Sadisa Aleke Bazaya e Nkubik’a Yave

O WANA bazola longoka. Badika e yuvu bakala yau aleke a esi Isaele kuna Engipito muna fuku wa nkinzi antete a Nduta: ‘Ekuma mwan’ememe kavondelo?’ ‘Ekuma o Papa kekusilanga o menga muna tungwa kia mwelo?’ ‘Akweyi tukwendanga?’ O nkanikinu kavana Yave kwa mase ma Isaele usonganga vo wayangalela e yuvu yayi. Mu kuma kia lunda e lumbu kia Nduta, Yave wabavovesa vo: “O wan’eno vava bekunuvovesa vo, adieyi nuna diau muna nsadila yayi? Nuvova vo, i kimenga kia ndut’a Yave, ona walut’e nzo za wan’a Isaele muna Engipito, vava kawanda Angipito, kakôlele nzo zeto.” (Luv. 12:24-27) I bosi, Yave wasungamesa mase ma Isaele o mfunu wa vana e mvutu muna yuvu ya wan’au mu kuma kia “mîna ye nzengo,” zina Yave kakanikina.—Nsi. 6:20-25.

 Kieleka, Yave wazolanga vo wana bazaya e mvutu za yuvu bayuvulanga mu kuma kia nsambila. E mvutu zazi zadi kubafila mu zola Yave nze Nzambi ye Mvuluzi au. O unu, Yave diau mpe kazolele kw’aleke. Imosi muna mpila amase balenda kotesela muna ntima mia wan’au o zola muna Nzambi ye muna nkangu andi, i kubasadisa bazaya e nkubik’a Yave yo bakula e nluta ikubatwasilanga. Yambula twabadika ezaka mpila tulenda sadisila aleke mu zaya mayingi mu kuma kia nkubik’a Nzambi.

Nkutakani

Aleke bafwete toma zaya e nkutakani ina esi nzo zau bekwendanga. Muna kuma kiaki, yeno mase nufwete natanga wan’eno muna tukutakanu twawonso tw’Akristu. Muna mpila yayi nulanda dina kasikidisa Yave kwa Aneyisaele, vava kabakanikina vo: “Lungisa nkangu, akala y’akento ye yingyanangyana . . . , bawa yo longwa, bavumina Yave wa Nzambi aku, yo vis’o meso muna vanga mambu mawonso ma nsiku wau; o wan’au, ana ke bazaya ko, bawa yo longw’o vumina Yave wa Nzambi eno.”—Nsi. 31:12, 13.

Tuka muna kisedia, o wana balenda longoka Diambu dia Yave. Paulu wa ntumwa wavova mu kuma kia Timoteo vo: “Tuka muna kisedia, ozeye e sono yavelela.” (2 Tim. 3:15) Muna tukutakanu kun’Eseka dia Kintinu, kana nkutu aleke bebakulanga mana melongwanga yo kulukiana ye nkunga mia Kintinu. Muna tukutakanu belongokanga una bafwete sadila yo zitisa  Nkand’a Nzambi kumosi ye nkanda misasilanga Nkand’a Nzambi. Vana ntandu, muna tukutakanu tweto bemonanga e fu kia zola kwakieleka kiswaswanesanga alandi akieleka a Kristu. Yesu wavova vo: “Nkanikinu ampa ikunusia, nuzolaziana; e nzola inuzolele, i nuzolaziananga. Muna wau i bezayil’o wantu awonso vo nu alongoki ame, ovo nzolani nuna yau.” (Yoa. 13:34, 35) O zola yo luvuvamu lukalanga mun’Eseka dia Kintinu lutuntanga aleke yo kubasadisa mu sia tukutakanu tw’Akristu va fulu kiantete muna zingu kiau.

Vava osiang’e ngolo za lwaka kun’Eseka dia Kintinu una lukutakanu ke lwayantikidi ko yo sala mu fikolo kuna mfoko a lukutakanu, o wan’aku bekala y’elau dia vanga yikundi. Vana fulu kia kulukiana kaka ye wana akaka, ubasadisa bazayana ye mpangi z’akala ye z’akento za ntela zawonso. Avo batomene kulukiana ye ambuta, o wan’aku bebakula vo ambuta mambu mayingi bazeye ye bavwidi ngangu zayingi. Nze una Zakariya kuna nz’ankulu, ona wakala yo “umbakuzi muna mona-meso kia Nzambi” kakadila se mbandu ambote kwa nleke Uziya, wa ntinu a Yuda, o unu mpe awana besadilanga Yave ye kwikizi kiawonso se mvu miayingi bena se mbandu ambote kw’aleke. (2 Tus. 26:1, 4, 5) Ekolo nukalanga mun’Eseka dia Kintinu, olenda mpe sasila kwa wan’aku o mfunu w’elundilu dia nkanda, babu kia tuzayisu ye mambu makaka.

Nkubik’a nza Yawonso

O wana bafwete zaya vo, e nkutakani au imosi muna vioka 100.000 ma nkutakani zina mu nza yawonso. Ubasasila mambu matadidi nkubika yayi, una isadilanga ye dina wana bafwete vanga mu vana e moko muna salu kia nkubika yayi. Ubasonga una obadikilanga tukutakanu twa zunga, twa mvivu ye nkingul’a nkengi a zunga.—Tala e babu, “Mambu ma Badika Muna Fuku wa Nsambila ya esi Nzo,” lukaya lwa 28.

