‘Tuvana kwa Yave eki Tuna Kiau’

KELE vo muntu uvangidi diambu diambote, adieyi ovanganga mu songa luyangalalu lwaku? Tala una mfumu za makesa kuna Isaele bavutulwila matondo vava banwana vita y’Anemidiani. E vita yayi yanwanwa vava Aneyisaele basambila Bale-peo. Muna lusadisu lwa Nzambi, o nkangu andi wasunda e vita, esanzu diakayaneswa vana vena makesa 12.000 ye Aneyisaele akaka. Muna luludiku lwa Yave, makesa bavana ndambu esanzu diau kw’anganga, Aneyisaele akaka mpe bavana ndambu esanzu diau kw’Anelevi.—Nta. 31:1-5, 25-30.

Kansi, e mfumu za makesa ke diau kaka ko bavanga. Bavovesa Mose vo: “Antaudi zaku batangidi makesa mena mu wisa kieto, ke vakondelo muntu vava twina ko.” Muna vutula matondo kwa Yave, bavana lukau lwa wolo ye lekwa yakaka yantalu yapezanga tezo kia 190 ma kilo.—Nta. 31:49-54.

 O unu, wantu ayingi besonganga luyangalalu lwau muna wete kekubavanganga o Yave. Kansi, ke selo ya Nzambi kaka ko bevutulanga matondo. Badika nona kia muntu mosi wanatanga ampangi kuna lukutakanu lwa nsi zayingi kuna mbanza Bologna, Itália, muna mvu wa 2009. Wau vo nlembami kakala ye watoma diatisa ekalu, ampangi ana kanata bansonekena finkanda mu kumvutula matondo yo kunkudikila e nzimbu kumosi yo Nkand’a Nzambi Adieyi Kieleka Kelonganga? Kansi, muntu ndioyo wavova vo: “Ngyangalele mu kuma kia nkanda nunsonekene kumosi ye Nkand’a Nzambi Adieyi Kieleka Kelonganga? kansi, inuvutulwidi e nzimbu nunkudikidi, kadi mvene zo se lukau kimana nwakwamanana sala e salu kieno. Kana una vo ki Mbangi a Yave ko, nzolele vana lukau lwalu, kadi mbwene vo mu zola nusadilanga e salu kieno.”

Kele vo oyangalelanga dina Yave kevanganga mu kuma kiaku, imosi muna mpila olenda songela luyangalalu lwalu i mu vananga tukau mu yikama e salu kia Mbangi za Yave mu nza yawonso. (Mat. 24:14) Mu zaya mpila olenda wo vangila, tala e kunku kina ye ntu a diambu vo, “Vava Ntim’eto Ukutufilanga mu Vana Kina Tulenda.”

[Mvovo mia Fwaniswa mina muna lukaya lwa 20]

Vava Ntim’eto Ukutufilanga Mu Vana Kina Tulenda

Akete kaka muna Mbangi za Yave bena ye mavwa mayingi, kansi ulolo bemonanga e mpasi za kondwa e nzimbu. Kansi, avo se vana lukau lwamvevo mu nungununa salu kia Kintinu, kana nkutu lwakete, kufwete banza ko vo ka luna mfunu ko. Vava Yesu kamona nkento anson’ansukami watuba mbiya zole muna lundilwa kia nzimbu muna tempelo, kamveza ko. Kansi, wavova vo: “Kieleka inusamunwini vo, o nkento ndioyu anson’ansukami otubidi ntuba iviokele awonso; kadi awowo muna nsavu au i batubìdi muna mwina tukau: vo i yandi, muna usukami wandi i katubìdi vumu kiandi kiawonso.” (Luka 21:1-4) Kanele vo lukau lwandi lwakete lwakala, wavana kina kalenda.

Muna lenda vana lukau, konso muntu, konso nzo yovo konso nkutakani, divavanga vo bateka kubama. Vava Akristu a esi Korinto bazola sadisa mpangi zau bakala mu mpasi kuna Yuda, Paulu wa ntumwa wabavana luludiku lwamfunu luna bafwete landa. Wasoneka vo: ‘Vo i diambu dia ngonzekel’aveledi, wauna yakanikina mabundu ma Ngalatia, oyeno mpe i nuvanga una. Muna lumbu kiantete kia lumingu, konso muntu muna nzo andi, kafwete kilundila, muna mbaku andi, ke vakala ngonzekela vava ikwiza.’—1 Kor. 16:1, 2.

Nze una muntu kelundilanga nzimbu mu kuma kia diambu dilenda bwa ku kinsalukisa, i una mpe konso Mbangi a Yave yovo konso nzo yovo nkutakani balenda lundanga konso kina balenda mu vana lukau mu nungununa nsambil’aludi. Muna kuma kiaki, e nkutakani zawonso konso ntangwa zivananga tukau mu nungununa salu kia Kintinu. Bevanganga wo muna teka kubama yo wizana una bafwete wo vangila. Akwa ntima miamvevo ana beyangalelanga nsangu zambote, bevananga mpe tukau twau mu yikama e salu kiaki kisalwanga mu nza yawonso. Tukau twatu twamvevo tuwokesanga luyangalalu ye kiese kiau mu zaya vo bevananga kina balenda.

Evula difilanga e nkand’a matondo mu zayisa vo lukau lwau lutambukidi.

Tukau twawonso tufilwanga kuna Vula, tuyangalelwanga yo sadilwa mu salu kia samun’e nsangu zambote za Kintinu kia Nzambi. Kasikil’owu, tukau twatu tusadilwanga mu kubika e nzo ye salu kia misionario muna nsi zayingi. Tusadilwanga mpe mu lunga-lunga yovo sumba sadilwa inietekanga e nkanda ye má yakaka. Tukau twatu tusadisanga mpe akengi a zunga ye a mvivu mu kingula nkutakani z’Akristu mu nza yawonso yo kubakasakesa muna mwanda. (Roma 1:11, 12) Akaka mpe bena mu salu kia ntangwa ke ntangwa bebakanga filusadisu mu tukau twatu.

Akristu antete ana bayikama nsambil’aludi batambula nsambu, kadi bakembelela Yave muna mavwa mau. Ekwe nsambu bakala zau! Yeto mpe nsambu zayingi tuvwa avo tuyikama e salu kia Kintinu mu mpila yayi. Muna kuma kiaki, yambula twakala yo nyindu ambote vava ntim’eto ukutufilanga mu vana konso kina tulenda.

Konso muntu, konso nzo yovo konso nkutakani izolele vana lukau, lenda lo fila kun’evula dia Mbangi za Yave, Rua Talatona n.o1—Luanda Sul, Caixa Postal 6877 Luanda-Angola