“Finkanda Fikunsadisanga mu Simba Ntima mia Wantu”

PORTO ALEGRE, mbanza ina kuna sude ya Brasil, mwavangama lukutakanu lwavovela mambu ma zingu kia wantu. Mafunda ye mafunda ma wantu batuka mu nsi 135 bakala mu lukutakanu lwalu. Muna ntangw’a vunda, buka kia Mbangi za Yave muna nkutakani imosi kuna Porto Alegre bamokena y’akaka muna yau mu kubasamwina nsangu za Kintinu. Aweyi bamokenena yau?

Elizabete, wa mviti a nzila wavova vo: “Twasadila finkanda, Boas Novas Para Pessoas de Todas as Nações.” Wakudikila vo: “Ayingi muna wantu awaya ke bawidi nsangu zambote za Kintinu ko, kansi batambulwila e nsangu twabasamunwina. Twamokena ye wantu batuka kuna Bolívia, China, França, Índia, Isaele ye Nigéria. Twakala ye nkanda misasilanga Nkand’a Nzambi muna ndinga zavovanga akaka muna yau. Batoma yangalela e nkanda miami.”

Kuna México, Raúl una vo mviti a nzila, wasadila mpe finkanda fiafi yo baka nluta miambote. Mu mvu miavioka, wamokena ye yakala dimosi wa mwisi Arábia, una ye mvu 80, ona wafwila nkento ke kolo ko. Vava katanga finkanda fiasonama e nsangu za Kintinu muna ndinga Árabe, wadila ye kiese. Ekuma? E kuma kadi, Nzambi wasia nsilu vo e lufwa ke lukala diaka ko, nze una tutanganga muna Lusengomono 21:3, 4. Ediadi diasimba ntim’andi wau vo mu nding’andi a kingutukila katangila dio. Lumbu kiakaka, ekolo kasilanga umbangi ku kinsalukisa, Raúl wawanana ye muntu mosi wavovanga ndinga Kimputu. Muntu ndioyo mpe mwana kafwilwa. Raúl wanlomba vo katanga finkanda, vana lukaya lwa Kimputu. Vava kafokola o tanga, eyakala diadi wasonga luzolo lwa zaya mayingi mu kuma kia Nkand’a Nzambi yo tambulwila elongi dia Nkand’a Nzambi.

Raúl osadilanga finkanda, Boas Novas Para Pessoas de Todas as Nações mu sila umbangi muna ndinga Armênio, Chinês, Francês, Alemão, Hindi, Coreano, Mixe, Persa, Russa ye Zapoteca. Wavova vo: “Imonanga o mfunu wa sadila finkanda fiafi muna salu kia umbangi. Fikunsadisanga mu simba e ntima mia wantu kana una vo kizeye vova ndinga zau ko.”

Wau vo wantu ayingi bekangalanga ye kwenda zingila mu nsi za kinzenza, nkumbu miayingi tuwanananga ye wantu bevovanga ndinga zakaka. Tulenda kubasamunwina e nsangu za Kintinu muna sadila finkanda, Boas Novas Para Pessoas de Todas as Nações. Nga onatanga finkanda fiafi?

[Mafoto zina muna lukaya lwa 32]

Raúl ye finkanda fikunsadisanga mu simba ntima mia wantu