yo nungunuka muna mwanda.

Aweyi bemonanga awana ke batomene zaya Mbangi za Yave ko vava bekingulanga Betele? Muna mvu wa 1988, Alberto, ona wayivananga muna mambu ma mbumba, wayenda kingula Betele ya Brasil. Wasivika kikilu vava kamona e fulu kiatoma veleleswa, kia luvuvamu. Diakaka diansivikisa i mona vo e mambu ke mavangamenanga ku sweki ko. Vitila kenda kingula Betele, Alberto wakingula dibundu dina vo nkwezi andi wakala i mfumu. Alberto wayika nswaswani kamona. Wavova vo: “Kuna dibundu diadi, mawonso ku sweki mavangamenanga.” Ke vavioka kolo ko vava kakingula Betele, watambulwila longoka Nkand’a Nzambi, wayambula kuyisia muna mambu ma mbumba. Owau se nkuluntu muna nkutakani.

Wiza Kingula Betele!

Ayingi besiang’e ngolo za kwenda kingula Betele ya nsi au. Kasikil’owu, kuna Brasil, Paulo yo Eugenia, balunda nzimbu mu tezo kia mvu yá kimana bavanga nkangalu wa 3.000 ma kilometa mu lumbu yole mun’ekalu, mu kwenda kingula Betele ya nsi au. Bavova vo: “E ngolo twavanga ke zankatu ko. Owau, twatoma bakula e nkubik’a Yave. Vava tusasilanga kw’alongoki eto a Nkand’a Nzambi e salu kisalwanga kuna Betele, ezak’e ntangwa beyuvulanga vo: ‘Oyeno nga nwayenda ko kala?’ Owau tulenda vutula vo elo.”

Nga Betele ina kuna nsi ozingilanga yovo nsi ina lukufi ye nsi eno? Tubokele wiza kingula Betele. Ka lukatikisu ko vo ampangi kuna Betele betoma kutambula yo kasakeswa mu kwamanana sadila Yave.