Salu Kisalanga Mfidi eto o Unu
Salu Kisalanga Mfidi eto o Unu
“Wizidi avaika, wizidi asundinge, kasunda mpe.”—LUS. 6:2.
1, 2. (a) E salu kisalanga Kristu nze ntinu tuka muna mvu wa 1914, aweyi kisongelwanga muna Nkand’a Nzambi? (b) Adieyi Kristu kevanganga tuka kayadikilwa?
KRISTU wayadikwa se Ntinu muna Kintinu kia Masia kia Yave muna mvu wa 1914. Aweyi tukumbadikilanga o unu? Nga nze ntinu ovwende vana kunda kiandi, otalanga ova ntoto ezak’e ntangwa mu zaya mana mevangamanga muna nkutakani andi? Avo i wau, tufwete soba e ngindu zeto. Muna nkand’a Nkunga ye Lusengomono Yesu osongwanga nze ntinu angolo ofongele vana mvalu, “wizidi asundinge, kasunda mpe” yavana kefokola nsund’andi.—Lus. 6:2; Nku. 2:6-9; 45:1-4.
2 E diambu diantete kavanga o Kristu vava kayadikwa nze ntinu i sunda ‘e ngobodi ye mbasi zandi.’ Wau vo Mikaele wa mbasi ambuta ofilanga mbasi zandi, Kristu wayinga Satana ye nkwiya miandi kun’ezulu yo kubatuba ova ntoto. (Lus. 12:7-9) I bosi, nze “nkunzi ekangu” dia Yave, Yesu wayiza kumosi yo S’andi mu kingula e tempelo ya kimwanda. (Mal. 3:1) Wafundisa mabundu ma Kikristu kia Kimpangila, ina vo ndambu isundidi o yiva muna “Babele anene,” yo mona vo nkwa kuma muna bungula menga yo tá e zumba kia mwanda ye ayadi a nza yayi.—Lus. 18:2, 3, 24.
Kristu Wavelelesa Ntaudi Andi ova Ntoto
3, 4. (a) Kristu nkia salu kesalanga nze “nkunzi” a Yave? (b) Nkia diambu diamoneka vava tempelo yakingulwa? Nze Ntu a nkutakani, nkia kiyekwa kasisa o Yesu?
3 Muna nkingula bavanga, Yave ye “nkunzi” andi bawana mpe buka ki’Akristu aludi vana yanzala kia tempelo ya kimwanda, ana ke bakala mu mabundu ma Kikristu kia Kimpangila ko. Kansi, kana nkutu Akristu akuswa awaya yovo “wan’a Levi,” veleleswa bavavanga. Kiaki i kuma Malaki wa ngunza kavovela vo: “[Yave] kala kekala se nkenzi yo mvelelesi a palata, kavelelesa wan’a Levi, okubakenza nze wolo ye palata; i ntambikila betambikil’o tukau kwa Yave muna unsongi.” (Mal. 3:3) Yave wasadila Kristu Yesu wa “nkunzi ekangu” diandi mu velelesa Isaele ya mwanda.
4 Kana una vo i wau, Kristu wawana Akristu akuswa awaya akwikizi mu vanga bena mawonso mu vana madia ma mwanda muna ntangw’andi kw’esi nzo ana bakala ye lukwikilu. Tuka muna mvu wa 1879 yamu unu, vakala nkaku yovo ve, bevaikisanga e nkanda misasilang’e ludi kia Nkand’a Nzambi mu kuma kia Kintinu kia Nzambi. Yesu wavova vo “ovo wizidi” kingula esi nzo andi muna “mbaninu a tandu,” owana ntaudi mu kubavana kena “madia muna ntangw’andi.” Oyikila ntaudi yayi vo nkwa nsambu yo “kunsi’e kiyekwa kia salanganu yandi yawonso” ova ntoto. (Mat. 24:3, 45-47) Nze Ntu a nkutakani y’Akristu, Kristu osadilanga “ntaudi akwikizi yo lulungalalu” mu lunga-lunga mawonso ma Kintinu ova ntoto. Osadilanga Buka kia Selo Yambuta mu vana luludiku kwa “esi nzo,” i sia vo, Akristu akuswa kumosi ye mpangi zau “mameme makaka.”—Yoa. 10:16.
