Kinunu ke Nkaku ko mu Sadila Nzambi

Kuna Málaga, sude ya Espanha, ngudi mosi yo mwan’andi ankento, yau awole bena ye nkumbu Ana, bavubwa kina kia 19 kia ngonde Desemba, 2009. Bakala muna buka kia 2.352 dia wantu ana bavubwa kuna Espanha muna mvu wa 2009. Kansi, e diambu diaswaswanesa ngudi yayi yo mwan’andi, i kimbuta kiau. O ngudi mvu 107, o mwana 83.

Nki kiabafila mu kuyiyekola kwa Yave yo vubwa? Kuna lubantiku lwa mvu 1970, mfinangani mosi wabokela Ana wa mwana mu kwenda kuna lukutakanu lw’Elongi dia Nkanda dia Nkutakani kuna nzo a Mbangi mosi a Yave. Ezak’e ntangwa Ana wayendanga muna tukutakanu. Kansi, mu kuma kia salu kiandi, Ana kanungunuka ko.

Vioka mvu kumi, akaka muna wan’a Ana bayantika longoka Nkand’a Nzambi, kuna kwalanda bakituka se selo ya Yave. Mosi muna yau, Mari Carmen, wasikamesa zola kwa ngudi au muna ludi kia Nkand’a Nzambi yo kunsadisa mu tambulwila elongi dia Nkand’a Nzambi. I bosi, o nkak’andi a Mari Carmen, i sia vo, Ana ona wa ngudi wasonga mpe luzolo lwa longoka Nkand’a Nzambi. Kuna kwalanda, e kumi muna esi nzo au bavubwa.

Muna lumbu kia luvubu lwau, aki Ana, i sia vo, ngudi yo mwana, kiese kiayingi bakala kiau. O Ana ona wakala ye mvu 107 wavova vo: “O Yave wambote kikilu kwa mono, oyambwidi vo yanzaya.” O mwan’andi wakudikila vo: “Ekolo e Paradiso ke yalweke ko, nzolele sadila Yave yo vanga dina ndenda mu lungisa luzolo lwandi yo samun’e nsangu zambote.”

Edi ditoma yangidikanga akento ansona awaya i kalanga muna tukutakanu. Nkuluntu mosi muna nkutakani au wavova vo: “Ke bekondwanga mu tukutakanu ko. Betoma kubamanga mu vana e mvutu mun’Elongi di’Eyingidilu.”

E mbandu au ya kwikizi ikutusungamesanga Ana wa nkento ansona, ona ‘kakatuka muna tempelo ko, wasambang’aka, yo fionkonona, yo dodokela, yo fuku yo mwini.’ Wakala y’elau dia mona Yesu vava kakala nsedia. (Luka 2:36-38) Muna kimbuta kia mvu 84, Ana kayimwena ko vo nunu mu sadila Yave. Diau adimosi mpe divanganga Ana zole bayikilu mun’elongi diadi.

Nga una ye yitu bezolang’o wá e nsangu za Nkand’a Nzambi? Nga wamokena kala yo nunu wasonga luzolo lwa kuwá vava wasila umbangi muna nzo andi? Anunu awaya balenda kituka nze Ana zole tuyikidi, kadi kinunu ke nkaku ko mu sadila Yave wa Nzambi aludi.

[Mvovo mia Sina mina muna lukaya lwa 25]

“O Yave wambote kikilu kwa mono”

[Mvovo mia Sina mina muna lukaya lwa 25]

“Ekolo e Paradiso ke yalweke ko, nzolele sadila Yave”