Yuvu Y’atangi

Ekuma Yesu kavovesela nkento ona wazayakana vo nsumuki, masumu mandi mayambulwilu?—Luka 7:37, 48.

Ekolo Yesu kadianga muna nzo a Mfarisi mosi nkumbu andi Simone, nkento mosi ‘watelama kuna nima, kuna Yesu kafila malu mandi.’ Wazombesa malu mandi ye mansanga mandi yo kunguna mo muna nsuki za ntu andi. Ofibulwidi malu mandi yo kusa mo mazi mansunga. Lusansu lusonganga vo, o nkento ‘wazayakana muna mbanza vo nsumuki.’ Kieleka, wantu awonso asumuki, kansi Nkand’a Nzambi usadilanga mvovo wau mu yika muntu ona otomene zayakana kwa wantu vo nkwa masumu. Nanga nkento ndiona nkembi kakala. Yesu kwa nkento ndiona kavovesa vo: “O masumu maku mayambulwilu.” (Luka 7:36-38, 48) Adieyi kazola vova Yesu? Wau vo kimenga kia lukulu ke kiayivaninwa ko, aweyi masumu mandi malolokelwa?

Vava nkento kakusuna malu ma Yesu yo kusa mo mafuta, kansi vitila kanloloka, Yesu wata kingana mu sasila diambu diamfunu kwa simone ona wantambula muna nzo andi. Muna tezanesa esumu ye mfuka zina muntu kalendi futa ko, Yesu wavovesa Simone vo: “Nsompeki, mindia-mfuka miole kakala miau: omosi, mfuk’a nkama tanu za mpanza kakala yau, owaka makumatanu. Vava ke bena y’eki bafuta ko, ubayambulwidi zo yau ewole. Nga nani olut’o kunzola vana bena?” Simone wavutula vo: “Edi ngina diau vo ndiona kaluta yambulwila.” Yesu wamvovesa vo: “Solola otomene solola.” (Luka 7:41-43) Yeto awonso mfuka ya lemvokela Nzambi tuna yau. Muna kuma kiaki, vava tukolamenanga Nzambi yo sumuka, tuyambulanga futa e mfuka eto kwa Nzambi. Muna mpila yayi tukudikilanga e mfuka. Kana una vo i wau, Yave una nze nsompeki ona oyambulwilanga e mfuka. Ekiaki i kuma Yesu kakasakesela alongoki andi basambanga kwa Nzambi vo: “Utuyambulwila mfuka zeto, e ngyambwila tuyambulwidi ana tuvwidi mfuka.” (Mat. 6:12) E sono kia Luka 11:4 kiyikilanga e mfuka zazi vo masumu.

Mu nkia nzila o Nzambi kalolokelanga masumu kuna nz’ankulu? O unsongi wandi wavavanga vo muntu kavewa e tumbu kia lufwa kele vo osumukini. Kiaki i kuma Adami kafwila mu kuma kia masumu mandi. Kansi, muna Nsiku kavana Nzambi kwa wan’a Isaele, o nsumuki olenda yambulwila masumu kele vo ovene kimenga kia bulu kwa Yave. Paulu wa ntumwa wavova vo: “Mun’owu wa nsiku,  . . . e lekwa yawonso muna menga ikianzisilwa, vana vakondelo e mbungukw’a menga ke vena luyambulwilu ko.” (Ayib. 9:22) Ayuda ke bazaya mpila yakaka ko ina Nzambi kalenda kubalolokela masumu. Muna kuma kiaki, ke diasivi ko vo ana bawanga Yesu ke bakwikila ko muna dina kavovesa kwa nkento. Awana bavwanda kumosi yo Yesu vana mesa bavovaziana vo: “Ng’andioyu nani, oyambulwila masumu?” (Luka 7:49) Ozevo, aweyi masumu ma nkento ona wazayakana vo nsumuki malolokelwa?

Ungunza wantete wavovwa vava yakala yo nkento antete bakolama, wayika ekani dia Yave dia fila “mbongo” ona obosolwa singini kwa Satana ye “mbongo” andi. (Etu. 3:15) Yesu wabosolwa e singini vava kavondwa kw’atantu a Nzambi. (Ngal. 3:13, 16) Menga mabunguka ma Kristu mena se lukulu olu lwavevola wantu mun’esumu ye lufwa. Wau vo ke vena diambu ko dilenda simba Yave mu lembi lungisa ekani diandi, vava kavova e mvovo mina muna Etuku 3:15, vana meso ma Nzambi o lukulu muna lumbu kiakina lwafutwa. Ediadi diaziula nzila mu loloka masumu m’awana bekwikilanga muna nsilu andi.

 Kuna nz’ankulu, Yave wabadikila wantu ayingi vo ansongi. Akaka muna yau, Kanoke, Noa, Abarayama, Rakabi yo Yobi. Mu kuma kia lukwikilu, bavingilanga e ndungan’a nsilu mia Nzambi. Yakobo wasoneka vo: “Abarayama, wakwikila Nzambi, kabadikilwa dio vo ndungidi.” Mu kuma kia Rakabi, Yakobo wavova vo: “Diau adimosi mpe yo Rekabe wa nkembi, ke wau ko vo muna mavangu kalungisilwa?”—Yak. 2:21-25.

Davidi wa Ntinu kuna Isaele yankulu wavanga masumu mampwena, kansi wakala ye lukwikilu lwasikila muna Nzambi aludi yo songa luviluku lwa ntima muna konso sumu kavanga. Vana ntandu, muna Nkand’a Nzambi tutanganga vo: “[Yesu] wasiwa kwa Nzambi se lembekelwa, muna lukwikilu, muna menga mandi, kasonga ndungidi andi, muna kuma kia ndandul’a masumu mateka vangama, muna mvuku a Nzambi; kasonga ndungidi andi muna kiau tandu eki: kakala nlungi yandi kibeni, yo nlungisi a nkwa lukwikilu muna Yesu.” (Roma 3:25, 26) Muna kuma kia kimenga kia lukulu kadi vana o Yesu kuna sentu, Yave waloloka masumu ma Davidi lembi kulula nsiku miandi miansongi.

Diau adimosi mpe diavangama kwa nkento ona wakusa mazi muna malu ma Yesu. Nkembi kakala, kansi waviluka o ntima. Wabakula vo lukulu kavwang’o mfunu mu kuma kia masumu mandi ye wasonga muna mavangu mandi vo wayangalela ona Yave katuma muna kutukûla. Kanele vo kimenga ke kiayivaninwa ko, kiasadilwa mu kuma kia wantu nze yandi. Muna kuma kiaki, Yesu wamvovesa vo: “O masumu maku mayambulwilu.”

Lusansu lwalu lutoma songanga vo, Yesu kavezanga asumuki ko. Wabavanganga oma mambote. Vana ntandu, Yave wakubama mu loloka asumuki ana bevilukanga kikilu o ntima. Kieleka, ediadi dialukasakeso kikilu kwa yeto wantu alembi lunga.

[Foto ina muna lukaya lwa 7]

Yave wababadikila vo ansongi