Vava okalanga y’elau, bokela kuna nzo aku akengi a zunga, misionario, esi Betele ye mpangi zakaka bena muna salu kia ntangwa ke ntangwa mu dila vamosi. Kuyindula ko vo ke bekala ye ntangwa ko mu mokena ye aleke. Awana bena muna salu kia ntangwa ke ntangwa besiang’e ngolo za tanginina Yesu, ona wayangalelanga o wana yo mokena yau. (Maku 10:13-16) Vava bewanga mana e selo yayi ya Yave bevovanga yo mona e kiese kiau muna salu kiavauka, o wan’aku mpe balenda kuyisila ekani dia kota muna salu kia ntangwa ke ntangwa.

Adieyi diaka balenda vanga esi nzo mu sadisa wana batoma zaya e nkubik’a Yave? Tala tuludiku twakaka tulenda kusadisa: Vanga e nkubika kimana esi nzo awonso nwalongokanga o nkanda Testemunhas de Jeová—Proclamadores do Reino de Deus. Toma sasila una e selo ya Yave basongela o vumi, lulembamu ye kwikizi. Songa una Yave kabasadila mu sayanesa nsangu zambote mu nza yawonso. Sadila e vídeo zivaikiswanga kwa nkubik’a Yave mu kubalonga mambu mamfunu ma tandu yavioka ye ma lumbu yeto. Avo dilendakana, nulenda kingula evula dia nsi eno yovo dia nsi yakaka. E nkingula yayi ilenda sadisa wan’eno mu zaya una usadilanga nkubik’a Yave eyi ifilwanga kwa buka kia ntaudi akwikizi mu vana madia ma mwanda yo luludiku kw’ampangi mu nz’amvimba nze una wavangamanga muna tandu kiantete.—Mat. 24:45-47; Mav. 15:22-31.

Sasilanga Mambu Mun’owu wa Nsatu za Konso Mwana

Vava olongang’o wan’aku, sungamenanga e mpila Yesu kalongelanga ntumwa zandi. Lumbu kimosi wabavovesa vo: “Mambu mengi aka ngina mau ma  kunusamunwina, kansi owau ke nufweno mo siamina ko.” (Yoa. 16:12) Yesu kazadisanga alongoki andi ye ulolo wa mambu ko. Kansi, wabalonganga malembe-malembe mambu mamfunu mana balenda simbinina. Diau adimosi mpe, kuzadisanga wan’aku ye mambu mayingi ko. Kele vo lumbu yawonso ubalongele mambu makete mu kuma kia nkubik’a Yave, olenda sikamesa luzolo lwau yo kala ye kiese kia longoka oma ma nkutakani y’Akristu. Ekolo wan’eno benungunukanga, olenda vutukila mana wabalonga kala yovo kudikila mambu makaka.

E nkutakani y’Akristu i nto asikila ikutusadisanga mu siamisa e ngwizani eto yo Nzambi. Aleke ana bekuyivananga muna salu ya nkutakani bekalanga batoma kubama mu zizidila ntonta za nza ya Satana. (Roma 12:2) Tuna ye vuvu vo nusolola e kiese muna sadisa wan’eno bazaya e nkubik’a Yave. Muna nsambu zandi, betatidila e nkubik’a Yave yo sikila ye kwikizi muna Nzambi anzodi ona tusadilanga.

[Babu/​Foto ina muna lukaya lwa 28]

Mambu ma Badika Muna Fuku wa Nsambila ya esi Nzo

Tala maka mambu mu kuma kia nkubik’a Yave nulenda badika muna Fuku wa Nsambila ya esi Nzo.

▪ Nubadika lusansu lwa nkutakani eno. Nkia ntangwa ye aweyi yayantikila? Nkia Maseka maswaswana ma Kintinu basadila kala? Muna moko kiaki, ekuma nulembi bokelela kuna nzo eno mpangi mosi una se mvu miayingi muna nkutakani mu vana e mvutu muna yuvu ya wan’eno?

▪ Yika ekani divangamenanga tukutakanu twaswaswana mun’eseka dia Kintinu ye tukutakanu twampwena ye una wana balenda bakila nluta muna tukutakanu twatu.

▪ Badika ekani dia sikola za mpila mu mpila zakubikwa muna nkubik’a Yave. Yika e nona isonganga e nluta miambote betambulanga awana batanga sikola zazi.

▪ Sadisa aleke bazaya o mfunu wa kituka ateleki avema a nsangu zambote. Ubasonga una balenda vanina e moko muna nsangu za salu ki’ateleki a nza yawonso zisonekwanga muna Anuário das Testemunhas de Jeová.

▪ Badika e mpila zayingi za salu kia ntangwa ke ntangwa aleke balenda sala muna nkubik’a Yave. E kapu kia 10 kia nkanda Organizados Para Fazer a Vontade de Jeová kivwidi mambu mayingi mamfunu.

▪ Sadisa aleke babakula ekuma emaka mambu mevangamenanga muna nkutakani. Ubasasila ekuma ke bafwete kadila ye fu kia kuyitumina ko muna nkubik’a Yave, kana nkutu muna mambu makete. Ubasonga una balenda lemvokela luludiku lw’akuluntu kimana mawonso muna nkutakani mavangamena mu mpila yambote.

[Foto]

O wan’aku bevwa nluta muna vanga kikundi y’awana besadilanga Yave se mvu miayingi

[Mafoto zina muna lukaya lwa 26]

Nze kuna Isaele yankulu, o unu mase bafwete siang’e ngolo za vana e mvutu zasikila vava beyuvulwanga oma ma nkubik’a Yave