Salu kia Mpaika mu Buka Kuna Bulgária Kiatwasa Nluta

“O nsâlu wayingi, kansi nsadi mike. Dianu vo, nudodokela mfumu a nsâlu, katuma nsadi muna nsâlu andi.” —MAT. 9:37, 38.

E MVOVO miami mia Yesu mialungana kikilu kuna Bulgária, nsi yambote ina kuna sude ya Europa. Asadi ayingi bavwil’o mfunu mu samuna nsangu zambote kwa vioka mazunda nsambwadi ma wantu. Tezo 1.700 z’ateleki bena kuna Bulgária, kansi ke bafwana ko mu sila umbangi muna zunga kiawonso. Muna kuma kiaki, Buka kia Selo Yambuta basikidisa vo mboka yavewa kwa Mbangi za Yave bevovanga e ndinga Búlgaro, bezingilanga muna nsi zayingi za Europa mu kwenda yikama e salu kia mpaika mu buka kiasalwa mu mvu wa 2009. E salu kiaki kiavangama mu kolo kia tumingu nsambwadi muna nsungi a mbangala yo fokoka muna Lukutakanu lwa Mvivu lwakala kuna mbanza Sófia, kina kia 14-16 kia ngonde ya Agositu, 2009, lwakala yo ntu a diambu vo, “Nuyingila!”

Mpangi Zayingi Batambulwila e Mboka

Ampangi za vula kuna Sófia ke bazaya ko kana vo vekala ye mpangi za França, Alemanha, Grécia, Itália, Polônia ye Espanha betambulwila e mboka yayi. Kadi ediadi diavavanga vo basadila mavwa mau mu kwenda kuna Bulgária yo sadila lumbu yau ya vundu muna salu kia umbangi. Ekwe kiese bakala kiau mu mona tezo kia mpangi 292 batambulwila e mboka! Wau vo ndonga yayiza, ediadi diasadisa ampangi mu kubafila mu mbanza tatu za nsi a Bulgária: Kazanlak, Sandanski, ye Silistra. Akengi a zunga kuna Bulgária bakasakesa aviti a nzila ye ateleki kimana yau mpe bayikama e salu kiaki. Tezo kia mpangi 382 bayivana kuna mvevo mu sila umbangi muna zunga ina ke yalweke nsangu zambote ko.

Ampangi muna nkutakani zakala lukufi ye mbanza zazi bafilwa mu kwenda kubika e fulu belwakila ampangi. Bavava masuku ye fulu muna hotel ke zilombanga nzimbu zayingi ko. Ampangi awaya basala kwayingi kimana e nzenza bakala ye fulu kia lwakila yo lungisa e nsatu zau. Muna mbanza zazi zau tatu, ampangi bavava e fulu ya tukutakanu ina balenda futila. Bavang’e nkubika kimana mpangi batuka mu nsi zakaka bafilanga tukutakanu. Diakiese diakala mu mona 50 m’ateleki bakutakananga muna kembelela Yave mu fulu ina ke yazingilanga Mbangi za Yave ko.

Ampangi batuka muna nsi zakaka bayivana kwayingi muna salu kia mpaika muna buka. Muna nsungi a mbangala, kuna Bulgária o mwini ulenda lwaka yamu tezo kia 40°C. Kansi, ediadi ke diakulula vema kwau ko. E mbanza Silistra, ina vana ndambu a nkoko a Danúbio ina ye tezo kia 50.000 ma wantu, yasilwa umbangi una ufwene mu tumingu tatu twantete. I bosi, ampangi bayenda sila mpe umbangi muna mavata mena vana ndambu a mbanza yayi, yo lwaka kuna Tutrakan, tezo kia 55 dia kilometa kuna weste ya Silistra. Bayantikanga e salu kia umbangi muna ola ya 9:30 mu mene. Bavaulanga e ntangwa mu dia madia ma mwini, i bosi bakwamanananga muna salu kiau yamu ola ya 19:00 yovo vioka. Muna kuma kia vema kwa mpangi zazi, e salu kia mpaika mu buka kuna mbanza Kazanlak ye Sandanski kialwaka mpe muna mavata ye mbanza zina lukufi ye mbanza zazi.

 Nkia Nluta Diatwasa?

