Adieyi Mwan’aku Kevova?

MASE: Mun’Eyingidilu dia 15 Yanuali, 2010, lukaya lwa 16-20, twakasakesa mase mu vanganga nsongesela yo wan’au. Elongi diadi dina ye tuludiku tulenda kunusadisa mu longa wan’eno una balenda sundila ntonta kuna sikola. Nulenda vanga nsongesela zazi muna Fuku wa Nsambila ya Esi Nzo.

ALEKE bena vo Mbangi za Yave ntonta zayingi bewanananga zau. Nkumbu miayingi akundi au a sikola bekubayuvulanga ekuma balembi kundilang’e sinsu kia nsi, kembela lumbu kia luwutuku ye nkinzi miakaka. Avo mwan’aku eyakala yovo ankento banyuvwidi yuvu yayi, nkia mvutu kevana?

Aleke akaka Akristu edi kaka bevovanga: “Kilendi wo vanga ko. Simwa disimwanga muna bundu dieto.” Aleke awaya bafwana sanisinwa muna unkabu wau. E mvutu zau zilenda vengesa yuvu yakaka. Kansi, Nkand’a Nzambi ukutuvovesanga vo ‘twakubama kak’o vana mvutwilu kwa konso on’okutuyuvul’e kuma’ kia lukwikilu lweto. (1 Pet. 3:15) O vanga wo mayingi divavanga, ke vova kaka ko vo “Kilendi wo vanga ko.” Kana nkutu vo akaka ke batambulwidi ko, vekala y’awana bebakula vo kuma kiasikila tuna kiau mu bak’e nzengo zazi.

Aleke ayingi bena vo Mbangi za Yave, bezayisanga tusansu twa Nkand’a Nzambi kw’akundi au a sikola muna sadila nkanda nze Aprenda do Grande Instrutor. Tusansu twatu tulenda sadisa mu sasila ekuma aleke akaka Ambangi za Yave bevangilanga yovo lembi vanga diambu kingandi. Alongoki akaka betoma sianga sungididi muna tusansu twa Nkand’a Nzambi. Ayingi beyantikanga longoka Nkand’a Nzambi muna mpila yayi. Kansi, dilenda kala diampasi kw’alongoki akaka mu wá lusansu lwawonso lwa Nkand’a Nzambi. Tusansu twakaka twa Nkand’a Nzambi tulenda kala twampasi mu bakula kele vo ke tutomene sasilwa ko. Vava nkundi andi kambokela kenda kuna nkinzi a luwutuku, Minhee una ye kimbuta kia mvu 11, wavova kwa nkundi andi vo: “Nkand’a Nzambi ke ukutuvovesanga ko vo twakembela nkinzi mia luwutuku. Yoane wa Mvubi, oyikwanga muna Nkand’a Nzambi, ku nkinzi a luwutuku kavondelwa.” Kansi, Minhee osungamenanga vo nkundi andi kabakula ko e mvutu kamvana.

Ezak’e ntangwa, dilenda kala diambote mu songa fwaniswa kwa nlongoki yovo lusansu luna muna nkanda mieto. Adieyi tuvova kele vo ayadi bavovele vo aleke ke bafwete songa nkanda mia mabundu ko kw’akundi au a sikola? Nga aleke eto balenda toma sia umbangi kana nkutu ke bena ye nkanda ko? Aweyi olenda sadisila wan’aku mu songa e kuma kia lukwikilu lwau?

Nuvanganga Nsongesela

Dia lusadisu mu vanganga nsongesela kuna nzo, amase bakalanga vana fulu ki’akundi a sikola. Vava wana besianga ngolo za tanina lukwikilu lwau, mase bafwete kubasanisinanga yo kubasonga una balenda tomesena  mvutu zau ye kuma dinina o mfunu. Kasikil’owu, ubazayisa basadilanga e mvovo mina akundi a ntel’au balenda bakula. Joshua, nleke una ye mvu vwa, wavova vo akundi andi a sikola ke bebakulanga ko e mvovo nze “ntona” yovo “kwikizi.” Muna kuma kiaki, osadilanga mvovo mialeboka mu mokena yau.—1 Kor. 14:9.

Wana ayingi a sikola ana bezolanga yuvula yuvu balenda vidisa luzolo lwa wá kele vo baveno e mvutu zandá. Kele vo bakoteso muna moko yo kubasadisa babakula, aleke Ambangi za Yave balenda sadisa akundi mu kala y’etima dia wá. Haneul, dumbelele kia mvu kumi, wavova vo: “Akundi ame a sikola mokena bezolanga, ke kubazayisa mambu mayingi ko.” Muna mokena yo muntu, yuvulanga yuvu yo toma wunikina dina kevovanga.

E mbokena zina va yanda zisonga una aleke Akristu balenda mokenena y’akundi au a sikola. Ke dina mfunu ko mu lunda e mvovo miami muna ntu. Ke vena aleke wole bafwanana ko. Vena mpe ye mambu mayingi malenda swaswanesa mvutu zau. Muna kuma kiaki, nleke una vo Mbangi a Yave kafwete simba mbuta  diambu, vovela dio muna mvovo mia yandi kibeni yo zaya una kalenda dio vovela kwa konso nkundi a sikola. Avo wan’aku mu sikola bena, vavanga vanga nsongesela za mbokena zazi.

Ntangwa ye ngolo divavanga muna longa wana. Mase m’Akristu bafwete kotesanga nkanikinu mia Nkand’a Nzambi muna ntima mia wan’au yo kubakwikidisa o mfunu wa zingila ngwizani ye nkanikinu miami.—Nsi. 6:7; 2 Tim. 3:14.