Salu kia Nsâlu ova Nza
5. Nkia salu kia Masia wa Ntinu kamona Yoane wa ntumwa muna mona-meso?
5 Muna mona-meso, Yoane wa ntumwa wasongwa diambu diakaka kavanga o Masia wa Ntinu muna “lumbu kia Mfumu,” vava kayadikwa muna mvu wa 1914. Yoane wasoneka vo: “Mbwene etuti diampembe; van’etuti vafongele ona wina nze mwan’a muntu, wina ye kolow’awolo vana ntu andi, vana koko kwandi sakilwa kiameno.” (Lus. 1:10; 14:14) Yoane wawá nding’a mbasi yafila Yave yavovesanga Nsadi ndioyo vo kasia sakilwa kiandi, kadi “o nsâlu a nza uwumini.”—Lus. 14:15, 16.
6. Adieyi kavova Yesu divangama?
6 O “nsâlu a nza” wau ukutusungamesanga kingana kia Yesu kia mbongo ambote ye mbongo ambi. Yesu wayitezanesa yo muntu wakuna mbongo ambote muna mpatu andi y’ekani dia vela mbongo ambote. Mbongo yayi isunzulanga “wan’a kintinu,” i sia vo, Akristu akuswa ana beyala yandi muna Kintinu kiandi. Kansi, muna fuku, o ntantu andi, “Nkadi ampemba,” wakuna mo mbongo ambi isunzulanga “wan’a mbi.” O mfumu a nsâlu wavovesa asadi andi vo bayambula e mbongo ambote ye mbongo ambi yakudila kumosi yamuna nsâlu ukala kuna “mbaninu a nza.” Muna kolo kiakina, ofila mbasi zandi kimana bavambula mbongo ambote ye mbongo ambi.—Mat. 13:24-30, 36-41.
7. Aweyi Kristu kefidilanga o “nsâlu a nza”?
7 Muna ndungan’a mona-meso kiasongwa Yoane, Yesu yandi ofilanga e salu kia nsâlu ova nza yawonso. O “nsâlu a nza” wayantika muna nkutik’a nsadiswa ya 144.000 ma “wan’a kintinu,” “mbongo ambote” a kingana kia Yesu. E nswaswani vana vena Akristu akieleka y’Akristu aluvunu yatoma moneka kunima Vit’Antete ya Nz’Amvimba. Ediadi diaziula nzila mu nkutika yazole ya “nsâlu a nza,” i sia vo, nkutik’a mameme makaka. Awaya ke “wan’a kintinu” ko, kansi “ndong’ayingi” y’awana besinga yalwa kwa Kintinu kiaki. Bekutikwanga vana vena wantu a “makanda, ye nsi, ye ndinga” zawonso. Besakalelanga Kintinu kia Masia, kiyalwa kwa Kristu Yesu kumosi ye 144.000 ‘m’aveledi’ ana beyala yandi muna luyalu lw’ezulu.—Lus. 7:9, 10; Dan. 7:13, 14, 18.
Una Kristu Kefidilanga Nkutakani
8, 9. (a) Adieyi disonganga vo Kristu kemonanga kaka fu ya konso nkutakani ko, kansi mpe ye mavangu ma konso muntu muna nkutakani? (b) Nze una usonganga fwaniswa kia lukaya lwa 26, nkia “mambu masina ma Satana” tufwete venga?
8 Mun’elongi diaviokele, twawá vo Kristu wazayanga kimwanda kia nkutakani zawonso muna tandu kiantete. Mu lumbu yeto, nze Ntinu wavanwa “wisa kiawonso ki’ezulu ye nza,” Kristu wa Mfumu eto ofilanga nkutakani mu nza yawonso kumosi y’akuluntu a nkutakani zazi. (Mat. 28:18; Kol. 1:18) Yave ‘wansia se ntu a ma yawonso ya nkutakani’ y’Akristu akuswa. (Ef. 1:22) Mu kuma kiaki, omonanga mawonso mevangamanga muna tezo kia 100.000 ma nkutakani za Mbangi za Yave.
9 Yesu wavovesa nkutakani ya Tuatira vo: “I mau mama mavovele o Mwan’a Nzambi, ndiona wina yo meso nga nlaku a tiya, . . . Nzeye mo, o mavangu maku.” (Lus. 2:18, 19) Watumba esi nkutakani yayi mu kuma kia mavangu mau ma zumba ye mpila zingu ki’eloko bakala kiau. Wabavovesa vo: “Omono i yun’osatanga nsi za mbundu ye ntima: ikunuvanina, konso muntu vovo nwina, mun’owu wa mavangu mandi.” (Lus. 2:23) E mvovo miami misonganga vo Kristu omonanga e fu kia konso nkutakani ye mavangu ma konso muntu muna nkutakani. Yesu wasanisina Akristu kuna Tuatira “ana balembele zaya mambu masina ma Satana.” (Lus. 2:24) Diau adimosi mpe o unu, Yesu oyangalelanga aleke ye mbuta ana bevenganga kuyisia muna “mambu masina ma Satana” muna Internete, vídeo games zisonganga mavangu mansoki yovo landa ngindu zabendomoka za wantu. Ekwe kiese kekalanga kiau mu mona e ngolo bevanganga Akristu ayingi za sakalela wisa kiandi muna mambu mawonso ma zingu kiau!
