Nga Osungamenanga?

Nga wayangalela tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:

• Ekuma wantu bevangilanga mambu mambi?

E mpasi za zingu, zola nzimbu, lembi tumba muntu ovangidi mbi ye ngindu zambi i maka mambu mefilanga wantu mu vanga mambu mambi. (Kim. 7:7; 8:11; 1 Tim. 6:10; Yak. 1:14, 15)—Oktoba-Desemba, lukaya lwa 4.

• Ekuma dinina diamfunu mu wunikinanga ye sungididi kiawonso vava nkundi aku oyelanga kevovanga?

O nkundi oyelanga, muntu olenda kunwunikina ye sungididi kiawonso kevavanga, kansi ke ndiona okunyuvulanga mambu mayingi ko. Nanga olenda kuzayisa e mpasi zandi lembi mona wonga wa vezwa. (Kim. 3:1, 7; Yak. 1:19)—Oktoba-Desemba, lukaya lwa 10, 11.

• Nkia mbasi katuma o Nzambi mu fila Isaele, vava kabavaikisa muna Engipito? (Luv. 23:20, 21)

Tuzeye wo vo e mbasi yayi, ona wakala ye ‘nkumbu a Yave muna yandi,’ i Mwan’antete a Nzambi, ona wakituka Yesu.—15/9, lukaya lwa 21.

• Ekuma yakala yo nkento bafwete songaziananga e ngindu?

Kuna kwa Yave wa Nzambi, akazi bena “se nitu mosi.” (Mat. 19:3-6) E mbokena mfunu zina muna simbinina ekangu diadi. —Oktoba-Desemba, lukaya lwa 15.

• Muna diambu dia nsambila aludi, nkia kuma ke yitondakananga ko kwa Nzambi?

‘Salu kiaki kiampasi. Kizolanga salu kiaki ko. Kina ye ntangwa ko. Kiafwana ko. Muntu wankendeleka.’ Eyayi ke kuma yasikila ko muna lembi lungisa e nkanikinu mia Nzambi.—15/10, lukaya lwa 12-15.

• Nkia mpila olenda kuyikasakesa yo kasakesa akaka muna tukutakanu?

Teka kubama. Lungananga ntangwa zawonso. Lwakanga mu ola yambote. Natanga nkanda mivwil’o mfunu. Venga e fu kia vunzanesa e ngindu. Vanang’e mvutu. Vanang’e mvutu zankufi. Toma lungisa kiyekwa oveno. Sanisina ana baven’e mvutu. Mokena y’ampangi kuna lubantiku ye kuna mfoko a lukutakanu.—15/10, lukaya lwa 22.

• Aweyi mase balenda ‘kadila se mbandu ambote’ muna sadisa wan’au bazaya lungisanga mbebe au? (Yoa. 13:15)

Nze Yesu, muna sadisa wana bazaya lungisa e mbebe au, mase bafwete kala se mbandu mu mpila belungisilanga mbebe au. —Oktoba-Desemba, lukaya lwa 19.

• Adieyi tulenda longoka muna nona kia Arone ona wavukumunwa kwa ndonga?

Vava Mose kakala ko, Aneyisaele bavovesa Arone vo kabavangila nzambi a teke. Wavukumunwa yo vanga e teke. Ediadi disonganga vo ke aleke kaka ko bevukumunwanga kw’akundi. E ntonta z’akundi zilenda mpe vukumuna kana nkutu ambuta, ana besianga ngolo za vanga oma mambote. Tufwete sianga e ngolo za zizidila e ntonta z’akundi.—15/11, lukaya lwa 8.

• Nkia mambu malenda kusadisa mu baka nluta mia tanganga Nkand’a Nzambi?

Tanga wo y’ekani diasikila. (Yak. 1:23-25) Sola nsekola yambote. Lomba lusadisu lwa Yave muna sambu. (Nku. 119:18) Tanganga wo lumbu yawonso. (Yos. 1:8) Sadila ndekwa zaswaswana. Badika mana otangidi. (Nku. 119:97) Lomba lusadisu muna bakula mana otangidi. (2 Pet. 3:16)—Oktoba-Desemba, lukaya lwa 21-23.