Yuvu Y’atangi

Yesu wavovesa awana bawanga malongi mandi vo: “Nufwete kala nwalunga nze una o S’eno kun’ezulu kena walunga.” Aweyi wantu balenda kadila “balunga” o unu?—Mat. 5:48, NW.

Muna vana e mvutu za kiuvu kiaki, diambote twateka bakula e mpila o mvovo “lunga” usadilwanga muna Nkand’a Nzambi. E mvovo “lunga” ke ntangwa zawonso ko usadilwanga mu Nkand’a Nzambi mu yika lekwa kialunga muna mawonso. Kieleka, Yave walunga muna mawonso. Kansi, o wantu yovo lekwa ke ilendi kala yalunga ko muna mawonso. E mvovo wa Kiyibere ye Kingerekia wasekolwa muna Nkand’a Nzambi vo “lunga,” nkumbu miayingi una ye nsasa vo “wamvimba,” “wazikuka” yovo “kondwa tumbu” mun’owu wa nkanikinu miasikidiswa kwa ndiona una ye wisa.

Adami yo Eva balunga bakala muna ngindu, muna mwanda ye muna nitu. Balunga kikilu bakala mun’owu wa nsiku miasikidisa Mvangi au. Kansi, mu kuma kia ukolami wau, ke balemvokela nsiku mia mvangi au ko. Muna kuma kiaki, ke bakala diaka alunga ko kumosi yo wan’au. Mu kuma ki’esumu dia Adami, usumuki yo lufwa lwasambukila wantu.—Roma 5:12.

Mun’elongi diandi vana Mongo, Yesu wavova vo kana nkutu wantu alembi lunga balenda kwau kala balunga mu maka mambu. Mun’elongi diadi, Yesu wasonga vo o zola i fu kilenda sadisa muntu mu kala walunga yovo wamvimba. O zola kwaku i kesonganga o Nzambi kwa wantu. Yesu wavova vo: “Nuzol’atantu eno, nubasambil’ana bekunubangika; nwakala nu wan’Es’eno wina kun’ezulu: e kuma kadi, odungumunanga ntangw’andi vana vena wantu ambi yo wantu ambote, yo nokesanga mvula vana ven’asongi, y’ana balembi songa.” (Matai 5:44, 45) Muna songanga o zola kwa mpila yayi, alongoki a Yesu badi tanginina e mbandu a Nzambi yakala walunga.

O unu, Mbangi za Yave mu nz’amvimba betatidilanga e nkanikinu wau wa songa o zola kwa muntu yo kw’akaka. Besonganga luzolo lwa sadisa wantu a makanda ye nsambila za mpila mu mpila bazaya e ludi kia Nkand’a Nzambi. Muna 236 dia nsi, Mbangi za Yave belongokanga o Nkand’a Nzambi ye 7.000.000 ma wantu ana besonganga luzolo lwambote.

Yesu wayuvula vo: “Ovo nuzolele ana banuzolele, nkia nsendo nuna wau? Akwa mpaku nkutu, ke wau bevanga ko e? Ovo nukayisa mpangi zeno kaka, nkia nduta nulut’akaka? a nzenza nkutu, ke wau bevanganga ko e?” (Mat. 5:46, 47) Akristu akieleka ke besianga mpambula ko vana vena wantu a nsi zaswaswana ye ke besonganga kaka zola kw’awana bekubazolanga ko. Kansi, besadisanga asukami, mbevo, aleke ye anunu. Muna vanga wau, Akristu balenda tanginina zola kwa Yave yo kala alunga muna maka mambu.

Nga tusinga kituka se wantu alunga nze una Adami kakala una kasumukini ko? Elo, muna lusadisu lwa kimenga kia lukûlu lwa Yesu, akwa kwikizi balenda kituka se alunga muna Luyalu lwa Kristu lw’Ezunda dia Mvu, vava ‘mwan’a Nzambi kefwasa mavangu mawonso ma Nkadi Ampemba.’—1 Yoa. 3:8.