Ampangi basila umbangi una ufwene muna tumingu nsambwadi. Nze una wavovwa muna lumbu y’antumwa, o wantu a mbanza zazi mpe bafwana vova vo, ‘nuvwidi zadisa e mbanza zeto y’elongi dieno.’ (Mav. 5:28) Awana bayivana mu salu kiaki, bakaya tezo kia 50.000 ma yinkanda-nkanda yo yantika longoka Nkand’a Nzambi yo wantu 482. Kina kia 1 kia ngonde a Setemba, 2009, nkutakani mosi yavangama kuna mbanza Silistra. Vena mpe ye buka kuna mbanza Kazanlak ye Sandanski. Dialukasakeso mu mona lunungunuku lwa mwanda lw’awana bawá nsangu zambote mu nkumbu antete vava kiasalwa salu kia mpaika mu buka.

Muna lumingu lwantete lwa salu kiaki, mpangi mosi ankento una vo mviti a nzil’a espesiale, watuka kuna Espanha, ovovanga ndinga Búlgaro wasila umbangi kwa Karina, mwisi Silistra watekanga zulunalu muna nzila. Karina wasonga luzolo lwambote yo kwenda kuna lukutakanu. Vana vau watambulwila elongi dia Nkand’a Nzambi. Wau vo nkaz’andi kekwikilanga mu Nzambi ko, walomba vo elongi dia Nkand’a Nzambi diavangamenanga kuna fulu kia nsaka (parque). Walongokanga Nkand’a Nzambi kumosi yo wan’andi wole amakento. Ona wambuta una ye nkumbu a Daniela, watoma yangalela e ludi kia Nkand’a Nzambi. Muna lumingu lumosi, watanga Nkand’a Nzambi Adieyi Kieleka Kelonganga? yo sadila vana vau dina Nkand’a Nzambi kelonganga mu kuma kia lembi sadila e teke muna nsambila. I bosi, wayantika zayisa e ludi kw’akundi andi. Tumingu tatu kaka twavioka tuka kayantikila kwenda mu tukutakanu, wayuvula mpangi ankento ona walongokanga yandi vo: “Nzolele vo yakituka nze ngeye. Adieyi mfwete vanga kimana yayantika sila umbangi?” Daniela kumosi yo ngudi andi yo mbunzi andi ankento, bakinu nungunuka muna mwanda yamu wau.

Kuna mbanza Kazanlak, mpangi mosi eyakala una ye nkumbu Orlin wa mwisi Bulgária, watuka kuna Itália yo kwenda yikama e salu kia mpaika mu buka, wavutuka kuna nzo vava kafokola e salu kia umbangi. Muna nzila, Orlin wasila matoko mole umbangi ana bakala bavwanda vana kunda ya fulu kia nsaka. Wabavana o Nkand’a Nzambi Adieyi Kieleka Kelonganga? yo wizana kimana kabavutukila muna lumbu kilanda. Vava kabavutukila, Orlin wayantika longoka Nkand’a Nzambi yo Svetomir, ona wakwamanana longoka muna lumbu kialanda. Muna lumbu vwa, Orlin walongoka yo Svetomir nkumbu nana. Svetomir wavova vo: “Vitila lumbu yole una ke twamonanene ko, yasamba kwa Nzambi kansadisa kimana yanzaya. Yasia o nsilu vo, kele vo Nzambi unsadisi, iyekola e zingu kiame kwa yandi.” Vava Orlin kavutuka kuna Itália, mpangi mosi ozingilanga kuna Bulgária wakwamanana  longoka yo Svetomir, yamu wau wakinu nungunuka muna mwanda.

Nsambu Bavwa Awana Bayivana Kuna Mvevo

Aweyi bamona awana basadila mavwa ye lumbu yau ya vundu mu kwenda samuna e nsangu zambote ku nsi yakaka? Nkuluntu mosi kuna Espanha wasoneka vo: “E salu kia mpaika mu buka kiawokesa e ngwizani vana vena mpangi za Bulgária ye za Espanha. E salu kiaki nsambu zayingi kiatwasa kw’ampangi ana bayivana.” Mpangi mosi yo nkaz’andi batuka kuna Itália basoneka vo: “Eyayi i ngonde isundidi o mfunu muna zingu kieto.” Bakudikila vo: “E salu kia mpaika mu buka kiasoba e zingu kieto. E kiwuntu kieto kiasoba.” Akazi awaya bayantika yindula kana vo balenda kwenda zingila emvimba kuna Bulgária mu sadila kuna kuvwilu ateleki ayingi o mfunu. Carina una vo mpumpa ye mviti a nzila a ngonde ke ngonde watuka kuna Espanha, wayenda yikama salu kia mpaika mu buka kuna mbanza Silistra. Wayambula e salu kiandi kuna Espanha yo kwenda zingila kuna Bulgária mu yikama e nkutakani ampa muna mbanza yayi. Walunda nzimbu zafwana mu zingila kuna Bulgária mu mvu mosi. Carina wavova mu kuma kia nzengo zandi vo: “Kiese kiayingi ngina kiau wau vo Yave wayambula vo ngiza kunsadila ku nsi a Bulgária. Ngina ye vuvu vo kolo kiayingi ikala mu nsi yayi. Alongoki a Nkand’a Nzambi tanu kala ngina yau, atatu muna yau bekwendanga mu tukutakanu.”