10. E mpila Kristu kefidilanga akuluntu muna nkutakani aweyi iyikilwanga? Kansi, nkia diambu bafwete sungamenanga?
10 Kristu kuna zola kwawonso ofilanga e nkutakani andi ova ntoto muna solanga akuluntu. (Ef. 4:8, 11, 12) Muna tandu kiantete, akuluntu awonso akuswa muna mwanda bakala. Nkand’a Lusengomono ukubayikilanga nze ntetembwa vana koko kwalunene kwa Kristu. (Lus. 1:16, 20) O unu, akuluntu ayingi muna nkutakani mu buka kia mameme makaka bena. Muna lusadisu lwa sambu ye mwand’avelela besolelwanga. Muna kuma kiaki, balenda mpe badikilwa vo Kristu ukubafilanga. (Mav. 20:28) Besungamenanga vo Kristu osadilanga buka kiandwelo ki’Akristu akuswa nze Buka kia Selo Yambuta mu fila alongoki andi ova ntoto.—Tanga Mavangu 15:6, 28-30.
“Wiza, e Mfumu Yesu”
11. Ekuma twinina y’etima dia mona e ngiz’a Mfumu eto?
11 Muna mona-meso kasongwa o Yoane wa ntumwa, Yesu nkumbu miayingi kavova vo mu kwiza kena mu nzaki. (Lus. 2:16; 3:11; 22:7, 20) Ka lukatikisu ko vo ngiz’andi kayikanga vava kekwiza fwasa Babele Anene kumosi ye nza ya Satana. (2 Tes. 1:7, 8) Wau kakala y’etima dia mona ndungan’a ungunza wau, Yoane wa ntumwa wavova vo: “Amen: wiza, e Mfumu Yesu.” Yeto tuzingilanga mu tandu kiansuka kia nza yayi yambi tuna mpe y’etima dia mona ngiz’a Mfumu ye Ntinu eto muna Kintinu mu velelesa e nkumbu a S’andi yo tundidika Kimfumu kiandi.
12. Adieyi kevanga o Kristu vitila e tembwa ya lufwasu yayambulwa?
12 Vitila Yesu keza fwasa nkubika ya Satana, ona wansuka muna buka kia 144.000 ma Isaele a mwanda otambula e dimbu kiansuka. O Nkand’a Nzambi utoma songanga vo e tembwa ya lufwasu lwa nza ya Satana ke iyambulwa ko yavana 144.000 bemana siwa e dimbu.—Lus. 7:1-4.
13. O Kristu aweyi kesinga songela e nkal’andi kuna lubantiku lwa “mpasi zayingi”?
13 E ‘nkal’a’ Kristu tuka muna mvu wa 1914 ke itoma bakulwanga ko kwa wantu ayingi ova ntoto. (2 Pet. 3:3, 4) Kansi, ke kolo ko, e nkal’andi imoneka vava ketwasa mfundis’a Yave muna nkubika zawonso za nza ya Satana. O lufwasu lwa “muntu esumu,” i sia vo, mfumu za mabundu ma Kikristu kia Kimpangila lukala se sinsu kia “nsengomok’a ngiz’andi.” (Tanga 2 Tesalonika 2:3, 8.) Kiaki i ziku kisonga vo Kristu mu sala kena nze Mfundisi wasolwa kwa Yave. (Tanga 2 Timoteo 4:1.) Lufwasu lwa mabundu ma Kikristu kia Kimpangila, mena vo i ndambu isundidi o yiva muna Babele anene, lwau luvitila lufwasu lwa kintwadi kia nsambila zawonso za luvunu ova nza yayi yambi. O Yave osinga sia muna ntima mi’ayadi e ngindu za fwasa nkembi ndioyo a mwanda. (Lus. 17:15-18) Lwalu i lubantiku lwa “mpasi zayingi.”—Mat. 24:21.
14. (a) Ekuma lumbu ya mpasi zayingi ikufikilwa? (b) E “sinsu kia Mwan’a muntu” nkia nsasa kina kwa nkangu a Yave?