Muna Fuku wa Nsambila ya Esi Nzo, vanga e nsongesela za mbokena tuyikidi yo wan’aku. Ubasonga o mfunu wa mbokena zazi. Sungamena vo ekani dia nsongesela zazi ke lunda e mvutu yovo mvovo miawonso ko muna ntu. Ezak’e ntangwa, olenda vanga nsongesela zole muna diambu dimosi, yo vana mvutu zaswaswana yo zaya dina wan’aku bevanina e mvutu. Ekolo bevavanga sasila e ziku kia mana bekwikilanga, ubasadisa mu wokesa umbakuzi wau ye ndekwa. Muna mpila yayi, olonga wan’aku una balenda songela e kuma kia dina bekwikilanga kw’akundi a sikola, esi belo ye kw’alongi au.

[Foto ina muna lukaya lwa 3]

“Ekuma kuyimbidilanga nkunga wa nsi ko?”

[Foto]

“Kiambote kiaku e João. Nzolele vo wakala kuna nkinzi a luwutuku lwame”

[Babu/​Mafoto zina muna lukaya lwa 4]

NKINZI MIA LUWUTUKU

Maria: Kiambote kiaku e João. Nzolele vo wakala kuna nkinzi a luwutuku lwame.

João: E Maria ntondele muna kumbokela kuna nkinzi aku. Nga olenda kunzayisa ekuma ovangila o nkinzi a luwutuku lwaku?

Maria: Muna kembela e lumbu kina yawutuka. Nga ongeye kukembelanga lumbu kiaku kia luwutuku ko?

João: Ve, kikembelanga kio ko.

Maria: Ekuma? Mase ye yitu yame bayangalala vava yawutuka.

João: Mase ye yitu yame mpe bayangalala vava yawutuka. Kansi, ekiaki ke kuma ko kifwete kumfila mu kembelela luwutuku lwame konso mvu. Muna nkinzi miau mia luwutuku, wantu ayingi bekuyibadikilanga vo yau basundidi o mfunu. Kansi, nga ke Nzambi ko osundidi o mfunu? Nga ke tufwete kumvutula matondo ko, wau vo yandi watuvana o moyo?

Maria: Nga diadi disongele vo kifwete kembela lumbu kiame kia luwutuku ko?

João: Maria, ngeye mosi ofwete baka nzengo zazi. Kansi, badika diambu edi. Ekolo wantu ayingi bezolanga tambula tukau muna nkinzi a luwutuku, Nkand’a Nzambi uvovanga vo edi disundidi e kiese i dia vana ke mu tambula ko. Vana fulu kia siang’e sungididi muna yeto kibeni muna lumbu kia luwutuku lweto, nga ke diambote ko mu vutula matondo kwa Nzambi, yo yindula akaka yo kubavanga o wete?

Maria: Kiayindwidi wo ko. Nga mase maku ke bekuvananga lukau ko?

João: Bekumpananga. Kansi, ke bevingilanga lumbu kia luwutuku lwame ko. Bekumpananga lukau konso ntangwa bazolele. Maria, nga ozolele zaya una e nkinzi mia luwutuku miayantikila?

Maria: Nga olenda kunzayisa?

João: Ke diambu ko, o mbazi ikuzayisa lusansu lwa muntu mosi kuna nz’ankulu wavangisa nkinzi a luwutuku.

YIMBILA NKUNGA WA NSI

Makiese: E Nlandu, ekuma olembi yimbidilanga vava wana kalasi beyimbilanga nkunga wa nsi?

Nlandu: Ntondele muna kiuvu kiaku. Kansi nzolele teka kuyuvula, ekuma ongeye oyimbidilanga nkunga wa nsi?

Makiese: Iyimbilanga wo e kuma kadi nsi ame izolanga.

Nlandu: Mono mpe iyangalelanga zingila mu nsi yayi. Kansi, kiyindulanga ko vo vena ye nsi isundidi nsi yakaka.

Makiese: Kuna kwa mono e nsi ame isundidi o wete.

Nlandu: Mono ivavanga badikila e mambu nze una Nzambi kebadikilanga mo. Nkand’a Nzambi uvovanga vo Nzambi ke sianga mpambula ko. Ozolanga wantu awonso, kana nkutu nkia nsi bezingilanga. Ekiaki mpe i kuma kikundilanga sinsu kia nsi ko.

Makiese: Ngeye mambu osakisanga.

Nlandu: Ve, ke mono kaka ko iyindulanga e mpila yayi. Nkand’a Nzambi uyikanga matoko bakala ye ngindu zazi. Bavoveswa vo bakunda e teke kiakala nze sinsu kia nsi, kansi ke bavanga wo ko, kana una vo bavumiswa vo vondwa bevondwa.

Makiese: Dialudi kikilu? Kiawilu diambu diadi ko.

Nlandu: Avo zolele tulenda mokena mu kuma kia diambu diadi muna ntangwa vundu.

MAMBU MA MBUMBA

Pedro: E Miguel, kele vo okala mu ntela ya sola mfidi a nsi eto, nani wadi sola?

Miguel: Kitokanenanga diambu diadi ko.

Pedro: Ekuma? Nga kutokanenanga zingu kiaku kia kusentu ko?

Miguel: Itokanenanga kio. Kansi, yasola kala luyalu lusundidi o wete.

Pedro: Nkia luyalu lwalu?

Miguel: I luyalu lufilwanga kwa Yesu. Kadi yandi kaka ofwene yala o wantu. Nga ozolele zaya ekuma?

Pedro: Kizolele kwame ko.

Miguel: Ke diambu ko, e lumbu ovava zaya ekuma, ikala ye kiese kia kuzayisa.