Yave Owanga e Kazu kia Awana Babudik’e Ntima

NZE una Solomo wa Ntinu angangu kuna Isaele yankulu kamona, “e kolo ye mambu ma kinsalukisa mebwilanga [yeto] awonso.” (Kim. 9:11) Tulenda bwilwa diambu diampasi dilenda tokanesa zingu kieto. Muna bong’e nona, o lufwa lwakinsalukisa lwa yitu kieto tutoma zolanga, lulenda tokanesa e ngindu zeto. Muna tumingu ye ngonde zilanda, tulenda mona ntantu yo dimbula e vuvu. O muntu nanga ke zayanga diaka dina kalenda vanga ko yo yindula vo kafwana finama Yave ko muna sambu.

Muna ntangwa yayi, o muntu ovavanga vo kakasakeswa, kasongwa o zola yo vuwa o mfunu. Davidi wa ntozi a nkunga wayimbila vo: “O Yave osikin’awonso bebwa. Yo vumbul’ana bavetekelo.” (Nku. 145:14) O Nkand’a Nzambi ukutuzayisanga vo “meso ma Yave mekwendanga ya kuku ya kuna ova nza yawonso kakumama muna diambu di’awana bena yo ntim’asikila oku kena.” (2 Tus. 16:9) Yave osadisanga ‘nkwa mwand’akosomoka yo mwand’a anlembami, kavutula mwand’a nlembami, kavutula ntima mi’awana bakosomoka.’ (Yes. 57:15) Yave aweyi kesadisilanga yo kumika akwa mwand’akosomoka y’awana babudik’e ntima?

“E Diambu Muna Ntangw’andi”

E kintwadi kia wan’angudi mu nz’amvimba i mosi muna mpila ina Yave kevaninanga lusadisu muna ntangw’andi. Akristu bewondelelwanga ‘bakasakes’akwa ntima mia wonga.’ (1 Tes. 5:14) E mvovo mia lukasakeso yo zola besonganga mpangi zeto kulenda kumika muntu muna ntangw’a mpasi ye ntantu. O sadila e mvovo mia lufiaulwisu kana nkutu vava tukalanga ye moko kiankufi, dilenda kumika muntu wakendalala. E mvovo miami milenda tuka kwa muntu wabwilwa kala diambu diau adimosi. Milenda mpe tuka kwa nkundi wazikuka ona wabwilwa kala mambu mayingi muna zingu. Muna lusadisu lwa mpangi zeto, Yave olenda kumika ona wabudik’e ntima.

Badika e diambu diabwila Alex una vo nkuluntu ye wasompa, kansi kuna kinsalukisa o nkento andi wafwa mu kimbevo kilembi sasukanga. Nkengi a zunga mosi wasadila mvovo mialufiaulwisu vava kamokena yo Alex. Oyandi mpe wafwilwa o nkento, kansi wasompa diaka. O nkengi a zunga ndioyo wavova una e ngindu zandi zantokanesenanga. E ngindu zandi zavuvamanga vava kakalanga kumosi y’akaka muna salu kia umbangi ye muna tukutakanu. Kansi, vava kakotanga muna suku diandi yo kanga kielo,  wamonanga kinsona kiasaka. Alex wavova vo: “Yafiaulwiswa kikilu mu zaya vo vena mpe ye wantu akaka bamona kala e mpasi zina imonanga.” Dialudi vo “e diambu muna ntangw’andi,” dilenda vana lufiaulwisu yo sadisa muna ntangw’a mpasi.—Nga. 15:23.

Nkuluntu wakaka ona ozeye wantu ayingi bafwilwa kala akazi au, wayenda mokena yo Alex muna kumfiaulwisa. Wayisia vana fulu kiandi yo kunsungamesa kuna zola kwawonso vo Yave ozeye una tumonanga ye dina tuvwidi o mfunu. O mpangi wavova mpe vo: “Ekolo ngonde ye mvu miviokanga, avo nkento ovwidi mfunu olenda sompa diaka, eyayi i nkubika isonganga o zola kwa Yave.” Dialudi vo ke awonso ko befwilwanga akento i bezolanga diaka sompa. Kansi, vava kayindula e mvovo mia mpangi ndioyo, Alex wavova vo: “O sungameswa vo o sompa diaka i nkubik’a Yave, dilenda sadisa muntu kakatula konso ngindu zalembi songa za sia vo kele vo sompele diaka dilenda songa kondwa kwa kwikizi kwa nkaz’andi wafwa yovo kwa nkubik’a Yave mu kuma kia longo.”—1 Kor. 7:8, 9, 39.

Davidi wa ntozi a nkunga ona wawanana ye mpasi zayingi, wavova vo: “O meso ma Yave mun’asongi mena, o matu mandi muna kazu kiau.” (Nku. 34:15) Dialudi vo, Yave olenda wa kazu kia ndiona wabudik’e ntima yo vanina kio mvutu muna ntangw’andi muna sadila mpangi z’Akristu zazikuka ana balenda sadila e mvovo mia ngemba muna kumfiaulwisa. E nkubika yayi yamfunu kikilu.

Lusadisu Lutukanga Muna Tukutakanu tw’Akristu

O muntu wakendalala olenda kala ye ngindu zalembi songa ezi zilenda kumfila mu kuyivaula y’akaka. Kansi, muna Ngana 18:1 tutanganga vo: “On’okuvaula, i diandi’keto kevava, ofulutilanga ngangu zavimpi zawonso.” Alex wavova vo: “Vava muntu kefwilwanga o nkaz’andi, o ntim’andi uzalanga ye ngindu zalembi songa.” Alex wasungamena e yuvu kakiyuvulanga: “‘Nga vena ye diambu kialungisa ko? Nga kiansonganga zola kwafwana ko?’ Kiazola kala mono mosi ko. Kiazola kala mpumpa ko. Diampasi  kikilu dikalanga muna lembi yindula mambu mama kadi konso lumbu osungamena vo, ngeye mosi kaka una.”