Mpangi mosi ankento kuna Itália wakala ye luzolo lwa yikama e salu kia mpaika mu buka, kansi kakala ye lumbu ya vundu ko, kadi ke kolo ko kayantika e salu. Kuna unkabu wawonso, walomba vo bamvana nswa kenda mu ngonde mosi yo lembi tambula nzimbu, avo ke batambulwidi ndomb’andi ko, wakubama kakala mu katuka muna salu. Wasivika vava mfumu andi a salu kavova vo: “Ke diambu ko, kansi dimosi kaka ikulomba vo: Untwikila cartão postal ya nsi a Bulgária.” Mpangi ndioyo wabakula vo Yave wavana e mvutu za sambu yandi.

Stanislava, nsanga nkento ozingilanga kuna mbanza Varna, Bulgária, wasalanga e lumbu yawonso mu kompani diamfutanga nzimbu zayingi, walomba lumbu ya vundu mu yikama e salu kia mpaika mu buka muna mbanza Silistra. Vava kamona e kiese bakala kiau aviti a nzila ana bayiza samuna nsangu zambote muna nsi andi, wadila. Wayantika yindula dina kavanganga muna zingu kiandi, mu salu kiandi kia kinsuni. Vioka tumingu tole wavutuka kuna nzo, wakatuka muna salu yo kituka se mviti a nzila a ngonde ke ngonde. Owau una ye kiese kiayingi kia yindulanga Nsemi andi muna kileke kiandi.—Kim. 12:1.

Kieleka, o kala yo vema muna salu kia Yave nsambu ditwasanga. E diambu disundidi o mfunu olenda vanga i sadila e ntangwa ye ngolo zaku muna salu kisundidi o mfunu, kia longa ye samuna e nsangu zambote. Nga vena ye diambu olenda vanga mu wokesa salu kiaku kia umbangi eki kivuluza mioyo mia wantu? Dilenda kala vo muna nsi aku muna ye zunga ivwidi asadi ayingi o mfunu. Nga olenda kwenda sadila mu zunga yayi? Olenda longoka ndinga yakaka mu sadisa wantu muna nsi aku ana bena ye vwina dia ludi kia Nkand’a Nzambi. Konso nkubika ovanga mu wokesa salu kiaku kia umbangi, kala ye ziku vo Yave okusambula.—Nga. 10:22.

[Babu/​Foto ina muna lukaya lwa 32]

Lumbu ke Kilendi Vilakanwa Ko

Ndonga mun’awana batuka muna nsi zayingi za Europa mu kwenda yikama salu kia mpaika mu buka kuna Bulgária, bavanga e nkubika mu lungana muna Lukutakanu lwa Mvivu kuna Sófia, lwakala yo ntu a diambu vo, “Nuyingila!” Ediadi diakasakesa kikilu ampangi z’akala ye z’akento za nsi yayi mu lungana ye ulolo wa nzenza zatuka mu nsi zayingi. Ekwe kiese bakala kiau ampangi 2.039 bakala mu lukutakanu lwalu, vava mpangi Geoffrey Jackson wa mwisi Buka kia Selo Yambuta kasunzula Tradução do Novo Mundo das Escrituras Sagradas muna ndinga Búlgaro. Awonso balungana kina Kiatanu basika moko mu songa luyangalalu lwau. Ayingi muna yau badila ye kiese. E nsekola yayi yatoma kiá, isinga sadisa akwa ntima miansongi kuna Bulgária mu zaya Yave.

[Nenga kia Nsi kina muna lukaya lwa 31]

(Muna zaya una mena o mambu, tala muna nkanda)

BULGÁRIA

Silistra

Kazanlak

Sandanski

SÓFIA

[Foto ina muna lukaya lwa 31]

Basia umbangi una ufwene mu tumingu nsambwadi