14 Yesu wavova vo e lumbu yayi ya mpasi zayingi ikufikwa mu kuma kia “adimbuki,” i sia vo, nsadisw’a Akristu akuswa ova ntoto. (Mat. 24:22) Yave ke yambula ko vo lufwasu lwa nsambil’aluvunu lwafwasa mpe Akristu akuswa ye mpangi zau mameme makaka. Yesu wakudikila vo “vava kivwa kak’e mpasi za lumbu yayina,” vekala ye sinsu muna ntangwa, ngonde ye ntetembwa, “i bosi kimonek’e sinsu kia Mwan’a muntu kun’ezulu.” Ediadi difila makanda mawonso ma nza mu ‘zazana’ yovo nionga. Kansi, ediadi ke divangama ko kwa akuswa, ana bena ye vuvu kia zingila kun’ezulu ye mpangi zau mameme makaka, bena ye vuvu kia zingila ova ntoto. ‘Besampuk’omu’zulu, bevumbula ntu, kadi nkûk’au ifinamene.’—Mat. 24:29, 30; Luka 21:25-28.
15. Kristu nkia salu kesala vava kekwiza?
15 Vitila kafokola e nsund’andi, o Mwan’a muntu okwiza diaka mu mpila yakaka. Wavova vo: “O Mwan’a muntu, ova kekwizila muna nkembo andi, ye mbasi zawonso yandi, i kevwanda vana kunda kia nkembo andi: vana kena valungalakena zula yawonsono: kakubavambanisa nga mvungudi ovambanisa mameme ye nkombo: kasia mameme kuna koko kwandi kwalunene, kansi nkombo kuna lumonso.” (Mat. 25:31-33) E mvovo miami miyikanga e ngiz’a Kristu nze mfundisi mu vambula “zula yawonsono” mu buka yole: “mameme,” i sia vo, ana basadisa mpangi zandi za mwanda (Akristu akuswa ova ntoto) ye “nkombo,” i sia vo, awana “balembi lemvokel’e nsangu zambote za Mfumu eto Yesu.” (2 Tes. 1:7, 8) Mameme, meyikilwanga vo “alungi” yovo asongi, bevwa “moyo a mvu ya mvu” ova ntoto, kansi e nkombo ‘bekwenda muna tumbu kia mvu ya mvu’ yovo befwaswa.—Mat. 25:34, 40, 41, 45, 46.
Yesu Ofokola e Nsund’andi
16. O Kristu wa Mfidi eto, aweyi kefokolwela e nsund’andi?
16 Vava lutangu lwawonso lwa ntinu ye nganga besiwa e dimbu ye kutika mameme ye sia mo kuna koko kwandi kwalunene mu kubavuluza, Kristu ‘ofokola e nsund’andi.’ (Lus. 5:9, 10; 6:2) Wau vo ovit’o ntu muna vu kiangolo kia mbasi kumosi ye mpangi zandi ana bafulwa, Yesu ofwasa nkubika zawonso za nza ya Satana, i sia vo, tuyalu, masoladi ye kinkita. (Lus. 2:26, 27; 19:11-21) Kristu ofokola e nsund’andi vava kefwasa e nza yawonso ya Satana. I bosi, okanga Satana ye nkwiya miandi muna mbilu mun’ezunda dia mvu.—Lus. 20:1-3.
17. Kristu akweyi kefila mameme mandi makaka muna Luyalu Lw’ezunda dia Mvu? Nki’ekani tufwete kala diau?
17 Mu kuma kia “ndong’ayingi” ya mameme makaka, ana besala moyo muna mpasi zayingi, Yoane wa ntumwa wavova vo “o Mwan’ememe una vana kati kwa kunda okubavungula, yo kubafila kuna nto za maza ma moyo.” (Lus. 7:9, 17) Elo, muna Luyalu lwandi Lw’ezunda dia Mvu, Kristu okwamanana fila mameme makaka, ana bewila nding’andi yo kubafila muna moyo a mvu ya mvu. (Tanga Yoane 10:16, 26-28.) Muna kuma kiaki, yambula twalanda Mfidi eto ye kwikizi kiawonso tuka wau ye muna nz’ampa ina Yave katusil’o nsilu!
Yuvu ya Lufimpu
• Adieyi kavanga o Kristu vava kayadikwa?
• Aki nani kesadilanga o Kristu ova ntoto mu fila e nkutakani?
• Mu nkia mpila Kristu wa Mfidi eto kekwizila diaka?
• O Kristu aweyi kekwamanena kutufila muna nz’ampa?
[Yuvu ya Longoka]
[Foto ina muna lukaya lwa 29]
O lufwasu lwa nza ya Satana lusonga e nkal’a Kristu