Vana ntandu, o muntu wakosomoka muna mwanda akundi ambote kavwidi o mfunu. Olenda kubasolola muna tukutakanu tw’Akristu. Muna tukutakanu twatu, tuwanga diambu dia Nzambi dikutukumikanga.

O tukutakanu tw’Akristu tukutusadisanga mu kala ye ngindu zasikila mu kuma kia mpasi zeto. Ekolo tuwanga yo badika e sono ya Nkand’a Nzambi, tulenda sia e sungididi kieto mu mambu mole mamfunu—tundidika kimfumu kia Yave yo velelesa e nkumbu andi, vana fulu kia sia sungididi muna mpasi za yeto kibeni. Vana ntandu, ekolo tutambulanga malongi ma mwanda, tukumikwanga mu zaya vo kana nkutu vo akaka ke bazeye mpasi tumonanga ko yovo ke bebakulanga zo ko, Yave ozeye ye obakulanga mpasi zeto. Yandi ozeye wo vo, “muna mpasi za ntima o moyo utolokela.” (Nga. 15:13) O Nzambi aludi ozolele kutusadisa, ediadi dikutuvananga vuvu yo kutukumika.—Nku. 27:14.

Vava kamweswanga e mpasi kw’atantu andi, Davidi wa Ntinu waboka kwa Nzambi oku vo: “O mwand’ame uyoyele omo mono; o ntim’ame utungamene.” (Nku. 143:4) Nkumbu miayingi e mpasi ziyoyesanga muntu muna nitu ye ngindu yo kendeleka ntim’andi. E mpasi zazi zilenda kala mayela yovo mpasi zakaka. Tulenda kala ye vuvu vo Yave okutusadisa mu zizidila e mpasi zazi. (Nku. 41:1-3) Wau vo o unu Nzambi ke kutuwukanga mu mpil’esivi ko, okutuvananga ngangu ye nkuma tuvwidi o mfunu muna zizidila e mpasi zeto. Sungamena dio vo vava Davidi kamonanga e mpasi walombanga lusadisu kwa Yave. Wavova vo: “Nyindula lumbu ya nz’ankulu; mvunguta mavangu maku mawonso: Mbalula salu kia moko maku.”—Nku. 143:5.

Wau vo e mvovo miami miavumunwinwa miasonama muna Diambu dia Nzambi, ediadi disonganga vo Yave obakulanga ngindu zeto. E mvovo miami mikutusonganga mpe ziku vo Yave owanga e ndomba zeto. Avo tutambulwila lusadisu lwa Yave, ‘yandi kibeni okutusikina.’—Nku. 55:22.

“Nukwaminin’o Samba”

Muna Yakobo 4:8 tutanganga vo: “Nufinama Nzambi, oyandi mpe okunufinama.” E sambu, imosi muna mpila tulenda finamena Nzambi. Paulu wa ntumwa watukasakesa vo: “Nukwaminin’o samba.” (1 Tes. 5:17) Kana nkutu vo ka tulendanga vova mpasi zeto ko muna sambu, “o mwanda, yandi kibeni, okutudodokelelelanga ye bumu ilembi tatukana.” (Roma 8:26, 27) Kieleka, Yave obakulanga ngindu zeto.

Monika una ye ngwizani ambote yo Yave wavova vo: “Muna lusadisu lwa sambu, tanga Nkand’a Nzambi y’elongi dia mono kibeni, yamona vo Yave wakituka se Nkundi ame kikilu. Imonanga una kekunsadisilanga muna zingu kiame. Dia lufiaulwisu kikilu mu zaya vo kana nkutu vava kilendanga kumvovesa dina dikuntokanesanga ko, Yave okumbakulanga. Nzeye wo vo o wete ye nsambu zandi ke zina nsuka ko.”

Muna mambu mawonso, tufwete tambulwilanga e mvovo mia zola ye lufiaulwisu mia mpangi zeto. Tufwete sadilanga malongi ye lulukisu tuwanga muna tukutakanu tw’Akristu muna kumika lukwikilu lweto yo zayisa kwa Yave muna sambu konso diambu dina muna ntim’eto. E nkubika yayi i mpila ina Yave kesongelanga vo okutulunga-lunganga. Alex wayika diambu dina diambwila vava kavova vo: “Avo tusia e ngolo mu sadila mawonso kekubikanga o Yave kimana twakumama muna mwanda, tukala yo ‘ulolo wa nkuma’ mu zizidila konso mpasi zilenda kutubwila.”—2 Kor. 4:7.

[Mvovo mia Fwaniswa mina muna lukaya lwa 17]

“E diambu muna ntangw’andi” dilenda fiaulwisa muntu muna ntangw’ampasi

[Mvovo mia Fwaniswa mina muna lukaya lwa 18]

Lufiaulwisu Kw’awana Babudik’e Ntima

O nkanda nkunga wazala ye mvovo misonganga ntantu za wantu ye ziku isonganga vo Yave owanga kazu ki’awana babudik’e ntima. Badika e mvovo milende:

“Muna mpasi zame yabokela kwa Yave, kwa Nzambi ame yatâtila: Wawa nding’ame muna tempelo, e kazu kiame kialuaka mu matu mandi.”—Nku. 18:6.

“O Yave ofinamene awana babudik’e ntima, ovuluzang’awana bakendalala.”—Nku. 34:18.

“[Yave] osasul’abudikw’a ntima, yo kanga ndwadi zau.”—Nku. 147:3.